రాప్తాడు నియోజకవర్గం నుంచి టీడీపీ అభ్యర్థిగా మంత్రి పరిటాల సునీత పేరును అధిష్టానం ఖరారు చేసింది. అయితే.. ఆమె మాత్రం అభిమానుల కోరిక మేరకు పరిటాల శ్రీరామ్ పోటీ చేస్తాడని ప్రకటించారు. రెండు స్థానాల్లో అవకాశం కల్పించమని అడుగుతున్నామని.. కుదరని పక్షంలో శ్రీరామ్ తనకు బదులుగా రాప్తాడు నుంచి పోటీ చేస్తారని ఆమె స్పష్టం చేశారు. తన నిర్ణయాన్ని అధినేత దృష్టికి తీసుకెళతానని, ముఖ్యమంత్రి నిర్ణయం తమకు శిరోధార్యమని పరిటాల సునీత తెలిపారు. ఇదిలా ఉంటే.. టీడీపీ అభ్యర్థి పరిటాల శ్రీరామ్‌ను భారీ మెజార్టీతో గెలిపించాలని ముత్తవ్వకుంట్ల ఎన్నికల ప్రచారంలో టీడీపీ శ్రేణులకు మంత్రి పరిటాల సునీత పిలుపునివ్వడం విశేషం.
పరిటాల కుటుంబం రాప్తాడు, కల్యాణదుర్గం టికెట్లను తమకు కేటాయించాలని టీడీపీ అధిష్టానాన్ని కోరింది. అయితే టీడీపీ అధ్యక్షుడు చంద్రబాబు నాయుడు పరిటాల కుటుంబానికి ఒక టికెట్‌ మాత్రమే ఖరారు చేశారు. రాప్తాడు టికెట్‌ను మరోసారి పరిటాల సునీతకు కేటాయించారు. అయితే ఆ స్థానం నుంచి పోటీ చేసేందుకు సునీత కుమారుడు పరిటాల శ్రీరామ్ ఆసక్తి కనబరిచారు. దీంతో రాప్తాడు నుంచి శ్రీరామ్‌ను బరిలో నిలిపేందుకు సునీత సిద్దమయ్యారు. తాము రెండు స్థానాలు కోరినప్పటికీ చంద్రబాబు ఒకటే సీటు కేటాయించడంతో.. సునీత పోటీ నుంచి తప్పుకున్నారు. శ్రీరామ్‌ను గెలిపించాల్సిందిగా ఆమె పార్టీ శ్రేణులను కోరారు.
రాయలసీమలో అనంతపురం జిల్లా ఏపీలో అధికార పార్టీకి పెట్టని కోటగానే ఉంది. గడచిన ఎన్నికల్లో రాయలసీమలో సత్తా చాటిన విపక్ష వైసీపీ అనంతపురంలో మాత్రం చతికిలబడిందనే చెప్పాలి. టీడీపీ అధినేత - ఏపీ సీఎం నారా చంద్రబాబునాయుడు సొంత జిల్లా చిత్తూరులో కూడా సత్తా చాటిన వైసీపీ... అనంతపురంలో మాత్రం అంతగా రాణించలేదనే చెప్పాలి. ఇందుకు చాలా కారణాలే ఉన్నా... టీడీపీకి ఆ జిల్లాలో కీలక నేతలు ఉన్నారు. పరిటాల కుటుంబంతో పాటుగా బలమైన కమ్మ సామాజిక వర్గం కూడా ఆ జిల్లాలో చక్రం తిప్పుతోంది. ఇక ఎన్నికల ముందు జేసీ దివాకర్ రెడ్డి కుటుంబం కూడా టీడీపీలో చేరడంతో టీడీపీకి తిరుగులేని విజయాలు ఆ జిల్లాలో నమోదయ్యాయి.