news

తుఫాను అంటేనే వణుకుతున్న శ్రీకాకుళం జిల్లాకు మరో గండం పొంచి ఉన్నదని సోషల్‌ మీడియాలో జరుగుతున్న ప్రచారం కలకలం రేపుతోంది. తితలీ దెబ్బ నుంచి ఇంకా కుదుటపడనేలేదు. ఇటువంటి సమయంలో మరో తుఫానా? అంటూ శ్రీకాకుళం ప్రజలు కంగారుపడుతున్నారు. కొందరు విశాఖలోని తుఫాను హెచ్చరిక కేంద్రానికి ఫోన్‌ చేసి వాకబు చేస్తున్నారు. వాస్తవ పరిస్థితి చూస్తే ఈ నెల 23కల్లా ఉత్తర అండమాన్‌ సముద్రం, ఆగ్నేయ బంగాళాఖాతం పరిసరాల్లో అల్పపీడనం ఏర్పడనున్నదని భారత వాతావరణ శాఖ బుధవారం బులెటిన్‌లో పేర్కొంది.

ఇప్పటివరకు ఉన్న పరిస్థితుల మేరకు అల్పపీడనం ఏర్పడుతుందని మాత్రమే అంచనా వేసిందని, దీనిపై స్పష్టత రావాలంటే మరో నాలుగు రోజులు ఆగాలని సంబంధిత శాఖ అధికారి ఒకరు తెలిపారు. అల్పపీడనం బలపడి వాయుగుండం, ఆ తరువాత తుఫానుగా మారితే అప్పుడు దాని గమనం తెలుస్తుందని...ఈలోగా దానిపై ఏమీ చెప్పలేమన్నారు. అల్పపీడనం ఏర్పడిన తరువాత బంగాళాఖాతంలో వాతావరణం, గాలుల తీవ్రత తదితర అంశాలపై ఆధారపడి దాని పయనం ఉంటుందన్నారు. ఈసారి ‘దయె’ తుఫాను వస్తుందన్న వదంతులను కొట్టివేశారు. దయె తుఫాను గత నెలలోనే వచ్చిందన్నారు.

ఒకవేళ బంగాళాఖాతంలో తుఫాను వస్తే దానికి ‘గజ’ అని పేరు పెడతారన్నారు. వదంతులు నమ్మవద్దని కోరారు. కాగా. ఈనెల 22 లేక 23 తేదీల్లో ఆగ్నేయ బంగాళాఖాతం, అండమాన్‌ సముద్రం పరిసరాల్లో అల్పపీడనం ఏర్పడుతుందని ఆర్టీజీఎ్‌స/ఇస్రో నిపుణుడు తెలిపారు. దీనిపై మరింత స్పష్టతకు మూడు, నాలుగు రోజులు ఆగాలని, అప్పుడే దాని గమనం తెలుస్తుందన్నారు. బంగాళాఖాతంలో సముద్ర ఉపరితల ఉష్ణోగ్రతులు తుఫానులకు అనుకూలంగా ఉన్నాయన్నారు. అయితే తుఫానులు ఏర్పడకముందే వదంతులు నమ్మవద్దని సూచించారు.

కడప జిల్లాకు చెందిన రాజ్యసభ సభ్యులు సీఎం రమేశ్‌ కేంద్రంలోని నరేంద్రమోదీ సేనకు ఇప్పుడు కీలక శత్రువుగా మారారు. ముఖ్యమంత్రి చంద్రబాబు సన్నిహితులపై కేంద్రం గురిపెట్టిన తరుణంలో సీఎం రమేశ్‌ టార్గెట్‌గా ఆదాయపు పన్నుశాఖ అధికారులు కదిలారు. ఆయన ఇంటిపై, ఆస్తులపై రోజుల తరబడి సోదాలు జరిపారు. చివరికి వారికి ఏం దొరికిందో తెలియదు కానీ.. ఈ సోదాల వెనుక ఏ రాజకీయం దాగిఉందో ప్రజలు మాత్రం ఓ అభిప్రాయానికి వచ్చారు. పార్లమెంట్‌లో ఏపీకి జరిగిన అన్యాయంపై రమేశ్‌ గొంతెత్తారు. కేంద్రప్రభుత్వ చేసిన నిర్వాకంపై చట్టసభలో ఎండగడుతున్నారు. అంతేకాదు.. బీజేపీతో తెలుగుదేశం పార్టీ తెగదెంపులు చేసుకున్నాక కేంద్రప్రభుత్వానికి వ్యతిరేకంగా చేపట్టిన ఉద్యమాల్లో కూడా సీఎం రమేశ్‌ది కీలకపాత్ర! పార్లమెంట్‌ సెషన్స్‌ జరిగిప్పుడే కాదు- మమూలు సమయాల్లో కూడా విభజన చట్టం అమలుపై ఆయన కేంద్రాన్ని నిలదీస్తున్నారు. ఈ పరిణామాలేవీ కమలనాథులకు రుచించలేదు. ఇదే సమయంలో ఈ మధ్యనే కడప ఉక్కు ఫ్యాక్టరీ కోసం గట్టిగా గళమెత్తారు.

ఇంతటితో రమేశ్‌ ఊరుకోలేదు. ఇటీవల ఏపీలో జరుగుతున్న ఐటీ దాడులు కక్షపూరితమైనవనీ, దీనికి సమాధానం చెప్పాలనీ కోరుతూ సంబంధిత కేంద్రశాఖకు నోటీసులు పంపారు. ఇది జరిగిన మూడవ రోజునే సీఎం రమేశ్‌ ఇల్లు, ఆస్తులపై ఐటీ అధికారులు విరుచుకుపడ్డారు. తాజా దాడులకు నేపథ్యం ఇలా ఉండగా.. తనపై ఇంత త్వరగా ఐటీ సోదాలకు పురికొల్పిన అంశం మరొకటి ఉందని సీఎం రమేశ్‌ వాదిస్తున్నారు. ఎప్పటినుంచో సీఎం చంద్రబాబుపైనా, ఆయన సన్నిహిత నేతల పైనా కక్షతో రగిలిపోతున్న వైసీపీ అధినేత జగన్‌, ఆయన ప్రతినిధుల ప్రోద్బలంతోనే కేంద్రం ఈ దాడులు చేయించిందని రమేశ్‌ చెబుతున్నారు. ఆయన వాదనతో టీడీపీకి చెందిన ముఖ్య నేతలు కూడా ఏకీభవిస్తున్నారు.

కేంద్ర బీజేపీ పెద్దలతో లోపాయికారీ బంధాన్ని కొనసాగిస్తున్న వైసీపీ అధ్యక్షుడు జగన్‌ ఈ మొత్తం వ్యవహరంలో కీలక భూమిక పోషించారని ఢిల్లీలో టాక్ నడుస్తుంది. కడపలో స్టీల్‌ప్లాంట్‌ గురించి దీక్ష చేయడంతో జగన్‌కీ, ఆయన పార్టీ నేతలకీ అస్తిత్వ సమస్య వచ్చింది. దీంతో సీఎం రమేశ్‌ పై వెంటనే దాడులు జరిగేలా వైఎస్‌ జగన్‌, విజయసాయిరెడ్డి ద్వారా కేంద్ర బీజేపీ పెద్దలపై వత్తిడి తెచ్చారని ఢిల్లీ వర్గాల్లో చక్కర్లు కొడ్తుంది. అందుకే ఈ దాడుల వెనుక విజయసాయిరెడ్డి పాత్ర ఉందని సీఎం రమేశ్‌ కూడా ఆరోపిస్తున్నారు. సియం రమేష్ పై, ఒక ప్రెస్ మీట్ లో, విజయసాయి రెడ్డి బూతులు తిట్టిన సందర్భం కూడా ఉంది. ఈ స్కెచ్ అంతా, బీజేపీతో సన్నిహితంగా ఉంటూ, వైఎస్‌ జగన్‌, విజయసాయిరెడ్డి ద్వారా నడిపించారని తెలుగుదేశం పార్టీ కూడా గట్టిగా నమ్ముతుంది. అందుకే సియం రమేష్, ఈ ఐటి దాడుల వ్యవహారం పై కోర్ట్ కి కూడా వెళ్లి, అసలు ఎవరు వల్ల, ఎందుకు ఈ దాడులు చెయ్యాల్సి వచ్చిందో చెప్పాలని కోరనున్నారు.

జనసేన చెప్పేది ఒకటి, చేసేది ఒకటి అని పవన్ చేసే ప్రతి చర్యతో అర్ధమవుతుంది. సరి కొత్త రాజకీయం అని చెప్పే పవన్, ఇప్పటి వరకు, కేవలం ఆ పార్టీ, ఈ పార్టీ వదిలేసిన నేతలనే, పవన్ చేర్చుకుంటున్నారు. 2014కి ముందు శాసనసభ స్పీకర్‌గా వ్యవహరించిన నాదెండ్ల మనోహర్ జనసేనలో చేరిపోయారు. 2014 ఎన్నికల్లో ఓడిపోతానని తెలిసినప్పటికీ కాంగ్రెస్ తరఫున నాదెండ్ల మనోహర్ పోటీచేశారు. మెడలో మూడు రంగుల కండువా ధరించి ఫక్తు కాంగ్రెస్ నేతగా దర్శనమిచ్చే నాదెండ్ల మనోహర్ జనసేనలో చేరడం కాంగ్రెస్‌వాదులకు ఆశ్చర్యం కలిగించింది. నాదెండ్ల మనోహర్‌ను జనసేనపార్టీలో చేర్చుకోవడం వెనుక విజయవాడకు చెందిన ఒక పారిశ్రామికవేత్త మధ్యవర్తిత్వం నెరిపారని గుసగుసలు వినిపిస్తున్నాయి.

ఎందుకంటే ఆ పారిశ్రామికవేత్త అటు మనోహర్‌కీ, ఇటు పవన్కీ కూడా సన్నిహితుడే. ఏ ఉద్దేశంతో మనోహర్ జనసేనలో చేరారో తెలియదు కానీ.. ఈ పరిణామం వల్ల పవన్‌కల్యాణ్‌కు రెండు ప్రయోజనాలు నెరవేరాయి. జనసేన పార్టీ ఒకే సామాజికవర్గానికి పరిమితమైందనే భావన ఈ ఘటనతో సమసిపోయిందని జనసైనికులు అంటున్నారు. రెండవది నాదెండ్ల మనోహర్ వివాదాలకు దూరంగా ఉంటారు. నిజాయితీపరుడు. మనోహర్‌తో పాటు గుంటూరు జిల్లాలకు చెందిన మరికొంతమంది నేతలకు జనసేన, వైసీపీలు వల విసిరాయి. రేపల్లె మాజీ ఎమ్మల్యే దేవినేని మల్లిఖార్జునరావును రెండు పక్షాలు సంప్రదించాయి. తెలుగుదేశం పార్టీలో ఉన్న దేవినేని మల్లిఖార్జునరావును ఆ పార్టీ పెద్దలు పట్టించుకోలేదన్న భావన ఆయన అనుచరుల్లో ఉంది.

అటు రేపల్లె, ఇటు వేమూరు నియోజకవర్గాల్లో మల్లిఖార్జునరావుకు పట్టు ఉంది. ఇక చిలకలూరిపేట మాజీ ఎమ్మెల్యే, యువజన శ్రామిక రైతు కాంగ్రెస్‌ జిల్లా అధ్యక్షులు మర్రి రాజశేఖర్‌ను ఆ నియోజకవర్గ సమన్వయకర్త పదవి నుంచి పార్టీ అధ్యక్షులు జగన్ ఆకస్మికంగా తప్పించారు. కేవలం డబ్బులు లేవనే సాకుతోనే ఆయనను ఆ పదవి నుంచి తొలగించారన్నది పలువురి అభిప్రాయం. దీంతో ఆయన అనుచరులు పార్టీకి రాజీనామా చేసి నిరసన వ్యక్తంచేశారు. ఈ తరుణంలో రాజశేఖర్‌ను జనసేన పార్టీ నేతలు సంప్రదించినట్టు సమాచారం. ఉభయ గోదావరి జిల్లాల్లోనే కాకుండా కోస్తాలో అత్యంత కీలకమైన గుంటూరు, కృష్ణా, ప్రకాశం జిల్లాల్లో కూడా జనసేనను సంస్థాగతంగా పటిష్టం చేసేందుకు నాదెండ్ల మనోహర్ సారథ్యంలో జనసేన పావులు కదుపుతోంది. ఇలా వాళ్ళు వీళ్ళు వదిలేసిన నేతలను టార్గెట్ గా పెట్టుకుని, వారిని పార్టీలో చేర్చుకుని, సరి కొత్త రాజకీయం అని పవన్ చెప్పటం, మనం వినటం సరిపోయింది..