తెలుగుదేశం పార్టీ ప్రధాన కార్యదర్శి, నారా లోకేష్, కార్యకర్తలను ఉద్దేశించి భావోద్వేగ లేఖ రాసారు. రేపు పార్టీ ఆవిర్భావ దినోత్సవం సందర్భంగా కార్యకర్తలను ఉద్దేశించి, బహిరంగ లేఖ రాసారు. తెలుగుదేశం పార్టీ 40 ఏళ్ళుగా తెలుగు ప్రజలకు అండగా వస్తూ వచ్చిందని, మన పార్టీకి బలం, వెన్ను చూపని కార్యకర్తలు, నాయకులు అని, కార్యకర్తల సంక్షేమాన్ని మరువం అని, ప్రతి కార్యకర్త కష్టాన్ని, శ్రమని గౌరవిస్తాం అని అన్నారు. కార్యకర్తల సంక్షేమం కోసం, ఇప్పటికీ పని చేస్తుంది కేవలం టిడిపి పార్టీ మాత్రమే అని అన్నారు. ఆ నాడు అన్న ఎన్టీఆర్, బడుగు, బలహీన వర్గాల కోసం పెట్టిన పార్టీ, వెంటనే అధికారంలోకి వచ్చి, పేదవాడికి కూడు, గూడు, గుడ్డ నినాదంతో పని చేసిందని అన్నారు. అణగారిన వర్గాలకు, యువతకు, రాజకీయంగా ప్లాట్ఫారం ఇచ్చింది టిడిపి అని అన్నారు. అన్న ఎన్టీఆర్, చంద్రబాబు గారి సారధ్యంలో, తెలుగు జాతి కృషి కోసం, అభివృద్ది కోసం, రాష్ట్ర ప్రగతి కోసం కృషి చేస్తూనే ఉన్నారని అన్నారు. అధికారంలో ఉన్నా, లేకపోయినా టిడిపి కార్యకర్తలు కంటికి రెప్పలా పార్టీని కాపాడారని అన్నారు. ప్రతి పేదవాడికి అండగా ఉండటమే టిడిపి లక్ష్యం అని చెప్తూ, ఆవిర్భావ దినోత్స‌వ శుభాకాంక్షలు తెలిపారు.