news

నరసరావుపేట పేట టీడీపీ ఇంచార్జ్ చదలవాడ అరవింద్‍బాబు పై, రెండు రోజుల క్రితం, పోలీసులు వ్యవహరించిన తీరు అందిరకీ తెలిసిందే. ఒక కేసు విషయంలో, తెలుగుదేశం పార్టీకి చెందిన యువకులను అక్రమంగా అరెస్ట్ చేసారని తెలుగుదేశం పార్టీ నిరసనకు పిలుపు ఇచ్చింది. అక్రమంగా అరెస్ట్ చేసిన వారిని వదిలిపెట్టాలని డిమాండ్ చేసింది. అయితే తెలుగుదేశం పార్టీ చేస్తున్న నిరసన కార్యక్రమాన్ని పోలీసులు అడ్డుకున్నారు. ఈ క్రమంలో అరవింద్ బాబు పైన పోలీసులు గుండెల మీద తన్నటంతో, ఆయన అక్కడికక్కడే కుప్పకూలిపోయారు. హుటాహుటిన హాస్పిటల్ కు తీసుకుని వెళ్లి చికిత్స అందించారు. అరవింద్ బాబు పైన దౌర్జన్యం చేసిన పోలీసులను అరెస్ట్ చేయాలని టిడిపి ఆందోళన చేస్తుంటే, తెలుగుదేశం పార్టీకే షాక్ ఇచ్చారు పోలీసులు. కొట్టి, హాస్పిటల్ లో చేరితే, ఆయనకు న్యాయం చేయకుండా, ఎదురు చదలవాడ అరవింద్‍బాబుపైనే కేసు నమోదు చేసారు పోలీసులు. జొన్నలగడ్డలో రోడ్డు మీద ఆందోళన చేపట్టి, అక్కడ ప్రజలకు ఇబ్బంది కలిగించారని, అందుకే కేసు నమోదు చేస్తున్నట్టు చెప్పారు. ఈ పరిణామంతో తెలుగుదేశం పార్టీ కూడా షాక్ కు గురయ్యింది. ఇదేమి తీరు అంటూ, తెలుగుదేశం పార్టీ నేతలు, పోలీసుల పై మండి పడుతున్నారు.

స్థానిక వైఎస్ఆర్ కాంగ్రెస్ పార్టీ ఎమ్మెల్యే ఒత్తిడితోనే, పోలీసులు ఇలా వ్యవహరిస్తున్నారని, ఇది మంచి పద్దతి కాదని వార్నింగ్ ఇస్తున్నారు. అక్రమంగా తెలుగుదేశం కార్యకర్తలను అరెస్ట్ చేసారని, దాని పై ప్రశ్నిస్తే, ఎదురు కేసులు పెట్టటం పై వారు అభ్యంతరం వ్యక్తం చేస్తున్నారు. మరో పక్క నరసరావుపేట పేట టీడీపీ ఇంచార్జ్ అరవింద్ బాబును, చంద్రబాబు ఫోన్ చేసి పరామర్శించారు. ఆయన ఆరోగ్య పరిస్థితి అడిగి తెలుసుకున్నారు. అవసరం అయితే, హాస్పిటల్ మార్చాలని సూచించారు. నిరసన సమయంలో పోలీసులు వ్యవహరించిన తీరు పై చంద్రబాబు ఆగ్రహం వ్యక్తం చేసారు. ఆరోగ్యం జాగ్రత్తగా చూసుకోవాలని, చంద్రబాబు సూచించారు. అలాగే అంబులెన్స్ లో హాస్పిటల్ కు తీసుకుని వస్తున్న సమయంలో, వైసీపీ కార్యకర్తలు అడ్డుకుని, అంబులెన్స్ ధ్వంసం చేయటం పై చంద్రబాబు ఆగ్రహం వ్యక్తం చేసారు. ఇంత జరుగుతున్నా పోలీసులు పట్టించుకోక పోవటం పై చంద్రబాబు ఆగ్రహం వ్యక్తం చేసారు.

నరసాపురం ఎంపీ రఘురామకృష్ణ రాజుపై ప్రభుత్వ కక్ష సాధింపు కొనసాగుతూనే ఉంది. ఇప్పటికే ఆయన పై రాజద్రోహం కేసు పెట్టి, సిఐడితో టార్చర్ పెట్టిన సంగతి తెలిసిందే. ఆ తరువాత ఆ కేసు సాగుతూనే ఉంది. తాజాగా ఎనిమిది నెలలు తరువాత, రఘురామరాజుని మళ్ళీ విచారణకు రావాలి అంటూ నోటీసులు ఇచ్చింది సిఐడి. అయితే ఈ సందర్భంగా ప్రెస్ మీట్ పెట్టిన రఘురామరాజు, సిఐడి చీఫ్ సునీల్ కుమార్ పై ధ్వజమెత్తారు. పండగ రోజు ఎలా విచారణకు పిలుస్తారు అంటుంటే, అసలు నన్ను కొట్టిన వాడి పైన సుప్రీం కోర్టులో కేసు నడుస్తుంటే, అతనే నన్ను మళ్ళీ ఎలా విచారణకు పిలుస్తారని ప్రశ్నించారు. అంతే, ఈ వ్యాఖ్యలు ఆధారమగా, ఆయన పైన ఎస్సీ, ఎస్టీ కేసు నమోదు చేసారు. ఏపీ సీఐడీ చీఫ్ సునీల్ కుమార్‍ను అసభ్య పదజాలంతో దూషించారు అంటూ, చింతలపూడికి చెందిన ఎయిమ్ సంస్థ సభ్యుడు గొంది రాజు ఫిర్యాదు చేసారు. ఇదే చింతలపూడి ఏపీ సీఐడీ చీఫ్ సునీల్ కుమార్ సొంత గ్రామ౦. దీంతో రఘురామరాజు పైన ఎస్సీ, ఎస్టీ కేసు నమోదు చేసినట్లు చింతలపూడి సీఐ మల్లేశ్వరరావు తెలిపారు. మరి దీని పైన రఘురామరాజుని ఎప్పుడు అరెస్ట్ చేస్తారో చూడాలి మరి.

జగన్ మోహన్ రెడ్డి చెల్లెల్లు వైఎస్ షర్మిల, ఆంధ్రప్రదేశ్ లో పార్టీ పెడుతుంది అంటూ ఈ మధ్య వార్తలు వచ్చిన సంగతి తెలిసిందే. షర్మిల కూడా స్పందిస్తూ, ఏ పార్టీ పెట్టకూడదని ఏమైనా రాజ్యాంగంలో ఉందా అంటూ కౌంటర్ ఇవ్వటంతో, షర్మిల ఏ క్షణమైనా ఏపిలో ఎంట్రీ ఇస్తుందనే ప్రచారం మొదలైంది. అయితే షర్మిల పార్టీ పేరు వైఎస్ఆర్టీపి, అందులో తెలంగాణా పదం ఉంది. ఈ పేరు పెట్టుకుని షర్మిల ఏపిలో పార్టీ పెట్టటం కష్టం అని అందరూ అనుకున్నారు. అయితే ఇప్పుడు షర్మిలకు ఆ బాధ కూడా తప్పింది. ప్రసుత్తం జరిగిన ఒక పరిణామంతో, షర్మిల తన పార్టీ పేరు మార్చుకోవాల్సిన పరిస్థితి రావటంతో, ఏపిలో కూడా పార్టీ ఉండేలా, కొత్త పేరుతో షర్మిల వస్తున్నాట్టు తెలుస్తుంది. అసలు ఏమైంది అంటే, ఇప్పటికే షర్మిల వైఎస్ఆర్టిపి పేరుతో తన పార్టీ పేరు ఎన్నికల కమిషన్ దగ్గర రిజిస్టర్ చేసుకోవటానికి ధరఖాస్తు చేసారు. అయితే షర్మిల పార్టిని ఎన్నికల కమిషన్ రిజిస్టర్ చేయకుండా, పార్టీ పేరు మార్చుకోవాలని తిప్పి పంపించింది. అప్పటి వరకు పార్టీ పేరుని రిజిస్టర్ చేయమని చెప్పింది.

దీనికి కారణం అన్న వైఎస్ఆర్ కాంగ్రెస్ పార్టీ చేసిన అభ్యంతరం. ఇప్పటికే అన్న వైఎస్ఆర్ కాంగ్రెస్ పార్టీ అధ్యకుడు మహబూబ్ బాషా, షర్మిల పార్టీ పేరు పై ఎలక్షన్ కమిషన్ వద్ద అభ్యంతరం తెలిపారు. దీంతో ఆయనకు ఎలక్షన్ కమిషన్ స్పందిస్తూ, షర్మిల పార్టీ పేరుని రిజిస్టర్ చేయలేదని, కొత్త పేరుతో రమ్మని చెప్పినట్టు తెలిపారు. అన్న వైఎస్ఆర్ కాంగ్రెస్ పార్టీ, ఇప్పటికే జగన్ మోహన్ రెడ్డి పార్టీ పేరు పైన కూడా అభ్యంతరం తెలిపింది. అది కూడా కోర్టులో ఉంది. ఇప్పుడు తాజాగా షర్మిల పార్టీ విషయంలో కూడా అభ్యంతరం తెలపటంతో, షర్మిల పార్టీ పేరు రిజిస్టర్ చేయలేదు. ఇప్పుడు షర్మిల కొత్త పేరు పైన కసరత్తు చేస్తున్నట్టు తెలిసింది. ఎలాగూ షర్మిల ఏపిలో కూడా అడుగు పెడుతున్నారు కాబట్టి, ఏపిలో కూడా పార్టీ ఉండేలా ఆమె, కొత్త పేరుతో రానున్నారని తెలుస్తుంది. మొత్తానికి షర్మిల పార్టీకి పేరు రిజిస్ట్రేషన్ లోనే అవాంతరాలు ఎదురైనా, ఆమె దీన్ని తనకు ఎలా అనుకూలంగా మలుచుకుంటారో చూడాలి.