నవ్యాంధ్రను దేశంలోనే నెంబర్ 1 చెయ్యాలన్న ముఖ్యమంత్రి చంద్రబాబు కృషి ఫలిస్తుంది... ఒక పక్క నవ్యాంధ్ర ఇప్పటికే సెల్ ఫోన్ తయారీ హబ్ గా పేరు తెచ్చుకుంది... మరో పక్క ఆటోమొబైల్‌ రంగంలో ఇప్పటికే ఇసుజు, కియా, హీరో కంపెనీలు వచ్చాయి... ఇప్పుడు తాజాగా మరో ప్రతిష్టాత్మక సంస్థ రాబోతోంది. అది కూడా ఎలక్ట్రిక్‌ వాహనాల తయారీ ప్లాంట్‌... దీనికి గుజరాత్‌, మహారాష్ట్ర లాంటి రాష్ట్రాలు పోటీ పడినా, ఆంధ్రప్రదేశ్ వైపే మొగ్గు చూపుతున్నట్టు సమాచారం... దీనికి ఊతం ఇచ్చేలా, రెండు హైబ్రిడ్‌ మోడళ్ల కార్లను మొదటి సారిగా భారత్‌లో తొలిసారిగా అమరావతిలో లాంచ్‌ చేయనుంది.
ఈ మేరకు ఈ నెల 16వ తేదీన రాష్ట్ర ప్రభుత్వంతో ఒప్పందం చేసుకుంటారు. ఈ సందర్భంగా రాష్ట్ర ప్రభుత్వానికి 10 ఎలక్ట్రిక్‌ వాహనాలను ఉచితంగా అందించనుంది. చాలా హై లెవెల్ లో, గుజరాత్‌ లో పెట్టుబడి పెట్టాలి అని, గుజరాత్‌ ఎన్నికల నేపథ్యంలో తమ రాష్ట్రానికి ఉపయోగపడుతుంది అని, పైస్థాయి నుంచి టయోటాతో సంప్రదింపులు జరిగినా, చివరకు ముఖ్యమంత్రి చంద్రబాబు డైరెక్ట్ గా రంగంలోకి దిగటం, అలాగే అమరావతిలో ఎలక్ట్రిక్‌ వాహనాల ప్రయోగ, ప్రచార కేంద్రంగా ఉపయోగించుకోవాలంటూ చేసిన సూచన, వారితో చేసిన చర్చలు టయోటాను ఏపీవైపు మొగ్గు చూపేలా చేశాయి.
టయోటా కార్ల తయారీ ప్లాంట్‌ ప్రస్తుతం బెంగళూరు సమీపంలో ఉంది. భారత్‌కు అవసరమైన వాహనాలను ఇక్కడినుంచే ఉత్పత్తి చేస్తుంది. అయితే ఎలక్ట్రిక్‌ వాహనాల తయారీ ప్లాంట్‌ భారత్‌లో లేదు. జపాన్‌లోని తమ ప్లాంట్‌లో తయారైన ఇ-కార్లను నేరుగా అమరావతికి పంపిస్తుంది. కొద్దిరోజుల క్రితం ఐటీ శాఖ మంత్రి నారా లోకేశ్‌ బెంగళూరు వెళ్లినప్పుడు టయోటా ప్రతినిధులను కలిశారు. ఎలక్ట్రిక్‌ కార్లలో రెండు మోడల్స్‌ ఉన్నాయి. ఇందులో ఒకటి పీహెచ్‌వీ మోడల్‌. సుమారు రూ.40 లక్షల వరకు ఉంటుంది. ఒకసారి ఛార్జింగ్‌ చేస్తే 68.5 కిలోమీటర్లు ప్రయాణిస్తుంది. ఇది హైబ్రిడ్‌ కారు. ఈ మోడల్‌కు చెందిన నాలుగు కార్లను టయోటా కంపెనీ ప్రభుత్వానికి అందిస్తుంది. రెండోది కామ్‌ ఎస్‌ మోడల్‌. సుమారు రూ. 9 లక్షల వరకు ఉంటుంది. ఈ మోడల్‌కు చెందిన ఆరు వాహనాలను టయోటా ఏపీకి ఇస్తోంది.