నెల్లూరు జిల్లా రాజ‌కీయాల‌తో వైసీపీలో టెన్ష‌న్ టెన్ష‌న్ వాతావ‌ర‌ణం నెల‌కొంది. రోజుకో ప్రెస్మీట్ తో వైసీపీకి చెందిన కోటంరెడ్డి శ్రీధ‌ర్ రెడ్డి స్వ‌ప‌క్షాన్ని ఇర‌కాటంలోకి నెడుతున్నాడు. నెల్లూరు వైసీపీ నేత‌ల్ని కోటంరెడ్డిపైకి ఉసిగొల్పితే..ఒక‌రి బాగోతాలు ఒక‌రికి తెలియ‌డంతో ఎదురుదా-డికి భ‌య‌ప‌డుతున్నారు. వారు త‌ప్పించుకున్నా త‌న‌కు త‌ప్ప‌దు క‌దా అనే ధోర‌ణిలో స‌ల‌హాదారుడు స‌జ్జ‌ల రామ‌కృష్ణారెడ్డి త‌న‌దైన శైలిలో కోటంరెడ్డిపై బుర‌ద చ‌ల్లేసి మీడియాకి వ‌దిలేశాడు. కందిరీగ ప‌ట్టుని క‌దిపి వ‌దిలిన‌ట్ట‌య్యింది స‌జ్జ‌ల ప్రెస్మీట్. స‌జ్జ‌ల తాను వేసిన బౌన్స‌ర్ల‌కి కోటంరెడ్డి హ‌డలిపోతాడ‌నుకుంటే..కోటంరెడ్డి ఎగిరెగిరి సిక్సులు కొట్టాడు. స‌జ్జ‌ల రామ‌కృష్ణారెడ్డి భారీగా ప్యాకేజీలు తీసుకుని మంత్రి ప‌ద‌వులు క‌ట్ట‌బెట్టాడ‌ని ధ్వ‌జం ఎత్తాడు. తాము రాజ‌శేఖ‌ర్ రెడ్డి ఉన్న‌ప్పుడు, జ‌గ‌న్ మోహ‌న్ రెడ్డి ప్ర‌తిప‌క్షంలో ఉన్న‌ప్పుడూ వెంటే ఉన్నామ‌ని...అప్పుడు స‌జ్జ‌ల త‌న‌యుడు భార్గ‌వ‌రెడ్డి ఎక్క‌డున్నాడంటూ నిల‌దీశాడు. స‌జ్జ‌ల రామ‌కృష్ణారెడ్డి ఆదేశాల‌తోనే బోరుగ‌డ్డ అనిల్ త‌న‌కి ఫోన్ చేసి బెదిరించాడ‌ని, భ‌య‌ప‌డేదే లేద‌న్నారు. నువ్వు మామూలు ఫోన్ కాల్స్ చేయిస్తావు స‌జ్జ‌లా, నేను త‌లుచుకుంటే నీకు నెల్లూరు నుంచి వీడియో కాల్స్ వ‌స్తాయంటూ గ‌ట్టిగానే వార్నింగ్ ఇచ్చారు. వైసీపీ సోష‌ల్మీడియాని త‌న క‌నుస‌న్న‌ల్లోకి తెచ్చుకున్న స‌జ్జ‌ల త‌న‌యుడు స‌జ్జ‌ల భార్గ‌వ‌రెడ్డి త‌న‌ని ల‌క్ష్యంగా దుష్ప్ర‌చారం చేస్తుండ‌డాన్ని స‌వాల్ విసిరారు. వ‌ర‌స ప్రెస్మీట్ల‌తో కోటంరెడ్డి స‌జ్జ‌ల రామ‌కృష్ణారెడ్డిపై విరుచుకుప‌డ‌టంతో తోక‌ముడిచి, ఇత‌ర నేత‌ల్ని ఉసిగొల్పుతున్నారు.