news

బీజేపీ ఎంపీ జీవీఎల్ నరసింహారావుకు ఓపెన్ ఛాలెంజ్ విసిరారు టీడీపీ ఎంపీ సీఎం రమేష్... వంద కోట్లు అక్రమాలకు పాల్పడ్డానని చెబుతున్నారు కదా! ఒక్కటి నిరూపించు చూద్దాం అంటూ సవాల్ చేశారాయన. ఆంధ్రప్రదేశ్‌లో ఏ ఒక్క బిజినెస్‌లో అయినా డీల్ కుదిరిందేమో చూపించాలన్న ఆయన... సత్యమూర్తి ఐటీ కంపెనీల్లో డీల్ కుదిరిందా? ఆధారాలతో రా...! ఏంటీ ఏపీలో టీడీపీ పని అయిపోయిందంటావా! ఒక్క చోట కౌన్సిలర్ గా అయినా గెలిచే సత్తా మీ బీజేపీకి ఉందా? అంటూ మండిపడ్డారు. ఆంధ్రలో బీజేపీ, జగన్... ఇంకా ఎవరొచ్చినా వాళ్ల ఆటలు సాగవన్న సీఎం రమేష్... రాష్ట్రంలో బీజేపీ పరిస్థితి చీకటి వ్యాపారాన్ని తలపిస్తోందని... జగన్, బీజేపీ ఇరువురిని ఏపీలో అంటరానివారుగా చూస్తున్నారని సెటైర్లు వేశారు.

లోకేష్‌కు మంత్రి పదవి ఇవ్వాలంటే జీవీఎల్‌ను, పవన్‌ కల్యాణ్‌ను అడగాలా? అంటూ ప్రశ్నించారు సీఎం రమేష్‌... బీజేపీ ప్రభుత్వమే లోకేష్ బాబుకు బెస్ట్ అవార్డు ఇచ్చిందని గుర్తు చేసిన ఆయన... ప్రజల మన్నన పొందారనడానికి ఈ అర్హత చాలదా? అంటూ ప్రశ్నించారు. మీరు ముఖ్యమంత్రి చంద్రబాబుని, మంత్రి లోకేష్‌ను నిందించడం అంటే... మీరు అభాసుపాలు కావడమే నన్న సీఎం రమేష్‌... నా పైన ఎథిక్స్ కమిటీకి ఫిర్యాదు చేస్తున్నానంటున్నావు కదా.. నాతో పాటు అమిత్ షాపై కూడా సుప్రీం కోర్టు జడ్జితో విచారణ జరిపించండి... వాస్తవాలు ఏమిటో తేలిపోతాయని సవాల్ చేశారు.

మరో పక్క, జీవీఎల్ నర్సింహారావుపై తీవ్ర వ్యాఖ్యలు చేశారు ఏపీ మంత్రి కొల్లు రవీంద్ర... అమరావతిలో మీడియాతో మాట్లాడిన ఆయన... జీవీఎల్ ఒక తోకలేని కోతి అంటూ వ్యాఖ్యానించారు. ఏపీకి అన్యాయం జరిగితే ప్రజలే రాళ్లతో కొడతారని హెచ్చరించిన ఆయన... బీజేపీని నిలదీసిన ప్రతీ టీడీపీ నేతపై ఐటీ, ఈడీ తో దాడులు చేయిస్తున్నారంటూ మండిపడ్డారు. ఇక కనీవినీ ఎరుగని రీతిలో తుఫాన్ విరుచుకుపడితే స్పందించాల్సిన కేంద్రం మౌనంగా ఉందని విమర్శించిన కొల్లు రవీంద్ర... విపత్తులో చెయ్యి అందించాల్సిన కేంద్రం మొండి చెయ్యి చూపిందని... పక్క జిలాల్లో పాదయాత్ర చేస్తున్న ప్రతిపక్ష నేత పరామర్శకు కూడా రాని పరిస్థితి ఉందన్నారు.

‘తిత్లీ’ తుపాను ఉత్తరాంధ్రను అతలాకుతలం చేసింది. అక్కడి ప్రజలను ఆదుకోవడానికి ఇప్పటికే పలువురు సినీ ప్రముఖులు ముందుకొచ్చారు. ఇప్పుడు హీరో అల్లు అర్జున్ కూడా తనవంతు సహాయం చేస్తానని శనివారం తెలిపారు. రూ.25 లక్షలు విరాళంగా ప్రకటించారు. ఈ మేరకు ఆయన ట్విటర్‌లో స్పందిస్తూ.. ‘శ్రీకాకుళం ప్రజల పరిస్థితి విన్న తర్వాత చాలా బాధేసింది. తుపాను ప్రభావం వల్ల జరిగిన నష్టం చూశాక నా హృదయం ద్రవించిపోయింది. ‘తిత్లీ’ తుపాను బాధితులకు రూ.25 లక్షలు విరాళంగా ప్రకటిస్తున్నా‌. ఈ కష్ట సమయంలో మన వారికి మనవంతు సహాయం చేయడానికి ముందుకొద్దాం’ అని పోస్ట్‌ చేశారు.

సినీ ప్రముఖులు బాలకృష్ణ రూ.25 లక్షలు, ఎన్టీఆర్‌‌ రూ.15 లక్షలు, కల్యాణ్‌రామ్‌ రూ.5 లక్షలు, విజయ్‌ దేవరకొండ రూ.5 లక్షలు, కొరటాల శివ రూ.3 లక్షలు, కార్తికేయ రూ.2 లక్షలు, అనిల్‌ రావిపూడి రూ.లక్ష, సంపూర్ణేష్‌ బాబు రూ.50 వేలు బాధితుల సహాయార్థం ఆంధ్రప్రదేశ్‌ ముఖ్యమంత్రి సహాయ నిధికి విరాళంగా ప్రకటించారు. కథానాయకుడు నిఖిల్‌ స్వయంగా శ్రీకాకుళం చేరుకుని సహాయక చర్యలు చేపట్టారు. తితలీ తుఫాను బాధితులకు రూ. 25 లక్షల సాయం ప్రకటించి, పెద్ద మనసు చాటుకున్న అల్లు అర్జున్‌ను మంత్రి నారా లోకేశ్ ట్విట్టర్‌లో అభినందించారు.

అగ్రిగోల్డ్ యాజమాన్యంతో ఏపీ బీజేపీ అధ్యక్షులు కన్నా లక్ష్మీనారాయణ కుమ్మక్కు అయ్యారని ప్రణాళిక సంఘం ఉపాధ్యక్షులు కుటుంబరావు ఆరోపించారు. యాజమాన్యానికి సన్నిహితంగా ఉండే ఏజెంట్లతో ఆయన సంప్రదింపులు జరుపుతున్నారని అమరావతిలో విమర్శించారు. అగ్రిగోల్డ్ ఆస్తులు వేలం జరగకుండా అడ్డుకోవడానికి బీజేపీ కుట్ర పన్నుతోందని పేర్కొన్నారు. స్కాం రూ.6400 కోట్ల వరకు పెరగడానికి కన్నా కూడా కారణమే అని ఆరోపించారు. హ్యాయ్ ల్యాండ్ విలువ రూ. 3వేల కోట్లు అని చెబుతున్న.... ఆయన వేయికోట్ల రూపాయలతో హ్యాయ్ ల్యాండ్ ను సొంతం చేసుకోవచ్చు అని సవాల్ విసిరారు. చంద్రబాబు కుటుంబం తరహాలో కన్నా ఆస్తులు ప్రకటించగలరా అని ప్రశ్నించారు.

జీవీఎల్ పై చర్యలు తీసుకోవాలని రాజ్యసభ ఛైర్మన్ కు లేఖ రాస్తున్నానని తెలిపారు. జీవీఎల్‌ నరసింహరావు చేస్తున్న ఆరోపణలపై కోర్టుకువెళ్లొచ్చ కదా అని ప్రశ్నించారు. దేశ వ్యాప్తంగా రఫేల్ స్కామ్ మార్మోగుతోంది... మరి అమిత్ షా, రఫేల్ స్కామ్ పై విచారణ ఎందుకు చేయించుకోరని కుటుంబరావు ప్రశ్నించారు. జీవీఎల్‌ నరసింహరావు, కేంద్రానికి లేఖ రాసి, రఫేల్ స్కామ్ విచారణ జరపమని కోరాలి అని అన్నారు. దేశ ప్రజలంతా ఇప్పుడు స్కామ్(SCAM) కావాలని కోరుకుంటున్నారని తెలిపారు. SCAM అంటే "సేవ్ కంట్రీ ఫ్రమ్ అమిత్ షా అండ్ మోడీ" అని కుటుంబరావు విశ్లేషించారు.

మరో పక్క బుద్ధా వెంకన్న కూడా బీజేపీ పై మండి పడ్డారు. అడ్రస్‌ లేని బీజేపీకి అధ్యక్షుడు కన్నా లక్ష్మీనారాయణ అని, చంద్రబాబు గురించి అబద్ధాలు ప్రచారం చేస్తున్నారని ప్రభుత్వ విప్‌ బుద్దా వెంకన్న అన్నారు. కాంగ్రెస్‌ ప్రభుత్వ హయాంలో మంత్రిగా ఉన్న కన్నా... నూజివీడులో ఉన్న దేవదాయశాఖకు చెందిన భూములు, గుంటూరులోని పలు ప్రాంతాలలో విలువైన భూములను కబ్జా చేశారని ఆరోపించారు. జగన్‌, కన్నాలకు ఒకే స్థాయిలో అవినీతి చరిత్ర ఉంటుందన్నారు. చంద్రబాబు బినామీలంటూ టీడీపీ నేతలపై విమర్శలు చేయడమే జీవీఎల్‌ పని అని బుద్దా విమర్శించారు. జీవీఎల్‌ పవర్‌ బ్రోకర్‌ అని, ఆయనకు ఎంపీ పదవి ఇచ్చి ఏపీపైకి మోదీ వదిలారని అన్నారు.