కాంగ్రెస్ పార్టీ 2019లో అధికారంలోకి వస్తే ఆంధ్రప్రదేశ్‌కు ప్రత్యేక హోదా ఇచ్చితీరుతామని ఆ పార్టీ అధ్యక్షుడు రాహుల్ గాంధీ అన్నారు. బెర్లిన్‌లో ఇండియన్ ఓవర్సీ కాంగ్రెస్ ఏర్పాటు చేసిన కార్యక్రమంలో రాహుల్ గాంధీ మాట్లాడుతూ ఏపీ ప్రత్యేక హోదా అంశాన్ని ప్రస్తావించారు. రాహుల్ అక్కడి ప్రవాస భారతీయులతో సమావేశమయ్యారు. ఆంధ్రప్రదేశ్‌కు ప్రత్యేక హోదా ఇవ్వాలని భారత ప్రభుత్వం వాగ్దానం చేసిందని, దీన్ని తామంత తేలిగ్గా తీసుకోమని చెప్పారు. కాంగ్రెస్ ప్రభుత్వం 2019లో అధికారంలోకి రాగానే ప్రత్యేక హోదా కల్పిస్తామని, ఇది ఏపీ ప్రజలకు తాను ఇస్తున్న హామీ అని అన్నారు. అప్పట్లో తెలంగాణా ఇస్తామని మాటిచ్చామని, అన్నట్టుగానే ఇచ్చామని, ఇప్పుడు కూడా హోదా పై మాట ఇస్తున్నామని అన్నారు.
ఈ సందర్భంలోనే, ఏపిలో పరిపాలన గురించి మీ అభిప్రాయం చెప్పండి అని అడిగితే, డైరెక్ట్ గా చంద్రబాబు పేరు చెప్పకుండా, మోడీ ఏ విధంగా రాష్ట్రానికి అన్యాయం చేస్తున్నారో చెప్పారు, రాహుల్.. బీజేపీ అధికారంలోకి లేని రాష్ట్రాల్లో పాలనను ప్రధాని మోదీ బలహీనపరుస్తున్నారని రాహుల్ ఆరోపించారు. బీజేపీ పాలిత రాష్ట్రాలకు దన్నుగా నిలుస్తూ ఇతర పార్టీలు అధికారంలో ఉన్న రాష్ట్రాల్లో పాలనను బలహీనపరుస్తున్నారని విమర్శించారు. ‘‘నవ్యాంధ్రకు ప్రత్యేక హోదా ఇస్తామని కేంద్రం స్పష్టమైన హామీ ఇచ్చింది. ఇదేమీ ఆంధ్రప్రదేశ్‌కు అయాచితంగా ఇచ్చే బహుమతి కాదు. ప్రత్యేక హోదా ఏపీ ప్రజల హక్కు. పార్లమెంటు వేదికగా ప్రధానమంత్రి ఇచ్చిన హామీ. నేను దానిని తేలికగా తీసుకోను. 2019 ఎన్నికల్లో కాంగ్రెస్ అధికారంలోకి వస్తే.. నేను ప్రత్యేక హోదా ఇస్తానని ఆంధ్రప్రదేశ్‌ ప్రజలకు హామీ ఇస్తున్నా’’ అని వ్యాఖ్యానించారు.
ప్రధాని మోదీని తాను ఆలింగనం చేసుకున్న అంశంపై అడిగిన ప్రశ్నకు 'నిజాలు కంటే వేగంగా అబద్ధాలు ప్రచారమవుతాయి. మోనీ నిరంతరం నాపైన, ఇతర విపక్ష పార్టీలపై దాడి చేస్తూనే ఉన్నారు. నన్ను రకరకాల పేర్లు పెట్టి పిలుస్తున్నారు. మీరు చెప్పండి, నేను కౌగిలించుకున్న అంశం కంటే అవి వేగంగా ప్రచారంలోకి వచ్చాయా? అభిమానం అనేది చాలా శక్తివంతమైన విషయం. అలాంటి అనుభూతి చెందిన వాళ్లకు మాత్రమే ఆ చర్యలోని అర్ధం అవగతమవుతుంది. వాళ్లలో నైరాశ్యం ఎక్కువైంది. అందుకే అలా వ్యవహరిస్తున్నారు. అలాంటి వాళ్లకు మేం అధికారంలోకి రాగనే సహాయపడతాం' అని రాహుల్ పేర్కొన్నారు. జర్మనీలో రెండురోజుల పర్యటన జరుపుతున్న రాహుల్ అక్కడ్నించి యూకే వెళ్తున్నారు. అక్కడ లండన్ స్కూల్ ఆఫ్ ఎకనామిక్స్‌ విద్యార్థులతోనూ, ఇండియన్ ఓవర్సీస్ కాంగ్రెస్‌తోనూ ఆయన సమావేశమవుతాయి.