news

మాజీ మంత్రి వైఎస్‌ వివేకానందరెడ్డిని కిరాయి హంతకులు హత్య చేశారా... అంటే అవునంటున్నాయి పోలీసు వర్గాలు. అసలు వివేకాను ఎందుకు చంపించారు? ఎవరు హత్య చేయించారు? అన్న కోణంలో పోలీసుల దర్యాప్తు ముమ్మరంగా కొనసాగుతోంది. వివేకా కుటుంబంలోని ముగ్గురిపై అనుమానం వ్యక్తం చేస్తున్న పోలీసులు వారు నోరు విప్పకపోవడంతో కాల్‌ డేటా ఆధారంగా హంతకులు ఎవరన్న దిశగా విచారణ సాగుతున్నట్లు సమాచారం. దీనికోసం ప్రత్యేకంగా మూడు పోలీసు టెక్నికల్‌ బృందాలను నియమించి ఈ బాధ్యత అప్పగించినట్లు పోలీసు వర్గాలు పేర్కొంటున్నాయి. తాజా సమాచారం ప్రకారం.. బెంగళూరు కేంద్రంగా పనిచేసే ప్రొఫెషనల్‌ కిల్లర్స్‌కు ఈ హత్యకు పాల్పడ్డారని, వారికోసం వేట ముమ్మరంగా సాగుతోంది. వివేకా హత్య కేసులో రోజుకొక మిస్టరీ వెలుగులోకి వస్తోంది.

మార్చి 15న మాజీమంత్రి వివేకానందరెడ్డిని అతి దారుణంగా, క్రూరంగా హింసించి హత్య చేసినట్లు పోలీసులు పేర్కొన్నారు. ఈ హత్య ఎందుకు చేశారు? ఎవరు చేయించారు? అన్న దిశగా మొదటి నుంచి దర్యాప్తు సాగిస్తున్న పోలీసులకు రోజుకొక మిస్టరీ వెలుగులోకి వస్తోంది. వివాహేతర సంబంధాలు, భూ సెటిల్‌మెంట్ల వ్యవహారాల్లో వివేకాను హత్య చేశారా అన్న కోణాల్లో మొదట పోలీసులు విచారణ కొనసాగించారు. మొదట ఎస్పీ రాహుల్‌దేవ్‌శర్మ ఐదు బృందాలను నియమించి దర్యాప్తు వేగవంతం చేయగా ఆయన బదిలీ తరువాత ఎస్పీగా బాధ్యతలు చేపట్టిన అభిషేక్‌ మహంతి 11 బృందాలను నియమించి ఒక్కొక్కరికి ఒక్కో బాధ్యత అప్పగించి దర్యాప్తు చేపట్టిన సంగతి తెలిసిందే. వివాహేతర సంబంధాలు, భూదందాలు, సెటిల్‌మెంట్లు వివాదాల కారణంగా వివేకా హత్య కాలేదని ప్రాథమికంగా పోలీసులు నిర్ధారించారు. కుటుంబ వ్యవహారాలే హత్యకు కారణమని మొదటి నుంచి అనుమానాలు వ్యక్తమవుతూ వచ్చాయి.

ఈ దిశగా దర్యాప్తు చేయగా, కుటుంబంలో కీలకంగా వ్యవహరించే ముగ్గురు వ్యక్తులు సూత్రధారులుగా వ్యవహరించారని పోలీసు విచారణలో తేలింది. వివేకా, ఆయన అనుచరులు, సన్నిహితులు, స్నేహితులు, కుటుంబ సభ్యుల ఫోన్‌ కాల్‌ డేటాను పోలీసులు సేకరించారు. ఈ కాల్‌డేటాను పూర్తిగా విశ్లేషించి ప్రతి కాల్‌కు సంబంధించిన డేటాను ఎంతో గోప్యంగా విచారించేందుకు మూడు పోలీసు టెక్నికల్‌ బృందాలను నియమించి వారికి ఈ బాధ్యత అప్పజెప్పారు. ఈ బృందాలు కాల్‌ డేటాను పూర్తి స్థాయిలో పరిశీలించగా వివేకాను హత్య చేసింది ప్రొఫెషనల్‌ కిల్లర్సేనని వెల్లడైనట్లు పోలీసు వర్గాలు పేర్కొంటున్నాయి. ఈ కిరాయి ముఠాను అదుపులోకి తీసుకుని విచారించి వారి నుంచి వివరాలు రాబట్టి ఎవరు సూత్రధారులన్నది తేల్చే దిశగా పోలీసులు దర్యాప్తు ముమ్మరం సాగిస్తున్నారు. బెంగళూరు కేంద్రంగా ఉండే ప్రొఫెషనల్‌ కిల్లర్స్‌ ఈ హత్య చేసినట్లు నిర్ధారించిన పోలీసులు ఆ దిశగా మరింత లోతుగా దర్యాప్తు సాగిస్తున్నారు. వివేకా హత్య వెనుక సుపారి భారీ మొత్తాల్లోనే అందించినట్లు సమాచారం. మొదట వివేకా చనిపోయిన వెంటనే గుండెపోటుతో చనిపోయారని సంఘటన స్థలంలో ఉన్న సాక్ష్యాధారాలను పూర్తిగా తొలగించే విధంగా కుటుంబ సభ్యుల సహకారంతోనే సాగిందని విమర్శలు వెల్లువెత్తాయి.

ఏపీలో మరో 5 కేంద్రాల్లో రీపోలింగ్‌కు కేంద్ర ఎన్నికల సంఘం ఆదేశించింది. ఈ నెల 19న(ఆదివారం) చిత్తూరు జిల్లాలోని చంద్రగిరి నియోజకవర్గం పరిధిలోని 5 పోలింగ్‌ కేంద్రాల్లో అసెంబ్లీ, చిత్తూరు పార్లమెంటు నియోజకవర్గానికి సంబంధించి రీపోలింగ్‌ చేపట్టాలని రాష్ట్ర ఎన్నికల సంఘానికి ఆదేశాలు జారీ చేసింది. ఈ మేరకు సీఈవో గోపాలకృష్ణ ద్వివేది బుధవారం ఒక ప్రకటనలో తెలిపారు. అయితే, చంద్రగిరిలో రీపోలింగ్‌పై సీఎం చంద్రబాబు అసంతృప్తి వ్యక్తం చేశారు. టీడీపీ అడిగిన బూత్‌లను పరిగణనలోకి తీసుకోకపోవడంపై ఆయన అసహనం వ్యక్తం చేశారు. వైసీపీ అడిగిన 7 బూత్‌లలో 5 బూత్‌లకు ఎన్నికలు జరపడం సరికాదన్నారు. టీడీపీ అడిగిన స్థానాల్లోనూ రీపోలింగ్‌ జరపాలని తెలిపారు. ఈసీ పక్షపాత ధోరణి మరోసారి రుజువైందన్నారు. రీపోలింగ్‌పై గురువారం ఎన్నికల కమిషన్‌కు లేఖ రాస్తామని చంద్రబాబు చెప్పారు.

రాష్ట్ర వ్యాప్తంగా సార్వత్రిక ఎన్నికల సందర్భంగా 49 కేంద్రాల్లో అక్రమాలు జరిగితే ఎన్నికల సంఘం పక్షపాత వైఖరితో ఇష్టారాజ్యంగా వ్యవహరించటం సమంజసంకాదని ఏపీ టీడీపీ అధ్యక్షుడు, మంత్రి కిమిడి కళావెంకట్రావ్ నిరసన వ్యక్తం చేశారు. బుధవారం సచివాలయంలోని ఎన్నికల సంఘం కార్యాలయంలో రాష్ట్ర అదనపు ఎన్నికల ప్రధానాధికారి సుజాతశర్మను కలిసి ఈ 49 కేంద్రాల్లోనూ రీపోలింగ్ నిర్వహించాలని డిమాండ్ చేశారు. చంద్రగిరి నియోజకవర్గం పరిధిలో ఐదు కేంద్రాల్లో రీపోలింగ్‌కు ఈసీ ఆదేశించిందంటూ, నియోజకవర్గంలోని 166,310 పోలింగ్ కేంద్రాల్లో అవకతవకలు జరిగాయని టీడీపీ చేసిన ఫిర్యాదుపై ఎందుకు స్పందించలేదని ప్రశ్నించారు. పోలింగ్ రోజునే టీడీపీ అభ్యర్థి నానీ.. ఈసీకి పరిస్థితిని వివరించారని గుర్తుచేశారు.

పోలింగ్ ముగిసిన 24 రోజుల తరువాత వైసీపీ అభ్యర్థి కొన్ని బూత్‌లపై ఫిర్యాదు చేస్తే సీఈఒ విచారణకు ఆదేశించటం మంచి సాంప్రదాయం కాదన్నారు. రాష్ట్రంలో ఈనెల 6వ తేదీన ఒకవిడత రీపోలింగ్ నిర్వహించారని ఇప్పుడు కొత్తగా విచారణ జరిపి మరోసారి రీపోలింగ్‌కు అనుమతి ఎలా ఇస్తారని ప్రశ్నించారు. ఎన్నికల సంఘం అధికారులు పారదర్శకంగా వ్యవహరించటం లేదని ఆక్షేపించారు. ఎన్నికల సంఘం ఏకపక్షంగా వ్యవహరించటం ప్రజాస్వామ్య మనుగడకే ప్రమాదమన్నారు. చంద్రగిరిలో రీపోలింగ్‌కు నిర్ణయించటంతో ఎన్నికల అధికారుల పనితీరును శంకించాల్సి వస్తోందన్నారు. అక్రమాలు జరిగిన అన్ని కేంద్రాల్లో విచారణ జరిపి రీపోలింగ్ జరపాలని విజ్ఞప్తి చేశారు. దీనిపై సుజాత శర్మ స్పందిస్తూ రాష్ట్ర ఎన్నికల ప్రధాన అధికారి గోపాలకృష్ణ ద్వివేది ప్రస్తుతం సెలవులో ఉన్నారని ఆయన విధులకు హాజరైన అనంతరం పరిస్థితిని వివరిస్తామన్నారు. టీడీపీ డిమాండ్ చేస్తున్న కేంద్రాల్లో కూడా రీపోలింగ్ జరపాలని కళా వెంకట్రావ్ సుజాతశర్మకు వినతిపత్రం సమర్పించారు.

పశ్చిమ బెంగాల్‌లో రాజకీయ పరిస్థితి ఉద్రిక్తంగా మారింది. భాజపా జాతీయ అధ్యక్షుడు అమిత్‌ షా కోల్‌కతాలో నిర్వహించిన ప్రదర్శనలో హింస చెలరేగడం ప్రకంపనలు సృష్టించింది. మంగళవారం జరిగిన ఈ ప్రదర్శనలో ప్రముఖ సంఘ సంస్కర్త ఈశ్వర చంద్ర విద్యాసాగర్‌ విగ్రహాన్ని ధ్వంసం చేయడం మరింత వివాదాస్పదమయింది. ఇందుకు కారణం మీరంటే మీరని తృణమూల్‌ కాంగ్రెస్‌, భాజపాలు పరస్పరం విమర్శించుకుంటున్నాయి. బెంగాల్‌ ఆత్మగౌరవానికి భంగం కలిగిందని తృణమూల్‌ ఆరోపించగా, తమపై నింద మోపడానికి కుట్ర జరిగిందని భాజపా ప్రత్యారోపణ చేసింది. ఈ సంఘటనకు నిరసనగా ముఖ్యమంత్రి మమతా బెనర్జీ బుధవారం కోల్‌కతాలో ప్రదర్శన నిర్వహించారు.

సంఘటన తీవ్రత దృష్ట్యా ప్రచారాన్ని ఒక రోజు ముందుగా గురువారమే ముగించాలంటూ ఎన్నికల సంఘం అసాధారణ నిర్ణయాన్ని ప్రకటించింది. ఎన్నికల ప్రక్రియలో చివరిదైన ఏడో దశలో భాగంగా 9 నియోజకవర్గాలకు ఈ నెల 19న పోలింగ్‌ జరగాల్సి ఉంది. షెడ్యూలు ప్రకారం శుక్రవారం ప్రచారం ముగియాల్సి ఉండగా, కోల్‌కతాలో జరిగిన ఘర్షణల దృష్ట్యా గురువారం రాత్రి పది గంటలకే ప్రచారాన్ని ముగించాలని ఆదేశించింది. రాజ్యాంగంలోని 324వ అధికరణం ద్వారా సంక్రమించిన అధికారాలను ఉపయోగించుకొని, తొలిసారిగా ఇలాంటి నిర్ణయం తీసుకున్నట్టు డిప్యూటీ ఎన్నికల కమిషనర్‌ చంద్ర భూషణ్‌ కుమార్‌ చెప్పారు. రాష్ట్ర ప్రభుత్వ ముఖ్య కార్యదర్శి (హోం) అత్రి భట్టాచార్య, అదనపు డీజీపీ (సీఐడీ) రాజీవ్‌ కుమార్‌లను ఆయా పదవుల నుంచి తొలగించినట్టు తెలిపారు.

పశ్చిమ బెంగాల్‌లో 324వ అధికరణాన్ని అమలు చేయడాన్ని మమతా బెనర్జీ ఖండించారు. ఈ అధికరణాన్ని విధించేటంతటి శాంతిభద్రతల సమస్యలు రాష్ట్రంలో లేవని చెప్పారు. ఎన్నికల సంఘం ‘‘గతంలో ఎన్నడూ లేని, అప్రజాస్వామిక, అనైతిక నిర్ణయం తీసుకొంది. ఇది ప్రధాని నరేంద్ర మోదీ, అమిత్‌ షాలకు ఈసీ ఇచ్చిన బహుమతి’’ అని ఆరోపించారు. మొత్తం ఆర్‌ఎస్‌ఎస్‌వారితో నిండిపోయిన ఇలాంటి ఎన్నికల సంఘాన్ని తానెప్పుడూ చూడలేదని అన్నారు. ఇద్దరు ఉన్నతాధికారులను కూడా ఈసీ కాకుండా మోదీ, అమిత్‌షాయే తొలగించారని ఆరోపించారు. విగ్రహాన్ని ధ్వంసం చేయడం భాజపా పనేనని తృణమూల్‌ కాంగ్రెస్‌ ప్రధాన కార్యదర్శి పార్థ ఛటర్జీ ఆరోపించారు. ఎన్నికల ముందు హింస సృష్టించాలన్న ఉద్దేశంతోనే అమిత్‌ షా ప్రదర్శన నిర్వహించారని అన్నారు.