news

వైకాపాకు నెల్లూరు జిల్లాలో ఎదురుదెబ్బ తగిలింది. నెల్లూరు జడ్పీ ఛైర్మన్‌, వైకాపా నేత బొమ్మిరెడ్డి రాఘవేందర్‌రెడ్డి ఆ పార్టీకి రాజీనామా చేశారు. వెంకటగిరి నియోజకవర్గం బాధ్యతలను మరొకరికి అప్పగించడంతో బొమ్మిరెడ్డి అసంతృప్తి వ్యక్తం చేశారు. ఈ సందర్భంగా ఆయన మాట్లాడుతూ పార్టీ అధ్యక్షుడు జగన్‌ ఒక నియంతలా వ్యవహరిస్తున్నారని ఆరోపించారు. జగన్‌ వైఖరి వల్లే మనస్తాపం చెంది పార్టీని వీడుతున్నట్లు పేర్కొన్నారు. తనకు జరిగిన అవమానం ఇంకెవరికీ జరగకూడదనే ఈ నిర్ణయం తీసుకున్నట్లు బొమ్మిరెడ్డి వెల్లడించారు. ఎన్నికల్లో పోటీకి రూ.50 కోట్లు కావాలి.. అంత డబ్బు నువ్వు పెట్టగలవా? అని జగన్‌ తనను అడిగినట్లు బొమ్మిరెడ్డి తెలిపారు.

రాజకీయ అనుభవం కంటే డబ్బున్నవారికే ప్రాధాన్యం ఇస్తున్నారని ఆరోపించారు. ఆనం పార్టీలో చేరగానే తనను బాధ్యతల నుంచి తప్పించారన్నారు. పార్టీలో తనకు కనీస గౌరవం కూడా ఇవ్వడం లేదని ఆయన విమర్శించారు. ‘ఆనం రూ.50 కోట్లు ఖర్చు పెట్టగలరు...నువ్వు అంత ఖర్చు పెట్టగలవా’ అని జగన్ అడిగారని తెలిపారు. జగన్ నాయకత్వంలో పనిచేసేకంటే ఇంట్లో ఉండటం మేలని వ్యాఖ్యానించారు. ఆత్మాభిమానం చంపుకొని పనిచేయాల్సిన అవసరం లేదని రాఘవేందర్‌ రెడ్డి స్పష్టం చేశారు.

మరో పక్క అదే నెల్లూరు జిల్లాలో, నుడా చైర్మన్‌ కోటంరెడ్డి శ్రీనివాసులురెడ్డి ఎమ్మెల్యే అనిల్‌ పై ఫైర్ అయ్యారు. నెల్లూరులోని టీడీపీ జిల్లా కార్యాలయంలో ఆయన విలేఖరులతో మాట్లాడుతూ అనిల్‌ కాంగ్రెస్‌ పార్టీలో ఉన్నప్పుడు అధికారంలో ఉన్నారని, అప్పుడు నగరంలో కనీసం రెండు బోర్లయినా వేయించగలిగారా!? అని ప్రశ్నించారు. పేదలు నివసించడానికి పనికిరాని ఇళ్లను నిర్మించడంలో భాగస్వామిగా ఉన్న వ్యక్తి నేడు అత్యాధునికంగా పేదల కోసం నిర్మిస్తున్న ఇళ్లపై విమర్శలు చేయడం దిగజారుడు తనానికి నిదర్శనమని ధ్వజమెత్తారు. యూజీడీ, తాగునీటి పథకాల పనులు టీడీపీ ప్రభుత్వ హయాంలో జరుగుతున్నాయన్న విషయాన్ని ఎమ్మెల్యే గుర్తుపెట్టుకోవాలని హితవు పలికారు. నగరంలోని పేదల కోసం నిర్మించిన ఇళ్లు వారికి దక్కకుండా దుర్మార్గంగా వైసీపీ నాయకులు కోర్టుకు వెళ్లారని విమర్శించారు.

ప్రకాశం జిల్లాలోని నల్లమల అటవీ ప్రాంతంలో సాగుతున్న వెలిగొండ ప్రాజెక్టు పనులపై ఝార్ఖండ్ రాష్ట్రానికి చెందిన భాజపా ఎంపీ.. కేంద్ర అటవీ పర్యావరణ మంత్రిత్వశాఖ కార్యదర్శికి ఫిర్యాదు చేసినట్లు సమాచారం. నల్లమల అటవీ ప్రాంతంలో వన్య ప్రాణుల జీవనానికి భంగం వాటిల్లకుండా ఉండేందుకు ఈ ప్రాజెక్టు పనులు ఎలాంటి పేలుళ్లు, ధ్వని కాలుష్యం లేకుండా నిర్వహించాలని పేర్కొంటూనే అప్పట్లో అటవీ పర్యావరణ మంత్రిత్వశాఖ అనుమతులు ఇచ్చింది. ఈ కారణంగానే వెలిగొండ టన్నెళ్లు పనులు ప్రత్యేకంగా విదేశాల నుంచి రప్పించిన టన్నెల్ బోరింగు మిషన్ల సాయంతో చేస్తున్నారు.

ఇందుకు అదనపు మొత్తాలు ఖర్చు పెడుతున్నారు. వెలిగొండ టన్నెళ్లు కాకుండా శ్రీశైలం జలాశయం నుంచి టన్నెళ్లను కలిపి హెడ్ రెగ్యులేటర్ పనులు కూడా వేరే ఏజన్సీ సాయంతో విడిగా పనులు అప్పచెప్పి చేయిస్తున్నారు. ఇక్కడ పర్యావరణ నిబంధనలు పాటించడం లేదంటూ ఆ భాజపా ఎంపీ ఫిర్యాదు చేసినట్లు సమాచారం. దీంతో చెన్నైకి చెందిన అటవీ పర్యావరణ ప్రాంతీయ కార్యాలయం పరిశోధన అధికారి రెండ్రోజుల పాటు ఆంధ్రప్రదేశ్లో పర్యటించి వెలిగొండ పనులను తనిఖీలు చేశారు.

వెలిగొండ పనులు జరిగే శ్రీశైలం జలాశయం ప్రాంతానికి వెళ్లి స్వయంగా ఆయన పరిశీలన జరిపినట్లు తెలిసింది. నల్లమల అటవీ ప్రాంతంలో వన్య ప్రాణులకు, జంతువులకు ఎలాంటి అవరోధం కలగకుండా ఉండేందుకు కనీసం హెడ్ రెగ్యులేటర్ ప్రాంతంలో క్యాంపు ఏర్పాటు చేసుకోవడానికి కూడా వీలు లేదు. ఆ పరిశోధన అధికారి జలవనరులశాఖ కార్యదర్శి శశి భూషణ్ కుమార్, ఇంజినీర్ ఇన్ చీఫ్ ఎం. వెంకటేశ్వరరావులను అమరావతి సచివాలయంలో కలిసి చర్చలు జరిపినట్లు తెలిసింది. వెలిగొండ పనులపై ఈ అధికారుల నుంచి సమాచారం సేకరించారు. అసలు ఎక్కడో ఝార్ఖండ్ లో బీజేపీ ఎంపీకి, మన ప్రకాశం జిల్లా ప్రాజెక్ట్ తో ఏం పని ?

మొన్న పాల వ్యాన్ కు హెరిటేజ్ స్టిక్కర్ అంటించి, ఎర్ర చందనం అక్రమ రవాణా చేస్తూ ఒక దొంగల ముఠా దొరికిన విషయం తెలిసిందే. అందరూ అనుకునట్టే, 2004 నుంచి ఎర్ర చందనం అక్రమంగా స్మగ్గ్లింగ్ చేస్తున్న ముఠానే దీని వెనకాలా ఉంది అని అప్పట్లో పోలీసులు తేల్చారు. పాల వ్యాన్ కు హెరిటేజ్ స్టికర్ వేసి అక్రమ రవాణా చేసిన కేసులో ఆరుగురు స్మగ్లర్లను చిత్తూరు రెడ్ శ్యాండిల్ ట్రాక్స్ ఫోర్స్ కార్యదళం అరెస్ట్ చేసింది. వారిచ్చిన సమాచారంతో, ప్రధాన నిందితుడు రాజాశేఖర్ అలియస్ చిన్నాను పోలీసులు అరెస్ట్ చేశారు. ఇతను, జగన్ గారి రైట్ హ్యాండ్ అయిన ఎర్ర చందనం సుమ్గ్గ్లింగ్ డాన్ కొల్లంగంగి రెడ్డి ప్రధాన అనుచరుడు. ఈ కొల్లంగంగి రెడ్డి, చంద్రబాబు మీద అలిపిరి దాడి చేసిన వారిలో ఒకడు.

అయితే ఇప్పుడు తాజాగా మళ్ళీ ఇలాంటి సంఘటనే జరిగింది. నిన్నటి వరకు పోలీస్‌, ప్రెస్‌, పాల వ్యాన్, ప్రజాప్రతినిధులు, తితిదే తదితర పేరిట స్టిక్కర్లున్న వాహనాల్లోనూ వచ్చిన ఎర్రదొంగలు, ఇప్పుడు ఏకంగా ఆర్మీ స్టిక్కర్‌ను వినియోగించడం కలకలం రేపింది. శుక్రవారం టాస్క్‌ఫోర్స్‌ దాడుల్లో వెలుగు చూసింది. ఆ మేరకు ఎర్రదుంగలు స్వాధీనం చేసుకోగా, స్మగ్లర్లు పరారయ్యారు. తిరుపతి అర్బన్‌ పరిధిలోని జీవకోన బీడీ కాలనీ వద్దకు శుక్రవారం వేకువ జామున 5 గంటల ప్రాంతంలో ఆర్మీ స్టిక్కరున్న వాహనం వచ్చింది. అదే సమయంలో అక్కడ కూంబింగ్‌ నిర్వహిస్తున్న టాస్క్‌ఫోర్స్‌ ఆర్‌ఎస్‌ఐ విజయనరసింహులు గుర్తించి, ఆర్మీ స్టిక్కర్‌ ఉండడంతో పట్టించుకోలేదు.

తర్వాత అనుమానంతో కొంతదూరం అనుసరించగా, వాహనంలోని వ్యక్తులు ఎర్రదుంగలను లోడ్‌ చేయడం గుర్తించారు. దీంతో సిబ్బందితో కలసి పట్టుకునే ప్రయత్నం చేయగా స్మగ్లర్లు పరారయ్యారు. అనంతరం వాహనాన్ని పరిశీలించగా, నాలుగు ఎర్రచందన దుంగలు దొరికాయి. విషపు రాతలు రాసే సాక్షి పత్రిక అప్పట్లో "ఎర్ర చందనం "హెరిటేజ్ దొంగలు" అనే కధనం ప్రచురించిన సంగతి తెలిసిందే. మరి ఇప్పుడు అదే విధంగా ఇండియన్ ఆర్మీని పెట్టి హెడ్డింగ్ ఇస్తారా ? అలా చేస్తే, ఇక్కడ కోర్ట్ లు, జడ్జిలు ఉండరు. ఆర్మీ వచ్చి, ఏమి చెయ్యాలో అది చేసి వెళ్తుంది. తొందరపడి, అలవాటులో పొరపాటుగా, రాయమాకయ్య జగన్..