తాజా లోక్‌సభ ఎన్నికల్లో ఏ పార్టీకీ, కూటమికీ ప్రభుత్వ ఏర్పాటుకు సరిపడినంత మెజారిటీ రాదని ముంబైకి చెందిన ఓ ప్రముఖ మార్కెట్‌ విశ్లేషణా సంస్థ చెబుతోంది. కేంద్రంలో 2014లో ఏర్పడినట్లుగా సుస్థిర ప్రభుత్వం రావడం కష్టమేనని తేల్చింది. ఆ సంస్థ అంచనా ప్రకారం.. తాజా ఎన్నికల్లో బీజేపీకి 100కు పైగా సీట్లు తగ్గిపోనున్నాయి. 2014 ఎన్నికల్లో 282 సీట్లు గెలిచిన కాషాయ పార్టీ ఈ సారి 171 స్థానాలకు పడిపోనుందని ముంబై సంస్థ అంచనా వేసింది. గతంలో 54స్థానాల్లో గెలిచిన ఎన్డీయే మిత్రపక్షాలు, ఈసారి కేవలం 23 స్థానాల్లోనే గెలుపొందనున్నట్లు తేల్చింది. గత ఎన్నికల్లో లోక్‌సభలో ఎన్డీయే బలం 336కాగా.. ఈసారి అది 194కు పడిపోతుందని పేర్కొంది.
ఆ సంస్థ అంచనా ప్రకారం.. 193స్థానాలున్న దక్షిణ, తూర్పు భారతంలో ఎన్డీయేకు 29, యూపీఏకు 68, తటస్థ పార్టీలకు (గ్రూపు1) 61, గ్రూప్‌2కి 36; మధ్యభారతంలో ఎన్డీయేకు 69, యూపీఏకు 72 స్థానాలు; ఉత్తర భారతంలో ఎన్డీయేకు 64, యూపీఏకు 35, గ్రూపు3 పార్టీలకు 40; 29 స్థానాలున్న అసోం, ఈశాన్య రాష్ట్రాలు, కేంద్ర పాలిత ప్రాంతాల్లో ఎన్డీయేకు 17, యూపీఏకు 12 సీట్లు వస్తాయి. ఇక యూపీలో ఎన్డీయేకు 35, కాంగ్రె్‌సకు 5, ఎస్పీకి 21, బీఎస్పీకి 17, పీఎస్పీకి2 సీట్లు వస్తాయని అంచనా వేసింది. తటస్థ పార్టీలు ఈ ఎన్నికల్లో కీలక పాత్ర పోషించనున్నాయి. వాటిని మూడు విభాగాలుగా చేసి సీట్ల సంఖ్యను అంచనా వేసింది. గ్రూపు-1లో టీడీపీ, టీఎంసీ, వామపక్షాలు, నేషనల్‌ కాన్ఫరెన్స్‌(ఎన్‌సీ), ఆప్‌.. గ్రూపు-2లో టీఆర్‌ఎస్‌, వైసీపీ, బీజేడీ, పీడీపీ, మజ్లిస్‌.. గ్రూపు-3లో ఎస్పీ, బీఎస్పీ, ఆర్‌ఎల్డీలను చేర్చింది.
ఈ పార్టీలన్నీ ఎన్నికల తర్వాతే తమ నిర్ణయం తీసుకునే అవకాశం ఉంటుంది. వీటన్నింటికీ కలిపి 142 సీట్లు వస్తాయని అంచనా. అంటే కేంద్ర ప్రభుత్వ ఏర్పాటులో ఇవే కీలకం కానున్నాయి. టీడీపీ అధినేత, ఏపీ సీఎం చంద్రబాబు ఇప్పటికే ఢిల్లీలో మకాం వేసి వివిధ పార్టీల అధినేతలతో చర్చలు జరుపుతున్న సంగతి తెలిసిందే. గత ఎన్నికల్లో కేవలం 44సీట్లతో ప్రధాన ప్రతిపక్ష హోదా కూడా దక్కించుకోలేని కాంగ్రెస్‌ పార్టీ.. తాజా ఎన్నికల్లో 149 స్థానాల్లో గెలవనున్నట్లు అంచనా వేసింది. కాంగ్రె్‌సతో పాటు మిత్రపక్షాలు కూడా మెరుగుపడనున్నాయి. యూపీఏ భాగస్వామ్యపక్షాలు 56 స్థానాల్లో విజయబావుటా ఎగురవేసే అవకాశం ఉందని, మొత్తంగా యూపీఏ బలం 205కు చేరనుందని పేర్కొంది.