news

వైఎస్సార్ కాంగ్రెస్ పార్టీ-బీజేపీ మధ్య రహస్య ఒప్పందం ఉందన్న సంగతి తాజాగా బయటపడింది. జాతీయ న్యూస్ చానల్ ‘టైమ్స్ నౌ’ నిర్వహించిన స్టింగ్ ఆపరేషన్‌లో ఈ విషయం వెల్లడైంది. స్వయంగా వైసీపీ ప్రతినిధే ఈ విషయాన్ని వెల్లడించడం గమనార్హం. ఏపీలో బీజేపీకి వైసీపీ బి టీం అనడంలో సందేహం లేదని ఆయన చెప్పుకొచ్చారు. రాష్ట్రంలో బీజేపీని బలోపేతం చేయడానికి కొన్ని స్థానాల్లో బీజేపీపై బలహీనమైన అభ్యర్థులను నిలబెట్టాలని ఆ పార్టీతో ఓ అవగాహనకు వచ్చినట్టు విజయవాడకు చెందిన వైసీపీ అధికార ప్రతినిధి మనోజ్ కొఠారి న్యూస్ చానల్ ప్రతినిధికి చెప్పుకొచ్చారు. రాష్ట్రపతి, ఉపరాష్ట్రపతి విషయంలో తాము ఇంతకుముందు వారి అభ్యర్థులకు మద్దతు తెలిపినట్టు ఆయన వివరించారు. బీజేపీతో వైసీపీకి రహస్య ఒప్పందం ఉందని, ఇది వందశాతం నిజమని మనోజ్ చెప్పుకొచ్చారు. బీజేపీ కోసం వైసీపీ పనిచేస్తోందన్నారు. ఢిల్లీలో బుగ్గన బీజేపీ నేత రాంమాధవ్‌ను కలిశారు కదా? అన్న టైమ్స్ నౌ ప్రతినిధికి మనోజ్ బదులిస్తూ.. బుగ్గన విద్యావంతుడని, ఆయనెప్పుడూ ఇష్టం వచ్చినట్టు మాట్లాడరన్నారు. బుగ్గన కలిశాకే రెండు పార్టీల మధ్య ఓ అవగాహన ఏర్పడిందా? అన్న ప్రశ్నకు ఆయన అవునని సమాధానమిచ్చారు.

రాష్ట్రంలో బీజేపీకి అభ్యర్థులే లేరు కదా? మరి, వైసీపీ అభ్యర్థులు ఎవరైనా బీజేపీ తరపున పోటీ చేస్తారా? అన్న మీడియా ప్రతినిధి ప్రశ్నకు మనోజ్ మాట్లాడుతూ.. అలా జరగదన్నారు. ఇది తన అభిప్రాయం మాత్రమేనన్న ఆయన.. కన్నా లక్ష్మీనారాయణ వంటి వారిపై చాలా బలహీనమైన వ్యక్తులను నిల్చోబెడతామన్నారు. ఇదే పార్టీ నిర్ణయమని తేల్చి చెప్పారు. అయితే, ఈ విషయంలో అధ్యక్షుడు జగన్ నుంచి డైరెక్టుగా ఇప్పటి వరకు ఎటువంటి ఆదేశాలు రాలేదని వివరించారు. జగన్‌తో ఎవరైతే నిత్యం టచ్‌లో ఉంటారో వారి నుంచే ఇటువంటి ఆదేశాలు వస్తుంటాయన్నారు. పెద్దిరెడ్డి వంటి వారు చెబుతుంటారని పేర్కొన్నారు. గత ఐదేళ్లలో రాజకీయాల్లో చాలా మార్పులు వచ్చాయని మనోజ్ పేర్కొన్నారు. జగన్‌కు రాజకీయం అంటే ఏంటో నేర్పింది విజయసాయిరెడ్డేనని పేర్కొన్నారు. ఒకసారి జగన్ ముఖ్యమంత్రి అయితే చంద్రబాబు ఏమవుతారో అంటూ ఆయన సంచలన వ్యాఖ్యలు చేశారు.

‘టైమ్స్‌ నౌ’ చానల్‌ స్టింగ్‌ ఆపరేషన్‌తో జాతీయ స్థాయిలో వార్తల్లోకి వచ్చిన మనోజ్‌ కొఠారీ విజయవాడ నగర వైసీపీ అధికార ప్రతినిధి. వన్‌టౌన్‌లో హోల్‌సేల్‌ ప్లాస్టిక్‌ వ్యాపారం చేస్తుంటారు. ఈ ప్రాంతంలో అందరికీ తెలిసిన పేరు... మనోజ్‌ కొఠారీ! మొదటి నుంచీ వైఎస్ కు వీరాభిమాని. వైఎస్‌ మరణం తర్వాత వైసీపీలో క్రియాశీలకంగా పని చేస్తున్నారు. పార్టీ కోసం, ప్రచారం కోసం భారీగా ఖర్చు పెడుతుంటారు. మనోజ్‌ వీలైనప్పుడల్లా జగన్‌ను కలుస్తుంటారు. విజయవాడ పశ్చిమ నియోజకవర్గ వైసీపీ ఇన్‌చార్జి వెలంపల్లి శ్రీనివాసరావుకు అనుచరుడిగా ఉన్నారు.

అమరావతి రోడ్డులోని వేళంగిణినగర్‌ దగ్గర చేసిన తనిఖీల్లో భారీగా నగదు పట్టుబడటం కలకలం రేపింది. వాహనంలో తరలిస్తున్న రూ.కోటి పది లక్షలను పోలీసులు స్వాధీనం చేసుకున్నారు. బ్యాంకు నగదుగా అనుమానం వ్యక్తం చేశారు. ఎన్నికల నేపథ్యంలో తరలిస్తున్న సొమ్ముగా పోలీసులు భావిస్తున్నారు. ఈ డబ్బు ఏ పార్టీకి చెందిన నేతదన్నది తెలియాల్సి ఉంది. మరో చోట, వోల్వో బస్సులో తరలిస్తున్న రూ. 88.88లక్షల నగదు, 1.28 కేజీల బంగారాన్ని పోలీసులు స్వాధీనం చేసుకున్నారు. కర్నూలు జిల్లా డోన్ మండలం ఉడుములపాడు గ్రామం దగ్గర బుధవారం ఉదయం పోలీసులు తనిఖీలు నిర్వహిస్తున్నారు. ఈ సందర్భంగా ఓ ఇద్దరు వ్యక్తుల దగ్గర రూ.88.88 లక్షలు, 1.28 కేజీల బంగారాన్ని కనుగొన్నారు. అనంతరం వాటిని స్వాధీనం చేసుకుని ఆ ఇద్దరు వ్యక్తులను అదుపులోకి తీసుకుని విచారిస్తున్నారు.

డబ్బును ఒకచోట నుంచి మరోచోటుకు తీసుకెళ్లడం చట్ట ప్రకారం అక్రమం కాదు. కానీ ఎన్నికల కోడ్‌ అమలో ఉన్నప్పుడు నగదు, బంగారం భారీ మొత్తంలో తీసుకెళ్లొద్ధు ఎన్నికల కమిషన్‌ కొంత పరిమితిని నిర్దేశించింది. ఒకవేళ తీసుకెళ్లాల్సి వస్తే.. వాటికి సరైన ఆధారాలు చూపించాలి. లేకుంటే అంతే సంగతులు. నియోజకవర్గాల్లో చెక్‌పోస్టులు ఏర్పాటు చేశారు. వీటి వద్ద రెవెన్యూ, పోలీసుశాఖ అధికారులు, సిబ్బంది తనిఖీ చేస్తున్నారు. ఆధారాలు లేకుండా రూ.50 వేల కంటే ఎక్కువ మొత్తంలో నగదు తీసుకెళ్తే స్వాధీనం చేసుకుంటారు. ఆదాయ పన్నుశాఖకు జప్తు చేస్తారు. అక్కడి నుంచి నగదును పొందాలంటే కష్టం. ఆధారాలు, వివరణ సరిగా లేకపోతే 30 శాతం పన్ను కింద తీసుకుని మిగతా సొమ్ము ఇస్తారు. ఈ నిబంధనలు తెలియక చాలామంది పెద్ద మొత్తంలో నగదు తీసుకెళ్తూ దొరికిపోతున్నారు. ఆదాయ పన్ను చట్టం 1961 సెక్షన్‌ 69-ఎ ప్రకారం ఏ వ్యక్తి అయినా తన వద్ద ఉన్న డబ్బు, బంగారం, ఇతర విలువైన వస్తువులుంటే వాటికి ఆధారం చూపించాలి. సరైన వివరణ ఇవ్వాలని స్పష్టంగా చట్టంలో ఉంది.

తనిఖీ బృందంలో ఎవరుంటారు? నియోజకవర్గానికి మూడు నుంచి నాలుగు చొప్పున తనిఖీ కేంద్రాలు ఏర్పాటు చేశారు. ఒక్కో కేంద్రంలో రెవెన్యూ శాఖకు సంబంధించిన ఉప తహసీల్దారు, పోలీసు విభాగం నుంచి ఏఎస్సై, కానిస్టేబుల్‌ ఉంటారు. గమనించాల్సిన విషయాలు ● ఆదాయపు పన్ను చట్టం 1961 సెక్షన్‌ 40(3) ప్రకారం ఒకరోజు ఒక వ్యక్తి లేదా సంస్థకు రూ.10 వేలకు మించి నగదు ఇవ్వొద్ధు ● సెక్షన్‌ 269 ఎస్‌ఎస్‌ ప్రకారం రూ.20 వేలకు మించి అప్పు తీసుకోకూడదు. ● సెక్షన్‌ 269 ప్రకారం రూ.20 వేలకు మించి అప్పు చెల్లించరాదు. అప్పు తీసుకుంటే.. అవసరం నిమిత్తం రూ.లక్షల్లో అప్పు తీసుకుంటారు. ఆ సొమ్ము తీసుకెళుతున్నప్పుడు అప్పు ఇచ్చిన వ్యక్తి రాయించుకున్న ప్రామిసరీ నోటు నకలు వెంట తీసుకెళ్లాలి. వైద్య సేవలకైతే.. ఆసుపత్రిలో వైద్య సేవలకు బిల్లు కట్టడానికి ఎక్కువ మొత్తం తీసుకెళ్తుంటారు. ఆ సమయంలో చికిత్సకు ఎంత మొత్తం ఖర్చవుతుందని తెలిపే బిల్లు, అది కాకపోతే ఎస్టిమేషన్‌ కాపీ చూపించాలి. పంట అమ్మితే.. ప్రస్తుతం రబీ పంట కొనుగోళ్లు, ఉద్యాన పంటల అమ్మకాలు జరుగుతున్నాయి. విపణిలో పంట ఉత్పత్తులను విక్రయిస్తున్నారు. నగదు తీసుకెళ్లే సమయంలో వ్యవసాయ మార్కెట్‌ కమిటీ అమ్మకం పట్టీ దగ్గర ఉంచుకోవాలి.

ఎన్నికల షెడ్యూల్ విడుదలైన నేపథ్యలో ఏపీలో రాజకీయం రంజుగా మారుతోంది. క్షణక్షణం ఆసక్తి రేపుతోంది. టీడీపీ నుంచి వైసీపీలోకి వైసీపీ నుంచి టీడీపీలోకి ఇలా వసల జోరు కొనసాగుతున్నాయి. ఇదేకోవలో కాకినాడ ఎంపీ తోట నరసింహం తెలుగుదేశం పార్టీకి గుడ్ బై చెప్పి భార్య తోట వాణితో కలిసి వైసీపీలో చేరిపోయారు. ఈ సందర్భంగా తోట నరసింహం తెలుగుదేశం పార్టీపై కీలక వ్యాఖ్యలు చేశారు. అనారోగ్యంతో ఉన్న తనను టీడీపీ కనీసం పలకరించలేదంటూ ఆవేదన వ్యక్తం చేశారు. ఎంపీ తోట నరసింహం వ్యాఖ్యలకు టీడీపీ ఘాటుగానే స్పందించింది. తోట నరసింహం ఆస్పత్రిలో ఉన్నప్పుడు టీడీపీ నేతల పరామర్శించిన ఫోటోలను విడుదల చేశారు మంత్రి నారా లోకేష్.

తోట నరసింహం ఆస్పత్రిలో ఉన్నప్పుడు లోకేష్ పరామర్శించిన ఫోటోలను విడుదల చేశారు. ఆ సమయంలో లోకేష్ తోపాటు శ్రీకాకుళం ఎంపీ రామ్మోహన్ నాయుడు కూడా ఉన్నారు. మెుత్తానికి ఎంపీ తోట నరసింహం ఆరోపణలకు టీడీపీ ఆధారాలతో సహా దిమ్మతిరిగే షాక్ ఇచ్చిందన్నమాట. అయితే వైసీపీలో చేరిన సందర్భంగా తోట నరసింహం టీడీపీ కోసం తాను ఎంతో చేశానని అలాంటిది ఆ పార్టీ తనను కనీసం గుర్తించలేదని వాపోయారు. టీడీపీలో అవమానించారని అందుకే పార్టీ మారుతున్నానని చెప్పుకొచ్చారు. తనకు ఆరోగ్యం బాగోలేనప్పుడు టీడీపీ కనీసం పరామర్శించలేదని తోట నరసింహం విమర్శలు చేశారు. దీంతో తీవ్ర మనస్తాపానికి గురయ్యానని పేర్కొన్నారు. అందుకే పార్టీని వీడుతున్నానని వెల్లడించారు.

మరోవైపు తోట నరసింహం వ్యాఖ్యలపై టీడీపీ జాతీయ ప్రధాన కార్యదర్శి మంత్రి నారా లోకేష్ ట్విట్టర్ వేదికగా స్పందించారు. తోట నరసింహం ఆస్పత్రిలో ఉన్నప్పుడు పరామర్శించిన ఫోటోలు పబ్లిష్ చేశారు. ఈ సందర్భంగా సాక్షిపై ఆగ్రహం వ్యక్తం చేశారు. సాక్షి రాతలకు ఉండదు మనస్సాక్షి అంటూ చెప్పుకొచ్చారు. అది దొంగబ్బాయి పెంచుకున్న మాయ పక్షి దేనికైనా మసిపూసి చిటికెలో మారేడుకాయ చేస్తుంది. జరిగింది జరగనట్టు, జరగనిది జరిగినట్టు చెప్తుంది అంటూ ట్వీట్ చేశారు. మెుత్తానికి ఎంపీ మాటకు ఆధారాలతో సహా మాట అప్పగించారు ఐటీ మంత్రి నారా లోకేష్.