news

తూర్పుగోదావరి జిల్లా అమలాపురం పట్టణం మోబర్లీపేట ప్రాంతంలోని తెదేపా నాయకుల ఇళ్లల్లో ఆదాయపన్ను శాఖ అధికారులు సోమవారం సోదాలు నిర్వహించారు. ఉదయం పదకొండున్నర గంటల సమయంలో మొదలైన సోదాలు రాత్రి వరకూ కొనసాగాయి. మూడు బృందాలుగా వచ్చిన అధికారులు పట్టణానికి చెందిన తెదేపా నాయకులు అల్లాడ స్వామినాయుడు(సోంబాబు), అల్లాడ శరత్‌బాబు, అల్లాడ శ్రీనివాసు ఇళ్లల్లో ఏకకాలంలో సోదాలు జరిపారు. ఆదాయ పన్ను శాఖ అసిస్టెంట్‌ కమిషనర్‌ (రాజమహేంద్రవరం) ఎం.వి.రమేష్‌ నేతృత్వంలోని బృందం తొలుత అల్లాడ శరత్‌బాబు ఇంట్లోకి ప్రవేశించి వ్యాపారాది వ్యవహారాలపై ఆరా తీసింది. అక్కడ నుంచి శ్రీనివాసు, స్వామినాయుడు గృహాల్లోకి వెళ్లి పలు వివరాలు సేకరించింది. ఎన్నికలు సమీపిస్తున్న తరుణంలో అమలాపురంలో ఐటీ అధికారుల దాడులు కలకలం సృష్టించాయి.

ముగ్గురు ఇళ్లలో కీలక డాక్యుమెంట్లతోపాటు ఇతర బ్యాంకు ఖాతాల్లో జరిగిన లావాదేవీలపై అధికారులు సోదాలు కొనసాగిస్తున్నారు. మోబర్లీపేటలో నివాసముంటున్న అల్లాడ స్వామినాయుడు, అల్లాడ వాసు, అల్లాడ శరత్‌లకు చెందిన ఇళ్లపై పదిమంది సభ్యులతో కూడిన ఐటీ అధికారులు మూడు బృందాలుగా విడిపోయి ముగ్గురి సోదరుల ఇళ్లలో ఏకకాలంలో సోదాలు నిర్వహించారు. ఈసోదాల్లో కీలక డాక్యుమెంట్లు, కొంత నగదుతోపాటు ఇతర లావాదేవీలపై సోదాలు చేస్తున్నారు. ఇన్‌కంటాక్స్‌ అసిస్టెంట్‌ కమిషనర్‌ ఎంవీ రమేష్‌ ఆధ్వర్యంలో అధికారుల బృందాలు రాత్రి 9 గంటల సమయంలో కూడా సోదాలను కొనసాగిస్తున్నారు. ఇటీవలకాలంలో అల్లాడ సోదరులకు సంబంధించిన కొంత భూమిని విక్రయించారు. దాని విలువ రూ.12 కోట్లుగా చూపడంతో ఆ భూమి లావాదేవీలపై అనుమానం వచ్చిన అధికారులు ప్రధానంగా దృష్టిసారించి విచారణ జరుపుతున్నట్టు తెలిసింది.

గతంలో అపార్ట్‌మెంట్లు, ఇతర నిర్మాణాల్లో భాగస్వామ్య వ్యవహారాలపై కూడా దృష్టిసారించారు. అదేవిధంగా ఆడిటర్‌ ఇంటికి వెళ్లి ఆయనతో చర్చించిన తర్వాత కంప్యూటర్‌ హార్డ్‌డిస్క్‌లను స్వాధీనం చేసుకున్నట్టు సమాచారం. తొలుత అల్లాడ స్వామినాయుడు ఇంటి వద్ద సోదాలు జరిపారు. ఆ తర్వాత అల్లాడ వాసు, శరత్‌ ఇళ్లలోనే ఐటీ అధికారులు సోదాలు రాత్రి సమయంలో కూడా కొనసాగిస్తున్నారు. అయితే ఎవరో అజ్ఞాతవ్యక్తి మూడు నెలల క్రితం అల్లాడ సోదరుల లావాదేవీలపై ఐటీశాఖకు చేసిన ఫిర్యాదును ఆధారంగా చేసుకుని వీరి లావాదేవీలపై నిఘా పెట్టిన ఐటీ అధికారులు సోమవారం ఈ ఆకస్మిక దాడులకు దిగారని ప్రచారం కూడా జరుగుతోంది. అల్లాడ సోదరులు టీడీపీలో కీలకంగా వ్యవహరిస్తూండటంతో ఐటీ దాడులు రాజకీయంగా కూడా చర్చనీయాంశమైంది.

రైతు సంక్షేమాన్ని దృష్టిలో పెట్టుకుని అన్నదాత సుఖీభవ పథకానికి శ్రీకారం చుట్టిన ప్రభుత్వం దీనికి సంబంధించిన విధివిధానాలను విడుదల చేసింది. కౌలు రైతులకు రాష్ట్ర ప్రభుత్వం భారీ సాయం ప్రకటించింది. పెట్టుబడి సాయం రూపంలో కుటుంబానికి ఏడాదికి రూ.15వేల చొప్పున ఇవ్వాలని నిర్ణయించింది. ఖరీఫ్‌ ప్రారంభం కాగానే తొలి విడత మొత్తాన్ని వారి ఖాతాలకు జమ చేయనుంది. కేంద్రం ప్రకటించిన పీఎం-కిసాన్‌లో కౌలు రైతుల ప్రస్తావనే లేదు. అయినా రాష్ట్రం సొంతంగా సాయం చేయాలని నిర్ణయించింది. దీనివల్ల ప్రభుత్వంపై రూ.1,350 కోట్ల భారం పడనుంది. ఇప్పటికే పంట రుణాలతోపాటు రాయితీపై విత్తనాలు, ఎరువుల సరఫరా విషయంలోనూ ప్రభుత్వం వీరికి ప్రాధాన్యమిస్తోంది.

మరే రాష్ట్రంలో లేని విధంగా రూ.5వేల కోట్ల పంటరుణాలు ఇప్పించింది. రెవెన్యూశాఖ ద్వారా రుణ అర్హత కార్డులు, వ్యవసాయశాఖద్వారా కౌలుదారు పత్రాలు మంజూరు చేయించింది. ఇప్పుడు పెట్టుబడి సాయం అందించనుంది. కేంద్రంతో సంబంధం లేకుండా రాష్ట్రమే సొంతంగా అయిదెకరాల లోపున్న రైతులకు రూ.9వేలు, అయిదెకరాల పైబడిన వారికి రూ.10వేలు ఇస్తుండగా.. సెంటు భూమి లేని కౌలు రైతులకు ఏకంగా రూ.15,000 చొప్పున ఇవ్వనుంది.రాష్ట్రంలో అధికారిక అంచనాల ప్రకారం గుర్తించిన 15.50 లక్షల మంది కౌలు రైతుల్లో సెంటు భూమి లేని వారు సుమారు 9 లక్షల వరకు ఉంటారని అంచనా. రాష్ట్రంలో 54 లక్షల మంది రైతులు కేంద్ర పథకానికి అర్హులుగా గుర్తించింది. వీరందరికీ కేంద్రం మూడు విడతల్లో రూ.6 వేల ఆర్థిక సాయాన్ని అందించనుండగా రాష్ట్ర ప్రభుత్వం రెండు విడతల్లో మరో రూ.9 వేలను చెల్లించనుంది. మొత్తం రాష్ట్రంలో 70 లక్షల రైతు కుటుంబాలు ఉండగా కేంద్ర నిబంధనల ప్రకారం ఐదెకరాల లోపు ఉన్న చిన్న, సన్నకారు రైతులు 54 లక్షల మంది ఉన్నట్లుగా గుర్తించారు. మిగిలిన 16 లక్షల మంది రైతులు ఈ పథకానికి కేంద్ర నిబంధనల ప్రకారం అర్హులు కారు.

దీంతో రాష్ట్ర ప్రభుత్వం ఈ 16 లక్షల మంది రైతు కుటుంబాలను సైతం ఆదుకోవాలని నిర్ణయం తీసుకుంది. దీనిలో భాగంగా వీరందరికి రూ.10వేల ఆర్థిక సాయాన్ని కేంద్రంతో సంబం ధం లేకుండా రాష్ట్ర ప్రభుత్వమే చెల్లించనుంది. మార్చిలోగా మొదటి విడత రూ.4 వేల ఆర్థిక సాయాన్ని విడుదల చేయాలని ప్రభుత్వం నిర్ణయించింది. మొత్తం రెండు దఫాలుగా ఈ చెల్లింపులు జరపనున్నారు. రబీ, ఖరీఫ్‌ల వారీగా రైతులకు పెట్టుబడి సాయాన్ని అందించనుంది. కేంద్ర సాయం పొందే రైతులకు తొలివిడతగా రూ.4 వేలను అందిస్తారు. అదే విధంగా కేంద్ర పథకానికి అర్హులు కాని రైతులకు రూ. 5 వేలు తొలివిడతగా చెల్లించనున్నారు. వీరందరి ఖాతాలకు నేరుగా నగదు జమ అయిందని నిర్ధరణ అయ్యాక మార్చిలో మిగిలిన రూ.3వేలు బదిలీ చేస్తారు. ఖాతా సంఖ్యలు సరిగా లేని, వివరాలు అందుబాటులో లేని వారిని కూడా గుర్తించి వెంటనే చెల్లించేందుకు ఏర్పాట్లు చేస్తున్నామని వ్యవసాయ మంత్రి సోమిరెడ్డి చంద్రమోహన్‌రెడ్డి తెలిపారు.

రాయలసీమ చిరకాల వాంఛ హైకోర్టు బెంచ్‌ మంజూరు కానుంది. కర్నూలు పట్టణంలో హైకోర్టు బెంచ్‌ ఏర్పాటు చేస్తూ అధికారికంగా ప్రభు త్వం తొందరలోనే ఉత్తర్వులు జారీ చేయ నున్నట్లు తెలిసింది. ఉమ్మడి ఆంధ్రప్ర దేశ్‌లో హైదరాబాద్‌ కేంద్రంగా హైకోర్టు కార్యకలాపాలు నడుస్తున్న సమయంలోనే రాయలసీమ ప్రాంత ప్రజలు బెంచ్‌ కోసం ఆందోళనా కార్యక్రమాలు చేపట్టారు. అప్పట్లో రాయలసీమ, ఆంధ్ర ప్రాంతాల నుంచి ప్రజల ఒత్తిడి పెరగడంతో ప్రభుత్వాలు కూడా వెనుకడుగు వేయాల్సి వచ్చింది. రాష్ట్ర విభజన తర్వాత అమరావతిలో హైకోర్టును ప్రభుత్వం ఏర్పాటు చేసింది. ఇదే సమయంలో బెంచ్‌ కోసం అక్కడి న్యాయవాదులు, ప్రజలు, వివిధ రాజకీయ పార్టీల నేతలు ఆందోళన చేస్తున్నారు.

అక్కడి వారి ఆకాంక్షలకు అనుగుణంగా ప్రభుత్వం హైకోర్టు బెంచ్‌ని కర్నూలు పట్టణంలో ఏర్పాటుకు నిర్ణయించుకొని విధి విధానాలు రూపొందిస్తున్నట్లు తెలిసింది. తొందరలోనే అధికారిక ఉత్తర్వులు వెలువడనున్నట్లు ప్రభుత్వ వర్గాల సమాచారం. మరో పక్క, రాయలసీమలో హైకోర్టు బెంచ్ ఏర్పాటు చేయాలని హైకోర్టులోనే పిటిషన్ వేశారు. ఇప్పుడా పిటిషన్ కేంద్రం దగ్గరకు వెళ్లింది. కానీ కేంద్రం మాత్రం ఏమీ చెప్పకుండా నాన్చుతోంది. రాయలసీమలో ఏపీ హైకోర్టు బెంచ్ ఏర్పాటు పై కేంద్ర ప్రభుత్వం తన అభిప్రాయాన్ని చెప్పాలని రాష్ట్ర సర్వోన్నత న్యాయస్థానం నోటీసులు జారీ చేసింది. శ్రీభాగ్ ఒడంబడిక మేరకు రాయలసీమలో హై కోర్టును ఏర్పాటు చేయాలని అభ్యర్ధిస్తూ సీనియర్ న్యాయవాది జె.నారాయణ స్వామిలో 2017లో ఉమ్మడి హై కోర్టులో పిల్ దాఖలు చేశారు. రాష్ట్ర విభజన అనంతరం రాజధాని ఆంధ్ర ప్రాంతంలో ఉన్నందున హై కోర్టును రాయలసీమలో ఏర్పాటు చేయాలని, ఆ మేరకు కేంద్రానికి ఆదేశాలు ఇవ్వాలని ఆయన అభ్యర్ధించారు.

ఈ కేసు విచారణ లో ఉండగానే అమరావతిలో హైకోర్టు ఏర్పాటు చేస్తూ కేంద్ర, రాష్ట్ర ప్రభుత్వాలు నిర్ణయం తీసుకున్నాయి. ఈ పిటిషన్ పై ఏపీ హైకోర్టు లో విచారణకు వచ్చింది. గతంలో కేంద్ర ప్రభుత్వంతో సంబంధం లేకుండా బాంబే హైకోర్టు చీఫ్ జస్టిస్… ప్రత్యేకంగా ఔరంగబాద్ బెంచ్ ను ఏర్పాటు చేశారని పిటిషనర్ వాదించారు. ఆ మేరకు హైకోర్టు ప్రధాన న్యాయమూర్తి కి అధికారాలు ఉన్నాయని, సర్వోన్నత న్యాయస్థానం కూడా దీనిని సమర్ధించిందని గుర్తుచేశారు. సుప్రీంకోర్టు తీర్పు ఆధారంగా హై కోర్టు ప్రధాన న్యాయమూర్తి రాష్ట్ర ప్రభుత్వంతో చర్చించి కనీసం హై కోర్టు బెంచ్ అయినా రాయలసీమలో ఏర్పాటు చేయాలని అభ్యర్ధించారు. పిటిషనర్ వాదనలను పరిగణలోకి తీసుకున్న ధర్మాసనం దీనిపై కేంద్ర ప్రభుత్వ అభిప్రాయం ఏమిటో చెప్పాలని హైకోర్టు ఆదేశించింది. కాని కేంద్రం ఇప్పటి వరకు సమాధానం ఇవ్వలేదు. అయితే ఈ కేసుతో సంబంధం లేకుండా, ఏపి ప్రభుత్వం మాత్రం, హైకోర్ట్ బెంచ్ ఏర్పాటుకు పావులు కదుపుతుంది.