విజయవాడ టాస్క్‌ఫోర్స్ పోలీసులు ఈ రోజు ఉదయం అనుమానాస్పద బాక్స్‌ను స్వాధీనం చేసుకున్నారు. మొత్తం 12 మంది నిందితులను అదుపులోకి తీసుకొని.. కృష్ణలంక పోలీస్ స్టేషన్‌లో విచారణ మొదలుపెట్టారు. విచారణలో బాక్స్‌ను చెన్నై నుంచి రూ.5 లక్షలకు కొనుగోలు చేసినట్టుగా నిందితులు తెలిపారు. బాక్స్‌లో ఇరీడియం, యురేనియం వంటి ఖరీదైన పదార్థాలున్నాయన్నారు. వీటిని సాధారణంగా రాకెట్లు, విమానాల తయారీలో వినియోగిస్తుంటారు. ఇవి బంగారం కంటే ఖరీదైనవి. దీంతో బెంబేలెత్తిన పోలీసులు... వెంటనే ఈ విషయాన్ని ఉన్నతాధికారులకు తెలియజెప్పారు. అంతలోనే ఈ వార్త రాష్ట్రమంతా దావానలం వ్యాపించింది.
దీనిపై డీఆర్ డీవో, అని పేలుడు పదార్థం అని రాసి ఉండటంతో అధికారులు డీఆర్ డీవో శాస్త్రవేత్తలకు సమాచారం అందించారు. డీఆర్ డీవో శాస్త్రవేత్తల సూచన మేరకు బాక్సును జనావాసాలకు దూరంగా ఉన్న మంగళగిరి లోని పోలీస్ క్యాంప్ కు తరలించారు. దాన్ని తెరిచేందుకు నిపుణులను పిలిపించారు. మరోపక్క డీఆర్డీవోకి ఫోన్ చేసి.. అక్కడి మెటీరియల్ ఏమైనా బయటకు వెళ్లిందా అనే కోణంలో ఆరా తీశారు. అయితే వాళ్లు అలాంటిది ఏమీ లేదని తెలపడంతో ... నిపుణుల పర్యవేక్షణలో బాక్స్‌ను తెరిపించారు. చివరికి రాగి బిందె, అయస్కాంతం, రెండు బ్యాటరీలు బయటపడ్డాయి. దీంతో అందరూ ఊపిరి పీల్చుకున్నారు.
ఉదయం నుంచి నెలకొన్న ఉత్కంఠతకు తెరపడింది. ఒక ఏసీపీ, ఒక సీఐ, ఇద్దరు ఎస్సైలు, పది మంది పోలీసులు, బాంబ్ స్క్వాడ్ ఇంత మందిని ఉరుకులు పరుగులు పెట్టించిన బాక్స్ రహస్యం ఎట్టకేలకు బయటపడింది. దీన్ని హై ప్రొఫైల్ రైస్ పుల్లింగ్ బ్యాచ్ ఎత్తుగడగా పోలీసులు భావిస్తున్నారు. పక్కా ప్రణాళికగా దీన్ని తయారు చేశారని చెబుతున్నారు. పోలీసులు ఒక పక్కన నానా హైరానా పడుతుంటే.. నిందితులు మాత్రం కాలక్షేపం చేసుకుంటూ జరుగుతున్న దాన్ని ఎంజాయ్ చేశారు. ప్రస్తుతం నిందితులను తమదైన శైలిలో విచారించేందుకు రెడీ అవుతున్నారు పోలీసులు. వీటిని ఎక్కడికి తీసుకువెళుతున్నారు.. ఎవరు పంపించారు.. వీరి వెనక ఉన్న అదృశ్య శక్తులు ఏంటి.. అన్న కోణాల్లో విచారించనున్నారు.