ఆంధ్రప్రదేశ్ ముఖ్యమంత్రి చంద్రబాబునాయుడు, మంత్రి దేవినేని ఉమామహేశ్వరరావుతో పాటు మరో 14 మందికి నాన్‌బెయిలబుల్‌ వారెంట్‌ జారీ అయింది. బాబ్లీ ప్రాజెక్టుకు వ్యతిరేకంగా 2010లో చేసిన పోరాటానికి గాను ఈ వారెంట్‌ను మహారాష్ట్రలోని ధర్మాబాద్‌ మెజిస్ట్రేట్‌ కోర్టు ఇచ్చింది. చంద్రబాబును కోర్టులో హాజరుపరచాలంటూ ఆదేశాలు జారీచేసింది. ఈ నెల 21లోగా చంద్రబాబుతో పాటు మిగతా వారూ హాజరు కావాలని నోటీసుల్లో పేర్కొంది. నిన్నటి నుంచే ఇలాంటి ఊహాగానాలు విన్పిస్తున్నప్పటికీ తాజాగా సీఎం చంద్రబాబుకు నోటీసులు రావడం రాజకీయ వర్గాల్లో తీవ్ర కలకలం రేపుతోంది. అయితే, ఈ రోజు మహారాష్ట్ర పోలీసులు అమరావతి వచ్చి, నోటీసులు ఇస్తారనే సమాచారం ప్రభుత్వానికి అందింది.
అయితే, చంద్రబాబు ప్రస్తుతం తిరపతి పర్యటనలో ఉన్నారు. నిన్న శ్రీవారకి పట్టు వస్త్రాలు ఇవ్వటానికి తిరుమల వెళ్లారు. ఈ రోజు సాయంత్రం 4 గంటలకు తిరిగి అమరావతి వస్తారు. తరువాత నిరుద్యోగ బృతి ప్రారంభ కార్యక్రమం ఉంటుంది. అయితే చంద్రబాబుకి నోటీసులు ఇవాళ అందజేస్తారా, రేపు చేస్తారా అనేది చూడాల్సి ఉంది. ఈ అంశంపై ఇప్పటికే ఆంధ్రప్రదేశ్ ప్రభుత్వానికి మహరాష్ట్ర పోలీసులు సమాచారం అందించారు. అయితే అప్పట్లోనే కేసును ఉపసంహరించుకుంటామని ప్రభుత్వం ప్రకటించినా ఇప్పుడు ఎందుకు తెరమీదకు తెచ్చారనే చర్చ మొదలైంది.
2010లో మహారాష్ట్ర ప్రభుత్వం చేపట్టిన బాబ్లీ ప్రాజెక్టు నిర్మాణాన్ని వ్యతిరేకిస్తూ తెలుగుదేశం పార్టీ పెద్ద ఎత్తున ఆందోళన చేపట్టింది. 40 మంది ఎమ్మెల్యేలతో కలిసి అప్పట్లో ప్రతిపక్షనేతగా ఉన్న చంద్రబాబు నాయుడు తెలంగాణ సరిహద్దుదాటి మహారాష్ట్రలోని బాబ్లీ ప్రాజెక్టు వద్దకు వెళ్లేందుకు ప్రయత్నించారు. దీంతో చంద్రబాబుతో పాటు 40 మంది ఎమ్మెల్యేలను అరెస్టు చేసిన మహారాష్ట్ర పోలీసులు నాన్‌బెయిలబుల్‌ కేసు నమోదుచేశారు. అప్పటి నుంచి ఈ కేసు ధర్మాబాద్‌ కోర్టులో పెండింగ్‌లో ఉంది. ఈ కేసుకు సంబంధించి ఇటీవల మహారాష్ట్ర వాసి ధర్మాబాద్‌కోర్టులో పిటిషన్‌ వేయడంతో బాబ్లీ కేసు మళ్లీ తెరపైకి వచ్చింది. అయితే, దాదాపు ఎనిమిదేళ్ల తర్వాత ఆ కేసును తవ్వితీయడం చర్చనీయాంశంగా మారింది. దీనిపై చంద్రబాబు, తెదేపా ఎలాంటి నిర్ణయం తీసుకుంటుందో చూడాల్సి ఉంది.