news

జగన్ నేతృత్వంలోని ఏపీ ప్రభుత్వంపై ప్రధాని నరేంద్ర మోదీ ప్రశంసల జల్లు కురిపించారు. ఏపీలో జగన్ నాయకత్వంలో శక్తివంతమైన ప్రభుత్వం ఏర్పాటైందన్నారు. ఈ సందర్భంగా జగన్‌కు ప్రధాని శుభాకాంక్షలు తెలిపారు. కేంద్ర, రాష్ట్ర ప్రభుత్వాలు కలిసి పనిచేయాలని ఆకాంక్షించారు. ఏపీ ప్రజల సంక్షేమానికి కేంద్రం కట్టుబడి ఉందని ప్రధాని స్పష్టం చేశారు. బీజేపీ ఆధ్వర్యంలో ఇక్కడ ఏర్పాటు చేసిన ప్రజా ధన్యవాద సభలో ప్రధాని మోదీ ప్రసంగించారు. అభివృద్ధిలో దూసుకుపోవడానికి అన్ని అవకాశాలు ఉన్న రాష్ట్రం ఆంధ్రప్రదేశ్ అని పేర్కొన్నారు. కొత్తదనం సృష్టించడంలో నవ్యాంధ్ర దిశగా అడుగులు వేయాలన్నారు. అన్ని రాష్ట్రాలు కలిస్తేనే నవభారత నిర్మాణం సాధ్యం అవుతుందని అన్నారు. రాష్ట్రాల అభివృద్ధి, ప్రజల అభివృద్ధిపైనే తమ ప్రభుత్వం దృష్టి కేంద్రీకరిస్తుందన్నారు.

ఎన్డీయే ప్రభుత్వాన్ని మరోసారి గెలిపించినందుకు ప్రజలకు ప్రధాని నరేంద్ర మోదీ కృతజ్ఞతలు తెలిపారు. తినమో వెంకటేశాయ అంటూ తెలుగులో ప్రసంగాన్ని ప్రారంభించారు. ప్రజలకు కృతజ్ఞతలు తెలుపుతూ.. శ్రీవారికి ప్రణామాలు చేశారు. మోదీ ప్రసంగం ఆయన మాటల్లోనే.. ‘‘నాకు అనేకసార్లు తిరుపతి వచ్చే అదృష్టం దక్కింది. రెండోసారి గెలిచిన తర్వాత శ్రీవారి దర్శనానికి వచ్చాను. శిరస్సు వంచి నమస్కరించి వెంకన్న ఆశీస్సులతో పాటు.. ప్రజల దనర్శనం కూడా చేసుకోగలుగుతున్నాను. శ్రీవారు 130 కోట్ల మంది భారతీయుల ఆశయాలను నెరవేర్చాలని కోరుతున్నాను’’ అని అన్నారు. కాగా, దీనికంటే ముందు.. సభకు వచ్చిన ప్రజలకు ప్రధాని మోదీ క్షమాపణలు చెప్పారు. సభకు ఆలస్యంగా వచ్చినందుకు తనను క్షమించాలని కోరారు. శ్రీలంక నుంచి రావడంలో ఆలస్యమైందని వివరణ ఇచ్చారు.

ప్రజాస్వామ్య పరిరక్షణలో ప్రధాన భూమిక పోషించిన ఆంధ్రప్రదేశ్, తమిళనాడు ప్రజలను అభినందిస్తున్నానని ప్రధాని మోదీ అన్నారు. తాము ఇక్కడ గెలవకపోయినా ఇక్కడి ప్రజల సంక్షేమం కోసం పనిచేస్తాం అని అన్నారు. ప్రతి బీజేపీ కార్యకర్త కార్యదక్షతతో పనిచేస్తారని చెప్పారు. మున్సిపాలిటీల్లో గెలవని రోజుల్లోనూ అదే ఉత్సాహంతో పనిచేశామని గతాన్ని గుర్తుచేస్తూ బీజేపీ శ్రేణుల్లో ఉత్సాహాన్ని నింపే ప్రయత్నం చేశారు. బీజేపీ నేడు ఈ స్థాయికి రావడంలో కార్యకర్తల భాగస్వామ్యం అమోఘం అని పేర్కొన్నారు. ప్రజల కష్టసుఖాలు పంచుకోవడం బీజేపీ కర్తవ్యం అన్నారు. ఎన్నికల తర్వాత కూడా ప్రజల్లోనే ఉంటామని, ప్రజల సంక్షేమంపై దృష్టి పెడతామని కార్యకర్తలనుద్దేశించి మోదీ వ్యాఖ్యానించారు. ఆంధ్రప్రదేశ్, తమిళనాడుపై ప్రత్యేక దృష్టి పెట్టి అభివృద్ధికి కృషి చేస్తామన్నారు. ఎన్నికల్లో గెలవడం ఒకరోజే జరుగుతుందని, కానీ ప్రజల హృదయాలు గెలుచుకునేందుకు 365 రోజులు పనిచేయాల్సి ఉంటుందని పేర్కొన్నారు. ప్రభుత్వాలు ఏర్పాటు చేయాలి, దేశ నిర్మాణానికి కృషి చేయాలని బీజేపీ శ్రేణులకు ప్రధాని మోదీ పిలుపునిచ్చారు.

ప్రధాని నరేంద్ర మోదీ రేణిగుంట విమానాశ్రయానికి చేరుకున్నారు. ఈ సందర్భంగా ప్రధాని మోదీకి గవర్నర్ నరసింహన్, రాష్ట్ర ముఖ్యమంత్రి వైఎస్ జగన్, కేంద్ర మంత్రి కిషన్ రెడ్డి స్వాగతం పలికారు. అనంతరం ఎయిర్‌పోర్టులోని వీఐపీ లాంజ్‌లో మోదీతో సీఎం జగన్ సమావేశమయ్యారు. భేటీ అనంతరం మోదీ నేరుగా తిరుపతిలో ఏర్పాటు చేసిన ప్రజాధన్యవాద సభలో పాల్గొంటారు. సభ తర్వాత ప్రధాని మోదీ తిరుమలకు వెళ్లనున్నారు. ప్రధాని మోదీతో పాటు జగన్, నరసింహన్ శ్రీవారిని దర్శించుకోనున్నారు. ఇది ఇలా ఉంటె, ప్రధాని నరేంద్ర మోదీ తిరుమల పర్యటన సందర్భంగా ఓ ఆసక్తికర సంఘటన చోటు చేసుకుంది. విమానంలో నుంచి మోడీ దిగిన తర్వాత ముందుగా గవర్నర్ నరసింహన్ ఓ పువ్వు ఉన్న బోకే ఇచ్చి మోదీకి స్వాగతం చెప్పారు. గవర్నర్ తర్వాత వైఎస్ జగన్ మోహన్ రెడ్డి కూడా ఓ చిన్న పువ్వు ఉన్న బోకే ఇచ్చి వెల్కం చెప్పారు.

ఈ సందర్భంగా ప్రధాని కాళ్లకు నమస్కారం పెట్టడానికి జగన్ ప్రయత్నించారు. అయితే, జగన్ చేతులు పట్టుకుని ఉన్న మోదీ వద్దని వారించారు. వారిద్దరూ నవ్వుతూ మాట్లాడుకుంటూ ఉండగానే జగన్ మరోసారి మోదీ కాళ్లకు నమస్కారం చేయడానికి ప్రయత్నించారు. అప్పుడు కూడా మోదీ.. జగన్‌ను వారించారు. ఆ తర్వాత జగన్ మోహన్ రెడ్డి .. మోదీకి స్వాగతం పలికేందుకు వచ్చిన వైసీపీ నాయకులను ప్రధానికి పరిచయం చేశారు. అయితే గతంలో చంద్రబాబు గౌరవంగా కొంచెం వంగితేనే గోల గోల చేసిన వైసిపీ, ఇప్పుడు ఏకంగా జగన్ మోడీ కాళ్ళ మొక్కుతుంటే, ఏమంటారో మరి. ఇది ఇలా ఉంటే, తిరుపతిలో బీజేపీ నిర్వహించిన ప్రజాధన్యవాద సభలో ప్రధాని మోదీ పాల్గొన్నారు. ఓట్లు వేసినా, వేయకపోయినా ప్రజలకు సేవ చేయడమే తమ లక్ష్యమని ప్రధాని నరేంద్ర మోదీ అన్నారు. రెండోసారి ప్రధాని అయ్యాక తిరుమల శ్రీవారి దర్శనానికి రావడం ఆనందంగా ఉందన్నారు. ‘మా వరకు ఎన్నికల అధ్యాయం ముగిసిపోయింది.

130 కోట్ల మందికి సేవ చేసే అధ్యాయం ప్రారంభమైంది. కేంద్రంలో బీజేపీ ప్రభుత్వం ఏర్పడింది. ఏపీలో ప్రభుత్వం ఏర్పాటు చేసిన జగన్ రెడ్డికి శుభాకాంక్షలు. జగన్ కూడా రాష్ట్రాన్ని ముందుకు తీసుకెళ్తారని భావిస్తున్నా. ఏపీ అభివృద్ధికి, ప్రజలకు పూర్తి సహకారం అందిస్తానని భరోసా ఇస్తున్నా.’ అని ప్రధాని మోదీ ప్రకటించారు. ఆంధ్రప్రదేశ్ ఎన్నో అంశాల్లో ముందుంటుందని ప్రధాని మోదీ చెప్పారు. వ్యవసాయం నుంచి విజ్ఞానం వరకు, ఇన్నొవేషన్ నుంచి స్టార్టప్స్ వరకు ఏపీ.. కొత్త మార్గంలో పయనిస్తుందని మోదీ అన్నారు. ప్రతి రాష్ట్రం అభివృద్ధి చెందితేనే నవభారతం నిర్మాణం అవుతుందని ప్రధాని మోదీ అన్నారు.

లోక్‌సభ డిప్యూటీ స్పీకర్‌గా తూత్తుకుడి ఎంపీ కనిమొళి ఎంపికయ్యే అవకాశాలు కన్పిస్తున్నాయి. ముగిసిన 17వ సార్వత్రిక ఎన్నికల్లో 352 స్థానాల్లో ఘనవిజయం సాధించి ప్రధాని నరేంద్ర మోదీ నేతృత్వంలోని ఎన్డీఏ కూటమి వరుసగా రెండోసారి అధికారం చేపట్టిన విషయం తెలిసిందే. ఎన్డీఏ కూటమిలో బీజేపీ 303 స్థానాలను దక్కించుకొని చరిత్ర సృష్టించింది. ఈ నేపథ్యంలో, ఆ పార్టీకి చెందిన మాజీ కేంద్రమంత్రి మేనకాగాంధీ లోక్‌సభ స్పీకర్‌గా ఎంపికకావొచ్చని ప్రచారం జరుగుతోంది. అదే సమయంలో లోక్‌సభ డిప్యూటీ స్పీకర్‌ పదవిని ప్రతిపక్షాలకు కేటాయించాలని ప్రధాని నరేంద్ర మోదీ, కేంద్ర హోంశాఖ మంత్రి అమిత్‌షాలు భావిస్తున్నారు. ప్రస్తుత లోక్‌సభలో యూపీఏ కూటమికి 87 మంది ఎంపీలుండగా, వారిలో కాంగ్రెస్‌ సభ్యులు 52 మంది వున్నారు. డిప్యూటీ స్పీకర్‌ పదవిని కాంగ్రెస్‌కు కేటాయించాలని భావించగా, అందుకు నిరాకరించిన ఆ పార్టీ మిత్రపక్షాలకు ఇవ్వాలని కోరినట్టు సమాచారం.

ఈ క్రమంలో, 22 మంది ఎంపీలతో లోక్‌సభలో మూడవ పెద్ద పార్టీగా ఉన్న డీఎంకేకు ఆ పదవి దక్కే అవకాశం వుందని తెలుస్తోంది. కాంగ్రెస్‌తో చెలిమి చేస్తున్న డీఎంకే పార్టీకే డిప్యూటీ స్పీకర్‌ పదవి ఇస్తే బావుంటుందని ప్రతిపాదించిన కాంగ్రెస్‌, అందుకు కనిమొళి పేరును సిఫారసు చేసినట్టు విశ్వసనీయ సమాచారం. ప్రస్తుతం లోక్‌సభలో డీఎంకే సభాపక్ష ఉపనేతగా ఉన్న కనిమొళికి గతంలో రాజ్యసభ సభ్యురాలిగా ఉన్న సమయంలో అన్ని పార్టీల ఎంపీలతో సత్సంబంధాలుండగా, బీజేపీకి చెందిన ఎంపీలతో కూడా సఖ్యతగా వుండేవారు. దీంతో, లోక్‌సభ డిప్యూటీ స్పీకర్‌గా కనిమొళి ఎన్నికవ్వడం ఖాయమేనని డీఎంకే వర్గాలు భావిస్తున్నాయి.