క-రో-నా పేరుతో ప్రభుత్వాలు దోచుకుతింటున్నాయని, సీపీఐ జాతీయ కార్యదర్శి నారాయణ అన్నారు. ఇక నిన్నటి సినీ ప్రముఖుల అమరావతి పర్యటన పై, నారాయణ సంచలన వ్యాఖ్యలు చేసారు. సినిమా వారు కేవలం స్వార్ధం కోసమే, రెండు రాష్ట్రాల ముఖ్యమంత్రుల్ని కలుస్తున్నారని ఆరోపించారు. కనీసం అమరావతి రైతులకు మద్దతు తెలపలేని వీరి గురించి ఏమి చెప్తాం అని అన్నారు. అమరావతి తరలింపు కోసం సినీనటులను జగన్ అడ్డంపెట్టుకుని, పావుగా వాడుతున్నారని నారాయణ అన్నారు. సినీ ప్రముఖులు ముఖ్యమంత్రులను కలవటం పై, సినీ నటుడు బాలకృష్ణ చెప్పింది నిజమే అని, భూముల కోసమే కలుస్తున్నారని అన్నారు. అక్రమ భూముల క్రమబద్ధీకరణ కోసమే నిన్నటి అమరావతి పర్యటన జరిగింది అని అన్నారు. రానున్న ఎన్నికలు అమరావతి రాజధాని, ప్రత్యేక హోదా పైనే జరుగుతాయని అన్నారు. రాజధాని రైతులు వెళ్తే సంఘీభావం ప్రకటించవచ్చుకదా, తప్పేముంది, అందులో మీకు ఏమి అవుతుంది అని అన్నారు.
వీళ్ళు ఎవరిని కలిసినా, భూములు కావలి, సబ్సిడీలు కావాలి, స్టూడియోలు కావాలి అనే డిమాండ్లతో, వాళ్ళ స్వార్ధం కోసమే కలుస్తున్నారని అన్నారు. నిజంగా ప్రజల పట్ల, సమాజం పట్ల వీళ్ళకు చిత్తశుద్ధి ఉంటె, 200 రోజుల నుంచి ఆందోళన చేస్తున్న వారిని, ఎందుకు కనీసం పరామర్శించలేదు అని నారాయణ అడిగారు. వీళ్ళ వాలకం చూస్తుంటే, బాలకృష్ణ చెప్పింది నిజమే అని అనిపిస్తుందని అన్నారు. జగన్‌ను చూసి భయపడుతున్న సినీనటులు పరిశ్రమకు ఏం చేస్తారు ? అమరాతి వైపు కనీసం కన్నెత్తి కూడా చూడలేదు అని అన్నారు. ప్రజలను మోసం చేయడానికే సినిమా గ్యాంగ్ అమరావతికి వచ్చిందని అన్నారు. రాజధాని వెళ్లకుండానే విశాఖలో అరాచకాలు జరుగుతున్నాయని, విశాఖకు రాజధాని వెళ్తే ఫ్యాక్షన్ సెంటర్ గా మారుతుందని నారాయణ ఆరోపించారు. రాజధానిని తరలిస్తే సహించేది లేదని, ఎవరితో ఎన్ని డ్రామాలు వేయించినా, చూస్తూ కూర్చోమని అన్నారు.