news

సీనియర్ నటుడు, మాజీ ఎమ్మల్యే బీజేపీ నేత కోట శ్రీనివాసరావు మహా టీవీకి ఇచ్చిన ఇంటర్వ్యూ లో పలు విషయాలు ప్రస్తావించారు... సినిమాలు గురించి విషయాలు చెప్పిన కోటా, రాజకీయాల పై కూడా మాట్లాడారు... ముందుగా సొంత పార్టీ గురించి మాట్లాడుతూ, తెలుగు రాష్ట్రాల్లో మన దౌర్భాగ్యం ఏంటంటే.. బీజేపీకి ఊతం పట్టి నడిపే నాయకులు లేరు. బీజేపీకి దాని స్థానం దానికి పదిలం. వచ్చే ఎన్నికల్లో తెలంగాణ రాష్ట్రంలో బీజేపీకి కొన్ని స్థానాలు వస్తే వస్తాయి. ఏపీ, తెలంగాణలో ప్రభుత్వం ఏర్పరచడం మాత్రం బీజేపీకి కష్టమే, అని అన్నారు.

అలాగే బీజేపీ ఎమ్మెల్సీ సోము వీర్రాజు చేసిన వ్యాఖ్యలు గురించి మాట్లాడుతూ, ఎవరి కాన్ఫిడెన్సు వారిది, ఇప్పుడు,‘నెక్స్ట్ నేనే ముఖ్యమంత్రిని, నేనే ముఖ్యమంత్రిని’ అని జగన్మోహన్ రెడ్డి గారు అనట్లేదా, సోము వీర్రాజు వ్యాఖ్యలు కూడా అంతే అని అన్నారు.. అలాగే రోజా మీద మాట్లాడుతూ, ‘నిర్మొహమాటంగా చెప్పాలంటే..రోజా గారిని పొలిటికల్ లీడర్ గా నేను పరిగణించను.. పట్టించుకోను. ఆమె మాట్లాడే పద్ధతి నాకు నచ్చదు... ఈ మధ్య టీవీలో..బండ్ల గణేశ్, రోజా పోట్లాడుకోవడం చూశాను. ఏమిటా మాటలు? ఏమన్నా అర్థముందా? పోనీ, బండ్ల గణేశ్ అంటే ఏదో కుర్ర వెధవ, పిచ్చోడిలా వాగాడు. రోజా కేంటీ.. నువ్వు అనుభవజ్ఞురాలివి, ఎమ్మెల్యేగా చేశావు. ఆ అమ్మాయి గురించి నేనేమి వ్యక్తిగతంగా మాట్లాడటం లేదు. బయటకు కనపడుతున్నది అది అని కోటా అన్నారు...

అలాగే చంద్రబాబు గురించి మాట్లాడుతూ, ప్రస్తుత పరిస్థితుల్లో ఏపీ చంద్రబాబు చేతిలో ఉండటమే మంచిదని కోటా అన్నారు... తెలంగాణలో కెసిఆర్ కి వడ్డించిన విస్తరి... ఆంధ్రలో అలా కాదు కదా, ఆకులు పట్టుకుని విస్తరి తయారు చేసుకోవడమే కదా! నా లెక్క ప్రకారం..హైదరాబాద్ లో ఉన్న రోడ్ల లాగా బెజవాడ, అమరావతిలో రావాలంటే కనీసం ఇరవై సంవత్సరాలు పడుతుంది. ముందస్తు ఆలోచన చేసే గొప్ప రాజకీయనాయకుడు, మంచి పరిపాలన చేసే వ్యక్తి చంద్రబాబు. ఏపీ ఆయన చేతిలో ఉండటమే మంచిది. అంతకన్నా ఎవరూ చేయగలిగిందేమీ లేదు. ఆయన తప్పా ఇంకెవరు అభివృద్ధి చేయగలరు?’ అని చెప్పుకొచ్చారు.

కేంద్ర ప్రభుత్వ జన్యు పరిశోధనా సంస్థ అయిన సెంటర్ ఫర్ సెల్యులార్ అండ్ మాలిక్యులర్ బయాలజీ (CCMB) తెలంగాణా ప్రభుత్వానికి వార్నింగ్ ఇచ్చింది.. మా సమస్యలు వెంటనే తీర్చకపోతే, తెలంగాణా నుంచి ఆంధ్రప్రదేశ్ వెళ్లిపోతాము అని అల్టిమేటం ఇచ్చింది... ఈ సంస్థ కోసం, ఆంధ్రప్రదేశ్, కర్నాటక, పశ్చిమబెంగాల్ పోటీ పడుతున్నాయి.. కేంద్రంలో కూడా లాబీ జరుగుతుంది. ఈ సంస్థ తెలంగాణాలో ఏర్పాటు చేస్తూ కేంద్రం నిర్ణయం తీసుకున్నా, ఇప్పటి వరకు తెలంగాణా ప్రభుత్వం ఏ సహకారం అందించకపోవటంతో, తెలంగాణా నుంచి ఆ సంస్థని తరలించాలి అనే ఆలోచనకు వచ్చారు...

ఈ ప్రతిష్టాత్మకమైన ప్రాజెక్ట్ 2009 లో అప్పటి UPA కేంద్ర ప్రభుత్వం, తెలంగాణకు కేటాయించింది. అప్పటి రాష్ట్రంలోని కాంగ్రెస్ ప్రభుత్వం 114 ఎకరాలు ఈ ప్రాజెక్ట్ కోసం కేటాయించింది. కానీ అప్పటి నుంచి భూమి మాత్రం అప్పగించ లేదు. చివరగా భూమి అప్పగించినా, అది లిటిగేషన్ లో ఉంది... ఆ భూ యజమాని కోర్ట్ లో కేసు వేసాడు... మూడు సంవత్సరాల్లో అధికారంలో ఉన్న, టీఆర్ఎస్ ప్రభుత్వం కూడా భూమి ఇవ్వలేదు... ప్రత్యామ్నాయ భూమిని అందించలేదు... ఎన్ని సార్లు కేంద్రం అడిగినా, తెలంగాణా ప్రభుత్వం మాత్రం స్పందించటం లేదు...

దీంతో రూ .1,200 కోట్ల ప్రాజెక్టును మరో రాష్ట్రానికి మార్చాలని కేంద్రం ఆలోచిస్తుంది. విషయం తెలుసుకున్న ఆంధ్రప్రదేశ్ ప్రభుత్వం రంగంలోకి దిగింది... తెలంగాణా నుంచి సంస్థను తరలించే పక్షంలో, ఆంధ్రప్రదేశ్ లో పెట్టాలని, అన్ని విధాలుగా సహకరిస్తామని, భూమి కూడా రెడీగా ఉంది అని సంప్రదింపులు జరుపుతున్నారు.. ముఖ్యమంత్రి ప్రపోసల్ తో కేంద్రం దాదాపు సరే అన్నట్టు సమాచారం.. చివరి అవకాశంగా తెలంగాణా ప్రభుత్వానికి మరో అవకాసం ఇచ్చి, వారు స్పందించక పొతే, 1,200 కోట్ల రూపాయల కేంద్ర సంస్థ ఆంధ్రప్రదేశ్ వచ్చే అవకాసం ఉంది...

ఆంధ్రప్రదేశ్ రాష్ట్రంలో ఇండిగో విమానయాన సంస్థ తన కార్యకలాపాలు ప్రారంభించింది... ఆదివారం నుంచి ఇండిగో తన కార్యకలాపాలను తిరుపతి విమానాశ్రయం నుంచి ప్రారంభించింది. మొట్టమొదటి సారిగా తిరుపతి నుంచి బెంగళూరు, హైదరాబాద్‌లకు అనుసంధాన విమాన సర్వీసులను మొదలుపెట్టింది. బెంగళూరుకు నుంచి తిరుమలకు ప్రయాణికుల తాకిడి ఎక్కువ. అయితే ఇప్పటి వరకు బెంగళూరు నుంచి తిరుపతికి విమానం లేదు. ఇప్పుడు బెంగళూరు నుంచి అనుసంధాన విమానం అతి తక్కువ ధర రూ.1500కే అందుబాటులోకి రావడంతో ప్రయాణికుల సంఖ్య పెరిగే అవకాశం ఉంది.

రేణిగుంట నుంచి హైదరాబాద్‌, విజయవాడ, చెన్నై, దిల్లీ, బెంగళూరు, ముంబయి ప్రాంతాలకు విమాన సర్వీసులు ప్రస్తుతం నడుస్తున్నాయి. ప్రభుత్వరంగ విమానయాన సంస్థ ఎయిర్‌ ఇండియాతో పాటు ట్రూజెట్‌, ఎయిర్‌కోస్టా, స్పైస్‌జెట్‌లకు తోడుగా ఇప్పుడు ఇండిగో తన సర్వీసులు ప్రారంభించింది. రోజువారీ 13 విమానాలు రాకపోకలు సాగిస్తున్నాయి. ఇక ప్రత్యేక విమానాలు ఉన్నాయి. స్పైస్‌జెట్‌ విమానం రోజూ సాయంత్రం 4.30గంటలకు రేణిగుంట నుంచి బయలుదేరి హైదరాబాద్‌ మీదుగా ముంబయి చేరుకుంటుంది. ఎయిర్‌ ఇండియా విమానం రోజూ మధ్యాహ్నం 2.20 నిమిషాలకు రేణిగుంట నుంచి హైదరాబాద్‌ మీదుగా దిల్లీ చేరుకుంటుంది.

అయితే తిరుపతి నుంచి అంతర్జాతీయ సర్వీసులు ఎప్పుడు మొదలవుతాయా అని ప్రయాణికులు ఎదురు చూస్తున్నారు... ఎప్పటి నుంచో అదిగో ఇదిగో అంటున్నా, ఇప్పటి వరకు అంతర్జాతీయ సర్వీసులు మొదలు కాలేదు... ఇది తొందరగా మొదలు పెట్టాలి అని ప్రజలు కోరుకుంటున్నారు... చిత్తూరు జిల్లాలోని మదనపల్లి, పీలేరు, పూతలపట్టు, గంగాధరనెల్లూరు, చిత్తూరుతో పాటు రాయాలసీమ జిల్లాల నుంచి గల్ఫ్‌ వెళ్లే కార్మికులు ఎక్కువ. దీంతో రేణిగుంట నుంచి మొదటిగా దుబాయికి సర్వీసును ప్రారంభించాలన్న డిమాండ్‌ ఉంది. శ్రీవారి దర్శనానికి ఏటా రెండు నుంచి అయిదు లక్షల మేర విదేశీయులు వస్తున్నారు. ఈ సంఖ్యను కూడా పరిగణనలోకి తీసుకుంటే.. విదేశీ విమానాలు నడిపే వీలుంది...