news

తొడ‌కొట్టిన స‌వాల్ విస‌ర‌డంలో నంద‌మూరి న‌ట‌సింహం బాల‌య్య‌ని మించిన వారు లేరు. సినిమాల్లో బాల‌య్య తొడ‌కొడితే సినిమా బాక్సాఫీసులు నిండిపోతాయి. ఇప్పుడు బాల‌య్య‌కి పోటీగా స్పీక‌ర్ త‌మ్మినేని సీతారాం వ‌చ్చారు. ఆయ‌న తొడ‌గొట్టి మ‌రీ చాలెంజులు చేస్తున్నారు. ఒక రాష్ట్ర శాస‌న‌స‌భ స్పీక‌ర్. అత్యంత హుందాగా ఉండాల్సిన వ్య‌క్తి. అధికార‌, ప్ర‌తిప‌క్షం ఇష్టం ఉన్నా లేకున్నా గౌర‌వించాల్సిన పెద‌రాయుడు పోస్టు. ప్ర‌తిప‌క్షం ఏమైనా ఆరోప‌ణ‌లు చేస్తే స్పందించేందుకు ప్ర‌భుత్వంలో అధికార ప్ర‌తినిధులు, మంత్రులు, ఎమ్మెల్యేలు, ఎంపీలు, ఎమ్మెల్సీలున్నారు. ప్ర‌తిప‌క్షం ఆరోప‌ణ‌ల‌కు స్పీక‌ర్ స‌మాధానాలు ఇవ్వ‌డం దేశంలోనే మ‌న రాష్ట్రం నుంచే ఆన‌వాయితీని నెల‌కొల్పారు త‌మ్మినేని సీతారాం. రాజ్యాంగ‌బ‌ద్ధ ప‌ద‌విలో ఉంటూ స్పందించ‌కూడ‌ని అంశాల‌లో స్పందిస్తుండ‌డం స్పీక‌ర్ చైర్ కి అగౌర‌వం అయితే, బ‌జారు భాష ఆ కుర్చీకే అవ‌మానం అని రాజ‌కీయ విశ్లేషకుల మాట‌. లంజ‌త్వం అనే ప‌దం వాడ‌టం, ప్ర‌తిప‌క్ష‌నేత‌ని త‌రిమికొట్టాల‌ని పిలుపునివ్వ‌డం, తాజాగా తొడ కొట్ట‌డం చూస్తుంటే..ఆయ‌న స్పీక‌రేనా అన్న అనుమానాలు క‌లుగుతున్నాయి.

అప్పుల ఊబిలో కూరుకుపోయిన రాష్ట్రమైన ఆంధ్ర‌ప్ర‌దేశ్‌కి  దేశంలో అత్యంత సంపన్నుడైన ముఖ్యమంత్రి జగన్మోహన్ రెడ్డి అని టిడిపి అధినేత చంద్ర‌బాబు ఆరోపించారు. నెల్లూరు జిల్లా ప‌ర్య‌ట‌న‌లో మీడియాతో మాట్లాడారు. జగన్ ముఠా అవినీతిలో నెంబర్ 1గా నిలిచిందన్నారు. జె గ్యాంగ్‌ దోపిడీ వ‌ల్ల అప్పుల కుప్ప‌గా ఆంధ్ర‌ప్ర‌దేశ్ ద‌య‌నీయ‌స్థితిలో ఉంటే, దోచుకున్న జ‌గ‌న్ రెడ్డి అప‌ర‌కుబేరుడ‌య్యాడ‌ని ఆరోపించారు. జగన్మోహన్ రెడ్డి, అతని గ్యాంగ్ దగ్గర మాత్రమే డబ్బులుండాలి, ఇంకెవరిదగ్గరా ఉండకూడదన్నట్లు వ్యవహరిస్తున్నాడ‌ని దుయ్య‌బ‌ట్టారు. వైసీపీ అధికారంలోకి రాకముందు వ‌ర‌కూ ఇళ్లు లేని ఎమ్మెల్యేలంతా అవినీతి సొమ్ముతో ప్యాలెస్ లు కట్టుకున్నారని ఆరోపించారు. న్యాయమూర్తుల్ని సైతం బ్లాక్మైల్ చేసిన ప్రభుత్వం దేశంలో ఎక్కడా లేదని మండిప‌డ్డారు.  కోర్టులో కూడా దొంగతనం చేసి దస్త్రాలు మాయం చేయగలమనే ధైర్యంతో ఉన్నారంటే ఈ ప్ర‌భుత్వం బరితెగింపుని ఏమ‌నుకోవాల‌ని ప్ర‌శ్నించారు. బీసీ, ఎస్సీ, ఎస్టీలకు అనేక సంక్షేమాలను రద్దు చేయటంతో పాటు ఉపప్రణాళి నిధులు నిర్వీర్యం చేశారని ఆవేద‌న వ్య‌క్తం చేశారు. వివిధ రకాల పన్నులు, ధరలు, ఛార్జీలతో ప్రజలపై మోయలేని భారం మోపిన వైసీపీ స‌ర్కారుపై ప్ర‌జా తిరుగుబాటు త‌ప్ప‌ద‌ని హెచ్చ‌రించారు.

వైకాపాలో అంతర్యుద్ధం జరుగుతోంద‌ని, ప్రజా తిరుగుబాటుతో ఆ పార్టీకి ఓటమి భయం పట్టుకుంద‌ని తెలుగుదేశం అధినేత చంద్రబాబు పేర్కొన్నారు.  రాష్ట్రంలో 5 కోట్ల మంది ఓవైపు, జగన్మోహన్ రెడ్డి ఒక్కడే ఒక వైపుగా పోరాటం జ‌రుగుతోంద‌న్నారు. ఈ పోరాటం అన్ స్టాపబుల్, తెలుగుదేశం విజయమూ అన్ స్టాపబుల్ అని ధీమా వ్య‌క్తం చేశారు. ప్రజలు, ప్రతిపక్షాలపై ప్రభుత్వ ప్రేరేపిత ఉగ్రవాదం నడుస్తోందని ఆవేద‌న వ్య‌క్తం చేశారు. దోపిడీ,అణ‌చివేత‌, ఫ్యాక్ష‌న్ దుర్గుణాలు అన్నీ క‌ల‌గ‌లిసిన జగన్మోహన్ రెడ్డి మెంటల్ మనస్థత్వం కలిగిన వ్యక్తి అని చంద్ర‌బాబు ఆరోపించారు. ఇటువంటి ఉన్మాద పాల‌కుడి నుంచి రాష్ట్రాన్ని ర‌క్షించేందుకు ప్రజాస్వామ్య పరిరక్షణ వేదిక ఏర్పాటు చేయాల్సి వచ్చిందన్నారు. ప్ర‌జాసమ‌స్య‌ల‌పై స్వేచ్ఛగా పోరాడే వామపక్షాలు సైతం జ‌గ‌న్‌రెడ్డి మూర్ఖ‌పు ధోర‌ణికి భ‌య‌ప‌డి పోరాడటం మానేశాయ‌న్నారు. ఇళ్లలో నుంచి ఇక ఎవ్వరూ బయటకురాకుండా భయపెట్టేశామనే ధోరణిలో ప్రభుత్వం ఉన్నప్పుడు, ఏడాది ఏప్రిల్ లో బాదుడే బాదుడు కార్యక్రమానికి శ్రీకారం చుట్టామ‌న్నారు. ప్రజలు స్వేచ్ఛగా బయటకు వచ్చి ప్ర‌తిప‌క్షాల‌కు మద్దతు తెలపటంతో పాటు వైసీపీ ఎమ్మెల్యేలను నిలదీస్తున్నారని చంద్ర‌బాబు చెప్పారు. మహానాడులో ప్రజాచైతన్యం వెల్లువిరిసింద‌ని, ఇదేం ఖర్మ మన రాష్ట్రానికి కార్యక్రమం చేపట్టామ‌ని తెలిపారు. ప్రజల్లో కదలిక ప్రారంభం మాత్రమే, వైకాపా స‌ర్కారుకు రోజులు ద‌గ్గ‌ర‌ప‌డ్డాయ‌ని, జాగ్రత్తగా ఉండాలని వైకాపా నేతల్ని హెచ్చరించారు.