news

వైసీపీకి లోక్‌సభ డిప్యూటీ స్పీకర్ పదవి దక్కనుందా? ఈ ప్రశ్నకు అవుననే అంటోంది జాతీయ మీడియా. వైసీపీకి లోక్‌సభ డిప్యూటీ స్పీకర్ పదవి ఇస్తామంటూ బీజేపీ ఆఫర్ చేసినట్లు జాతీయ మీడియాలో విస్తృత ప్రచారం జరుగుతోంది. కేంద్ర మంత్రివర్గ కూర్పు తర్వాత ఎన్డీయేలో భాగస్వామ్య పక్షమైన జేడీయూ.. బీజేపీకి దూరంగా ఉంటూ వస్తోంది. దీంతో జేడీయూ స్థానాన్ని భర్తీ చేసేందుకు బీజేపీ పెద్దలు వైసీపీపై దృష్టిసారించినట్లు తెలుస్తోంది. ఈ నేపథ్యంలోనే ఆ పార్టీకి లోక్‌సభ డిప్యూటీ స్పీకర్ పదవిని ఆఫర్ చేసినట్లు జాతీయ మీడియా కథనాలు ప్రసారం చేస్తోంది. అయితే డిప్యూటీ స్పీకర్ పదవి ఆఫర్‌పై వైసీపీ ఇంకా అధికారికంగా స్పందించలేదు. ఎన్డీయే నుంచి టీడీపీ బయటికొచ్చినప్పటి నుంచి బీజేపీతో వైసీపీ సన్నిహితంగా మెలుగుతూ వస్తోంది. ఈ నేపథ్యంలోనే వైసీపీకి ఈ ఆఫర్ ఇచ్చినట్లు తెలుస్తోంది. ముగిసిన 17వ సార్వత్రిక ఎన్నికల్లో 352 స్థానాల్లో ఘనవిజయం సాధించి ప్రధాని నరేంద్ర మోదీ నేతృత్వంలోని ఎన్డీఏ కూటమి వరుసగా రెండోసారి అధికారం చేపట్టిన విషయం తెలిసిందే. 

ఎన్డీఏ కూటమిలో బీజేపీ 303 స్థానాలను దక్కించుకొని చరిత్ర సృష్టించింది. ఈ నేపథ్యంలో, ఆ పార్టీకి చెందిన మాజీ కేంద్రమంత్రి మేనకాగాంధీ లోక్‌సభ స్పీకర్‌గా ఎంపికకావొచ్చని ప్రచారం జరుగుతోంది. అదే సమయంలో లోక్‌సభ డిప్యూటీ స్పీకర్‌ పదవిని ప్రతిపక్షాలకు కేటాయించాలని ప్రధాని నరేంద్ర మోదీ, కేంద్ర హోంశాఖ మంత్రి అమిత్‌షాలు భావిస్తున్నారు. ప్రస్తుత లోక్‌సభలో యూపీఏ కూటమికి 87 మంది ఎంపీలుండగా, వారిలో కాంగ్రెస్‌ సభ్యులు 52 మంది వున్నారు. డిప్యూటీ స్పీకర్‌ పదవిని కాంగ్రెస్‌కు కేటాయించాలని భావించగా, అందుకు ఆ పార్టీ నిరాకరించినట్టు సమాచారం. ఈ క్రమంలో, 22 మంది ఎంపీలతో లోక్‌సభలో మూడవ పెద్ద పార్టీగా ఉన్న డీఎంకేకు ఆ పదవి దక్కే అవకాశం వుందని ముందు ప్రచారం జరిగింది. అయితే మనసు మార్చుకున్న మోడీ, షా, ఈ పదవి తమకు అప్రకటిత మిత్రపక్షంగా ఉన్న వైసిపీకి ఇస్తే బాగుటుంది అనే ఆలోచనలో ఉన్నట్టు సమాచారం.

రాష్ట్రాభివృద్ధి, పేదల సంక్షేమమే లక్ష్యంగా ముందుకెళ్లాలని కొత్త ప్రభుత్వానికి టీడీపీ అధినేత, ప్రతిపక్ష నాయకుడు చంద్రబాబు నాయుడు సూచించారు. మంగళవారం చంద్రబాబు అధ్యక్షతన టీడీఎల్పీ సమావేశం జరిగింది. ఈ సందర్భంగా మాట్లాడిన చంద్రబాబు.. రైతు రుణమాఫీ 4, 5వ విడతలు చెల్లించడం ప్రభుత్వానిదే బాధ్యత అని పేర్కొన్నారు. 10శాతం వడ్డీతో సహా రైతులకు ఇచ్చిన బాండ్లను గౌరవించాలన్నారు. భవిష్యత్తు ఉందంటేనే ఎవరైనా రాష్ట్రానికి వస్తారని, పెట్టుబడులు పెడతారని చంద్రబాబు చెప్పారు. అవగాహన లేకుండా పోవడం, చెప్పుడు మాటలు వినడం, టీడీపీపై బురదజల్లడమే వైసీపీ త్రిసూత్రంగా పెట్టుకుందని చంద్రబాబు విమర్శించారు. ఇదే సమయంలో ఎమ్మెల్యేలనుద్దేశించిమాట్లాడిన చంద్రబాబు, ప్రతిపక్షంలో ఉన్నప్పుడే నేతల నాయకత్వ సామర్థ్యం బయటపడుతుందన్నారు.

అసెంబ్లీలో తన కంటే మిగతావారి వాయిస్ ఎక్కువగా వినబడాలని దిశానిర్దేశం చేశారు. పార్టీ, ప్రజల పట్ల బాధ్యత తూచా తప్పకుండా నిర్వర్తించాలన్నారు. సమస్యల పరిష్కారంపై టీడీపీ పోరాట పటిమ ప్రజల్లోకి వెళ్లాలని దిశానిర్దేశం చేశారు. ఇదిలాఉండగా.. టీడీపీ కార్యకర్తలు, నేతలపై దాడులను, దౌర్జన్యాలను ఖండిస్తూ టీడీఎల్పీ తీర్మానం చేసింది. కార్యకర్తల రక్షణ కోసం టోల్ ఫ్రీ నెంబర్ ఏర్పాటు చేయాలని ఈ సమావేశంలో నిర్ణయించారు. కార్యకర్తల రక్షణ కోసం ప్రభుత్వంపై ఒత్తిడి తీసుకురావాలని నిర్ణయించారు. ఈనెల 15న జరిగే పార్టీ విస్తృతస్థాయి సమావేశంలో దీనిపై కార్యాచరణ సిద్ధం చేయాలని తీర్మానించారు.

కార్యకర్తల్లో, నాయకుల్లో ఆత్మవిశ్వాసం పెంచాల్సిన అవసరం ఉందని చంద్రబాబు పేర్కొన్నారు. టీడీపీ కార్యకర్తలు, నేతలపై దాడులు, దౌర్జన్యాలు గర్హనీయం అన్నారు. ప్రతీ కార్యకర్తకు పార్టీ అండగా ఉంటుందన్నారు. నియోజకవర్గంలో ఎప్పుడేం జరుగుతుందో సమాచారం నేరుగా చెప్పాలని నేతలకు సూచించారు. రాష్ట్రం కోసం, ప్రజల కోసం పట్టుదలతో పోరాడుదామని పిలుపునిచ్చారు. హక్కుల సాధనే టీడీపీ లక్ష్యం అని, పేదల సంక్షేమమే మనందరి ధ్యేయం అని పేర్కొన్నారు. గత 37 ఏళ్లలో ఎన్నో ఆటుపోట్లను ఎదుర్కొన్నామని గుర్తుచేశారు. ఎన్టీఆర్ హయాంలో, ఆ తర్వాత అనేక అవమానాలు భరించామని, ప్రజల అండదండలతోనే అన్నింటిని తట్టుకుని నిలబడ్డామని చెప్పుకొచ్చారు.

మొన్నటి దాక చంద్రబాబుని దించాలని, అహర్నిశలు శ్రమించిన బీజేపీ రాజ్యసభ సభ్యులు జీవీఎల్, అదే ఆశయం కోసం పని చేసి గెలిచిన జగన్ ను ఈ రోజు కలిసారు. జగన్‌ తో జీవీఎల్ సమావేశమయ్యారు. తాడేపల్లిలోని జగన్ నివాసానికి వచ్చిన జీవీఎల్‌ జగన్ తో పలు అంశాలపై చర్చించినట్టు తెలుస్తోంది. ఈ నేపధ్యంలో, జగన్ మోహన్ రెడ్డిని శాలువా కప్పి, జీవీఎల్ సన్మానించారు. ఎన్నికల ముందు వరకు, చంద్రబాబు ప్రభుత్వం పై రోజుకి ఒక కొత్త ఆరోపణతో మీడియా ముందుకు వచ్చి, ఏవేవో ఆరోపణలు చేసి, ప్రజలను కన్ఫ్యూజ్ చెయ్యటంలో జీవీఎల్ సక్సస్ అయ్యారు. ప్రతి రోజు, ఎదో ఒక అవినీతి ఆరోపణ చేస్తూ, చంద్రబాబు అవినీతి మాత్రమే చేస్తున్నారు అనే భ్రమ కల్పించటంలో సక్సస్ అయ్యి, జగన్ విజయానికి ఆయన తోడ్పాటు కూడా అందించారు. ఈ నేపధ్యంలో, జగన్ ని కలిసి, ఉమ్మడి శత్రువు చంద్రబాబుని ఓడించినందుకు, ఒకరినొకరు అభినందించుకున్నారు.

ఇది ఇలా ఉంటె, ఏపీ, తెలంగాణ రాష్ట్రాల ఉమ్మడి గవర్నర్ నరసింహన్ ను మారుస్తున్నారని, ఆ స్థానంలో సుష్మా స్వరాజ్ ను నియమిస్తారంటూ వస్తున్న వదంతులపై ఈ రోజు ఉదయం జీవీఎల్ నరసింహారావు స్పందించారు. సామాజిక మాధ్యమాల వేదికగా వస్తున్న ఈ వదంతులను నమ్మొద్దని, ఇప్పట్లో నరసింహన్ ను మార్చే యోచన కేంద్రానికి లేదని స్పష్టం చేశారు. ఈ సందర్భంగా గుంటూరు జిల్లా మంగళగిరిలో ఎయిమ్స్ ఏర్పాటు గురించి ప్రస్తావిస్తూ, 2020 నాటికి వైద్య సేవలు అందుబాటులోకి తీసుకొస్తామని హామీ ఇచ్చారు. తమ పార్టీలో చేరే వారిపై ఇప్పుడే ఎలాంటి నిర్ణయం తీసుకోలేదని, సేవా భావంతో పార్టీలోకి వస్తానంటే వారిని తప్పకుండా ఆహ్వానిస్తామని చెప్పారు. పార్టీలో అంతర్గత చర్చ జరిగిన తర్వాతే ఆయా పార్టీల నేతలను బీజేపీలో చేర్చుకుంటామని వివరించారు.