news

సోషల్ మీడియాలో, న్యాయమూర్తుల పై, కోర్టుల పై జరుగుతున్న దాడిలో కుట్ర కోణం ఉందని, ఇప్పటికే ఆంధ్రప్రదేశ్ హైకోర్టులో ఉన్న కేసులో ఇంప్లీడ్ అవ్వటానికి అవకాసం ఇవ్వాలని, పూర్తి ఆధారాలతో పిటీషన్ దాఖలు చేసారు, కర్నూల్ కు చెందిన, మాజీ పోలీస్ అధికారి శివానంద రెడ్డి. రాజ్యాంగ వ్యవస్థ అయిన కోర్టుల పై, ఇలాంటి దాడి దేశ చరిత్రలో ఎప్పుడూ జరగలేదని, దీని వెనుక కుట్ర కోణం ఉంది అంటూ, కోర్టుకు తన పిటీషన్ లో తెలిపారు. కొన్ని రాజకీయ పార్టీలు, సోషల్ మీడియా వింగ్ లు పెట్టుకుని మరీ, కోర్టుల పై దాడి చేస్తున్నారని పిటీషన్ లో తెలిపారు. ఇప్పటికే హైకోర్టు రిజిస్టార్ ఫిర్యాదు చేసినా, ఎలాంటి మార్పు లేదని, రాష్ట్రంలో ఉన్న దర్యాప్తు సంస్థలు కూడా సహకరించటం లేదని తెలిపారు. వీటికి సంబంధించి పూర్తి ఆధారాలు ఇచ్చేందుకు అవకాసం ఇవ్వాలని కోరారు. అలాగే ఈ పిటీషన్ లో ప్రశాంత్ కిషోర్ కి సంబందించిన ఐ-ప్యాక్ అనే సంస్థ పై కూడా హైకోర్టు ముందుకు తెచ్చారు. గత ఎన్నికల్లో, వీళ్ళు వైసీపీ పార్టీకి పని చేసారని అన్నారు.

కులం, మతం, ప్రాంతం ఆధారంగా విభజించి, సోషల్ మీడియాలో టార్గెట్ గా క్యంపైన్ చెయ్యటంలో వీళ్ళు సిద్ధహస్తులని అన్నారు. అయితే ఆ పార్టీ అధికారంలోకి వచ్చిన తరువాత కూడా, వీళ్ళు ప్రభుత్వ అజెండాను బలవతంగా స్లీపర్ సెల్స్ లాగా పని చేస్తూ, ఎక్కిస్తున్నారని, ఈ క్రమంలోనే హైకోర్టు పై దాడి కూడా, కుట్ర ప్రకారం, సోషల్ మీడియాలో చేస్తున్నారని తెలిపారు. న్యాయమూర్తుల పై దాడి చేసి, న్యాయ పాలనకు దూరం చెయ్యలనే వారి ఆలోచనలు అని అన్నారు. తమ నిర్ణయాలు ఎవరూ ప్రశ్నించకూడదు అనే ధోరణితో, ఆ ప్రతి ప్రజా ప్రతినిధులు, నాయకులు కూడా ఉన్నారని అన్నారు. ఇదే కోవలో కొంత మంది వైసీపీ కార్యకర్తలకు, అలాగే ఐ-ప్యాక్ లో పని చేసిన వారికి ప్రభుత్వంలో పదవి ఇచ్చారని, వీళ్ళు ఇదే పనిలో ఉన్నారని కొన్ని ఆధారాలు సమర్పించారు. ఇక విజయసాయి రెడ్డి, మరి కొంత మంది నేతలు కోర్టుల పై చేసిన వ్యాఖ్యలను కూడా సమర్పించారు. ఇది వరకు కోర్టు 98 మందికి నోటీసులు ఇస్తే, కేవలం 18 మందిని విచారణకు పిలిచారని, అధికార పార్టీకి తలొగ్గి పని చేస్తున్నారని, ఈ మొత్తం వ్యవహారం పై సిబిఐ విచారణ జరపాలని కోరారు.

రాజధాని అమరావతి పై రోజు వారీ విచారణ మొదలైంది. రాజధాని అమరావతికి సంబంధించిన కేసులు అన్నీ వర్గీకరణ చేసి, నేటి ఉదయం 10.30 గంటల నుంచి విచారణ ప్రారంభం అయ్యింది. మధ్యానం వరకు విచారణ కొనసాగింది. విచారణ సందర్భంగా, పలు కీలక అంశాల పై చాలా హాట్ హాట్ గా వాదనలు జరిగాయి. అటు పిటీషనర్ తరుపున న్యాయవాదులు, ప్రభుత్వం తరుపున న్యాయవాదులు తమ వాదనలు గట్టిగా వినిపించారు. ఈ రోజు ఉదయం, విచారణ మొదలైన వెంటనే అనేక అంశాలను కోర్టు విచారణకు తీసుకోవటం జరిగింది. ముఖ్యంగా ముఖ్యమంత్రి క్యాంప్ ఆఫీస్ ను వైజాగ్ లో 30 ఎకరాల్లో కట్టటం పై చర్చ జరిగింది. ప్రభుత్వం తరుపున వాదనలు వినిపించిన అడ్వొకేట్ జనరల్ శ్రీరాం, పరిపాలన వికేంద్రీకరణ చట్టంలోని సెక్షన్ 8, ఎక్కడైతే సియం ఉండి పని చేస్తారో అదే క్యాంప్ ఆఫీస్ గా, నిర్ణయిస్తారని ఏజీ కోర్టుకు తెలిపారు. గత ముఖ్యమంత్రికి కూడా రెండు క్యాంప్ ఆఫీస్ లు ఉన్నాయని, ఆయన ఈ సందర్భంలో ప్రస్తావించారు.

ముఖ్యమంత్రి క్యాంప్ ఆఫీస్ ఎక్కడైనా పెట్టుకోవచ్చు అని, కోర్టుకు చెప్పారు. క్యాంప్ ఆఫీస్ కు సంబంధించి, ఎలాంటి రూల్స్ ఉన్నాయి, ఏ నిబంధనలు ఉన్నాయో, పూర్తి సమాచారం ఇవ్వాలని, ధర్మాసనం, ఏజీని ఆదేశించింది. విశాఖ గెస్ట్ హౌస్ పై విచారణను శుక్రవారానికి వాయిదా వేసారు. అలాగే ఇక వేరే కేసు విషయంలో, టిడిపి నేత దీపక్ రెడ్డి వేసిన పిటీషన్ లో, శాసనమండలిలో చోటు చేసుకున్న పరిణామాల పై వేసిన కేసులో కూడా విచారణ జరిగింది. రెండు బిల్లుల విషయంలో శాసనమండలిలో ఏమి జరిగింది, ఆ ప్రొసీడింగ్స్ తమకు కావాలని పిటీషనర్ తరుపు న్యాయవాది జంధ్యాల రవి శంకర్ అడిగారు, లైవ్ ప్రసారాలు ఆపేసిన విషయం కోర్టు ముందు ఉంచారు. దీంతో ఆ వీడియో టేప్లు ఇవ్వాలని హైకోర్టు కోరింది. ఆ రెండు రోజుల్లో శాసనమండలిలో ఏమి జరిగిందో చూస్తామని కోర్టు చెప్పింది. అయితే కోర్టు కనుక ఇవి చూస్తే ఆ రోజు సెలెక్ట్ కమిటీ వేసారా లేదా, అసలు ఏమి జరిగింది అనే మొత్తం విషయాలు బయటకు వచ్చే అవకాసం ఉంది. ఇక మరో పక్క అన్ని కేసుల్లో స్టేటస్ కో కొనసాగుతుందని హైకోర్టు చెప్పింది.

తెలుగు రాష్ట్రాలే కాదు, భారత దేశం మొత్తం, కేసులు ఉన్న ప్రజాప్రతినిధులు ఉలిక్కి పడే నిర్ణయం తీసుకుంది సుప్రీం కోర్టు. ప్రజా ప్రతినిధుల పై ఉన్న కేసుల విషయంలో, ఏడాదిలోపు తేల్చేయాలని, అన్ని రాష్ట్రాల హైకోర్టులకి, సుప్రీం కోర్టు ఆదేశాలు ఇచ్చిన సంగతి తెలిసిందే. సుప్రీం కోర్ట్ ఆదేశాలు ప్రకారం, అన్ని రాష్ట్రాల హైకోర్టులు ప్రజా ప్రతినిధుల పై ఉన్న కేసుల విషయంలో రోడ్ మ్యాప్ ఇచ్చాయి. ఈ కేసు ఈ రోజు జస్టిస్ ఎన్.వి.రమణ బెంచ్ ముందు విచారణకు వచ్చింది. అన్ని రాష్టాలు ఇచ్చిన ప్రణాళికను, అమికస్ క్యూరీ, సుప్రీం కోర్టుకు సమర్పించారు. అయితే కొన్ని రాష్ట్రాల హైకోర్టులు ఇచ్చిన వివరాల పై, సుప్రీం అభ్యంతరం చెప్తూ, వివరాలు సంపూర్ణంగా లేవని, కొన్ని అంశాలు లేవనెత్తింది. అలాగే కేంద్రం తాను సమర్పించాల్సిన వివరాలు ఇవ్వటానికి, మరికొంత సమయం కావాలని, సుప్రీం కోర్ట్ ని కోరింది. దీంతో వివిధ రాష్ట్రాల హైకోర్టులు ఇచ్చిన ప్రణాళికలు తీసుకున్న సుప్రీం, ఈ కేసు తదుపరి విచారణను, రెండు వారల పాటు వాయిదా వేసింది.

అయితే ఇది ఇలా ఉంటే, ఈ కేసుకు సంబంధించి తెలంగాణా హైకోర్టు పంపించిన వివరాలు ఆసక్తిని రేకెత్తించాయి. ఎందుకు అంటే, తెలంగాణా సిబిఐ కోర్టులో 17 పిటీషన్ లు ఉన్నాయని, ఈ కేసులను 9 నెలల్లో తేల్చాయాలి అంటూ, తెలంగాణా హైకోర్టు, సుప్రీం కోర్టుకు ప్రణాళికలు పంపించింది. అయితే ఇక్కడ ఎందుకు ఆసక్తి అంటే, ఈ 17 కేసుల్లో, జగన్ మోహన్ రెడ్డికి సంబంధించిన కేసులు 16 ఉన్నాయి. ఇదే కేసులో విజయసాయి రెడ్డి కూడా ఉన్నారు. ఏకంగా ముఖ్యమంత్రి, ఎంపీలు, ఉండటంతో, ఈ అంశం ఇప్పుడు ఆసక్తిగా మారింది. ఒక వేళ ఇవి రోజు వారీ విచారణకు వస్తే, పరిస్థితి ఎలా ఉంటుంది అనే చర్చ మొదలైంది. ఇక ఆంధ్రప్రదేశ్ రాష్ట్రంలో ప్రజా ప్రతినిధుల పై 131 కేసులు ఉంటె, తెలంగాణాలో 143 కేసులు ఉన్నాయి. ఇవన్నీ రోజు వారీ విచారణకు రానున్నాయి. ఎంత మంది ప్రజా ప్రతినిధులు ఈ కేసుల్లో దోషులుగా తెలుతారో, వారి రాజకీయ భవిష్యత్తు ఏమి అవుతుందో, కాలమే నిర్ణయిస్తుంది.