కేంద్రంలో 2014లో ఎన్డీయే అధికారంలోకి వచ్చిన తర్వాత తొలిసారి అవిశ్వాస తీర్మానాన్ని ఎదుర్కోబోతుండటంతో దేశవ్యాప్తంగా ఆసక్తికర చర్చ సాగుతోంది. సంపూర్ణ బలముందన్న ధీమాలో ఎన్డీయే, ఏమైనా జరగొచ్చంటూ విపక్షాలు చెప్పుకొస్తున్న నేపథ్యంలో ప్రజల్లో కూడా ఏం జరుగుతుందోనన్న ఉత్కంఠ నెలకొంది. ఈ నేపథ్యంలో మోదీ ట్వీట్ చేశారు. ప్రజాస్వామ్యంలో ఇది చాలా ముఖ్యమైన రోజు అని, అంతరాయం లేని.. నిర్మాణాత్మక చర్చకు సహచర ఎంపీలంతా సహకరిస్తారనే ఆశిస్తున్నానని ఆయన ట్వీట్ చేశారు. చర్చను ఎంపీలందరూ సద్వినియోగం చేసుకుంటారని భావిస్తున్నానని.. ప్రజలకు.. రాజ్యాంగ రూపకర్తలకు మనం ఈ ప్రమాణం చేస్తున్నామని, దేశమంతా ఈ చర్చను పరిశీలిస్తోందని మోదీ ట్వీట్ చేశారు.
అయితే ప్రధాని ట్వీట్ పై విమర్శలు వస్తున్నాయి. ఇన్ని కబురులు చెప్పే ప్రధాని గారు, విపక్షాలకు మాట్లాడటానికి ఎంత టైం ఇచ్చారు ? అవిశ్వాసం పెట్టిన తెలుగుదేశం పార్టీకి 13 నిమషాలు ఇచ్చి, దేశంలో ప్రధాన ప్రతిపక్షం కాంగ్రెస్ కు 38 నిమషాలు ఇచ్చి, బీజేపీ మాత్రం 3 గంటలు 33 నిమషాలు తీసుకుని, ప్రతిపక్షాలు గొంతు నొక్కేలా చేసి, ప్రధాని ఇంత అద్భుతంగా ట్వీట్ చెయ్యటం పై విమర్శలు వస్తున్నాయి.
విభజన చట్టపరంగా ఆంధ్రప్రదేశ్‌కు ఇచ్చిన ప్రత్యేక హోదా హామీ అమలులో కేంద్రం విఫలమైనందున ప్రభుత్వ వైఖరిని అందరికీ తెలియజెప్పాలనే ఉద్దేశంతో తెలుగు దేశం పార్టీ ఇచ్చిన అవిశ్వాస తీర్మానంపై సభలో ఉదయం 11 గంటలకు చర్చ ప్రారంభం కానుంది. సాయంత్రం 6 గంటల వరకు చర్చ కొనసాగుతుంది. ఆ తర్వాత ఓటింగ్‌ జరుగుతుంది. మిత్రపక్షాలతో కలిసి కేంద్రానికి 316 మంది మద్దతు ఉంది. ప్రతిపక్ష పార్టీలకు 146కు మంచి బలంలేదు. దీంతో ఓడిపోతామనే భయం ప్రభుత్వానికి లేదు. గెలుస్తామని ప్రతిపక్షాలూ అనుకోవడం లేదు. కానీ ఈ అవకాశాన్ని ఉపయోగించుకుని వీలైంతగా ప్రభుత్వాన్ని ఎండగట్టాలని ప్రతిపక్షాలు భావిస్తున్నాయి. కాగా చర్చలో తమకు లభించిన సమయంలో ప్రతిపక్షాలను ఎండగట్టాలని కేంద్రం అనుకుంటోంది.