జేసీ ప్రభాకర్ రెడ్డి మరో వినూత్న నిరసనకి దిగి కలకలం రేపుతున్నారు. సంచలన వ్యాఖ్యలతో నిత్యమూ వార్తల్లో నిలిచే అనంతపురం జిల్లా తాడిపత్రి మున్సిపల్ చైర్మన్ జేసీ ప్రభాకర్ రెడ్డి నివాసాన్ని పోలీసులు చుట్టుముట్టారు. తాడిపత్రి మున్సిపల్ పరిధిలో మరమ్మతులకు నోచుకోని వాహనాలకు నిధులు కేటాయించని ప్రభుత్వం తీరుకు నిరసనగా భిక్షాటన కార్యక్రమానికి మున్సిపల్ చైర్మన్ జేసీ దివాకర్ రెడ్డి పిలుపునిచ్చారు. పాడైపోయిన వాహనాలతో పట్ణణంలో పర్యటిస్తూ నిరసనకు జేసీ ప్రభాకర్ రెడ్డి సిద్ధం అయ్యారు. అయితే నిరసన కార్యక్రమానికి అనుమతి లేదని పోలీసులు తేల్చిచెప్పారు. జేసీ ప్రభాకర్ రెడ్డిని ఇంటిలో నుంచి బయటకు రాకుండా ఇంటి చుట్టూ పోలీసులను మొహరించారు. రాష్ట్రంలో తాడిపత్రి మున్సిపాలిటీలో టిడిపి జెండా ఎగురవేసిన విషయం తెలిసిందే. అప్పటి నుంచి వైసీపీ ఎమ్మెల్యే కేతిరెడ్డి పెద్దారెడ్డి, టిడిపికి చెందిన మున్సిపల్ చైర్మన్ జేసీ ప్రభాకర్ రెడ్డి మధ్య మున్సిపాలిటీ పాలనా వ్యవహారాలు, నిధుల విషయంలో విభేదాలు తీవ్రం అయ్యాయి.