news

ఇప్పటికే రాష్ట్ర ఎన్నికల కమీషనర్ గా, నిమ్మగడ్డ రమేష్ కుమార్ ని మళ్ళీ నియమిస్తూ, ఆంధ్రప్రదేశ్ హైకోర్టు ఇచ్చిన తీర్పు పై, రాష్ట్ర ప్రభుత్వం, ఇప్పటికే సుప్రీం కోర్టుకు వెళ్ళటం, అక్కడ హైకోర్ట్ ఇచ్చిన ఆదేశాల పై స్టే ఇవ్వాలని కోరాటం, అయితే సుప్రీం కోర్ట్ మాత్రం, నిమ్మగడ్డ నియామకం పై హైకోర్టు ఇచ్చిన ఆదేశాల పై స్టే ఇవ్వటం కుదరదు అని చెప్పిన విషయం తెలిసిందే. అదే సందర్భంలో కేసులో ఉన్న ప్రతివాదులు అందరికీ సుప్రీం కోర్టు నోటీసులు జారీ చేసింది. ఈ నోటీసులు జారీ చేసిన వారిలో, రాష్ట్ర ఎన్నికల సంఘం, రాష్ట్ర ఎన్నికల కమీషనర్ కూడా ఉన్నారు. అయితే ఈ సందర్భంలో, సమాధానం ఇవ్వాల్సిన రాష్ట్ర ఎన్నికల సంఘం, మరో పిటీషన్ సుప్రీం కోర్టులో దాఖలు చెయ్యటం అందరినీ ఆశ్చర్య పరిచింది. వ్యూహాత్మికంగా ఇలా చేసారా, లేదా ఈ పిటీషన్ వెయ్యటం వెనుక ప్లాన్ ఏమిటి అనే విషయం తెలియాల్సి ఉంది. అయితే, సుప్రీం కోర్ట్ లో పిటీషన్ వేసిన రాష్ట్ర ఎన్నికల సంఘం, రాష్ట్ర ఎన్నికల కమీషనర్ గా, నిమ్మగడ్డ రమేష్ కుమార్ ని మళ్ళీ నియమిస్తూ ఇచ్చిన ఆదేశాల పై స్టే ఇవ్వాలి అంటూ, మరో పిటీషన్ సుప్రీం కోర్టు లో దాఖలు చేసింది.

ఈ కేసు పై ఈ రోజు సుప్రీం కోర్టులో, వాదనలు జరిగాయి. వీడియో కాన్ఫరెన్స్ ద్వారా సుప్రీం కోర్టు విచారణ చేపట్టింది. నిమ్మగడ్డ రమేష్ కుమార్ వ్యవహారం పై, ఇవాళ సుప్రీం కోర్టులో విచారణ జరిగింది. అయితే, గతంలో రాష్ట్ర ప్రభుత్వ పిటీషన్ లో చెప్పినట్టే, ఈ రోజు ఎన్నికల కమిషన్ వేసిన పిటీషన్ లో కూడా, సుప్రీం కోర్టు ఒప్పుకోలేదు. హైకోర్టు ఉత్తర్వుల పై స్టే ఇచ్చేందుకు సుప్రీం కోర్టు నిరాకరించింది. గతంలో కేసులతో కలిపి విచారణ జరుపుతామని స్పష్టం చేసిన కోర్టు, ఈ పిటీషన్ లో ఉన్న ప్రతివాదులకు నోటీసులు జారీ చేసింది. అయితే ముఖ్యంగా ఈ పిటీషన్ లో, రాష్ట్ర ఎన్నికల సంఘం వాదనలు వినిపిస్తూ, హైకోర్టు తీర్పులో స్పష్టత లేదని పేర్కొంది. అయినా సరే, ఈ వాదనల పై సుప్రీం కోర్ట్, పెద్దగా మొగ్గు చూపలేదు, ఇప్పటికిప్పుడు దీని పై స్టే ఇవ్వాల్సిన అవసరం లేదని, ఇప్పటికే ఈ కేసు పై వాదనలు జరిగాయని, అందులో కలిపి ఇది కూడా విచారణ చేస్తాం అని చెప్పటంతో, మొన్న రాష్ట్ర ప్రభుత్వం వేసిన పిటీషన్ కాని, ఈ రోజు ఎన్నికల సంఘం ద్వారా కాని, అనుకున్న ఫలితం దక్కలేదు.

గత కొన్ని రోజులుగా, వైసీపీలోని సీనియర్లలో ముసలం పుట్టిన సంగతి తెలిసిందే. వరుస పెట్టి, బహిరంగంగా ప్రభుత్వం పై విమర్శలు చేస్తున్నారు. జగన్ పై డైరెక్ట్ గా అటాక్ చెయ్యకపోయినా, ప్రభుత్వాన్ని విమర్శలు చేస్తున్నారు. ఈ పరిణామంతో ప్రభుత్వం ఇబ్బందుల్లోకి వెళ్ళింది. ఈ వార్తల నుంచి మళ్ళించటానికి, టిడిపి నేతల పై అరెస్ట్ వార్తలు ముందుకు తెచ్చారు. అయితే, ఈ అరెస్ట్ ల పై కూడా సొంత పార్టీ పై నే విమర్శలు చేసారు రఘురామ కృష్ణం రాజు. దీంతో రఘురామ కృష్ణం రాజుకి వ్యతిరేకంగా, ప్రసాదరాజు ని రంగంలోకి దించింది, వైసిపీ అధిష్టానం. దీంతో రఘురామ కృష్ణం రాజు నిన్న మరింతగా రెచ్చిపోయారు. సామాజికవర్గాల వారీగా మా కులంలో చిచ్చు పెట్టకండి, అంటూ తీవ్ర వ్యాఖ్యలు చేసారు. అయితే ఈ పరిణామాల పై జగన్ మోహన్ రెడ్డి సీరియస్ అయినట్టు చెప్తున్నారు. రఘరామ కృష్ణం రాజుకి షోకాజ్ నోటీసు ఇవ్వాలని, సరైన సమాధానం రాకపోతే, ఆయన్ను పార్టీ నుంచి కూడా సస్పెండ్ చెయ్యాలని, జగన్ నిర్ణయం తీసుకున్నట్టు చెప్తున్నారు. అయితే రఘురామకృష్ణం రాజు ఈ విషయం పై ఎలా రియాక్ట్ అవుతారు అనేది చూడాల్సి ఉంది.

ఆయన ఈ చర్య పై ఎలా రియాక్ట్ అవుతారా అని అందరూ ఎదురు చూస్తున్నారు. సహజంగా జగన్ ఇలాంటివి తట్టుకోలేరు అని, ఇన్నాళ్ళు ఆయన్ను వదిలేసారు అంటేనే, జగన్ ఎందుకు వెనకడగు వేస్తున్నారు అని చర్చ జరుగుతుంది. నిన్న ఒక వీడియో విడుదల చేసిన రఘు రామ కృష్ణం రాజు సంచలన వ్యాఖ్యలు చేసారు. "మా పార్టీలో విచిత్రమైన సిద్ధాంతం ఉంది. ఎవర్నైనా విమర్శ చేపించాలి అంటే, అదే సామాజిక వర్గానికి చెందిన ఎమ్మెల్యే చేత మాట్లాడిస్తారు. పవన్ కళ్యాణ్ అయితే కాపుల మీద, బీసీలు అయితే, బీసీల చేత తిట్టిస్తారు. అలాగే, నా మీద ప్రసాదరాజు చేత ఈ రోజు విమర్శలు చేయించారు. జగన్ దయతో ఎంపీ అయ్యానని, పార్లమెంటరీ కమిటీ చైర్మన్‌ను అయ్యానని అంటున్నారు. ఇది పూర్తిగా అవాస్తవం, నా ఇమేజ్ తో ఇక్కడ గెలిచారు, జగన్ మొఖం పెట్టుకుని కాదు. ఈ పార్టీలోకి వస్తాను అని కాని, సీటు ఇవ్వాలని కానీ అడగలా, రావాలని వైకాపా నేతలు కాళ్లా వేళ్లా బతిమిలాడితేనే నేను పార్టీలోకి వచ్చా. నేను కాబట్టే నరసాపురంలో నెగ్గా, నా ఇమేజ్ వల్ల ఎమ్మెల్యేలు గెలిచారు. జగన్ చుట్టూతా ఉన్నోళ్ళు, కుల పిచ్చతో ఉన్న వారే. పార్టీలో, ప్రభుత్వంలో ఉన్నతమైన పదవులన్నీ, పేరు చివర ఒకే తోక తగిలించుకున్న, ఆ ఒక్క సామాజిక వర్గానికి చెందిన వారికే దక్కాయి. దయచేసి మా కులాన్ని ఈ కులాల రొంపిలోకి లాగొద్దు. మీరు రాజ్యాన్ని ఏలుతున్నారు, ఏలుకోండి కాని, మా చిన్న కులంలో చిచ్చు పెట్టొద్దు." అంటూ సంచలన వ్యాఖ్యలు చేసారు.

ఇప్పటికే కోర్టుల్లో 70కు పైగా మొట్టికాయలతో, ఆంధ్రప్రదేశ్ రాష్ట్ర ప్రభుత్వం పరువు పోగుట్టుకుంది. అయితే వీటి నుంచి పాఠాలు మార్చుకుని, ముందుకు వెళ్ళాల్సిన ప్రభుత్వం, కోర్టులతో డీ అంటే డీ అంటుంది. ఇప్పటికే అమరావతిని మూడు ముక్కలు చేస్తూ నిర్ణయం తీసుకున్న సంగతి తెలిసిందే. గత అసెంబ్లీ సమావేశాల్లో, సీఆర్డీఏ చట్టం రద్దు, పరిపాలన వికేంద్రీకరణ బిల్లులను ప్రవేశపెట్టారు. అక్కడ ఈ రెండు బిల్లులు పాస్ అయ్యాయి. తరువాత శాసనమండలిలో కూడా ఈ బిల్లులు ప్రవేశపెట్టినా, అక్కడ బ్రేక్ పడటం, ఈ బిల్లు సెలెక్ట్ కమిటీ కి వెళ్ళిన సంగతి తెలిసిందే. అయితే మండలిలో చైర్మెన్ చెప్పినా, సెలెక్ట్ కమిటీ వెయ్యకుండా, ప్రభుత్వం అడ్డుపడింది. అయితే ఇదే సందర్భంలో, అమరావతి రైతులు, అమరావతి మార్పు విషయం పై హైకోర్టులో కేసు వేసారు. ఈ సందర్బంగా, ప్రభుత్వం సమాధానం ఇస్తూ, ఈ ప్రక్రియ అంతా ఇంకా శాసనమండలిలోనే ఉందని, సెలెక్ట్ కమిటీ దగ్గర ఆగింది అంటూ, కోర్టుకు చెప్పింది. మొన్న నెల రోజుల క్రితం కూడా, శాసన వ్యవస్థలో ప్రక్రియ పూర్తి అయ్యే వరకు, ఎలాంటి నిర్ణయం తీసుకోలేదని కోర్టుకు తెలిపారు. అయితే ఈ రోజు ప్రభుత్వం, కోర్టుకు చెప్పింది ఒకటి, చేసింది ఒకటి. ప్రభుత్వం చేసిన పనితో అందరూ అవాక్కయ్యారు.

ఈ రోజు సీఆర్డీఏ చట్టం రద్దు, పరిపాలన వికేంద్రీకరణ బిల్లులను, శాసనసభలో మళ్ళీ ప్రవేశ పెట్టారు. చర్చ ఏమి జరగకుండానే ఆమోదించుకున్నారు. ఒక బిల్లు బుగ్గన ప్రవేశ పెట్టగా, మరో బిల్లు బొత్సా ప్రవేశ పెట్టారు. అయితే, ప్రభుత్వం చేసిన ఈ చర్య, కోర్టు ధిక్కరణ కిందకు వస్తుంది అంటూ, పలువురు వాపోతున్నారు. ఇప్పటికే రెండు బిల్లులు, మండలి చైర్మెన్, సెలెక్ట్ కమిటీకి రెఫెర్ చేసారని, ఇప్పటికే ఈ రెండు బిల్లులు, గవర్నర్ దగ్గర, అలాగే హైకోర్టులో పెండింగ్ లో ఉన్నాయని, ఇప్పుడు మళ్ళీ ఆ బిల్లులు ప్రవేశ పెట్టుకుని, మళ్ళీ ఆమోదించుకోవటం, చట్ట విరుద్ధం అని, ప్రతిపక్షాలు ఆరోపిస్తున్నాయి. ఈ మొత్తం వ్యవహారం స్పీకర్ కూడా ఉండటం, విచారకరం అని వాపోతున్నారు. ఇది ఎలాగూ చెల్లదు అని తెలిసి, కోర్టుల్లో ఎదురు దెబ్బ తగులుతుంది అని తెలిసి కూడా, ప్రభుత్వం ఇలా చేస్తుంది అంటే, కోర్టు లతో డీ కొనే విధంగా, ఎదో ప్లాన్ చేసారని, అర్ధం అవుతుంది ప్రతిపక్షాలు ఆరోపిస్తున్నాయి.