విద్యుత్ రంగంలో వివిధ మైలురాళ్లను సాధించడంలో విజయం సాధించిన ఆంధ్రప్రదేశ్ కు వరుసగా రెండోసారి దేశ స్థాయిలో గుర్తింపు లభించింది. రాష్ట్రంలో అమలవుతున్న ఇంటిగ్రేటెడ్ పవర్ డెవలప్మెంట్ స్కీం (ఐపీఎస్), దీనదయాళ్ ఉపాధ్యాయ గ్రామజ్యోతి యోజన (డీడీయుజిజేవై), అగ్రి గ్రేట్ టెక్నికల్, కమర్షియల్ (ఏటీ అండ్ టీ), నష్టాల తగ్గింపు వంటి అంశాలపై మంగళవారం సిమ్లాలో జరిగిన జాతీయ విద్యుత్ మంత్రుల సదస్సులో ఏపీ ప్రశంసలందుకుంది. గతంలో స్టేట్ డిజీగేటెడ్ ఏజెన్సీ (ఎస్డీఏ) ఆధ్వర్యంలో ఉత్తరాఖండ్లోని ముస్సోరీలో జరిగిన జాతీయ సదస్సులో కూడా ఈ అంశాలపై ఏపీ ప్రశంసలను దక్కించుకుంది. రాష్ట్ర ముఖ్యమంత్రి నారా చంద్రబాబు నాయకత్వంలోని ఏపీ ప్రభుత్వం ఇటువంటి ఉత్తమ విద్యుత్ సంస్కరణలను తీసుకువచ్చినట్లు రాష్ట్ర విద్యుత్ శాఖా మంత్రి కిమిడి కళావెంకట్రావు, విద్యుత్ శాఖ ప్రిన్సిపల్ సెక్రటరీ అజయ్ జైన్లు ఈ సందర్భంగా సదస్సులో వెల్లడించారు.
ఏపీ విద్యుత్ రంగం ఎనర్జీ సామర్థ్యం, బొగ్గు కొరతల నివారణ, రెన్యువబుల్ ఎనర్జీ తదితర అంశాలపై తీసుకుంటున్న చర్యలను వివరించారు. విద్యుత్ వినియోగం పెద్దగాలేని సమయాల్లో రోజుకు 500 మెగావాట్ల విద్యుత్తు ఆంధ్రప్రదేశ్ ప్రభుత్వం ఆదా చేస్తున్నట్లు తెలిపారు. 2014లో ఇంధన లోటు 8 శాతం కంటే ఎక్కువగా ఉండేదన్నారు. 2016 నాటికి నూరు శాతం గృహ విద్యుదీకరణను సాధించడంలో విజయం సాధించామన్నారు. ట్రాన్స్మషన్ పంపిణీ నషాల తగ్గింపు 12.06 శాతం నుండి 9.72 శాతానికి దేశంలోనే మొట్టమొదటిసారిగా ఏపీ తగ్గించగలిగిందన్నారు. ఇందులో కూడా ఏపీ ట్రాన్స్ కో 2.32 వాతం తక్కువ ట్రాన్స్మిషన్ నష్టాలను సాధించి రికార్డు సృష్టించిందన్నారు. ఈ సందర్భంగా ఏపీ ప్రచార రథానికి ఇతర రాష్ట్రాల నుండి మంచి స్పందన లభించిదన్నారు. ఈ సందర్భంగా ఎలక్ట్రిక్ మొబిలిటీ పాలసీపై ఏపీ యొక్క ప్రోత్సాహకాలు వారిని ఎంతో ఆకట్టుకున్నాయి.
ఈ సందర్భంగా ఎలక్ట్రిక్ మొబిలిటీ విధానంపై ప్రత్యేకంగా వివరించడం జరిగింది. ఈ విధానం ద్వారా విద్యుత్ వాహనాల అభివృద్ధి చేస్తున్న విధానాన్ని వారు ఇతర రాష్ట్రాలవారికి తెలియజేశారు. ఈ వాహనాలకు రిజిస్ట్రేషన్ ఛార్జీల మినహాయింపు, రోడ్డు పన్ను, విద్యుత్ వాహన తయారీ పార్కులు, అభివృద్ధి, ఛార్జింగ్ వనరులు వంటి అంశాలను వివరించారు. అంతేకాకుండా ఈ విద్యుత్ వాహనాల వినియోగాన్ని మరింతగా ప్రోత్సహించేందుకుగానూ ఈ ఏడాది జూలై నాటికి 50 ఛార్జింగ్ స్టేషన్లను ఏర్పాటు చేయనున్నారు. ఈ సందర్భంగా విజయనగరం జిల్లాలో పైలెట్ ప్రాజెక్టు కింద ఏర్పాటుచేసిన 250 గ్రిడ్ ఆధారిత సోలార్ పంప్సెట్ల విధానంపై వివరించారు. రాష్ట్రంలో అత్యంత విజయవంతమైన ప్రాజెక్టుగా ఆయన దీనిని అభివర్ణించారు. దీనితో పాటు ఏపీలో 11 లక్షల స్మార్టు మీటర్లను ఏర్పాటు చేయనున్నట్లు తెలిపారు. సోలార్ పంపసెట్ల విధాన అమలుపై పలు రాష్ట్రాల ప్రతినిధులు ఏపీ పనితీరును ప్రశంసించారు.