విశాఖకు తొలిసారి వచ్చిన ఆ అపురూప అతిథి తన ‘అందచందాలతో’ అందరినీ కట్టిపడేసింది. హావభావాలతో ఆకట్టుకుంది. అడపాదడపా కొన్ని మాటలాడినా.. ఆ మాత్రానికే అందరినీ అబ్బురపరిచింది. నగరంలో జరుగుతున్న ఫిన్‌టెక్‌ సదస్సులో ప్రత్యేక ఆకర్షణగా నిలిచింది. ఇటీవల ‘పుట్టి’ ప్రపంచం చూపును తనవైపు తిప్పుకున్న ఆ అందాల భరిణె సోఫియా అన్న సంగతి మీకు ఇప్పటికే అర్థమై ఉంటుంది. ప్రపంచంలో తొలి హ్యూమనాయిడ్‌ రోబో అయిన సోఫియా వైజాగ్‌ ఫిన్‌టెక్‌ ఫెస్టివల్‌లో అలరించడానికి వచ్చింది. బుధవారమే వచ్చినా కొద్దిసేపే దర్శనమిచ్చిన ‘ఆమె’ గురువారం మాత్రం ఫెస్టివల్‌ ముగింపు కార్యక్రమంలో ప్రత్యేక ఆకర్షణగా నిలిచింది. సింధూర రంగులో ఉన్న లిప్‌స్టిక్‌ను సింగారించుకుని, కళ్లకు కాటుక పెట్టుకుని అతివలా అగుపించింది. చేతులు మినహా ఒళ్లంతా జిగేలు మనిపించే వస్త్రం కప్పుకుంది. ముఖమంతా మహిళను పోలినట్టే ఉంది. తలకు చిన్నపాటి వస్త్రాన్ని చుట్టుకుంది. చేతులు మాత్రం రోబో మాదిరిగా ఉన్నాయి.
వెల్‌కం టూ వైజాగ్‌ ఫిన్‌టెక్‌ ఫెస్టివల్‌ అంటూ తొలి పలుకు పలికింది. విశాఖను చూసి ఎంతో సంతోష (ఎక్జైట్‌) పడ్డానని చెప్పింది. మీరు ప్రశ్నలు అడుగుతారా? అంటూ లోకేష్‌ను ప్రశ్నించింది. ఆయన రెండు ప్రశ్నలడిగాక తానే లోకేష్‌కు ఓ ప్రశ్న సంధించి సమాధానం రాబట్టింది. ఆ తర్వాత మీడియా ప్రతినిధులు అడిగిన పలు ప్రశ్నలకు జవాబులిచ్చింది. ఫెస్టివల్‌ ముగిశాక సోఫియాతో ఫిన్‌టెక్‌ ఉద్యోగులంతా ఫోటోలు దిగి సంబరపడ్డారు. దాదాపు గంట సేపు సందడి చేసిన అనంతరం నిర్వాహకులు సోఫియాను తీసుకువెళ్లి ‘ఆమె’కు ప్రత్యేకంగా కేటాయించిన గదిలో భద్రపరిచారు.
లోకేష్‌: మనుషులు, రోబోలు కలిసి సామరస్య వాతావరణంలో జీవించడం సాధ్యమా? సోఫియా: రోబోలు మనుషులకు దగ్గరయ్యే రోజులు చేరువలోనే ఉన్నాయి. పలు రంగాల్లో రోబోలు మనుషులకు రోబోలు సహకారం అం దిస్తున్నాయి. మెడికల్‌ థెరపీతో పాటు అనేక రం గాల్లో రోబోలు ఎన్నో సేవలందిస్తున్నాయి. సోఫియా: (లోకేష్‌ను ప్రశ్నిస్తూ): పోలీసింగ్‌ కోసం రోబోలను ఉపయోగించే అవకాశం ఉందా? లోకేష్‌: భవిష్యత్‌లో రోబో పోలీసింగ్‌ నిజం అయ్యే అవకాశం లేకపోలేదు. విలేకరి: ఆంధ్రప్రదేశ్‌కు రావడం తొలిసారి కదా? నీ అనుభూతి ఏంటి? సోఫియా: నేను ఇక్కడకు రావడం ఎంతో సంతోషంగా ఉంది. సాయంత్రం వైజాగ్‌ బీచ్‌లో సరదాగా గడుపుతా. విలేకరి: ఇండియా నుంచి ఏం తీసుకెళ్తావు? సోఫియా: వైజాగ్‌ ఫిన్‌టెక్‌ ఫెస్టివల్‌ 2018 అనుభూతులను..విలేకరి: వైజాగ్‌ ఫెస్టివల్‌ అనుభూతి ఎలా ఉంది? సోఫియా: రావడం చాలా సంతోషం.. త్వరలోనే మళ్లీ విశాఖ రావాలని ఉంది.