news

అమరావతి పరిధిలోని రాయపూడి సమీపంలో అఖిల భారత సర్వీసు అధికారుల కోసం నిర్మిస్తున్న నివాస భవనాల పనులు శరవేగంగా కొనసాగుతున్నాయి. దీనిలోభాగంగా తొలివిడతలో ఓ పన్నెండు అంతస్తుల భవనాన్ని 85 రోజుల్లోనే పూర్తిచేశారు. మలేసియాలో ప్రాచుర్యం పొందిన ‘షీర్‌వాల్‌’ సాంకేతిక పరిజ్ఞానాన్ని దీని నిర్మాణంలో వినియోగించారు. సిమెంట్‌, కంకర మిశ్రమాన్ని ఉపయోగించి.. శ్లాబ్‌తో పాటు సంబంధిత గోడలను కూడా ఒకేసారి పూర్తిచేయడం ఈ సాంకేతిక పరిజ్ఞానం ప్రత్యేకత. ఒక్కో అంతస్తులో నాలుగు పడకగదులతో కూడిన రెండు ఫ్లాట్లు చొప్పున.. 12 అంతస్తుల్లో కలిపి మొత్తం 24 ఫ్లాట్లు నిర్మించారు. 

పూర్తిగా సిద్ధమైన ఈ భవనంలో.. అలంకరణ తదితర పనులనూ సాధ్యమైనంత త్వరలోనే పూర్తిచేసి ప్రభుత్వానికి అందజేయాలని గుత్తేదారు సంస్థ భావిస్తోంది. మరో పక్క, రాజధానిలోని నేలపాడు వద్ద నిర్మాణంలో ఉన్న జ్యుడీషియల్‌ కాంప్లెక్స్‌ను రాష్ట్ర అడ్వొకేట్‌ జనరల్‌ దమ్మాలపాటి శ్రీనివాస్‌ పరిశీలించారు. సీఆర్డీయే కమిషనర్‌ డాక్టర్‌ చెరుకూరి శ్రీధర్‌ ఈ కాంప్లెక్స్‌ వివరాలను, పనుల ప్రణాళికను ఆయనకు వివరించారు. ఇందులోని 6 భాగాలకుగాను ఒక భాగానికి సంబంధించిన మొదటి శ్లాబ్‌ పూర్తయిందని, మరో భాగపు శ్లాబ్‌ పనులకు ఏర్పాట్లు జరుగుతున్నాయని చెప్పారు.

మిగిలిన 4 భాగాలకు సంబంధించిన కాలమ్స్‌ పనులు చురుగ్గా సాగుతున్నాయని, ఈ ఏడాది డిసెంబర్‌ 15వ తేదీకల్లా అన్ని పనులు పూర్తి చేసి, హైకోర్టు నిర్వహణకు వీలుగా ఈ కాంప్లెక్స్‌ను సిద్ధం చేసేందుకు ప్రణాళికాబద్ధంగా కృషి చేస్తున్నామని పేర్కొన్నారు. అనంతరం శ్రీనివాస్‌ రాయపూడి వద్ద నిర్మాణంలో ఉన్న ఏఐఎస్‌ అధికారుల నివాసాలను కూడా చూశారు. అక్కడి నమూనా ఫ్లాట్‌ను సందర్శించారు. ఈ పర్యటనలో సీఆర్డీయే సీఈ ఎం.జక్రయ్య, ఇతర అధికారులు పాల్గొన్నారు.

ఎంపీ కేశినేని నాని నివాసంలో ఏపీ ఎంపీలు మంగళవారం సమావేశమయ్యారు. ఎంపీలు మురళీమోహన్‌, అవంతి శ్రీనివాస్‌, మాగంటి బాబు, కనకమేడల, నిమ్మల కిష్టప్ప, బుట్టా రేణుక సమావేశంలో పాల్గొన్నారు. ఇందులో భాగంగా జీఎం సమావేశంలో ఏపీ రైల్వేజోన్‌పై రైల్వే అధికారులను నిలదీయాలని ఎంపీలు నిర్ణయించారు. చట్టంలో ఉన్న రైల్వే జోన్‌ను ఎందుకు అమలుచేయరని వారు ఆగ్రహం వ్యక్తం చేశారు. నియోజకవర్గాల ప్రతిపాదనలు రైల్వే జీఎంకు ఇవ్వాలని ఎంపీలు నిర్ణయించారు. ఆ తర్వాత జోన్‌పై రైల్వే అధికారులను ఎంపీలు నిలదీయనున్నారు.

జోన్‌పై సంతృప్తికర సమాధానం రాకపోతే రైల్వే జీఎంతో సమావేశాన్ని బహిష్కరిస్తామని టీడీపీ ఎంపీలు స్పష్టం చేశారు. గతంలో అనేక సార్లు మేము ఇచ్చిన ప్రతిపాదనలను కూడా పరిగణలోకి తీసుకోవడం లేదన్నారు. ఎన్డీఏ నుంచి బయటకు వచ్చామని కక్ష సాధిస్తున్నారని ఎంపీలు ఆరోపించారు. వీరికి మద్దతుగా, తెలుగుదేశం పార్టీ శ్రేణుల నిరశన కార్యక్రమం చేపట్టాయి. దక్షిణ మధ్య రైల్వే సమస్యలు మరియు కొత్త ప్రాజెక్టుల ఫై జనరల్ మేనేజర్ ఆధ్వర్యంలో పార్లమెంట్ సభ్యుల సమావేశం ఎలక్ట్రికల్ ట్రాక్షన్ ట్రైనింగ్ సెంటర్, బి.ఆర్.టి.ఎస్. రోడ్, సత్యనారాయణపురంలో జరుగుతుంది.

దీంతో ఇక్కడ టెన్షన్ వాతావరణం నెలకొంది. కేంద్రం నుంచి వచ్చిన రైల్వే అధికారులకి తీవ్ర నిరసన తెలియచేయటానికి తెలుగుదేశం ఎంపీలు కూడా సిద్ధమయ్యారు. సమావేశం ప్రారంభం అయిన కొద్ది సేపటికే, రైల్వే జనరల్ మేనేజర్ తో పార్లమెంటు సభ్యుల సమావేశం రసాభాస అయ్యింది. నాలుగేళ్ల నుంచి, ఎదో పెట్టాలని సమావేశం పెట్టటం, ఒక్క ప్రతిపాదన కూడా కేంద్రం ఆమోదం చెయ్యకపోవటం, కీలకమైన రైల్వే జోన్ పక్కన పడేయటం వంటి వాటి పై, ఎంపీలు నిలదియ్యటంతో, రైల్వే అధికారులు చేతులు ఎత్తేసారు. స్పష్టమైన సమాధానం రాకపోవటంతో, రైల్వే బోర్డు సమావేశం హాలు బయట, తెలుగుదేశం పార్టీ యంపీల నిరసన తెలుపుతున్నారు.

నిన్నటి నుంచి జగన్ పాదయత్ర చేస్తున్న క్యాంప్ లో ఒకటే టెన్షన్.. దానికి కారణం, తన వెనుక ఉన్న 11 సిబిఐ, 5 ఈడీ కేసులు... అన్నిట్లో ఒకరు A1, మరొకరు A 2.. కేవలం కండీషన్ బెయిల్ పైనే బయట తిరుగుతున్నారు. ఇవన్నీ తెలిసినవే కదా టెన్షన్ ఎందుకు అంటారా... ఇలాంటి ఆర్దిక ఉగ్రవాదుల పై, ఈ రోజు సుప్రీం కోర్ట్ కీలక తీర్పు ఇవ్వనుంది అనే సమాచారంతో, జగన్ ముఠా అంతా అలెర్ట్ అయ్యింది. తీర్పు కనుక వ్యతిరేకంగా వస్తే, ఇక జగన్ కు రాజకీయ సమాధే. అందుకే టెన్షన్.. కాని, సుప్రీం కోర్ట్ మాత్రం, భిన్నమైన తీర్పు ఇవ్వటంతో, జగన్, విజయసాయి రెడ్డి ఊపిరి పీల్చుకున్నారు.

ఇక విషయానికి వస్తే, వచ్చే నెల 2న పదవీ విరమణ చేయనున్న సుప్రీంకోర్టు చీఫ్ జస్టిస్ దీపక్ మిశ్రా, కొద్దిసేపటి క్రితం కీలక కేసులో తీర్పును వెలువరించారు. నేరారోపణలు, ఆర్థిక నేరాభియోగాలు నమోదైన వ్యక్తులు ఎన్నికల్లో పోటీ చేసేందుకు అనర్హులుగా ప్రకటించే అంశంలో తాము ఎటువంటి ఆదేశాలనూ ఇవ్వలేమని, అభ్యర్థుల అనర్హతపై సుప్రీంకోర్టు నిర్ణయం తీసుకోలేదని అన్నారు. నేతల అవినీతి జాతీయ ఆర్థిక ఉగ్రవాదమేనని అభిప్రాయపడ్డ ధర్మాసనం, ఈ విషయంలో పార్లమెంటులో కఠిన చట్టాలను తేవాల్సివుందని పేర్కొంది. రాజ్యాంగ సవరణ, కొత్త చట్టాలు తెస్తేనే, నేర చరితులను రాజకీయాలకు, ఎన్నికలకు దూరంగా పెట్టవచ్చని తెలిపింది. ఇదే సమయంలో ఎన్నికల్లో పోటీ చేసే అభ్యర్థులందరూ తమపై ఉన్న పెండింగ్ కేసులను తప్పనిసరిగా వెల్లడించాలని ఆదేశాలు జారీ చేసింది.

క్రిమినల్‌ విచారణ ఎదుర్కొంటున్న చట్టసభ సభ్యులు.. అభియోగాల నమోదు దశ నుంచే ఎన్నికల్లో పోటీ చేయకుండా అనర్హులను చేయాలా అన్న ప్రశ్నను లేవదీస్తూ దాఖలైన పిటిషన్లపై సుప్రీం కోర్టు మంగళవారం తీర్పు ఇచ్చింది. ఈ పిటిషన్లపై విచారణ జరిపిన ప్రధాన న్యాయమూర్తి జస్టిస్‌ దీపక్‌ మిశ్ర నేతృత్వంలోని ఐదుగురు సభ్యుల రాజ్యాంగ ధర్మాసనం ఆగస్టు 28న తన తీర్పును వాయిదా వేసింది. ప్రస్తుతం ప్రజాప్రాతినిధ్య చట్టం ప్రకారం.. ఒక క్రిమినల్‌ కేసులో దోషిగా తేలాకే సదరు చట్టసభ సభ్యుడిపై అనర్హత వేటు పడుతుంది. పబ్లిక్‌ ఇంట్రెస్ట్‌ ఫౌండేషన్‌ అనే స్వచ్ఛంద సంస్థతో పాటు భాజపా నేత అశ్వనీ కుమార్‌ ఉపాధ్యాయ్‌లు ఈ పిటిషన్లను దాఖలు చేశారు.