news

జగన్ సర్కారుపై తెలుగుదేశం పార్టీ వ్యూహం మార్చుకుంది. తొలుత కొత్త ప్రభుత్వానికి 6 నెలలు గడువు ఇవ్వాలని ఆ పార్టీ భావించింది. అయితే టీడీపీ కార్యకర్తలపై వైసీపీ దాడులు చేస్తుండడంతో సర్కారుపై తక్షణమే పోరాటం చేయాలని నిర్ణయించింది. ఇవ్వాల్టి నుంచి ప్రారంభమయ్యే అసెంబ్లీ సమావేశాల్లో దాడులను ప్రస్తావించి వైసీపీ తీరును ఎండగట్టాలని డిసైడయింది. సంఖ్యాబలం తక్కువగా ఉన్నా.. ప్రజల సమస్యలపై సభలో పోరాటం చేయాలని టీడీపీ నేతలకు సూచించారు అధినేత చంద్రబాబు. నేటి నుంచి అసెంబ్లీ సమావేశాలు ప్రారంభమవుతుండడంతో ఎలా ముందుకు వెళ్లాలి అన్నదానిపై ఎమ్మెల్యేలు, ఎమ్మెల్సీలతో ఆయన భేటీ అయ్యారు. శాసనసభలో తమకు 23మంది సభ్యులు ఉన్నా ప్రభుత్వాన్ని నిలదీయడంలో అందరూ ముందు ఉండాలని పిలుపు ఇచ్చారు. మండలిలో 35మంది సభ్యుల బలం ఉన్నందున అక్కడ మరింత క్రీయాశీలకంగా వ్యవహరించాలని దిశానిర్దేశం చేశారు.

ఉభయసభల్లోనూ పార్టీ సభ్యులకు పదవులను ఖరారు చేశారు చంద్రబాబు. శాసనసభలో టీడీపీ పక్షనేతగా చంద్రబాబే వ్యవహరించనుండగా.. ఉపనేతలుగా అచ్చెన్నాయుడు, గోరంట్ల బుచ్చయ్య చౌదరి, నిమ్మల రామానాయుడును నియమించారు. విప్‌గా వీరాంజనేయ స్వామి ఉంటారు. శాసన మండలిలో పార్టీ పక్ష నేతగా యనమల రామకృష్ణుడు, ఉప నేతలుగా డొక్కా మాణిక్యవర ప్రసాద్, సంధ్యారాణి, గౌరువాని శ్రీనివాసును నియమించారు. మండలి విప్ గా బుద్దా వెంకన్నను ఎంపిక చేశారు. టీడీపీ శాసనసభాపక్ష కోశాధికారిగా మద్దాలి గిరి కొనసాగుతారు. ప్రస్తుత శాసనసభా సమావేశాల్లో వివిధ అంశాలు చర్చకు రానప్పటికీ గవర్నర్ ప్రసంగంపై ధన్యవాదాలు తెలిపే తీర్మానంపై మాట్లాడే అవకాశం వస్తుంది. అప్పుడు ప్రస్తావించాల్సిన అంశాలను చంద్రబాబు నేతలతో చర్చించారు. తమ ప్రభుత్వం ప్రవేశపెట్టిన అన్నదాత సుఖీభవ పథకం కింద రైతులకు ఇవ్వాల్సిన 15 వేల రూపాయల పెట్టుబడి సాయాన్ని రద్దు చేసి 12,250 మాత్రమే ఇవ్వడంపై అభ్యంతరాలు లేవలెత్తనున్నారు.

గత 15 రోజులుగా టీడీపీ నేతలపై వైసీపీ చేస్తున్న దాడుల అంశాన్ని సభలో ప్రస్తావించి శాంతి భద్రతల పరిరక్షణ బాధ్యతను కొత్త ప్రభుత్వానికి గుర్తు చేయాలని తెలుగుదేశం భావిస్తోంది. అలాగే తమ పార్టీ నాయకులపై అవినీతి బురద జల్లితే సమర్ధంగా తిప్పి కొట్టాలని డిసైడయింది. తప్పుడు కేసులు బనాయించినా, అవమానాలకు గురిచేసినా, వాటన్నింటిని ఎదుర్కోవాలని చంద్రబాబు నేతలకు దిశానిర్దేశం చేశారు. ఏ తప్పు చేయనప్పుడు భయపడాల్సిన పనిలేదని ఆయన స్పష్టం చేశారు. సహేతుకంగా నిర్మాణత్మక విమర్శలతో ప్రభుత్వాన్ని ఇరుకున పెట్టాటలన్నారు. . ఎమ్మెల్యేలు, ఎమ్మెల్సీలు సమన్వంతో పనిచేయాలని హితబోధ చేశారు. అసెంబ్లీ సమావేశాలు ఇవ్వాలే ప్రారంభం కానుండడంతో టీడీపీ ఎమ్మెల్యేలు పసుపు చొక్కాలతో హాజరు కానున్నారు. ఉదయం అధినేత చంద్రబాబు నివాసానికి చేరుకొని, అక్కడి నుంచి వెంకటపాలెం వెళ్లి ఎన్టీఆర్ విగ్రహానికి నివాళులు అర్పించి అసెంబ్లీకి వెళ్తారు.

ఆంధ్రప్రదేశ్  రాజధాని అమరావతికి ఎటు వైపు చూసినా కష్టాలే కనిపిస్తున్నాయి. నిన్నటి దాక, అక్కడ పనులు ఆపమని ఆదేశాలు వచ్చాయని, అక్కడ పని చేసిన వారందరూ వెళ్ళిపోతున్నారు అనే వార్తలు చూసాం. ఇలాంటి వార్తలు అమరావతి ప్రేమికులకు నిజంగా చేదు వార్తే. జగన్ ఎప్పుడు రివ్యూ చేస్తారా, మళ్ళీ అమరావతి పనులు ఎప్పుడు మొదలు అవుతాయా అని అందరూ ఎదురు చూస్తున్న టైంలో, అక్కడ అగ్ని ప్రమాదం జరిగింది అనే వార్తలు ఇప్పుడు మరింత బాధిస్తున్నాయి. అమరావతి  నిర్మాణ కంపెనీలో ఒకటైన మేఘా ఇంజనీరింగ్‌ కంపెనీలో మంగళవారం అర్ధరాత్రి 11 గంటలకు భారీ అగ్ని ప్రమాదం సంభవించింది. రాజధాని రైతుల ఫ్లాట్ల లేఅవుట్‌లో అభివృద్ధి పనుల నిమిత్తం ఉంచిన దాదాపు రెండు కోట్ల విలువ చేసే ప్లాస్టిక్‌ పైపులు ఈ ప్రమాదంలో దహనమైనట్టు తెలిసింది. ప్రాణనష్టం జరగలేదని అక్కడ ఉన్న కొంత మంది కార్మికులు తెలిపారు. మంటలను అదుపులోకి తెచ్చేందుకు మేఘా కంపెనీ సిబ్బంది, అగ్నిమాపక సిబ్బంది తీవ్రంగా శ్రమించారు. అయితే మంటలు ఎలా అంటుకున్నాయి అనే విషయం పై మాత్రం, ఇంకా క్లారిటీ రాలేదు.

లోక్‌సభ ఎన్నికల్లో 22 స్థానాలు దక్కించుకున్న వైసీపీకి లోక్‌సభ డిప్యూటీ స్పీకర్‌ పదవి దక్కబోతోందా..? అవుననే అంటోంది జాతీయ మీడియా. బీజేపీ జాతీయ అధికార ప్రతినిధి, రాజ్యసభ ఎంపీ జీవీఎల్‌ నరసింహరావు మంగళవారం అమరావతికి వచ్చారు. తాడేపల్లిలోని ముఖ్యమంత్రి నివాసానికి వెళ్లి జగన్మోహన్‌రెడ్డితో భేటీ అయ్యారు. దీంతో వైసీపీకి డిప్యూటీ స్పీకర్‌ పదవి ఇచ్చే విషయమై ఇద్దరి నడుమ చర్చ జరిగిందని పెద్దఎత్తున ప్రచారం జరుగుతోంది. ఇటీవల జరిగిన సార్వత్రిక ఎన్నికల్లో బీజేపీ సొంతంగా 303 స్థానాలు గెలుచుకుంది. కాంగ్రెస్‌ (52), డీఎంకే (23) తర్వాత ఎక్కువ సీట్లు (22) వైసీపీకే వచ్చాయి. ఎన్డీఏ భాగస్వామ్య పార్టీ అయిన జేడీయూ (16).. తమకు కేంద్ర కేబినెట్‌లో ఒక్కటే బెర్తు ఇవ్వజూపడంపై తీవ్ర అసంతృప్తి వ్యక్తంచేసింది. కేబినెట్‌లో చేరడం లేదని ప్రకటించింది. సీఎం నితీశ్‌కుమార్‌ తన మంత్రివర్గాన్ని విస్తరించి ఎనిమిది మంది జేడీయూ సభ్యులను మంత్రులుగా తీసుకున్నారు. బీజేపీకి ఒక్కటే ఇస్తామన్నారు.

దాంతో బీజేపీ కూడా దూరంగా ఉండిపోయింది. బిహార్‌లో మాత్రమే ఎన్డీఏ కూటమిలో ఉంటామని.. ఇతర రాష్ట్రాల్లో సొంతగా బరిలోకి దిగుతామని జేడీయూ ఆ తర్వాత ప్రకటించింది. ఈ పరిణామాల నేపథ్యంలో బీజేపీ.. వైసీపీకి చేరువ కావాలని భావిస్తున్నట్లు వార్తలు వస్తున్నాయి. రాజ్యసభలో 2021 మార్చి వరకూ బీజేపీ సొంత బలం సాధించలేదు. ఈ పరిస్థితుల్లో ఏవైనా బిల్లులు పాస్‌ కావాలంటే పెద్దల సభలో ఇబ్బందుల్లేకుండా చూసుకోవాలి. ఆంధ్రప్రదేశ్‌ నుంచి రాజ్యసభ ఎన్నికలు జరిగితే సీట్లన్నీ వైసీపీకే వెళ్తాయి. బీజేపీకి దాని మద్దతు అవసరమవుతుంది. పైగా ఎన్డీఏ నుంచి టీడీపీ బయటకు వచ్చినప్పటి నుంచి బీజేపీతో వైసీపీ సఖ్యంగా ఉంటోంది. అందుకే ఆ పార్టీకి లోక్‌సభ డిప్యూటీ స్పీకర్‌ పదవిని బీజేపీ ఇవ్వజూపినట్లు సమాచారం. గతంలో వాజ్‌పేయి ప్రభుత్వానికి టీడీపీ బయటి నుంచి మద్దతిచ్చినా.. లోక్‌సభ స్పీకర్‌ పదవి (జీఎంసీ బాలయోగి) తీసుకుంది. అదే విషయాన్ని బీజేపీ నేతలు.. వైసీపీ నేతలకు గుర్తు చేస్తున్నట్లు ప్రచారం జరుగుతోంది. దీనిపై రెండు పార్టీల నాయకులూ నోరు విప్పడంలేదు.

గవర్నర్‌ నరసింహన్‌ను మారుస్తున్నారని, ఆయన స్థానంలో సుష్మా స్వరాజ్‌ను కేంద్రం నియమించబోతోందని వస్తున్న వదంతులను నమ్మవద్దని బీజేపీ ఎంపీ జీవీఎల్‌ నరసింహరావు స్పష్టం చేశారు. ఇప్పట్లో నరసింహన్‌ను మార్చే యోచన కేంద్రానికి లేదన్నారు. అనంతరం తాడేపల్లిలోని సీఎం నివాసానికి వచ్చిన జీవీఎల్‌ నూతన ముఖ్యమంత్రి వైఎస్‌ జగన్‌కు అభినందనలు తెలియజేశారు. తర్వాత విలేకరులతో ముచ్చటించారు. ఆంధ్రప్రదేశ్‌లో సేవాభావంతో బీజేపీలోకి వస్తామంటే ఎవరినైనా ఆహ్వానిస్తామని తెలిపారు. గ్రామ, మండల స్థాయుల్లో ఎవరైనా చేరవచ్చన్నారు. పెద్ద స్థాయి నేతలు చేరాలంటే అగ్రనాయకత్వం అంతర్గతంగా చర్చించి నిర్ణయం తీసుకుంటుందని చెప్పారు.