బెజవాడలో ఎక్కడికక్కడే ట్రాఫిక్ జామ్ అయ్యింది. వైసీపీ ఆధ్వర్యంలో నిర్వహిస్తోన్న జయహో బీసీ సభ సందర్భంగా విజయవాడలో ట్రాఫిక్ ఆంక్షలు విధిస్తూ ఒక రోజు ముందు పోలీసులు ప్రకటన విడుదల చేశారు. ఉదయం 6 గంటల నుండి మధ్యాహ్నం 3 గంటల వరకు ట్రాఫిక్ ఆంక్షలు, మళ్లింపు వుంటాయని పేర్కొన్నారు. అయితే సుదూర ప్రాంతాల నుంచి బయలుదేరిన వాహనాలు ఈ ట్రాఫిక్ ఆంక్షలు తెలియక గందరగోళానికి గురయ్యారు. సదస్సుకు జనాన్ని తరలించేందుకు వైసీపీ నేతలు పెద్ద ఎత్తున ఆర్టీసీ బస్సులు ఏర్పాటు చేశారు. రాష్ట్రం నలుమూలల నుంచి వచ్చిన ఆర్టీసీ బస్సుల డ్రైవర్లకు పార్కింగ్ ప్రదేశం ఎక్కడో తెలియక ఎక్కడికక్కడ బస్సులు ఆపేశారు. అలాగే ట్రాఫిక్ మళ్లింపు సమాచారం తెలియని వాహనాలు దారులతో ట్రాఫిక్ జామ్ అయ్యింది. కనకదుర్గమ్మ వారధి నుంచి విజయవాడ వచ్చే మార్గంలో ట్రాఫిక్ నిలిచిపోయింది. విజయవాడలోని ప్రధాన మార్గాల్లో ట్రాఫిక్ జామ్ కావడంతో జయహో బీసీ సభకు జనాలు చేరుకోవడానికి నానా ఇబ్బందులు పడ్డారు. ట్రాఫిక్ జామ్ లో ఇరుక్కున్న సామాన్యప్రజలు బయటపడేందుకు నానా తంటాలు పడుతున్నారు.