news

సార్వత్రిక ఎన్నికల ఫలితాలు రాగానే స్థానిక సంస్థల ఎన్నికలు ఉంటాయని తెదేపా అధినేత చంద్రబాబు నాయుడు అన్నారు. స్థానిక పోరుకు సిద్దంగా ఉండాలని పార్టీ శ్రేణులకు సీఎం పిలుపునిచ్చారు. పార్టీ నేతలతో చంద్రబాబు టెలికాన్ఫరెన్స్‌ నిర్వహించారు. అధికారం కోసం ప్రతిపక్షం ఎన్ని అరాచకాలు చేయాలో అన్నీ చేసిందని మండిపడ్డారు. అయినా అన్నింటినీ సమర్థంగా ఎదుర్కున్నామన్నారు. ప్రజాస్వామ్యం కోసం తాము చేసే పోరాటం అందరిలో స్ఫూర్తి నింపుతోందన్నారు. ఎవరు ఎంత దుష్ర్పచారం చేసినా మళ్లీ అధికారంలోకి వచ్చేది తామేనని స్పష్టం చేశారు. ఈవీఎంలపై తమ పోరాటం ఈనాటిది కాదని చంద్రబాబు తెలిపారు. ఎన్నికలు ఐదేళ్లకు ఒకసారి వచ్చేవని.. సార్వత్రిక ఎన్నికలు అవ్వగానే స్థానిక సంస్థల ఎన్నికలు ఉంటాయని వాటికి సిద్ధంగా ఉండాలని నేతలకు సూచించారు.

తెలంగాణలో ఇంటర్‌ పరీక్షలు కూడా సరిగా నిర్వహించలేదన్న చంద్రబాబు.. ఇంటర్‌ పరీక్షలపై తెలంగాణ సీఎం సమీక్ష పెడితే ఎవరూ నోరు మెదపరని, ఇక్కడ తాము ఏదైనా సమీక్ష పెడితే మాత్రం నానా యాగీ చేస్తారని దుయ్యబట్టారు. ఈసీ ఇష్టానుసారంగా వ్యవహరిస్తే పాలన అస్తవ్యస్తం అవుతుందని సీఎం అన్నారు. ఎన్నికల సంఘం పరిధిలో... ఎన్నికల విధుల్లో పాల్గొనేవారు మాత్రమే పని చేయాలన్నారు. మిగిలిన వాళ్లు ప్రభుత్వం కిందే పనిచేయాలని చంద్రబాబు పేర్కొన్నారు. ఎవరి పరిధిలో వారు పని చేయాలని.. ఈసీ ఇష్టానుసారం వ్యవహరిస్తే పాలన అస్తవ్యస్తం అవుతుందన్నారు. ఈ ఐదేళ్లు అధికారులు తమకెంతో సహకరించారని.. అధికారుల సహకారంతోనే అనేక రంగాల్లో తాము నంబర్ 1గా నిలిచామన్నారు.

అలాంటిది ఇప్పుడు ఈసీ రూపంలో... అధికారుల మధ్య చీలిక తెచ్చే ప్రయత్నం చేస్తున్నారని చంద్రబాబు విమర్శించారు. కులం, మతం, వ్యక్తిగత అజెండాలతో... అధికారుల మధ్య చీలిక తెచ్చేందుకు కుట్ర పన్నుతున్నారన్నారు. దీనిని కూడా సమర్థంగా తిప్పికొడదామని చంద్రబాబు పేర్కొన్నారు. ప్రజాస్వామ్యాన్ని కాపాడేందుకు... తాము చేసే పోరాటం అందరిలో స్ఫూర్తి నిoపుతోందని చంద్రబాబు పేర్కొన్నారు. తమ పోరాటాన్ని ఎవరు ఎలా ప్రచారం చేసినా మళ్లీ అధికారంలోకి వచ్చేది తామేనన్నారు. ఈవీఎంలపై తమ పోరాటం ఈనాటిది కాదన్నారు. దుర్మార్గుడు అధికారంలోకి రావటానికి... ఎన్ని అరాచకాలు చేయాలో అన్నీ చేశాడని చంద్రబాబు పేర్కొన్నారు. ఎన్నికలు పూర్తి కావడంతో ప్రత్యర్ధుల కుట్రలు ముగియలేదని.. ఫలితాలు వెల్లడి అయ్యేదాకా వైసీపీ, బీజేపీ కుట్రలు కొనసాగుతాయన్నారు. కౌంటింగ్ ఏజెంట్లకు నియోజకవర్గాల వారీగా శిక్షణ ఇవ్వాలని సూచించారు. పార్లమెంటు, అసెంబ్లీ అభ్యర్ధుల ఓట్లలో తేడాలు ఉన్నాయని.. కౌంటింగ్ పూర్తయ్యేదాకా అందరూ అప్రమత్తంగా ఉండాలని చంద్రబాబు పేర్కొన్నారు.

ఇప్పటికే తీవ్ర విమర్శలను ఎదుర్కొంటున్న ఎలక్ట్రానిక్‌ ఓటింగ్‌ యంత్రాలు (ఈవీఎం) మరోసారి వివాదాలకు కేంద్ర బిందువయ్యాయి. లోక్‌సభ ఎన్నికల మూడో దశ పోలింగ్‌లో కూడా పలు రాష్ట్రాల్లో ఇవి మొరాయించాయి. దీంతో నిర్ణీత సమయం సాయంత్రం 5 గంటల తర్వాత కూడా పలు ప్రాంతాల్లో ఓటు హక్కు వినియోగించుకోవటం కోసం ప్రజలు బారులు తీరాల్సి వచ్చింది. ఉత్తర్‌ప్రదేశ్‌, కేరళలలో అత్యధికంగా సాంకేతిక సమస్యలు ఎదురయ్యాయి. ఈవీఎంలో తలెత్తిన లోపాలపై యూపీలో సమాజ్‌వాదీ పార్టీ నేతలు మండిపడ్డారు. ఎన్నికల సంఘానికి ఫిర్యాదు చేశారు. నిర్వహణపరమైన లోటుపాట్లు ఎలా ఉన్నప్పటికీ మంగళవారం పోలింగ్‌ కేంద్రాలకు ఓటర్లు భారీగానే తరలివచ్చారు.

ఈసీ అధికారులు మంగళవారం రాత్రి 8 గంటలకు వెల్లడించిన సమాచారం ప్రకారం 65.61 శాతం ఓట్లు పోలయ్యాయి. అయితే, కొన్నిచోట్ల అప్పటికీ పోలింగ్‌ జరుగుతున్నందున ఓటింగ్‌ శాతం మరింత పెరిగే అవకాశం ఉందని తెలిసింది. చెదురుమదురు ఘటనలు మినహా మంగళవారం 116 లోక్‌సభ స్థానాల పరిధిలో దాదాపు ప్రశాంతంగానే పోలింగ్‌ ముగిసింది. మొత్తం ఏడు దశల్లో జరుగుతున్న సార్వత్రిక ఎన్నికల్లో మంగళవారంతో 302 లోక్‌సభ స్థానాల్లో (అనంత్‌నాగ్‌ మినహా)పోలింగ్‌ పూర్తయ్యింది. ఉత్తర్‌ప్రదేశ్‌లో ఈవీఎంలపై ఫిర్యాదులు వెల్లువెత్తాయి. మంగళవారం ఎన్నికలు జరిగిన స్థానాల్లో ఎస్పీ వ్యవస్థాపకుడు ములాయంసింగ్‌ యాదవ్‌, భాజపా అభ్యర్థిని సినీనటి జయప్రద పోటీ చేస్తున్న నియోజకవర్గాలు ఉన్నాయి. పోలింగ్‌ ప్రారంభకావటంతోనే ఈవీఎంలలో సమస్యలు తలెత్తటంతో 350 యంత్రాలను అప్పటికప్పుడు మార్చారు.

ఓటింగ్‌ యంత్రాల నిర్వహణ లోపంపై సమాజ్‌వాదీ పార్టీ ఎన్నికల సంఘం అధికారులకు ఫిర్యాదు చేసింది. ఈవీఎంలలోని లోపాలను సత్వరమే సరిదిద్ది పోలింగ్‌ నిర్వహించినట్లు ముఖ్య ఎన్నికల అధికారి ఎల్‌.వెంకటేశ్వర్లు లఖ్‌నవూలో తెలిపారు. కేరళలో కనీసంగా 35 చోట్ల, బిహార్‌, కర్ణాటక, గోవాలలోని పలు పోలింగ్‌ కేంద్రాల్లోని ఈవీఎంలలో సాంకేతికపరమైన ఇబ్బందులు తలెత్తటంతో ఓటర్లకు నిరీక్షణలు తప్పలేదు.గుజరాత్‌లోని మొత్తం 26 లోక్‌సభ స్థానాలకు మంగళవారం పోలింగ్‌ జరుగగా 63.67 శాతం మంది ఓటర్లు తమ హక్కును వినియోగించుకున్నారు. గుజరాత్‌లోని పలు కేంద్రాల్లో ప్రధాని నరేంద్ర మోదీ, భాజపా అధ్యక్షుడు అమిత్‌ షా, ఆ పార్టీ అగ్రనేత ఆడ్వాణీ, కాంగ్రెస్‌ సీనియర్‌ నేత అహ్మద్‌ పటేల్‌ వంటి ప్రముఖులు ఓటు వేశారు. కేరళలో 71.67 శాతం ఓట్లు పోలయ్యాయి. కాంగ్రెస్‌ అధ్యక్షుడు రాహుల్‌ గాంధీ పోటీ చేస్తున్న వయనాడ్‌ స్థానంలో సాయంత్రం 6 గంటల సమయానికి అత్యధికంగా 76.21శాతం ఓటింగ్‌ నమోదయ్యింది. 2014 లోక్‌సభ ఎన్నికల్లో ఈ స్థానంలో పోలింగ్‌ శాతం 73.2 మాత్రమే.

ఎన్నికలకు మూడు నెలల ముందు రాష్ట్రంలో ప్రవేశపెట్టిన కొత్త పథకాలకు నిధుల విడుదలపై రాష్ట్ర ప్రభుత్వ ప్రధాన కార్యదర్శి ఎల్వీ సుబ్రహ్మణ్యం ఆరా తీస్తున్నారు. 2018-19లో బడ్జెట్‌లో లేని అన్నదాతా-సుఖీభవ, పసుపు-కుంకుమ, సామాజిక పింఛన్ల మొత్తం రెట్టింపుపథకాల కోసం.. ఆ బడ్జెట్‌లో నిధులు కేటాయించిన పనులను, బిల్లులను ఎందుకు పక్కన పెడుతున్నారని ఆర్థిక శాఖ అధికారులను ఆయన ప్రశ్నిస్తున్నట్లు తెలిసింది. బడ్జెట్‌లో ఇతర పనులకు కేటాయించిన నిధులను కొత్త పథకాల కోసం ఎందుకు మళ్లిస్తున్నారని వివరణ అడుగుతున్నట్లు సమాచారం. గత వారమే పెండింగ్‌ బిల్లులపై సమీక్ష నిర్వహించిన సీఎస్‌.. మంగళవారం మళ్లీ వాటిపై వరుస సమీక్షలు చేశారు. మొదట ఉదయం నుంచి మధ్యాహ్నం వరకు సమీక్షించి.. మరికొన్ని వివరాలు తీసుకురావాలని ఆర్థిక శాఖ అధికారులను ఆదేశించారు.

వారు ఆ వివరాలతో మధ్యాహ్నం మళ్లీ వచ్చారు. అనంతరం తిరిగి వచ్చి సీఎస్‌ మరికొన్ని వివరాలు అడుగుతున్నారంటూ ఆర్థిక శాఖ కార్యాలయంలో హడావుడి చేయడం కనిపించింది. ఎన్నికలకు ముందు ప్రభుత్వం అన్నదాతా-సుఖీభవ, పసుపు-కుంకుమ, పింఛన్ల రెట్టింపు పథకాలను తీసుకొచ్చింది. ఈ ప్రతిపాదనలన్నిటినీ కేబినెట్‌లో పెట్టి ఆమోదం పొందాకే వాటిని అమల్లోకి తెచ్చారు. 2018 మార్చి 31తో ఆర్థిక సంవత్సరం ముగిసిపోయింది. ఏప్రిల్‌ 1 నుంచి కొత్త ఆర్థిక సంవత్సరం ప్రారంభమైంది. అంతకుముందే 4 నెలల కాలానికి ఓటాన్‌ అకౌంట్‌ బడ్జెట్‌ను శాసనసభ ఆమోదించారు. అందులో ఈ కొత్త పథకాలకూ చేర్చారు. పసుపు-కుంకుమ మూడో విడత, అన్నదాతా-సుఖీభవ రెండో విడత చెల్లింపులను ఏప్రిల్‌ 1 నుంచి ప్రారంభమైన కొత్త ఆర్థిక సంవత్సరంలో చెల్లించారు.

ఏప్రిల్‌లో కేంద్రం నుంచి జీఎస్టీ రూపంలో రాష్ట్రానికి రూ.7,500 కోట్ల అడహాక్‌ గ్రాంటు వచ్చింది. మిగులు ఐజీఎస్టీ నిధులను కేంద్రం అన్ని రాష్ట్రాలకు పంచింది. ఈ నిధులను సంక్షేమ పథకాలకు ఎందుకు ఖర్చు పెట్టారని సీఎస్‌ ఆర్థిక శాఖ అధికారులను అడిగినట్లు తెలిసింది. గత ఆర్థిక సంవత్సరం బడ్జెట్‌లో లేని ఈ పథకాలకు ఏ విధానం ప్రకారం చెల్లింపులు చేశారని ప్రశ్నించినట్లు సమాచారం. ఈ పథకాల కింద ఎంత మంది లబ్ధి పొందారో సమాచారమివ్వాలని ఆదేశించారు. ఈ పథకాలకు కేబినెట్‌ ఆమోదం ఉన్నా.. నియమ నిబంధనల ప్రకారమే నిధులు విడుదలయ్యాయా లేదా అని సీఎస్‌ అడిగినట్లు తెలిసింది. మంగళవారం నాటికి రాష్ట్రంలో రూ.14,400 కోట్ల పెండింగ్‌ బిల్లులున్నాయి. పెండింగ్‌ బిల్లుల అంశంపై సీఎస్‌ నిర్వహించిన సమీక్షలో ఆర్థిక శాఖ అధికారులు ఈ వివరాలు వెల్లడించారు.