news

రీవెరిఫికేషన్ ఫలితాల్లోనూ తెలంగాణ ఇంటర్మీడియట్ బోర్డు తనదైన శైలిలో అయోమయం సృష్టిస్తోంది. ఇంటర్‌లో ఫెయిలై ఆత్మహత్య చేసుకున్న అనామిక అనే విద్యార్థిని మార్కుల విషయంలో గందరగోళానికి తెరలేపింది. తెలుగులో ఫెయిలైనందుకు బాధతో ఆత్మహత్యకు పాల్పడిన అనామిక.. రీవెరిఫికేషన్‌లో ఉత్తీర్ణురాలైందని వెబ్సైట్‌లో వెల్లడించిన ఇంటర్ బోర్డు.. కొద్దిసేపటికే మాటమార్చి ఆమె ఫెయిలైందని పేర్కొంది. అనామికకు రీవెరిఫికేషన్‌లో 48 మార్కులు వచ్చినట్లు తప్పుగా పేర్కొన్నామని వివరణ ఇచ్చింది. వాస్తవానికి ఆమెకు తెలుగులో గతంలో 20 మార్కులు రాగా.. రీవెరిఫికేషన్‌లో ఒక్క మార్కు పెరిగి మొత్తం 21 మాత్రమే వచ్చాయని వెల్లడించింది. మూల్యాంకన కేంద్రంలో క్లరికల్ సిబ్బంది పొరపాటు వల్ల ఈ గందరగోళం తలెత్తిందని స్పష్టంచేసింది.

అనామిక మార్కుల వ్యవహారంలో తప్పు ఎలా జరిగిందో తెలుసుకునేందుకు కమిటీ నియమించినట్టు ఇంటర్ బోర్డు కార్యదర్శి అశోక్ తెలిపారు. అనామిక జవాబు పత్రాన్ని ఆయన మీడియాకు విడుదల చేశారు. ఫెయిలైన విద్యార్థులందరివీ సమాధాన పత్రాలనూ రీవెరిఫికేషన్‌ చేశామని.. వారెవరూ ఉత్తీర్ణులు కాలేదని గతంలో బోర్డు స్పష్టంచేసిన విషయం తెలిసిందే. అయితే, ఈరోజు అనామిక కుటుంబ సభ్యులు తాజాగా ఇంటర్‌బోర్డు అధికారిక వెబ్‌సైట్‌లో పరిశీలించగా.. ఆమెకు 28 మార్కులు పెరిగి మొత్తం 48 మార్కులతో పాసైనట్టుగా వెబ్‌సైట్‌లో కన్పించడంతో వారు దిగ్భ్రాంతికి గురయ్యారు. సీపీఐ నేతలతో కలిసి మీడియాకు వివరాలను వెల్లడించారు. ఈ విషయం మీడియాలో ప్రముఖంగా ప్రసారం కావడంతో ఇంటర్‌ బోర్డు మరోసారి వివరణ ఇచ్చింది.

బెజవాడ శివార్లలోనే గొల్లపుడిలో నిన్న (శనివారం) అర్ధరాత్రి అల్లరి మూకలు బీభత్సం సృష్టించారు. తాము వెళ్తున్న బైక్‌కు సైడ్ ఇవ్వలేదని తెలంగాణాకు చెందినా ఆర్టీసీ బస్సును యువకులు ఆపి మరీ, బస్సు డ్రైవర్‌‌ను చితకబాదారు. అక్కడితో వారి ఆగడాలు ఆగలేదు. బస్సు లోపాలకి చొరబడి డ్రైవర్ పై డాడి చేసి, 25 వేలు ఎత్తుకెళ్ళారు. ఆ అల్లరి మూకల బీభత్సంతో భయబ్రాంతులకు గురైన బస్సు ప్రయాణికులు, అడ్డగించేందుకు కూడా భయపడి ఏమి చెయ్యలేకపోయారు. మొత్తంగా 50 మంది యువకులు ఈ ఘటనలో పాల్గొన్నట్లు తెలుస్తోంది. బస్సులోని ప్రయాణికులపై కూడా దాడి చేసినట్లు తెలుస్తోంది. మరోవైపు బస్సు ముందుభాగంలోని అద్దాలను సైతం ధ్వంసం చేశారు.

డ్రైవర్‌పై తీవ్రంగా దాడి చేసి టిమ్‌ మిషన్‌, రూ.25వేల నగదు ఎత్తుకెళ్లారు. ఘటనపై దర్యాప్తు చేపట్టిన పోలీసులు కొందరు యువకులను అదుపులోకి తీసుకున్నారు. కాగా.. ఈ బస్సు నార్కట్‌పల్లి డిపోకి చెందినదిగా గుర్తించారు. ఈ ఘటన హైదరాబాద్ హైవేపై భవానిపురం వద్ద చోటుచేసుకుంది. స్థానిక సమాచారం మేరకు ఘటనాస్థలికి చేరుకున్న పోలీసులు కేసు నమోదు చేసుకుని దర్యాప్తు చేస్తున్నారు. ప్రస్తుతం పోలీసుల అదుపులో పలువురు యువకులు ఉన్నారని.. మరికొందరి కోసం గాలిస్తున్నట్లు మీడియాకు తెలిపారు. కాగా ఈ ఘటనకు సంబంధించి మరింత సమాచారం తెలియాల్సి ఉంది.

నటుడు, దర్శకుడు పోసాని కృష్ణమురళి ఆసుపత్రి పాలయ్యారు. కొంతకాలం నుంచి అనారోగ్యంతో బాధపడుతున్న ఆయన.. ప్రస్తుతం యశోదా ఆసుపత్రిలో చికిత్స పొందుతున్నారు. పోసాని ఆరోగ్యం గురించి తెలుసుకున్న వైసీపీ ప్రధాన కార్యదర్శి సజ్జల రామకృష్ణారెడ్డి ఆదివారం ఆసుపత్రికి వెళ్లి పరామర్శించారు. పోసాని ఆరోగ్య పరిస్థితి గురించి వైద్యులను అడిగి తెలుసుకున్నారు. పోసాని త్వరగా కోలుకోవాలని సజ్జల ఆకాంక్షించారు. పోసాని కృష్ణమురళి వైసీపీకి అనుకూలంగా మాట్లాడుతూ పలు సంధర్భాల్లో మీడియా సమావేశాలు నిర్వహించిన సంగతి తెలిసిందే. పోసాని టిడిపి నేతలపై ఎన్నికల సంధర్భంగా తీవ్రమైన వ్యాఖ్యలు చేశారు. జగన్ పై ప్రశంసలు కురిపించారు. అలా పోసాని వైసిపి నేతలకు చేరువయ్యారు.