ఎన్నికలు సమీపిస్తున్న వేళ వైసీపీ కీలక నేత, ఎంపీ విజయసాయిరెడ్డి ‘ఆంధ్రులు నిబద్ధత లేనివారు’ అంటూ రాష్ట్ర ప్రజలను కించపరుస్తూ మాట్లాడిన ఆడియో ఇప్పుడు రాష్ట్ర వ్యాప్తంగా కలకలం రేపింది. శనివారం లీకైన ఆయన సంభాషణలపై ప్రజలు తీవ్రస్థాయిలో ధ్వజమెత్తుతున్నారు. ఈ ఆడియోతో వైసీపీ కుట్రలు, ఆ పార్టీ నేతల నైజం బట్టబయలైందని అంటున్నారు. బీజేపీతో లాలూచీ రాజకీయాలు బయటపడ్డాయని ఆగ్రహం వ్యక్తం చేస్తున్నారు. ‘ఎన్నికల కోసం పూర్తిగా సిద్ధమయ్యాక మోదీ తాను చూసుకుంటానని అంటున్నారని.. అయినా ఆయన్ను నమ్మడానికి వీల్లేదని, అదే నిజమైతే జగన్‌ ఇంకా కోర్టుల చుట్టూ తిరగాల్సిన పరిస్థితి ఎందుకు?’ అనడం రాష్ట్ర ప్రయోజనాలను తాకట్టు పెట్టడమేనని ప్రజలు మండిపడుతున్నారు. ఈ ఎన్నికల్లో ఆంధ్రుల నిబద్ధత అంటే ఏంటో చూపిస్తామని చెబుతున్నారు. విజయసాయి వ్యాఖ్యలతో వైసీపీలో ఓటమి భయం స్పష్టంగా తెలుస్తోందని టీడీపీ నేతలు విమర్శిస్తున్నారు. తెలంగాణ ప్రజలకున్న నిబద్ధత, ఆంధ్ర ప్రజలకు లేదని కించపర్చడం, ఆంధ్రా యువతకు ఐక్యూ లేదని చెప్పడంపై మండిపడుతున్నారు.
నమ్మకం లేనప్పుడు ఓట్లు ఎందుకడుగుతారు? నిబద్ధత లేని ప్రజలను ఓట్లెలా అడుగుతారు? కేసీఆర్‌తో జత చేరిన జగన్‌, విజయసాయిరెడ్డిలు ఇక్కడ తిని తెలంగాణ మాట, పాట పాడుతున్నారు. వాళ్లు తెలంగాణలోనే పోటీ చేసుకుంటే సరిపోతుంది.... వైసీపీ నిజస్వరూపం బయటపడింది... వైసీపీ నిజరూపం బయటపడింది. విజయసాయిరెడ్డి ఆంధ్రా ప్రజలను కించపరుస్తూ మాట్లాడడం దారుణం. ఆంధ్రావాసులపై ఇప్పటికే పలుసార్లు నమ్మకం లేదంటూ జగన్‌ ప్రకటించారు. ఇలాంటి నాయకులు ఆంధ్రాకు అవసరమా.... మోదీకి సపోర్ట్‌ అని అర్థమైంది... ఎట్టి పరిస్థితుల్లోను బీజేపీతో కలిసే ప్రసక్తే లేదని వైసీపీ చెబుతుంటే నిజమేనేమో అనుకున్నా. విజయసాయిరెడ్డి ఆడియోతో అసలు విషయాలు బయటకు వచ్చాయి. ముస్లిం, మైనారిటీలు ఎట్టి పరిస్థితుల్లో వైసీపీకి ఓట్లు వేయం. విజయసాయిరెడ్డి ఆంధ్రులకు కృతజ్ఞత లేదని మాట్లాడడాన్ని బట్టి చూస్తే ప్రజలపై ఆయనెంత కక్షకట్టారో అర్థమవుతోంది.
ఆంధ్రులకు చిత్తశుద్ధి లేదంటే నీకూ లేనట్లేగా... ఆంధ్రులకు కృతజ్ఞత, చిత్తశుద్ధి లేదని విజయసాయిరెడ్డి అనడం సిగ్గుచేటు. ఆంధ్రులంటే అతను కూడా వస్తాడన్న విషయాన్ని మర్చిపోయాడేమో..? విజయసాయిరెడ్డికి సిగ్గు లేకపోవచ్చునేమో కానీ మాకైతే ఉన్నాయి. ఎన్నికలకు ముందే ఇలాంటి పరిస్థితి ఉంటే పొరపాటున అధికారం వస్తే.. కేసీఆర్‌ దగ్గర, మోదీ కాళ్ల దగ్గర రాష్ట్రాన్ని తాకట్టు పెడతారు.... రాష్ట్రానికి శకునిలా మారాడు.... రాష్ట్రానికి విజయసాయిరెడ్డి శకునిలా దాపురించాడు. ఆడియో లీకులతో బీజేపీతో ఉన్న లాలూచీ బయట పడింది. ఆయన వాడిన భాష ఆమోదయోగ్యం కాదు. వీరికి ఆంధ్రప్రజల పట్ల కొంచెం కూడా చిత్తశుద్ధి లేదు. కేసుల మాఫియే ప్రధాన అజెండా అని తేలిపోయింది. పరోక్షంగా వైసీపీ ఓటమిని అంగీకరించినట్లే.