news

గుంటూరులో ప్రప్రథమంగా ఐటీ(ఇన్‌ఫర్‌మేషన్‌ టెక్నాలజీ) కంపెనీ ప్రారంభం కాబోతోంది. వేద ఐఐటీ, ఇన్వేకాస్‌ సంస్థలు తమ కార్యకలాపాలకు శ్రీకారం చుట్టేందుకు సంసిద్ధమయ్యాయి. డెస్కుటాప్‌లకు సంబంధించి ఏఎండీ మైక్రో ప్రాసెసర్స్‌ రీసెర్చ్‌ అండ్‌ డెవలప్‌మెంట్‌ ఇక్కడ నిర్వహించబోతున్నట్లు ఆయా సంస్థలు జిల్లా యంత్రాంగానికి నివేదించాయి. ఇందులోనే వేద ఐఐటీ సంస్థ పెద్దఎత్తున శిక్షణ కార్యక్రమాలను కూడా నిర్వహించనుంది. ఐటీ శాఖ మంత్రి నారా లోకేష్‌ విజ్ఞప్తి మేరకు నగరంలోని విద్యానగర్‌ ఒకటో లైనులో ఏడు అంతస్థుల భవనంలో ఐటీ టవర్‌ నిర్మాణం పూర్తి చేశారు.

ఈ నెల 29వ తేదీన ఉదయం దీనిని ప్రారంభించేందుకు ముఖ్యమంత్రి చంద్రబాబునాయుడు, మంత్రి లోకేష్‌ హాజరుకానున్నారని కలెక్టర్‌ కోన శశిధర్‌కు ప్రభుత్వవర్గాల నుంచి సమాచారం అందింది. అమరావతి రాజధాని ప్రాంతానికి ఐటీ కంపెనీలను తీసుకొచ్చేందుకు సీఎంతో పాటు మంత్రి లోకేష్‌ ముమ్మర ప్రయత్నాలు చేస్తున్నారు. ఇప్పటికే మంగళగిరికి పై డేటా సెంటర్‌ని తీసుకొచ్చి వందలాది మందికి ఉద్యోగాలు కల్పించారు. రెండు రోజుల క్రితం రాజధానిలోని రాయపూడిలో ఏపీ ఎన్‌ఆర్‌టీ సొసైటీ ద్వారా ఐకాన్‌ టవర్‌కు శంకుస్థాపన చేశారు. 36 అంతస్థులలో నిర్మాణం జరగనున్న ఆ టవర్‌ ఐటీ కంపెనీలకు హబ్‌గా మారనుంది.

తాజాగా గుంటూరు నగరానికి తొలిసారిగా ఐటీ కంపెనీని తీసుకురాబోతోన్నారు. ఇందులోనూ వందల సంఖ్యలో సాఫ్టువేర్‌, హార్డ్‌వేర్‌ ఉద్యోగులకు ఉద్యోగాలు లభించనున్నాయి. 24 వేల చదరపు అడుగుల విస్త్రీర్ణంలో నిర్మించిన వేద ఐఐటీ, ఇన్వేకాస్‌ సంస్థలు ఒకే టవర్‌లో కార్యకలాపాలాను ప్రారంభించనున్నాయి. వచ్చే శుక్రవారం ఉదయం 10.30 గంటలకు సీఎం చంద్రబాబు, అంతకంటే గంట ముందే లోకేష్‌ రానున్నారని సమాచారం రావడంతో ఆదివారం కలెక్టర్‌ శశిధర్‌, అర్బన్‌ ఎస్‌పీ విజయారావు, కార్పొరేషన్‌ కమిషనర్‌ శ్రీకేష్‌ లత్కర్‌ బాలాజీరావు ఇతర అధికారులు ఇన్వేకాస్‌ టవర్‌ని సందర్శించారు. సీఎం పర్యటన నేపథ్యంలో పటిష్ఠ బందోబస్తు ఏర్పాట్లు చేయాలన్నారు. విద్యానగర్‌ ఒకటో లైనులో ఆక్రమణలు తొలగించి కొత్తగా బీటీ లేయర్‌తో రోడ్డుని అభివృద్ధి చేయాలని ఆదేశించారు.

సోమవారం సచివాలయంలో పోలవరం సహా 54 ప్రాధాన్య ప్రాజెక్టులపై ముఖ్యమంత్రి జలవనరుల శాఖ అధికారులతో సమీక్షా సమావేశం నిర్వహించారు. పోలవరం ప్రాజెక్టులో భాగమైన అప్ స్ట్రీమ్ జెట్ గ్రౌంటింగ్ పనులు పూర్తికావడంపై ముఖ్యమంత్రి సంతోషం వ్యక్తం చేశారు. 2050 మీటర్లు పొడవున వున్న అప్ స్ట్రీమ్ జెట్ గ్రౌంటింగ్ నిర్మాణం పూర్తి చేశామని, డౌన్ స్ట్రీమ్ జెట్ గ్రౌంటింగ్ పనులు 77% అయ్యాయని అధికారులు వివరించగా, జూలై 9 నాటికి ఆ పనులు కూడా పూర్తి చేయాలని ముఖ్యమంత్రి సూచించారు. పోలవరం పనుల పురోగతిపై 65వ సారి ముఖ్యమంత్రి వర్చువల్ ఇన్‌స్పెక్షన్ చేయగా, ఇప్పటివరకు పోలవరం ప్రాజెక్టు నిర్మాణం 55.73% పూర్తయిందని అధికారులు వివరించారు. కుడి ప్రధాన కాలువ 90%, ఎడమ ప్రధాన కాలువ 61.62% నిర్మాణం పూర్తయ్యిందని అన్నారు. స్పిల్ వే, స్పిల్ చానల్, అప్రోచ్ చానల్, పైలట్ చానల్, లెఫ్ట్ ఫ్లాంక్‌ తవ్వకం పనులు 75.60% పూర్తికాగా, స్పిల్ వే, స్టిల్లింగ్ బేసిన్, స్పిల్ చానల్ కాంక్రీట్ పనులు 27.20% పూర్తయినట్టు తెలిపారు. రేడియల్ గేట్ల ఫ్యాబ్రికేషన్ 61.22%, కాఫర్ డ్యాం జెట్ గ్రౌంటింగ్ పనులు 90.70% చేపట్టినట్టు వెల్లడించారు.

గత వారం స్పిల్ చానల్, అప్రోచ్ చానల్, లెఫ్ట్ ఫ్లాంక్‌కు సంబంధించి 4.49 లక్షల క్యూబిక్ మీటర్ల మేర తవ్వకం పనులు చేపట్టగా, 42 వేల క్యూబిక్ మీటర్ల మేర స్పిల్ వే, స్పిల్ చానల్, స్టిల్లింగ్ బేసిన్ కాంక్రీట్ పనులు పూర్తయ్యాయని ముఖ్యమంత్రికి అధికారులు చెప్పారు. పోలవరం ప్రాజెక్టులో మొత్తం 1,115.59 లక్షల క్యూబిక్ మీటర్లకు గాను ఇప్పటివరకు 843.29 లక్షల క్యూబిక్ మీటర్ల మేర తవ్వకం పనులు పూర్తయ్యాయి. స్పిల్ వే, స్టిల్లింగ్ బేసిన్‌, స్పిల్ చానల్‌కు సంబంధించి మొత్తం 36.79 లక్షల క్యూబిక్ మీటర్ల వరకు కాంక్రీట్ పనులు చేపట్టాల్సి వుండగా ఇప్పటికి 10.01 లక్షల క్యూబిక్ మీటర్ల పనులు పూర్తయ్యాయి. రేడియల్ ఫ్యాబ్రికేషన్ 18 వేల మెట్రిక్ టన్నులకు 11,020 మెట్రిక్ టన్నుల వరకు పనులు పూర్తయ్యాయి.

పోలవరం ప్రాజెక్టు నిర్వాసితుల కోసం ‘పునరావాసం-పరిహారం’ కింద ఉద్దేశించిన రూ. 3,115.11 కోట్లకు గాను ఇప్పటివరకు రూ. 219.25 కోట్లు ఖర్చు చేసినట్టు అధికారులు ముఖ్యమంత్రికి తెలిపారు. ఈ ఆర్ధిక సంవత్సరాంతానికి ఆర్ఆర్ పనులు పూర్తవ్వాలని తూర్పగోదావరి జిల్లా కలెక్టర్‌ను ముఖ్యమంత్రి ఆదేశించారు. ఆర్ఆర్ ప్యాకేజీ త్వరితగతిన అమలు చేసేందుకు ఐఏఎస్ అధికారులు, నిపుణులతో కూడిన 5 ప్రత్యేక బృందాలు పర్యవేక్షిస్తున్నాయని అధికారులు ముఖ్యమంత్రికి వెల్లడించారు. తూర్పుగోదావరిలో 7 ఆర్ఆర్ కాలనీలు, పశ్చిమగోదావరిలో 19 ఆర్ఆర్ కాలనీలు పూర్తయ్యాయని చెప్పారు.

54 ప్రాజెక్టులలో మరో 6 ప్రాజెక్టులు ప్రారంభానికి సిద్ధంగా వున్నాయని అధికారులు ముఖ్యమంత్రి దృష్టికి తెచ్చారు. సోమవారం సచివాలయంలో పోలవరం సహా 54 ప్రాధాన్య ప్రాజెక్టులపై ముఖ్యమంత్రి జలవనరుల శాఖ అధికారులతో సమీక్షా సమావేశం నిర్వహించారు. పెదపాలెం, చినసేన, పులకుర్తి, ఓక్ టన్నెల్, గోరకల్లు రిజర్వాయర్, పులికనుమ ఎత్తిపోతల పథకం పనులు పూర్తయ్యాయని చెప్పారు. కొండవీటి వాగు ప్రాజెక్టు జూలై 15 నాటికి పూర్తికానుందని, జూలై 31 నాటికి కుప్పం బ్రాంచ్ కెనాల్ నుంచి నీటిని విడుదల చేసేందుకు సిద్ధమవుతుందని అన్నారు.

గుండ్లకమ్మ రిజర్వాయర్ పనులు తుదిదశకు చేరాయని తెలిపారు. వెలిగొండ ప్రాజెక్టు హెడ్ రెగ్యులేటర్, నెల్లూరు-సంగం బ్యారేజీలు ఆగస్టు 31 నాటికి పూర్తి కానున్నాయని వివరించారు. ఈ ఏడాది డిసెంబరులో ముల్లపల్లికి నీటి సరఫరా ప్రారంభమవుతుందని తెలిపారు. మల్లిమడుగు, బాలాజీ, వేణుగోపాల సాగర్ రిజర్వాయర్లు నిర్మాణం కోసం అటవీ భూముల సమస్యను పరిష్కరించాలని అటవీ శాఖ అధికారులను ముఖ్యమంత్రి ఆదేశించారు. వంశధార ప్రాజెక్టు స్టేజ్ 2, రెండో దశ పనులు పూర్తిచేసి 5 టీఎంసీల నీటిని జులై 15కి నిల్వ చేయాలని చెప్పారు. ఆగస్టు 15 నాటికి ప్రాధాన్య ప్రాజెక్టులలో మిగిలిన అన్ని ప్రాజెక్టులకు టెండర్లు పిలవడం పూర్తి చేయాలని ముఖ్యమంత్రి స్పష్టం చేశారు.

జలవనరుల శాఖకు 19 స్కోచ్ అవార్డులు రావడంపై అధికారులకు, ఉద్యోగులకు ముఖ్యమంత్రి చంద్రబాబు అభినందనలు తెలిపారు. నీటి పారుదల రంగంలో ‘స్టేట్ ఆఫ్ ది ఇయర్’ కింద ప్లాటినమ్ అవార్డు. మరో పక్క, పోలవరం ప్రాజెక్టు సత్వరం పూర్తి చేసేందుకు తక్షణం నిధులు విడుదల చేయాలని ముఖ్యమంత్రి నారా చంద్రబాబు నాయుడు కేంద్ర జలవనరుల శాఖ మంత్రి నితిన్ గడ్కరీకి లేఖ రాశారు. పోలవరం నిర్మాణం కోసం ఖర్చు చేసిన వాటిలో రూ. 1,504.14 కోట్లు ఇవ్వాలని, అలాగే నూతన అంచనాలకు త్వరగా ఆమోదం తెలపాలని ముఖ్యమంత్రి తన లేఖలో పేర్కొన్నారు. పోలవరం ప్రాజెక్టుకు సంబంధించి నిధుల విడుదలలో కేంద్రం ఆలస్యం చేయడం లేదని బీజేపీ నేతలు చేస్తున్న ప్రకటనలను తప్పుబట్టారు.