news

ఆంధ్రప్రదేశ్ రాష్ట్ర రాజధాని అమరావతి పై, జగన మోహన్ రెడ్డి ప్రభుత్వం వచ్చిన దగ్గర నుంచి, ఏదో ఒక వివాదం నడుస్తూనే ఉంది. ముఖ్యంగా మంత్రి బొత్సా సత్యన్నారాయణ ప్రతి రోజు చేసే వ్యాఖ్యలు, అమరావతి ఉంటుందా, ఉండదా అనే చర్చకు దారి తీసింది. ఒక మంత్రి ఇక్కడే ఉంటుంది అంటారు, ఇంకో మంత్రి నిపుణుల కమిటి వేసాం, వారు ఎక్కడ అంటే అక్కడే అంటారు, ఇంకో ఎమ్మెల్యే ఇంకా ఏదో అంటారు. ఇలా ఎవరి ఇష్టం వచ్చినట్టు వారు రాజధాని పై ప్రకటనలు చేస్తున్నా, ముఖ్యమంత్రి జగన్ మొహన్ రెడ్డి మాత్రం, ఒక్క మాట అంటే ఒక్క మాట కూడా అమరావతి పై మాట్లాడటం లేదు. అమరావతికి రుణం ఇవ్వం అని ప్రపంచ బ్యాంకు వెళ్ళిపోవటం, అమరావతిలో 40 వేల మంది కార్మికులు వెళ్ళిపోవటం, తాజాగా కేంద్ర హోం శాఖ విడుదల చేసిన ఇండియా మ్యాప్ లో, ఆంధ్రప్రదేశ్ రాజధానిగా అమరావతిని గుర్తించకపోవటం, ఇంత పెద్ద తప్పు జరిగినా, ప్రభుత్వం కేంద్రాన్ని అడగపోవటం చూస్తుంటే, అమరావతి పై ఇప్పటికీ జగన్ మనసులో ఏముందో క్లారిటీ రావటం లేదు.

అయితే, రాజధాని పై ప్రభుత్వ వైఖరిని విమర్శిస్తూ, ప్రతిపక్షాలు విమర్శలు చేస్తున్నా, ప్రభుత్వం స్పందించటం లేదు. తాజాగా జనసేన అధినేత పవన్ కళ్యాణ్ కూడా ఈ విషయం పై స్పందిస్తూ, ప్రభుత్వం పై విమర్శలు చేసారు. జగన్ మోహన్ రెడ్డికి సలహా ఇస్తూ, ఆంధ్రప్రదేశ్ రాజధానిని అమరావతి నుంచి తీసుకెళ్ళి పులివెందులలో పెట్టుకోండి అంటూ వ్యంగ్యంగా స్పందించారు పవన్. అంతే కాదు, అమరావతిలో ఉన్న హైకోర్ట్ తీసుకువెళ్ళి, కర్నూల్ లో పెట్టుకుంటే, ఇంకా సుఖంగా ఉంటుందని, జగన్ గారు పులివెందుల నుంచి, కర్నూల్ కోర్ట్ కు ప్రతి వారం వెళ్ళటానికి చాలా ఈజీగా ఉంటుందని, అందుకే పులివెందులలో రాజధాని, కర్నూల్ లో హైకోర్ట్ పెట్టుకోవాలని, పవన్ కళ్యాణ్, జగన్ ప్రభుత్వానికి సూచించారు.

అలాగే బొత్సా పై కూడా వ్యాఖ్యలు చేస్తూ, రాజధాని ఎంపిక చేసే అవకాశం వస్తే మంత్రి బొత్స సత్యన్నారాయణ, అమరావతి నుంచి రాజధాని తీసుకు వెళ్లి, చీపురుపల్లిని రాజధానిగా చేసుకుంటారని, ఇన్నాళ్ళు వీళ్ళు మంత్రులుగా ఉన్నా ఉత్తరాంధ్ర అభివృద్ధి చెందలేదని పవన్ కళ్యాణ్ విమర్శించారు. 33 వేల ఎకారాలు రైతుల త్యాగం అమరావతి అని, అమరావతిని అక్కడే ఉంచి అభివ్రుద్ధి చెయ్యాలని, పవన్ కళ్యాణ్ అన్నారు. గత ప్రభుత్వంలో అమరావతిలో ఏమైనా కుంబకోణాలు జరిగి ఉంటే, వాటి పై విచారణ జరిపి, అప్పటి ప్రభుత్వ పెద్దల పై చర్యలు తీసుకోవాలి కాని, ఇలా అసలు అమరావతినే ఇక్కడ ఉంచం అని రోజుకి ఒక్క మాట చెప్పటం, ప్రజలను గందరగోళానికి గురి చెయ్యటం, కరెక్ట్ కాదని, పవన్ కళ్యాణ్ అన్నారు.

జనసేన అధినేత పవన్ కళ్యాణ్, రెండు రోజుల క్రితం విశాఖపట్నంలో లాంగ్ మార్చ్ చేసిన సంగతి తెలిసిందే. నిన్న లాంగ్ మార్చ్ సందర్భంగా సహకరించిన అందరికీ ధన్యవాదాలు చెప్తూ, పవన్ కళ్యాణ్ ప్రెస్ కాన్ఫరెన్స్ పెట్టరు. ఈ సమావేశంలో, ఆయన మాట్లాడుతూ, ఇసుక సమస్యని తీర్చండి అని చెప్తుంటే, వైసీపీ నాయకులు, వరుస పెట్టి తనని తిడుతున్నారని పవన్ కళ్యాణ్ అన్నారు. తనని తిడితే లాభం లేదని, తనను తిడితే సమస్య పరిష్కారం అవ్వదని పవన్ కళ్యాణ్ అన్నారు. 40 లక్షల మంది ఇబ్బంది పడుతున్నారని, ఆ కష్టాలు ప్రభుత్వానికి చెప్పేందుకే విశాఖలో లాంగ్ మార్చ్ చేసామని, దీనికి సహకరించిన అందరికీ ధన్యవాదాలు చెప్పారు. ఇసుక సమస్యని పరిష్కారం చెయ్యకుండా, తనని తిడితే, ఆ 40 లక్షల మందికి ఏమి ఒరగదని అన్నారు. వైసీపీ నేతల తీరు చూస్తుంటే, వారికి ఇసుక సమస్య పరిష్కారం చెయ్యాలనే ఆలోచన లేదని, వారు ఇసుకలో ఇంకా ఏదో బెనిఫిట్‌ కోసం చూస్తున్నారని పవన్ కళ్యాణ్ అన్నారు.

ఇక వైసిపీ నేతలు తనని తిడటం పై, ఒక రేంజ్ లో విరుచుకుపడ్డారు పవన్ కళ్యాణ్. జగన్ మోహన్ రెడ్డి పేపర్ పెట్టచ్చు, ఆయన మీడియాను నడపొచ్చు, భారతీ సిమెంట్స్ వ్యాపారం చెయ్యొచ్చు, అవంతి శ్రీనివాస్ విద్యాసంస్థలు నడపవచ్చు, అందరూ అన్ని వ్యాపారాలు చేసుకుంటూ, రాజకీయం చెయ్యొచ్చు, నేను మాత్రం సినిమాల నుంచి వస్తే తప్పా అని, వైసిపీ నేతలను, పవన్ కళ్యాణ్ నిలదీసారు. నాకు సినిమా జీవితాన్ని ఇచ్చిందని, నటిస్తానో లేదో కాని, సినిమా రంగంలో ఉంటానని, అలాగే ప్రజల సమస్యల పై పోరాడుతూనే ఉంటానని పవన్ కళ్యాణ్ అన్నారు. అలాగే మంత్రి అవంతి శ్రీనివాస్ మాటల పై స్పందిస్తూ, తల్లో, తండ్రో, అన్నయ్యో ఎవరో ఒకరు పెంచితేనే పెద్ద అవుతామని పవన్ అన్నారు.

అవంతిలా తాను గడ్డంతోనే పుట్టలేదని ఎద్దేవాచేశారు. తాను అన్నయ్య దగ్గర పెరిగానని, సినిమాల్లో ఆక్టింగ్ నేనే చేసానని, అన్నయ్య వచ్చి చెయ్యలేదని పవన్ అన్నారు. మంత్రి కన్నబాబు విషయంలో కూడా, తాను ఏమి విమర్శలు చెయ్యలేదని, తాము రాజకీయాల్లోకి తీసుకువచ్చిన వ్యక్తీ, కృతజ్ఞత ఉండాలని మాత్రమే తాను మాట్లాడానని చెప్పారు. అయితే ఈ సందర్భంలో, విలేఖరులు, అంబటి రాంబాబు చేసిన విమర్శలకు ఏమంటారని అడుగగా, పవన్ కళ్యాణ్ ఒక్క ముక్కలో అంబటిని తీసి పడేసారు. చివరకు అంబటి రాంబాబు లాంటి వారి ప్రశ్నలకు కూడా సమాధానం చెప్పాలా అని పవన్‌ నవ్వుకుంటూ లేచి వెళ్లిపోయారు. అయితే ఈ విషయం పై అంబటి ఎలా స్పందిస్తారో చూడాలి.

నిన్న ఉన్నట్టు ఉండి, ఆంధ్రప్రదేశ్ రాష్ట్ర చీఫ్ సెక్రటరీని బదిలీ చేస్తూ, జగన్ ప్రభుత్వం సంచలన నిర్ణయం తీసుకున్న సంగతి తెలిసిందే. ఒక చీఫ్ సెక్రటరీని బదిలీ చెయ్యటం పై, దేశ వ్యాప్తంగా చర్చ అయ్యింది. అదీ కాక, ఆ చీఫ్ సెక్రటరీ, అంతకు ముందే, సియం ప్రిన్సిపల్ సెక్రటరీకి షోకాజ్ నోటీసు ఇవ్వటం, వెంటనే ఆయన్ను బదిలీ చెయ్యటం పై, చర్చ జరుగుతూ ఉన్న సందర్భంలో, ఇప్పుడు కేంద్రం ఎంటర్ అయ్యింది. ఎల్వీ సుబ్రహ్మణ్యం వేటుపై కేంద్రం సీరియస్ అయినట్టు తెలుస్తుంది. సీఎస్ పట్ల వ్యవహరించే తీరు ఇదేనా ? అంటూ రాష్ట్ర ప్రభుత్వాన్ని తలంటినట్టు వార్తలు వస్తున్నాయి. ఆంధ్రప్రదేశ్ ప్రభుత్వ తీరు పై ఢిల్లీ పెద్దల ఆగ్రహంగా ఉన్నారనే సమాచారంతో, రాష్ట్ర ప్రభుత్వ పెద్దలు కూడా మీమాంసలో పడ్డారు. జరిగిన విషయం మొత్తాన్ని, కేంద్ర ఇంటిలిజెన్స్ ద్వారా, కేంద్ర ప్రభుత్వం సమాచారం తెప్పించుకుని, అసలు ఈ పరిస్థితికి కారణం ఏంటి అనే విషయం పై, విశ్లేషణ చేస్తుంది.

ఇక మరో పక్క, కేంద్ర సర్వీసులకు వెళ్లే ఆలోచనలో ఎల్వీ సుబ్రహ్మణ్యం ఉన్నారు. ఎల్వీ సుబ్రహ్మణ్యం సేవలను ఉపయోగించుకోవాలని కేంద్రం భావిస్తున్నట్టు తెలుస్తుంది. ఎల్వీ సుబ్రహ్మణ్యం కు సెంట్రల్ విజిలెన్స్ కమిషన్ (సివిసి) భాద్యతలు అప్పగించే అవకాశం ఉందని ఢిల్లీ వర్గాల్లో చర్చ జరుగుతుంది. అయితే జరుగుతున్న పరిణామాలు ఏపీ అధికార యంత్రాంగంలో పెద్ద కుదుపునే కుదిపాయని చెప్పొచ్చు. ఏకంగా చీఫ్ సెక్రటరీ అయిన ఎల్వీ పై వేటుతో ఐ ఏ ఏస్, ఐ పీ ఎస్ వర్గాల్లో ఆందోళన వ్యక్తం అవుతుంది. ఏ నిమిషాన ఏమి జరుగుతుందో అని తీవ్ర వత్తిడిలో అధికార యంత్రాంగం ఉంది. మాజీ ఐఏఎస్ అధికారులు కూడా, ఎల్వీకి మద్దతుగా నిలుస్తు, ప్రభుత్వ చర్యను తప్పు బడుతున్నారు.

ఇక మరో పక్క ఎల్వీ బదిలీ పై, జగన్ పై విమర్శలు వస్తూనే ఉన్నాయి. ఎల్వీకి మద్దతుగా బ్రాహ్మణ సంఘాలు గళమెత్తుతున్నాయి. ఆయన క్రీస్టియన్ మతానికి చెందిన వారిని, తిరుమల సహా వివిధ గుడిల నుంచి, విధులు నిర్వహించకుండా, పంపించారని, అదే వారికి కోపం అని, దానికి బహుమతిగానే ఎల్వీ బదిలీ అంటూ, విమర్శలు చేస్తున్నారు. చిలుకూరు బాలాజీ దేవస్థానం ప్రధాన అర్చకులు సీఎస్ రంగరాజన్ కూడా ఇదే విషయమై, జగన్ ప్రభుత్వాన్ని తూర్పారబట్టారు. క్రిస్టియన్ మిషనరీ మాఫియా ఒత్తిడితోనే ఎల్వీని బదిలీ చేశారన్న వదంతులు వ్యాప్తి చెందుతున్నాయని, బదిలీకి గల నిజమైన కారణాలను ఏపీ సీఎం జగన్ వెల్లడించాలని ఆయన డిమాండ్ చేశారు.