news

కోస్తా తీరప్రాంతాన్ని గజగజలాడిస్తున్న పెథాయ్‌ తుపానును ఎదుర్కొనేందుకు అధికార యంత్రాంగం సన్నద్ధమైంది. భారత వాతావరణ విభాగం (ఐఎండీ), రియల్‌ టైం గవర్నెన్స్‌ (ఆర్‌టీజీఎస్‌) నుంచి వచ్చే సూచనలతో అధికారులు ఎప్పటికప్పుడు పరిస్థితిని సమీక్షిస్తున్నారు. తూర్పుగోదావరి, విశాఖ జిల్లాల మధ్య తీరం దాటే అవకాశం ఉందని రాష్ట్ర హోంశాఖ, విపత్తుల నిర్వహణ మంత్రి చినరాజప్ప ప్రకటించారు. దీంతో తూర్పుగోదావరి జిల్లాకు సమీపంలోని అయిదు మండలాలపై జిల్లా అధికార యంత్రాంగం పూర్తి దృష్టి సారించింది. రెవెన్యూ మొదలుకొని విద్యుత్తు, ఆరోగ్యం, పంచాయతీరాజ్‌, జలవనరులు, వ్యవసాయ, మత్స్యశాఖలతోపాటు ఇతర శాఖల ఉన్నతాధికారులంతా తీరప్రాంత గ్రామాల బాట పట్టారు. ఆయాశాఖల పరంగా తుపాను ప్రభావిత ప్రాంతాల్లో చేపట్టాల్సిన ముందస్తు ఏర్పాట్లను పరిశీలించారు. ఎటువంటి విపత్తు ఎదురైనా సమర్థంగా ఎదుర్కొనేందుకు అవసరమైన సామగ్రిని, అదనపు సిబ్బందిని ఉంచారు.

తుపాను ప్రభావిత ప్రాంతాల్లో తాగునీటి ఇబ్బందులు తలెత్తకుండా ముందస్తు జాగ్రత్తలను తీసుకుంటున్నారు. తీర ప్రాంతంలో సమగ్ర రక్షిత నీటి పథకాలున్నాయి. గాలులు తీవ్రత..విద్యుత్తు అంతరాయం వల్ల ఈ పథకాలకు నీరందే పరిస్థితి ఉండదని ఆలోచించి ఒక్కో రక్షిత నీటి పథకం వద్ద ఒక్కో పెద్ద జనరేటర్‌ను ఏర్పాటు చేశారు. గ్రామాల్లో తాగునీటి సరఫరా కోసం నీళ్ల ట్యాంకులను మాట్లాడి సిద్ధం చేసుకున్నారు. విపత్కర పరిస్థితులు వస్తే వీటిని గ్రామాలకు పంపిస్తారు. పెథాయ్‌ తీరం దాటే సమయంలో గంటకు వంద కిలోమీటర్ల పైబడి వేగంతో గాలులు వీచే ఆస్కారం ఉందని వాతావరణ శాఖ హెచ్చరికల నేపథ్యంలో తూర్పుప్రాంత విద్యుత్తు పంపిణీ సంస్థ (ఈపీడీసీఎల్‌) అందుకు తగ్గ ముందస్తు ఏర్పాట్లు చేసుకుంది.

గ్రామాల్లో చీకట్లు అలముకోకుండా ఉండేందుకు జనరేటర్లను ఏర్పాట్లు చేస్తున్నారు. స్తంభాలు పడిపోతే వాటి స్థానంలో వెంటనే కొత్తవి వేయడం కోసం 4 వేల స్తంభాలను రాజమండ్రిలో సిద్ధం చేసి ఉంచారు. ఇప్పటికే 500 స్తంభాలు ప్రభావిత ప్రాంతాలకు తరలించారు. సత్వర పునరుద్ధరణ పనుల్లో పాల్గొనే విధంగా 1500 మంది కార్మికులను గుత్తేదారులతో మాట్లాడి ఆయా మండలాల్లో పెట్టారు. అలాగే క్రేనులు కూడా ఎక్కడికక్కడ సిద్ధంగా ఉంచారు. వరిపైరు కోయకుండా పొలాల్లోనే ఉంది. ఈ పంట వర్షంతో కూడిన గాలి వల్ల నేలకొరిగితే కొంత వరకు నష్టం వాటిల్లే అవకాశం ఉందని వ్యవసాయశాఖ అంచనా వేస్తుంది. ఆదివారం ఆ శాఖ రైతులతో సమావేశమై పంట కోతలేవీ ఇప్పుడు పెట్టుకోవద్దని.. నేలకొరిగి నీటి మునిగితే రెండుశాతం ఉప్పు ద్రావణాన్ని పిచికారీ చేసుకోవాలని సూచించారు. వరిపైరు కుప్పలు ఉంటే, వీటిపై వెంటనే టార్పాలిన్లు కప్పుకోవాలన్నారు. గతేడాది టార్పాలిన్లు (పరదాలు) పంపిణీ చేశామని వాటిని ఈ సమయంలో ఉపయోగించుకోవాలని, లేని పక్షంలో కొత్తవి ఇస్తామని చెప్పారు. కోసి పనలుగా ఉన్న వాటిని వెంటనే దిబ్బలు పెట్టించారు.

తుపాను ప్రభావిత ప్రాంతాల్లోని సాగునీటి కాలువలు..చెరువులు గండ్లు పడకుండా ఉండేందుకు ముందస్తు ఏర్పాట్లు చేస్తున్నారు. తుపాను ప్రభావిత మండలాల్లో ప్రత్యేక పారిశుద్ధ్య పనుల కోసం కార్మికులను ఇప్పటికే ఆయా మండలాలకు చేర్చారు. తుపాను సహాయక చర్యల నిమిత్తం ఏజెన్సీ నుంచి ఒక్కో మండలానికి అదనంగా పది మంది చొప్పున కార్యదర్శులకు విధులు అప్పజెప్పారు. ఒక్కో మండలంలో నాలుగు పొక్లెయిన‌్ర్ల చొప్పున పెట్టినట్లు తెలిపారు. తుపాను ప్రభావిత ప్రాంతాల్లో 36 ప్రాథమిక ఆరోగ్య కేంద్రాలున్నాయి. వాటి పరిధిలో నిరాటంకంగా వైద్యసేవలు అందించేందుకు వైద్యుల సెలవులను సైతం రద్దుచేశారు. పశువుల సంరక్షణ వైద్యం కోసం ఒక్కో మండలానికి ఒక్కో సహాయ సంచాలకున్ని ప్రత్యేకాధికారిగా నియమించారు. ప్రతి మండలానికి లారీతో పశువుల దాణాను సిద్ధం చేసి ఉంచుతామని అవసరమైన పక్షంలో వినియోగిస్తామంటున్నారు. మరో పక్క, బియ్యం నిల్వలు కూడా ఎక్కడిక్కడ చేసారు.

తుపాను హెచ్చరికల నేపథ్యంలో పోలవరం ప్రాజెక్టు మొదటి గేటు ఏర్పాటు పనులను ఈ నెల 17 నుంచి 24వ తేదీకి వాయిదా వేసినట్లు జలవనరుల శాఖ మంత్రి దేవినేని ఉమామహేశ్వరరావు తెలిపారు. గిన్నిస్‌ రికార్డు సృష్టించేలా ఈ నెల 16వ తేదీన చేపట్టదలిచిన కాంక్రీటు పనులను జనవరి మొదటి వారానికి మార్చినట్లు వెల్లడించారు. శనివారం విజయవాడలో మంత్రి విలేకరులతో మాట్లాడారు. 24 గంటల్లో 28,580 క్యూబిక్‌ మీటర్ల కాంక్రీటు వేసి గిన్నిస్‌ రికార్డు సృష్టించాలని ప్రాజెక్టు నిర్మాణ సంస్థ నవయుగ నిర్ణయించినట్టు మంత్రి తెలిపారు. ఇప్పటికే దుబయిలో 21,580 క్యూ.మీ. కాంక్రీటు వేసిన రికార్డు ఉందన్నారు. పోలవరం పనులు 62.16 శాతం పూర్తైనట్లు వెల్లడించారు. దీన్ని జాతీయ ప్రాజెక్టుగా ప్రకటించిన తర్వాత కేంద్రం రూ.6,727 కోట్లు కేటాయించగా ఇంకా రూ.3,342 కోట్లు ఇవ్వాల్సి ఉందన్నారు.

డీపీఆర్‌-2 ఆమోదం కోసం ఎదురు చూస్తున్నట్లు మంత్రి తెలిపారు. దేశంలో 16 జాతీయ ప్రాజెక్టులు నిర్మాణంలో ఉండగా, వీటిలో పోలవరం వివరాలు మాత్రమే ఆన్‌లైన్‌లో ఉన్నాయని చెప్పారు. రానున్న ఖరీఫ్‌ నాటికి గ్రావిటీ ద్వారా నీరిచ్చేలా పనులు చేస్తున్నట్లు వివరించారు. వైకాపా అధినేత జగన్‌ పోలవరంపై సుప్రీంకోర్టులో కేసులు వేశారని, మరో వంక తెలంగాణ సీఎం కేసీఆర్‌తో కుమ్మక్కయ్యారని మంత్రి ఆరోపించారు. ఏపీ ప్రాజెక్టుల సమాచారాన్ని వైకాపా ఎంపీ విజయసాయిరెడ్డి పక్క రాష్ట్రాల వారికి అందజేస్తున్నారని దుయ్యబట్టారు. అధికారులు, రైతులు అప్రమత్తంగా ఉండాలి: తుపాను ప్రభావంతో కోస్తా జిల్లాల్లో భారీ వర్షాలు కురిసే అవకాశం ఉందని వాతావరణ శాఖ హెచ్చరికలు జారీ చేసిందని మంత్రి తెలిపారు. పంటలు దెబ్బతినకుండా, ధాన్యం కూడా తడవకుండా రైతులు, అధికారులు అప్రమత్తంగా ఉండాలని సూచించారు.

పోలవరం ప్రాజెక్టు స్పిల్‌వేలో గేట్ల బిగింపులో భాగంగా 43 బ్లాక్‌లో ఒక సమాంతర గడ్డర్‌ను శనివారం సాయంత్రం ఏర్పాటు చేశారు. సంబంధిత గేట్ల పనులను పర్యవేక్షిస్తున్న ఈఈ పి.సుధాకర్‌రావు ఈ మేరకు విలేకరులకు తెలిపారు. ఒక గేటుకు నాలుగు గడ్డర్లను చొప్పున అమర్చాల్సి ఉన్నట్లు ఆయన చెప్పారు. త్వరలో 43వ బ్లాక్‌లో గేటు ఏర్పాటుకు ముఖ్యమంత్రి చంద్రబాబు హాజరై పూజలు చేస్తారని, అనంతరం సమాంతర గడ్డర్‌కు గేటును బిగించే ప్రక్రియ ప్రారంభిస్తామని ఆయన వివరించారు. ప్రస్తుతం క్లస్టర్‌స్థాయి 25.72 మీటర్ల నుంచి ఒకటిన్నర మీటర్ల ఎత్తులో ఈ గడ్డర్‌ ఏర్పాటు చేశామని ఆయన వివరించారు.

పెథాయ్‌ తుపాను ప్రజానీకానికి కంటి మీద కునుకులేకుండా చేస్తోంది. తీవ్ర తుపానుగా మారిన ‘పెథాయ్‌’‌ ప్రస్తుతం కాకినాడ‌కు 200 కిలోమీట‌ర్ల దూరంలో కేంద్రీకృత‌మై ఉంది. ఇది గంటకు 19 కి.మీ వేగంతో తూర్పుగోదావ‌రి జిల్లావైపు వేగంగా క‌దులుతోంది. ఈరోజు మధ్యాహ్నం నుంచి సాయంత్రంలోపు తుని-యానాంల మ‌ధ్య తీరం దాటే అవకాశం ఉంది. తీరం దాటే సమయంలో గంట‌కు 100 నుంచి 110 కిలోమీట‌ర్ల వేగంతో కూడిన బ‌ల‌మైన గాలులు వీస్తాయని వాతావరణ శాఖ అధికారులు తెలిపారు. మరో పక్క, పెథాయ్ తుఫానుతో కోస్తా తీరంలోని జిల్లాల్లో ఒక్కసారిగా వాతావరణంలో మార్పులు చోటు చేసుకున్నాయి. నెల్లూరు జిల్లా తుమ్మలపెంట, హంసలదీవి, బాపట్ల, బోగాపురం, ఉప్పాడలో 50 అడుగుల మేర సముద్రం ముందుకు వచ్చింది.

ఈదురుగాలుల ధాటికి దివిసీమలో 10 వేల ఎకరాల్లో వరికి నష్టం వాటిల్లింది. అటు నిజాంపట్నం ఓడరేవులో అధికారులు 5వ నెంబర్‌ ప్రమాద హెచ్చరికను జారీ చేశారు. తూర్పుగోదావరి జిల్లాలోని 17 మండలాలపై తుపాను ప్రభావం ఉంటుందని అంచనా వేస్తున్నారు. ఈ క్రమంలో జిల్లాలో దాదాపు 283 పునరావాస కేంద్రాలను అధికారులు ఏర్పాటు చేశారు. నిత్యావసరాలను ప్రభుత్వం మండల కేంద్రాలకు తరలించింది. సమాచార వ్యవస్థకు అంతరాయం కలగకుండా జనరేటర్లు ఏర్పాటు చేసింది. కృష్ణా, గుంటూరు, పశ్చిమగోదావరి, తూర్పుగోదావరి, విశాఖ, విజయనగరం, శ్రీకాకుళం జిల్లాలపై పెథాయ్‌ తుఫాను ప్రభావం ఎక్కువగా ఉంది.

పగటిపూట ఉష్ణోగ్రతలు భారీగా పడిపోయాయి. చలి గాలులు ప్రజలను వణికిస్తున్నాయి. తుఫాను హెచ్చరికల నేపథ్యంలో ప్రజలను సురక్షితప్రాంతాలకు తరలించాలని కలెక్టర్లకు సీఎం చంద్రబాబు నాయుడు ఆదేశాలు జారీ చేశారు. ఎలాంటి పరిస్థితినైనా ఎదుర్కొనేందుకు సిద్ధంగా ఉండాలని చంద్రబాబు సూచించారు. పెథాయ్ తుపాను ప్రభావంపై ఏపీ సీఎం చంద్రబాబు నాయుడు సోమవారం ఉదయం టెలికాన్ఫరెన్స్ నిర్వహించారు. ఇది అత్యవసర పరిస్థితిగా భావించాలని, తుపాను ప్రభావిత జిల్లాలలో రెడ్ అలర్ట్ ప్రకటించాలని ఆదేశించారు. అలాగే అధికారులు, సిబ్బంది తప్పనిసరిగా విధులకు హాజరుకావాలన్నారు. విపత్తును ఎదుర్కోవడంపై ప్రతిశాఖ ప్రణాళికలు తయారు చేసుకోవాలని సూచించారు. ముంపు గ్రామాల ప్రజలను సురక్షిత ప్రాంతాలకు తరలించాలని బాబు తెలిపారు. పునరావాస కేంద్రాలలో అన్ని వసతులు కల్పించాలని ఆదేశించారు. తుఫాను కారణంగా కూలిన చెట్లను తొలగించాలని...విద్యుత్ స్థంభాలను వెంటనే పునరుద్ధరించాలన్నారు. సహాయ చర్యలలో పార్టీ నేతలు, కార్యకర్తలు చురుగ్గా పాల్గొనాలని సీఎం చంద్రబాబు పిలుపునిచ్చారు. టెలికాన్ఫరెన్స్‌లో జిల్లాల కలెక్టర్లు, నోడల్ అధికారులు, సిబ్బంది పాల్గొన్నారు.