news

ప్రధాని మోదీ, కేంద్ర ఎన్నికల సంఘంపై పశ్చిమ బెంగాల్‌ ముఖ్యమంత్రి మమతా బెనర్జీ విరుచుకుపడ్డారు. ఆదివారం జల్పాయిగుడి, ఫలకతాల్లో జరిగిన బహిరంగ సభల్లో ప్రసంగిస్తూ అధికార యంత్రాంగాన్ని ఉపయోగించి ప్రతిపక్షాలను భయపెట్టాలని మోదీ ప్రయత్నిస్తున్నారని దుయ్యబట్టారు. భాజపా సూచనల మేరకే ఎన్నికల సంఘం (ఈసీ) నడుచుకుంటోందని ఆరోపించారు. ఆంధ్రప్రదేశ్‌ ప్రభుత్వ ప్రధాన కార్యదర్శిని ఎందుకు బదిలీ చేశారని ఎన్నికల సంఘాన్ని ప్రశ్నించారు. ‘‘కేంద్ర ప్రభుత్వం ఎందుకు రాష్ట్ర వ్యవహారాల్లో తలదూర్చుతోంది? ఆంధ్రప్రదేశ్‌ ప్రభుత్వ ప్రధాన కార్యదర్శిని ఎందుకు తొలగించారు? చివరి క్షణం మార్పులపై అంత ఇష్టం ఉంటే సొంత కేబినెట్‌ కార్యదర్శినో, కేంద్ర హోం కార్యదర్శినో ఎందుకు తీసేయలేదు.

నేను ఎందరో ప్రధానులతో కలిసి పని చేశాను. మోదీలాంటి కక్షసాధింపు ప్రధానిని చూడలేదు’’ అని నిప్పులు చెరిగారు. ఎన్నికల సంఘం శుక్రవారం ఆంధ్రప్రదేశ్‌ ప్రభుత్వ ప్రధాన కార్యదర్శి అయిన అనిల్‌ చంద్ర పునేఠాను తొలగించి, ఎల్‌.వి.సుబ్రహ్మణ్యంను నియమించడాన్ని ఎన్నికల సభల్లో ప్రస్తావించారు. రాజకీయ ప్రయోజనాల కోసం ఆదాయపు పన్ను విభాగం, సీబీఐలను కేంద్ర ప్రభుత్వం దుర్వినియోగం చేస్తోందని మమత విమర్శించారు. ‘‘మధ్యప్రదేశ్‌ ముఖ్యమంత్రి కమల్‌నాథ్‌ కుటుంబ సభ్యుల ఇళ్లపై దాడి చేశారు. కర్ణాటక ముఖ్యమంత్రి ఇళ్లను సోదా చేశారు. ఆంధ్రప్రదేశ్‌ ముఖ్యమంత్రినీ వదలలేదు’’ అని విమర్శించారు. తనను ఎంతగా భయపెట్టాలని ప్రయత్నిస్తే అంత గట్టిగా గర్జిస్తానని మమత హెచ్చరించారు.

‘‘దీదీ ఎవరికీ, దేనికీ భయపడే వ్యక్తి కాదు’’ అని అన్నారు. భాజపా సూచనల మేరకే పశ్చిమ బెంగాల్‌లోనూ నలుగురు ఐపీఎస్‌ అధికారులను తొలగించడంపై మండిపడ్డారు. ఇందుకు తీవ్ర నిరసన తెలుపుతూ ఎన్నికల సంఘానికి లేఖ రాశారు. ఏకపక్షంగా, దురుద్దేశాలతో కూడిన ఈ నిర్ణయాన్ని పునఃసమీక్షించాలని డిమాండ్‌ చేశారు. అధికారులను బదిలీ చేయడంపై తానేమీ కలవరం చెందడం లేదని అన్నారు. ఓటమి భయం ఉన్నవారే ఇలాంటి పనులకు పాల్పడతారని విమర్శించారు. ఎంతమంది అధికారులను బదిలీ చేస్తే తమ విజయావకాశాలు అంత పెరుగుతాయని చెప్పారు. వారణాసిలో గంగను పరిశుభ్రం చేయలేని వ్యక్తి ఇక్కడకి వచ్చి మాట్లాడుతున్నారని మోదీని ఉద్దేశించి విమర్శించారు. సీపీఎం హయాంలో శారదా కుంభకోణం జరిగితే తమపై విమర్శలు చేస్తున్నారని అన్నారు. అందులో సంబంధం ఉన్న ఎంపీ ముకుల్‌ రాయ్‌ను మోదీ వేదికలపై పక్కన కూర్చోబెట్టుకుంటున్నారని ఆరోపించారు. మోదీని ‘నకిలీ చౌకీదార్‌’ అని విమర్శించారు. ఈ చౌకీదార్‌ అబద్ధాలకోరే కాదు, దొంగ కూడా అని ఆరోపించారు.

యాభై శాతం వీవీప్యాట్ల లెక్కింపు చేపట్టాలని, చంద్రబాబు నాయకత్వంలో, 21 ప్రతిపక్షాల అభ్యర్థన పై సుప్రీంకోర్టు కీలక ఆదేశాలు జారీ చేసింది. ప్రతి అసెంబ్లీ నియోజకవర్గాల్లో 5 వీవీప్యాట్లలోని స్లిప్పులను ఈవీఎంలతో సరిపోల్చాలని పేర్కొంది. అలాగే లోక్‌ సభ నియోజకవర్గాల్లో అయితే 35 వీవీపాట్ల స్లిప్పులను లెక్కపెట్టాలని తెలిపింది. ఈ విషయంలో ఈసీ అభ్యర్థనను దేశ అత్యున్నత న్యాయస్థానం కొట్టి వేసింది. ఇప్పటి వరకు ఎన్నికల సంఘం నియోజకవర్గానికి కేవలం ఒక్క వీవీప్యాట్‌ స్లిప్‌లనే లెక్కపెడుతున్న విషయం తెలిసిందే. యాభై శాతం వీవీప్యాట్ స్లిప్పులు లెక్కపెట్టినట్లయితే ఆరు రోజుల ఆలస్యంగా ఫలితాలు వెల్లడవుతాయని ఎన్నికల సంఘం పేర్కొన్న విషయం తెలిసిందే.

దీనిపై 21 రాజకీయ పార్టీలు స్పందిస్తూ.. ఎన్నికల ఫలితాలు ఆరు రోజులు ఆలస్యమైనా ఫరవాలేదని సుప్రీంకోర్టుకు తెలిపాయి. ఈమేరకు తెలుగు దేశం పార్టీ అధ్యక్షుడు చంద్రబాబు నాయుడు నేతృత్వంలోని విపక్షాలు ప్రమాణపత్రాన్ని సమర్పించాయి. ఎన్నికల ప్రక్రియ నిబద్ధతను కాపాడేటట్లయితే ఇదేమీ ఎక్కువ సమయం కాదని పేర్కొన్నాయి. సిబ్బంది సంఖ్యను పెంచితే ఆలస్యాన్ని గణనీయంగా తగ్గించవచ్చని చెప్పాయి. పారదర్శక ఎన్నికలు, ప్రజా ప్రయోజనం కోసమే పిటిషన్‌ వేశామని ప్రమాణపత్రంలో స్పష్టం చేశాయి. ఈవీఎంల విశ్వసనీయతను ప్రశ్నించడం తమ ఉద్దేశం కాదని, ఎన్నికల ప్రక్రియ నిబద్ధతపై ప్రజల్లో విశ్వాసం పెంచేందుకేనని పేర్కొన్నాయి.

ఈవీఎంలలో ఏ బటన్ నొక్కినా ఓట్లు బీజేపీకే పడుతున్నాయని ఆరోపిస్తూ ఏపీ ముఖ్యమంత్రి చంద్రబాబు నేతృత్వంలోని 21 పార్టీలకు చెందిన విపక్ష నేతలు ఈసీకి ఫిర్యాదు చేశారు. దేశవ్యాప్తంగా ఉండే ఈవీఎంలలో 50 శాతం వీవీప్యాట్‌ స్లిప్పులను లెక్కించడానికీ... ఫలితాలు వెల్లడించడానికీ దాదాపు ఆరు రోజులు పడుతుందని కేంద్ర ఎన్నికల సంఘం తెలిపింది. దీంతో చంద్రబాబు నేతృత్వంలోని ఎన్డీఏ యేతర పార్టీల బృందం సుప్రీంకోర్టును ఆశ్రయించింది. ఆరు రోజులు పట్టినా పర్వాలేదనీ, వీవీప్యాట్‌లలోని స్లిప్పులను లెక్కించాలని ఆదేశించాలని కోరింది. దీనిపై సుప్రీంకోర్టు ఇవాళ సమగ్ర విచారణ చేపట్టి... ఈ మేరకు తీర్పు ఇచ్చింది.

ఆంధ్రప్రదేశ్ రైతులకు ప్రభుత్వం మరో శుభవార్త చెప్పింది. రైతు రుణమాఫీ పథకం కింద నాలుగో విడత నిధులను విడుదల చేసింది. 4వ విడత రుణమాఫీ కోసం రూ.3,900 కోట్లు విడుదల చేసింది. 30 లక్షల మంది రైతుల ఖాతాల్లో రూ.39 వేల చొప్పున జమ కానుంది. దీనికి సంబంధించి వివరాలను రాష్ట్ర ప్రణాళికా సంఘం ఉపాధ్యక్షుడు కుటుంబరావు మీడియా ఎదుట వెల్లడించారు. రైతులు రుణ అర్హత పత్రంతో బ్యాంకుకు వెళ్లాలని సూచించారు. ఏడాదికి 10శాతం వడ్డీతో సహా రైతు రుణమాఫీ పూర్తిగా చెల్లిస్తామని ప్రకటించారు. ఎన్నికల ఫలితాల కంటే ముందే.. వడ్డీతో సహా తుది విడత బకాయిలు చెల్లిస్తామని కుటుంబరావు తెలిపారు. మొత్తం 58.32 లక్షల మంది రైతుల్లో 23.76 లక్షల మందికి తొలి విడతలో రుణమాఫీ చేస్తామని తెలిపారు. ఖరీఫ్ లోగా అన్నదాత సుఖీభవ క్లియర్ చేస్తామన్నారు. పసుపు-కుంకుమ 3 విడత చెక్కు సొమ్మును బ్యాంకుల్లో జమ చేసినట్లు కుటుంబరావు చెప్పారు.

దీంతో 2014 మార్చికి ముందు వ్యవసాయ రుణాల బకాయిల మొత్తాన్ని ప్రభుత్వం మాఫీ చేసినట్లు అవుతుంది. ఏపీ విభజన వల్ల రాష్ట్రం ఆర్థిక లోటులో ఉన్నా, గత ఎన్నికల సమయంలో టీడీపీ మ్యానిఫెస్టోలో రైతులకు రుణ మాఫీ చేస్తానని చంద్రబాబు వాగ్దానం చేశారు. ఆయన ముఖ్యమంత్రిగా అధికారం చేపట్టాక ఒక్కో రైతుకు రూ.లక్షలన్నర వరకు ఉపశమనం కల్పిస్తానని ప్రకటించారు. రాష్ట్రవ్యాప్తంగా దాదాపు 58.29 లక్షల మంది రైతులకు రూ.24,500 కోట్లు రుణ మాఫీ చేయాలని నిర్ణయించారు. దీనిలో భాగంగా రైతుసాధికార సంస్థను ఏర్పాటు చేసి, 2014-15లో తొలి విడతగా రూ.50 వేల లోపు రుణాలను ఏక మొత్తంగా మాఫీ చేశారు. ముందుగా నిర్ణయించిన ప్రకారం రుణమాఫీ నిబంధనలు వర్తించని ఉద్యాన రైతులకూ మేలు చేయాలని భావించిన సీఎం చంద్రబాబు ఆదేశాలతో 2,22,679 ఉద్యాన రైతుల ఖాతాలకు రూ.384.47 కోట్లను ప్రభుత్వం జమ చేసింది.

రుణమాఫీపై రైతులకు భరోసా కల్పించేందుకు రుణ ఉపశమన పత్రాలను జారీ చేసింది. రుణమాఫీ నిధులు విడుదల చేసినప్పుడు రైతులు ఈ ఉపశమన పత్రాలను సంబంధిత బ్యాంకుల్లో అప్‌లోడ్‌ చేయించుకుని, మాఫీ సొమ్మును ఖాతాల్లో జమ అయ్యేలా ప్రభుత్వం చర్యలు తీసుకుంది. దీనిలో భాగంగా 2016లో 2వ విడత, 2017లో 3 విడత రుణమాఫీ చేశారు. పైగా 10% వడ్డీతో కలిపి రుణమాఫీ అమలు చేశారు. అయితే ప్రభుత్వ మార్గదర్శకాల ప్రకారం గత మూడేళ్లలో దాదాపు లక్ష మంది రైతులు రుణ మాఫీ వర్తించలేదని రైతుసాధికార సంస్థకు అర్జీలు పెట్టుకోవడంతో ప్రభుత్వం సానుకూలంగా స్పందించి, అర్హత కలిగిన రైతులకు మాఫీ సొమ్ము జమ చేసింది. జిల్లాల్లో గ్రీవెన్స్‌లు నిర్వహించి మరీ అర్జీలు స్వీకరించి పరిష్కరించారు.