news

తెలుగుదేశం పార్టీ అధినేత చంద్రబాబు ఎలక్షన్ కమిషన్ కు లేఖ రాసారు. "శాంతిభద్రతలను పరిరక్షించాల్సిన పోలీసు అధికారులు పంచాయతీ ఎన్నికల్లో వైసీపీకి అనుకూలంగా వ్యవహరిస్తూ తెలుగుదేశం పార్టీ నేతలను ఇబ్బందులకు గురిచేస్తున్నారు. వినుకొండలో పిట్టంబండ, ముమ్మిడివరం, చెట్టుపల్లి గ్రామాల్లో తెదేపా నేతలను సీఐ వేధిస్తున్నారు. పంచాయతీ ఎన్నికల్లో పోటీ చేస్తున్న శ్రీ మక్కెన కోటయ్య, శ్రీ రసపుత్ర మల్లిఖార్జునరావు, శ్రీమతి కర్రి భారతమ్మ, శ్రీమతి జిట్ర యశోదలను సీఐ వేధిస్తున్నాడు. పోటీ చేస్తున్న అభ్యర్థులు వారి పిల్లలపై సీఐ అక్రమ కేసులు పెట్టి హింసిస్తున్నారు. సీనియర్ తెదేపా నాయకులు శ్రీ మక్కిన కొండలరావుపై తప్పుడు కేసులు పెట్టి అరెస్టులు కూడా చేశారు. వీటిని నిరసనగా ఎమ్మార్వో, ఎంపీడీవో ఆఫీసుల వద్ద పిట్టంబండ, ముమ్మిడివరం, చెట్టుపల్లి గ్రామస్తులతోపాటు మాజీ శాసనసభ్యులు శ్రీ జి.వి.ఆంజనేయులుగారు ఆందోళనలో పాల్గొన్నారు. అధికార పార్టీ నేతల మెప్పు కోసం జీవీ ఆంజనేయులుగారితోపాటు తెలుగుదేశం పార్టీ నేతలపై సెక్షన్ 143, 149, 188, 341 కింద కేసులు నమోదు చేశారు. మాచర్ల నియోజకవర్గంలో పంచాయతీ ఎన్నికల్లో పోటీ చేస్తున్న అభ్యర్థులను శ్రీ భక్తవత్సలరెడ్డి వేధింపులకు గురిచేస్తున్నారు. నామినేషన్లు ఉపసంహరించుకోకపోతే తప్పుడు కేసులతో వేధిస్తామంటూ బెదిరిస్తున్నారు.

"మాచర్ల పరిధిలో 77 పంచాయతీలకుగాను, 72 పంచాయతీలు ఏకగ్రీవం చేశారు. మిగిలిన వాటిల్లో అభ్యర్థులను వేధిస్తున్నారు. వినుకొండ, మాచర్ల నియోజకవర్గాల్లో జరిగిన పరిణామాలపై లోతైన విచారణ జరిపి సంబంధిత అధికారులపై తగిన చర్యలు తీసుకుని తెదేపా నేతలపై పెట్టిన తప్పుడు కేసులు ఎత్తేయాలని కోరుతున్నాం. ఎన్నికలు సజావుగా జరిగేందుకు వినుకొండ, మాచర్లలో అదనపు భద్రతా బలగాలను అందించాలి. ఎలక్షన్ కమిషన్ వెంటనే తగిన చర్యలు తీసుకుని ప్రజాస్వామ్యాన్ని కాపాడాలి. చిత్తూరు జిల్లా కుప్పం మండలం మిట్టపల్లి పంచాయతీలో అధికారులు, మీడియా సమక్షంలో ఉపసంహరించుకున్న ఇద్దరి నామినేషన్లను ఆమోదించాలని వైసీపీ నేతల ఒత్తిడి చేస్తున్నారు. ఎలక్షన్ కమిషన్ జోక్యం చేసుకొని స్వేచ్ఛాయుత వాతావరణంలో ఎన్నికలు జరిగేలా చూడాలి. తుది జాబితాలో నామినేషన్లు ఉపసంహరించుకున్నవారి పేర్లు లేకుండా జాబితా పారదర్శకంగా ఉండేలా చూడాలి." అని చంద్రబాబు ఎలక్షన్ కమిషన్ కు ఫిర్యాదు చేసారు..

రాష్ట్ర దేవాదాయా శాఖా మంత్రి వెల్లంపల్లి శ్రీనివాస్ మరోసారి తన చేష్టలతో వార్తల్లో నిలిచారు. ప్రతిసారి నోటికి పని చెప్పి, వార్తల్లో నిలిచే మంత్రికి, ఈసారి కూడా ఆగ్రహం వచ్చింది. ఈ రోజు విజయవాడ పశ్చిమ నియోజికవర్గంలోని 49వ డివిజన్ లో, ఆయన పర్యటించారు. కొన్ని కార్యక్రమాల్లో పాల్గుని, ప్రారంభోత్సవాలు, శంకుస్థాపనలు కూడా చేసారు. అయితే ఈ నేపధ్యంలో స్థానికంగా ఉన్న కొన్ని సమస్యలు పెండింగ్ లో ఉన్నాయని, వాటి పరిష్కారం కోసం చూడాలి అంటూ స్థానిక ప్రజలతో పాటు, జనసేనకు చెందిన కొంత మంది నాయకులు, ఒక వినతి పత్రాన్ని తయారు చేసి మంత్రికి ఇచ్చారు. అది చదివిన వెల్లంపల్లి, గత 5 ఏళ్ళుగా మీరేమి చేయలేకపోయారు, ఇప్పుడు నాకు వినతి పత్రం ఇస్తారా అని చెప్పి ఎదురు నిలదీయటంతో, కొంత ఆశ్చర్యానికి గురయ్యారు. మంత్రి ఇచ్చిన జవాబుతో ఆశ్చర్యపోయిన ప్రజలు, మంత్రి ఇలా ప్రవర్తించటం ఏమిటి అంటూ, వ్యతిరేక నినాదాలు చేసారు. దీంతో మరింత ఆగ్రహానికి గురైన వెల్లంపల్లి శ్రీనివాస్, గత 5 ఏళ్ళలో మీరేమి పీకకుండా, మమ్మల్ని బెదిరిస్తారా అంటూ, అసభ్య పదజాలం వాడారు. అంతే కాకుండా, అక్కడ ఉన్న పోలీసులను పిలిచి, వీళ్ళందరినీ ఇక్కడ నుంచి ఎత్తి పారేయండి అంటూ, పరుష పదజాలంతో వ్యాఖ్యలు చేసారు.

మంత్రి ప్రవర్తనతో, అప్పటి వరకు ప్రశాంతంగా ఉన్న పరిస్థితి, ఒక్కసారిగా ఉద్రిక్తంగా మారిపోయింది. మంత్రి వెల్లంపల్లికి వ్యతిరేకంగా జనసేన నాయకులతో పాటు, స్థానికులు కూడా వ్యతిరేక నినాదాలు చేసారు. గతంలో ఎన్నికల ముందు డివిజన్ లో పర్యటించిన వెల్లంపల్లి శ్రీనివాస్, నన్ను గెలిపిస్తే మీకు ఉన్న సమస్యలు అన్నీ పరిష్కరిస్తానని హామీలు ఇచ్చి, ఫోటోలు దిగారని, ఆ ఫోటోలు కూడా చూపిస్తూ నిరసనకు దిగారు. దీంతో పోలీసులు వారికి సర్ది చెప్పి, అక్కడ నుంచి పంపించి వేసారు. అయితే ఒక సమస్యను పరిష్కరించాల్సిన హోదాలో ఉన్న మంత్రి, అయితే అవుతుంది చెప్పాలి, లేకపోతే ప్రయత్నం చేస్తామని, అదీ లేకపోతే ఇది కుదరదు అని ప్రత్యామ్నాయం చూపించాలి కానీ, ఇలా చేయటం ఏమిటి అంటూ స్థానికులు తప్పు బడుతున్నారు. సమస్యను పరిష్కరించమంటే, అప్పుడు మీరేమి పీకారు అంటూ చెప్పటం పై, అభ్యంతరం వ్యక్తం చేసారు. ఇప్పుడు ఏమి చేసారో చెప్పండి అంటే, అప్పుడు ఏమి చేసారు అని తప్పించుకోవటం పై, ప్రజలు అభ్యంతరం చెప్పారు.

లోటస్ పాండ్ లో తెలంగాణాలో పార్టీ ఏర్పాటు, జిల్లాల సమీక్షల్లో బిజీ బిజీగా ఉన్న వైఎస్ షర్మిలను, వైఎస్ఆర్ కాంగ్రెస్ పార్టీ ఎమ్మెల్యే వచ్చి కలవటం ప్రాధాన్యత సంతరించుకుంది. ఈ రోజు ఉదయం 10 గంటలకు ఖమ్మం జిల్లా అభిమానులతో చర్చలు జరుపుతున్న సమయంలోనే, ఆంధ్రప్రదేశ్ కు చెందిన మంగళగిరి వైసీపీ ఎమ్మెల్యే ఆళ్ల రామకృష్ణా రెడ్డి లోటస్ పాండ్ వచ్చి, షర్మిల ను కలిసారు. షర్మిలతో భేటీ అయిన ఆర్కే, షర్మిలతో వివిధ అంశాల పై చర్చించిన తరువాత, అక్కడే ఉన్న బ్రదర్ అనిల్ కుమార్ తో కూడా సమావేశం అయ్యారు. అయితే ఈ భేటీ దాదాపుగా గంటకు పైగా సాగటంతో, ఇప్పుడు ఇది కొత్త చర్చకు దారి తీసింది. అయితే ఈ భేటీ పై స్పందించిన ఆళ్ల రామకృష్ణా రెడ్డి, నేను జగన్ మోహన్ రెడ్డి అనుమతి తీసుకుని, షర్మిల వద్దకు వచ్చానని చెప్పారు. కాకపోతే ఇందులో రాజకీయం ఏమి లేదని, వైఎస్ఆర్ కుటుంబం మొత్తంతో తనకు మంచి సంబంధాలు ఉన్నాయని, ఆ అనుబంధంతోనే వచ్చి కలిసాను తప్ప ఇందులో ఏమి లేదని చెప్పారు. అయితే ఆర్కే వచ్చి షర్మిలను కలవటం వెనుక, కేవలం మర్యాదపూర్వక భేటీ కాదని మాత్రం అర్ధం అవుతుంది. ఎందుకుంటే ఒక పక్క షర్మిల,బిజీబిజీ గా ఉన్నారు. అభిమానులతో మీటింగ్ లు పెట్టుకున్నారు. ఇంత బిజీ టైంలో అంట సేపు ఆర్కేను కలవటం వెనుక కచ్చితంగా ఏదో రాజకీయం ఉందని అంటున్నారు.

ఇప్పటికే ఆంధ్రప్రదేశ్ లో వైసీపీకి సంబందించిన కీలక నేతలు కూడా, షర్మిల పార్టీ పెట్టె అంశం పై స్పందించటానికి ఇబ్బంది పడుతున్నారు. షర్మిల సొంతగా నిర్ణయం తీసుకుని పార్టీ పెట్టటం అనేది, జగన్ ఇమేజ్ కు డ్యామేజ్ అనే విధంగానే ఆఫ్ ది రికార్డు చెప్తున్నారు. విజయసాయి రెడ్డి లాంటి నేత కూడా, డైరెక్ట్ గా ఏమి చెప్పలేక, షర్మిల ప్రెస్ మీట్ వీడియో చూపించినా, అది మార్ఫింగ్ అని చెప్పి తప్పించుకునే పరిస్థితి. అలాగే ప్రత్యర్ధి పార్టీల నుంచి కూడా జగన్ మోహన్ రెడ్డి పై విమర్శల దాడి మొదలైంది. ఒక చెల్లి ఇప్పటికే కోర్టుకు వెళ్లి సిబిఐ ఎంక్వయిరీ కోసం చూస్తుంటే, మరో చెల్లి ఏకంగా పార్టీ పెట్టింది, నువ్వా విశ్వాసనీయత గురించి మాట్లాడేది అంటూ, ఎదురు దాడి చేస్తున్నారు. ఈ సందర్భంలోనే, జగన్ మోహన్ రెడ్డి దగ్గర నుంచి దూతగా ఆర్కే వచ్చారా అనే అంశం పై కూడా చర్చ జరుగుతంది. ముఖ్యంగా గంట సేపు మాట్లాడటం అనేది కచ్చితంగా రాజీ ఫార్ములా కోసమే అనే అభిప్రాయాలు వ్యక్తం అవుతున్నాయి.