రాష్ట్ర ప్రజల సుఖసంతోషాల కోసం.. పవిత్ర నదీజలాల సంరక్షణ కోసం.. ఆంధ్రప్రదేశ్‌ ఉజ్వల భవిష్యత్తు కోసం.. నవ్యాంధ్ర రథసారధి, అపరభగీరథుడు, ముఖ్యమంత్రి చంద్రబాబునాయుడు ఈ ఎన్నికల్లో గెలుపొంది మళ్లీ ముఖ్యమంత్రి కావాలని ఆకాంక్షిస్తూ సుమారు 40 మంది రుత్వికులు శ్రీ యాగం నిర్వహిస్తున్నారు. కాపు ఉద్యమ నేత, దివంగత వంగవీటి రంగా తనయుడు, మాజీ ఎమ్మెల్యే, టీడీపీ స్టార్‌ క్యాంపెయినర్‌ వంగవీటి రాధ ఈ యాగం జరిపిస్తున్నారు. విజయవాడలోని పిన్నమనేని పాలీక్లినిక్‌ ఎదురు రోడ్డులో ఉన్న మున్సిపల్‌ ఎంప్లాయుస్‌ కాలనీలోని కె.జె.గుప్తా కల్యాణ మండపంలో ఆదివారం ఉదయం 8.12 గంటలకు రుత్వికులు యాగాన్ని ప్రారంభించారు. పండితుల వేదమంత్రోచ్ఛారణలతో యాగం మూడురోజుల పాటు కొనసాగనుంది.
వంగవీటి రాధా సోదరి ఆషా దంపతులు తొలిరోజు ఆదివారం పీటలపై కూర్చుని పూజా కార్యక్రమాలు నిర్వహించారు. గోపూజ, వాస్తు హోమం జరిపించారు. అనంతరం దుర్గామాత పూజతో శ్రీ యాగం ప్రారంభమైంది. ఇది మూడు రోజులపాటు వేదమంత్రోచ్ఛారణలతో శాస్త్రోక్తంగా కొనసాగి ఏప్రిల్‌ 3వ తేదీ ఉదయం 9.45 గంటలకు పూర్ణాహుతితో పరిసమాప్తమవుతుందని ఈ యాగం నిర్వహిస్తున్న రుత్వికులు తెలిపారు. ముఖ్యమంత్రి చంద్రబాబునాయుడు మళ్లీ ముఖ్యమంత్రి కావాలనే ఆకాంక్షతో వంగవీటి రాధా ఆధ్వర్యంలో శ్రీయాగం నిర్వహిస్తున్నాం. శ్రీయాగం అంటే వనదుర్గా మహావిద్యా యాగం. ఇది చాలా విశేషమైనది. చతుర్వేదాలలో ఉన్న మంత్రాలను క్రోడీకరించి దుర్గాదేవతను ఆరాధించే మహా కార్యం. శ్రీయాగం నిర్వహిస్తే శత్రుపీడ తొలగిపోయి అనుకున్న సంకల్పం నెరవేరుతుంది.
ప్రజలందరూ సుభిక్షంగా ఉంటారు. ప్రకృతి అనుకూలిస్తుంది. మనమేమైతే కోరుకుంటున్నామో దానిని పొంది ఈ భూమి మీద సుఖసంతోషాలతో వర్థిల్లేలా మహావిద్య అనే కల్పాన్ని దుర్గాదేవి అనుగ్రహిస్తారు. మూడు రోజులు యాగం జరుగుతుంది. నాలుగో రోజు పూర్ణాహుతితో పరిసమాప్త మవుతుంది. చంద్రబాబునాయుడే ఈ రాష్ట్రానికి దశ, దిశ చూపించగల నాయకుడు, రాష్ట్ర ప్రజల సుఖసంతోషాలతో ఉండాలనే ఆయనే మళ్లీ అధికారంలోకి రావాలి. నవ్యాంధ్రప్రదేశ్‌కు దశ, దిశ చూపించిన చంద్రబాబునాయుడు ఈ ఎన్నికల్లో మళ్లీ ముఖ్యమంత్రిగా ఎన్నికై రాష్ట్రాన్ని మరింత ముందుకు నడిపించాలని కోరుకుంటూ శ్రీయాగం చేయిస్తున్నాం.