రాఫెల్‌ కుంభకోణంలో నరేంద్ర మోడీ అడ్డంగా దొరిపోయారు. సమాధానం చెప్పలేక, పాకిస్తాన్ తో కలిసి కుట్ర పన్నుతున్నారు అంటూ, రాజమౌళి సినిమా కధలు చెప్తున్నారు. అయితే, ఇప్పుడు మోడీని ఈ విషయంలో మరింత ఇరుకున పెట్టటానికి, విపక్షంలో ఉన్న కాంగ్రెస్ పార్టీ అప్పట్లో, బోఫోర్స్ పై, అన్న ఎన్టీఆర్ చూపించిన దారిలోనే నడుస్తుందా అంటే అవును అనే సమాచారం వస్తుంది. నిన్న సాయంత్రం ఢిల్లీ నుంచి వచ్చిన చంద్రబాబు, ఈ రోజు మళ్ళీ ఢిల్లీ వెళ్తున్నారు. 1989లో కాంగ్రెస్ పార్టీ పై బోఫోర్స్ కుంభకోణం బయటకు వచ్చినప్పుడు, దేశంలో ప్రాధాన ప్రతిపక్షంగా తెలుగుదేశం పార్టీ ఉండేది. ఎన్టీఆర్ సూచనల మేరకు, అప్పట్లో రాజీవ్ గాంధీ పై ఒత్తిడి తేవటానికి, విపక్ష ఎంపీలను రాజీనామా చేపించారు ఎన్టీఆర్...
అయితే ఇప్పుడు చంద్రబాబు సూచన మేరకు, విపక్షాలు అన్నీ అదే ఫార్ములా ఉపయోగించి, మోడీ పై ఒత్తిడి తేనున్నట్టు సమాచారం. రాఫెల్‌ కుంభకోణంపై సంయుక్త పార్లమెంటరీ కమిటీ (జేపీసీ) వేయకపోవటంతోనే, మోడీ ఎంత అవినీతి చేసారో అర్ధమవుతుందని, అందుకే మూకుమ్మడి రాజీనామాల దిశగా ఆలోచనలు చేస్తున్నట్లు తెలిపాయి. తద్వారా, ఇప్పటికే పీకల్లోతు చిక్కుల్లో పడిన నరేంద్ర మోదీ సర్కారును మరింత ఇరుకున పెట్టేందుకు చంద్రబాబు అండ్ కో పావులు కదుపుతున్నారు. నిజానికి, రాఫెల్‌ యుద్ధవిమానాల కొనుగోలు కుంభకోణంపై జేపీసీని ఏర్పాటు చేయాలని విపక్షాలు ఎప్పటి నుంచో డిమాండ్‌ చేస్తున్నాయి. కానీ, అందుకు మోదీ సర్కారు ససేమిరా అంటోంది. రెండు దేశాల మధ్య జరిగిన ఒప్పందాన్ని బట్టబయలు చేయడానికి వీల్లేదని, ఈ మేరకు భారత్‌, ఫ్రాన్స్‌ మధ్య రహస్య ఒప్పందం ఉందని చెబుతూ వస్తోంది.
ఆంధ్రప్రదేశ్‌కు ప్రత్యేక హోదా ప్రకటించకపోవడం, దేశంలో ప్రతిపక్ష పార్టీలపై అణచివేత చర్యలకు పాల్పడడానికి నిరసనగా ప్రతిపక్ష పార్టీలకు చెందిన లోక్‌సభ ఎంపీలు రాజీనామా అస్త్రాన్ని ప్రయోగించాలని ప్రతిపక్ష నేతలు భావిస్తున్నారు. లోక్‌సభకు చివరి రోజు అయినా.. మోదీ సర్కారు తీరుపై ఆఖరి పోరాటంగా.. ప్రతిపక్షాలన్నీ సంఘటితమయ్యాయనడానికి సంకేతంగా రాజీనామా చేయాలని యోచిస్తున్నారు. ఈ ప్రతిపాదనపై కాంగ్రెస్ అధ్యక్షుడు రాహుల్‌ గాంధీ, ఏపీ సీఎం చంద్రబాబు వివిధ పార్టీలతో చర్చలు జరుపుతున్నట్లు సమాచారం. ఇదే ప్రతిపాదనపై ముఖ్యమంత్రి చంద్రబాబు మంగళవారం ఎన్సీపీ అధినేత శరద్‌ పవార్‌, తృణమూల్‌ అధినేత్రి మమతా బెనర్జీతో చర్చలు జరిపారు. ఈ లోక్‌సభకు చివరి సమావేశాల్లో చివరి రోజు రాజీనామాలు చేస్తే ఎంత మేరకు ప్రభావం ఉంటుంది!? అనే అంశంపై చర్చలు జరుగుతున్నట్లు తెలుస్తోంది. ప్రతిపక్షాలన్నీ కలిసి మూకుమ్మడి రాజీనామా నిర్ణయం తీసుకుంటే మోదీ సర్కారు పూర్తిగా చిక్కుల్లో పడినట్లేనని విశ్లేషకులు స్పష్టం చేస్తున్నారు.