news

ఆంధ్రప్రదేశ్ ప్రభుత్వం పై, అధికారుల పై కులం అంటగట్టి, జగన్ మోహన్ రెడ్డి చేస్తున్న నీచ రాజకీయం రోజు రోజుకీ ఎక్కువ అవుతుంది. దీని పై తెలుగుదేశం పార్టీ కూడా అంతే ధీటుగా స్పందిస్తుంది. ప్రభుత్వం 40 మందికి డీఎస్సీ ప్రమోషన్లు ఇస్తూ.. ఒకే సామాజిక వర్గానికి కట్టబెట్టారని వైసీపీ అధ్యక్షుడు జగన్మోహన్ రెడ్డి ఆరోపించారని టీడీపీ నేత దేవినేని ఉమ మండిపడ్డారు. బుధవారం ఆయన మీడియాతో మాట్లాడుతూ జగన్‌కు దమ్ము, ధైర్యం ఉంటే.. ఆ 40 మంది పేర్లు, ఏ సామాజిక వర్గానికి చెందినవాళ్లో.. అన్ని వివరాలతో సహా మీడియా ముందు పెట్టాలని జగన్‌కు సవాల్ చేశారు. ఎవరు ఎప్పుడు ప్రమోషన్ ఇచ్చారో మొత్తం మీడియా ముందు పెట్టాలని డిమాండ్ చేశారు.

మీడియాపై నమ్మకం లేకపోతే.. అవినీతి పత్రిక అయిన సాక్షిలో వివరాలు రాయాలన్నారు. దుర్మర్గంగా ప్రభుత్వంపై బురద జల్లుతున్నారని దేవినేని ఉమ మండిపడ్డారు. నిన్న జగన్ మీడియాతో మాట్లాడుతూ స్పీకర్ కోడెలే చొక్కా చింపుకున్నారని అన్నారని.. చొక్కాలు చింపుకోవడం, క్రిమినల్ వ్యక్తిత్వం వైసీపీ నేతలకే ఉంటుందని దేవినేని ఉమ తీవ్ర స్థాయిల ఆరోపించారు. నిన్న గవర్నర్‌ దగ్గర జగన్‌ చెప్పినవన్నీ అబద్దాలేనని అన్నారు. పోలింగ్ రోజే జగన్‌ ఓటమిని ఒప్పుకున్నారని అన్నారు. బీజేపీ సహకారంతో జగన్‌ మళ్లీ కుట్రలు చేస్తున్నారన్నారని ఆరోపించారు. సీఎస్‌, ఎస్పీలను బదిలీ చేస్తే రిటైర్డ్‌ అధికారులు ఎక్కడున్నారని ప్రశ్నించారు. రిటైర్డ్‌ అధికారులు ఎందుకు నోరు మెదపలేకపోయారన్నారు.

హైదరాబాద్‌ కేంద్రంగా కుట్రలు జరుగుతున్నాయని, ఆర్థిక ఉగ్రవాది పక్కన చేరి సన్నాయి నొక్కులు నొక్కుతున్నారని దేవినేని ఉమ విమర్శించారు. దుర్మార్గాలు చేసే వారికి సహకరిస్తే ప్రజలు తగిన బుద్ధి చెబుతారన్నారు. ఎన్నికల ఫలితాలు చూసి తట్టుకునేందుకు జగన్‌ సిద్ధంగా లేరని, ఫైనల్ పేమెంట్ తీసుకున్న ప్రశాంత్ కిషోర్ జగన్ చేతిలో సీఎం అనే నేమ్ ప్లేట్ పెట్టి వెళ్లాడని విమర్శించారు. 11వ తేదీ సాయంత్రమే జగన్ తన ఓటమిని అంగీకరించారని పేర్కొన్నారు. కౌంటింగ్ వరకు క్యాడర్‌ని కాపాడుకునేందుకు జగన్ అనేక తంటాలు పడుతున్నారని ఉమా అన్నారు. స్పీకర్‌పై దాడి చేసింది కాక గవర్నర్‌కు అన్నీ అబద్ధాలే చెప్పారని ఆగ్రహం వ్యక్తం చేశారు. చొక్కాలు చించుకునే సంస్కృతి జగన్‌దేనని విమర్శించారు.

వైఎస్సార్ కాంగ్రెస్ పార్టీ నేత అంబటి రాంబాబు పై ఏపీ స్పీకర్ కోడెల శివప్రసాద్ మండిపడ్డారు. కోడెల శివప్రసాద్‌కు అంబటి రాంబాబు పోటీనా అంటూ కోడెల ఆగ్రహం వ్యక్తం చేశారు. టీడీపీకి వైసీపీ పోటీనా?, ఆశపడొచ్చు... దురాశ ఉండకూడదని కోడెల శివప్రసాద్ అన్నారు. మీరేంటి... మీ చరిత్ర ఏంటి? అని, జనం ఓటేసి గెలిపించిన వాళ్లు అసెంబ్లీ నుంచి ఎందుకు పారిపోయారని వైసీపీ నేతలను కోడెల ప్రశ్నించారు. ఓటేసినవారికి మీరెప్పుడైనా సమాధానం చెప్పారా?, ప్రజాస్వామ్యం అంటే ఏమిటో తెలుసా మీకు? అని కోడెల మండిపడ్డారు. భౌతికంగా దాడిపై వైసీపీ ప్రజలకు వివరణ ఇవ్వాలని కోడెల డిమాండ్ చేశారు. భయభ్రాంతులకు గురి చేసి...ఎన్ని ఎత్తుగడలేసినా ఓటర్లు చెక్కు చెదరలేదని, ఆంధ్రా ఓటర్లకు జేజేలు పలుకుతున్నానని కోడెల శివప్రసాద్‌ స్పష్టం చేశారు.

ఏపీలో చూడబోతున్నది టీడీపీ సునామీ కోడెల అన్నారు. రాష్ట్రం బాగుండాలి, మనం బాగుండాలనుకునే ఏ ఒక్కరూ కూడా జగన్‌కు ఓటేయరని కోడెల తెలిపారు. ఏపీని టీడీపీ స్వీప్‌ చేస్తుందని, జగన్‌ ఎవరి మోచేతి నీళ్లు తాగుతున్నారో ఆంధ్రవాళ్లకు తెలుసు కోడెల స్పష్టం చేశారు. ఆంధ్రవాళ్లు కుక్కలని తిట్టిన కేసీఆర్‌కు వత్తాసు పలుకుతారా? అని జగన్‌ను కోడెల ప్రశ్నించారు. పోలింగ్‌ రోజున రాత్రి 9గంటలైనా వందలాది మంది క్యూలైన్లలో వేచి ఉన్నారని, అలాంటి ఓటర్లందరికీ జేజేలు పలుకుతున్నట్టు చెప్పారు. మహిళలు, పింఛనుదారులు పెద్ద సంఖ్యలో ఓటు వేశారని.. ఈ ఎన్నికల్లో తెదేపాకు ఓట్ల సునామీ రాబోతుందని వ్యాఖ్యానించారు. ఐదేళ్ల తర్వాత ఆయన తొలిసారిగా మంగళవారం రాత్రి గుంటూరులోని తెదేపా కార్యాలయానికి వచ్చారు. ఈ సందర్భంగా ఏర్పాటు చేసిన మీడియా సమావేశంలో మాట్లాడుతూ.. తనపై వైకాపా నేతలు ఫిర్యాదు చేయడంపై తీవ్రస్థాయిలో మండిపడ్డారు.

‘‘ఇనిమెట్లలోని పోలింగ్‌ బూత్‌లో వైకాపా వాళ్లు చేసిన తప్పుడు పని మీరూ చేయొద్దని తెదేపా కార్యకర్తలకు చెప్పా. ఆ సమయంలో ఓర్పుతో వ్యవహరించాం. దాడిచేసి పశ్చాత్తాప పడాల్సిన వారు ఎదురు ఫిర్యాదు చేస్తారా? చంద్రబాబుకు జగన్‌కు పోటీయా? వైకాపా తెదేపాకు ఎప్పుడూ పోటీయే కాదు. ఎవరైనా రాజకీయ పార్టీలు పెట్టొచ్చు.. అధికారం కోరుకోవచ్చు. తప్పులేదు. కానీ అసెంబ్లీకి రానివాళ్లకు జీతం తీసుకొనే హక్కు ఎక్కడుంది. జీతాలు ఎందుకు ఇస్తున్నారని ప్రజలు అడుగుతున్నారు. స్పీకర్‌గా నేను నిష్పక్షపాతంగా పనిచేశాను. సంప్రదాయప్రకారం వ్యవహరించాను. కానీ, 40 ఏళ్లలో తొలిసారి భౌతిక దాడి జరిగింది. ప్రజలకు వైకాపా క్షమాపణలు చెప్పాలి. నాపై దాడి పథకం ప్రకారమే జరిగింది. వైకాపా నేతలు ఎలాంటివాళ్లో ప్రజలందరికీ తెలియాలి. ఇలాంటి దాడులను అందరూ ఖండించాలి’’ అని కోడెల అన్నారు.

రాష్ట్రవ్యాప్తంగా ఐదు పోలింగ్ బూత్‌లలో రీపోలింగ్ జరగనుంది. నెల్లూరు జిల్లాలో రెండు, గుంటూరు జిల్లాలో రెండు, ప్రకాశం‌లో ఒక చోట రీపోలింగ్‌కి ఎన్నికల సంఘానికి ఆయా కలెక్టర్లు నివేదికలు పంపారు. దీంతో ఈ ఐదు చోట్ల రీపోలింగ్‌ నిర్వహించాలని రాష్ట్ర ఎన్నికల సంఘం కూడా కేంద్ర ఎన్నికల సంఘానికి సిఫారసు చేసింది. ఇందుకు అంగీకరించిన కేంద్ర ఎన్నికల సంఘం... రీ-పోలింగ్ ఎప్పుడు నిర్వహించేదీ మంగళవారం (ఏప్రిల్ 16) రాత్రికి ప్రకటిస్తామని తెలిపింది. ఈ ఐదు పోలింగ్ కేంద్రాలకు సంబంధించి ఆయా జిల్లా కలెక్టర్లు ఇచ్చిన స్క్రూటినీ రిపోర్టులను రాష్ట్ర ఎన్నికల సంఘం పరిశీలించింది.

ఈ పోలింగ్ కేంద్రాల్లో హింసాత్మక ఘటనలకు తోడు... ఈవీఎంల మొరాయింపు ఇతర సాంకేతిక సమస్యలు తలెత్తాయని కలెక్టర్లు నివేదికలు ఇచ్చినట్లు తెలిసింది. వాటి ఆధారంగా రాష్ట్ర ఈసీ... కేంద్ర ఎన్నికల సంఘానికి సిఫారసు చేసింది. శాంతి భద్రతల సమస్య తలెత్తిన ఈ ఐదు కేంద్రాల్లో ఓటర్లు తమ ఓటు హక్కును సరిగా వినియోగించుకోలేకపోయారని జిల్లాల కలెక్టర్లు స్క్రూటినీ రిపోర్టుల్లో తెలిపారు. అందువల్ల మరోసారి ఎన్నికలు జరిపేందుకు ఈసీఐ సిద్ధపడింది. ఇదే సమయంలో... ఏపీలోని ఆత్మకూరు, మచిలీపట్నం, విశాఖలో వీవీ ప్యాట్ స్లిప్పులు, ఈవీఎంల తరలింపుపై అధికారులపై చర్యలకు ఈసీ సిద్ధమవుతున్నట్లు తెలుస్తోంది.

ఇందుకు సంబంధించి అధికారిక ఉత్తర్వులు రానున్నాయి. అటు నెల్లూరు జిల్లా ఆత్మకూరులో వీవీ ప్యాట్ స్లిప్పుల కలకలంపై ఈసీ సీరియస్ అయింది. ఆర్వో, ఏఆర్వో‌లపై ఎఫ్ఐఆర్ నమోదు చేయాలని పోలీసులను ఆదేశించింది. ఈ ఘటనలో నిజా నిజాలు పోలీస్ విచారణలో నిగ్గుతేలుతాయని రాష్ట్ర ఎన్నికల సంఘం అధికారి గోపాలకృష్ణ ద్వివేది చెప్పారు. ఎన్నికల విధుల్లోని సిబ్బంది పొరపాట్లు చేస్తే శిక్ష తప్పదని ఆయన హెచ్చరించారు.