news

పశ్చిమ బెంగాల్‌ విషయంలో, సుప్రీం కోర్టులో సీబీఐకి ఎదురుదెబ్బ తగిలింది. శారదా కుంభకోణం దర్యాప్తు నేపథ్యంలో కోల్‌కతాలో నిన్న రాత్రి నుంచి అనూహ్య పరిణామాలు చోటుచేసుకుంటున్నాయి. దర్యాప్తులో భాగంగా కోల్‌కతా పోలీస్‌ కమిషనర్‌ రాజీవ్‌ కుమార్‌ను ప్రశ్నించేందుకు సీబీఐ అధికారులు ఆయన నివాసానికి వెళ్లగా.. వారిని పోలీసులు అడ్డుకుని పోలీస్‌స్టేషన్‌కు తరలించారు. దీంతో తాజా పరిణామాలను సీబీఐ అధికారులు సుప్రీంకోర్టు దృష్టికి తీసుకొచ్చారు. దర్యాప్తునకు సహకరించేలా సీపీ రాజీవ్‌ కుమార్‌ను ఆదేశించాలని కోరుతూ న్యాయస్థానంలో పిటిషన్‌ దాఖలు చేశారు. కోల్‌కతా‌ ఘటన నేపథ్యంలో తమ కేసును తక్షణ విచారణకు చేపట్టాలన్న సీబీఐ అభ్యర్థనను సుప్రీం కోర్టు ప్రధాన న్యాయమూర్తి రంజన్ గొగోయ్ తోసిపుచ్చారు.

సీబీఐ అధికారుల అరెస్టుపై దాఖలు చేసిన పిటిషన్‌పై విచారణను మంగళవారానికి వాయిదా వేశారు. సీబీఐ అధికారులను అన్యాయంగా అరెస్టు చేశారని సొలిసిటర్ జనరల్ తుషార్ మెహతా కోర్టుకు నివేదించారు. కోల్‌కతా పోలీస్ కమిషనర్ రాజీవ్ కుమార్ లొంగిపోయేలా అదేశాలివ్వాలని కోరారు. విచారణ ఆధారాలను రాజీవ్ కుమార్ మరుగునపడేలా చేశారని వాదించారు. దీనిపై స్పందించిన సీజేఐ.. వాటికి ఆధారాలు ఉంటే చూపాలని సీబీఐని ఆదేశించారు. తదుపరి విచారణను మంగళవారానికి వాయిదా వేస్తున్నట్టు తెలిపారు. సీబీఐ తరఫున సొలిసిటర్‌ జెనరల్‌ తుషార్‌ మెహతా సుప్రీంకోర్టులో వాదనలు వినిపించారు. ప్రస్తుత పరిస్థితుల దృష్ట్యా ఈ పిటిషన్‌పై నేడు అత్యవసర విచారణ చేపట్టాలని తుషార్‌ కోర్టుకు విన్నవించారు. అయితే ఇందుకు న్యాయస్థానం నిరాకరించింది. రాజీవ్‌ కుమార్‌పై ఆరోపణలకు సంబంధించి ప్రస్తుతం ఎలాంటి రుజువులు లేనందున ఈ కేసును మంగళవారం విచారిస్తామని సుప్రీంకోర్టు ప్రధాన న్యాయమూర్తి జస్టిస్‌ రంజన్‌ గొగొయ్‌ నేతృత్వంలోని ధర్మాసనం తెలిపింది.

మరో పక్క, కేంద్ర దర్యాప్తు సంస్థ సీబీఐ, పశ్చిమ బెంగాల్ ప్రభుత్వం మధ్య కొనసాగుతున్న హైడ్రామా ఇవాళ పార్లమెంటుకు చేరింది. ఉభయ సభలు ప్రారంభం కాగానే కేంద్రం వైఖరిపై తృణమూల్ కాంగ్రెస్ (టీఎంసీ) నేతలు తీవ్ర నిరసన వ్యక్తం చేశారు. రాజ్యసభలో టీఎంసీ సభ్యులు పెద్ద పెట్టున నినాదాలు చేస్తూ సభాకార్యక్రమాలను అడ్డుకోవడంతో తీవ్ర గందరగోళం నెలకొంది. సీబీఐ దుర్వినియోగంపై చర్చ చేపట్టాలంటూ టీఎంసీ పట్టుపట్టింది. దీంతో సభ ప్రారంభమైన కొద్ది నిమిషాలకే మధ్యాహ్నం 2 గంటల వరకు వాయిదా వేస్తున్నట్టు రాజ్యసభ చైర్మన్, ఉపరాష్ట్రపతి వెంకయ్య నాయుడు ప్రకటించారు. లోక్‌సభలోనూ సీబీఐ వ్యవహారంపై గందరగోళం రేగింది. సంతాప తీర్మానాల అనంతరం సుప్రియా సూలే ఎన్ఎస్ఎస్‌వో గణాంకాలపై లోక్‌సభలో లేవనెత్తారు.

నవ్యాంధ్ర రాజధాని అమరావతిలో జ్యూడీషియల్‌ కాంప్లెక్స్‌లో రాష్ట్ర హైకోర్టు ప్రారంభోత్సవం, శాశ్వత హైకోర్టు భవనం శంకుస్థాపన కార్యక్రమాలు ఆదివారం ఘనంగా జరిగాయి. భారత ప్రధాన న్యాయమూర్తి జస్టిస్‌ రంజన్‌ గొగోయ్‌ చేతుల మీదుగా జరిగిన ఈ కార్యక్రమంలో సుప్రీంకోర్టు న్యాయమూర్తులు జస్టిస్‌ ఎన్వీ రమణ, జస్టిస్‌ లావు నాగేశ్వరరావు, జస్టిస్‌ సుభా్‌షరెడ్డి, ఏపీ హైకోర్టు తాత్కాలిక ప్రధాన న్యాయమూర్తి జస్టిస్‌ ప్రవీణ్‌కుమార్‌, తెలంగాణ హైకోర్టు సీజే రాధాకృష్ణన్‌, ఏపీ సీఎం చంద్రబాబు తదితరులు పాల్గొన్నారు. ఈ సందర్భంగా ఏర్పాటు చేసిన సభలో సీజేఐ గొగోయ్‌ మాట్లాడారు. న్యాయం, నైతిక విలువలు కలిసి ప్రయాణం చేస్తాయన్నారు. ఇచ్చిన తీర్పులను న్యాయమూర్తులు తమకు తాముగా సమర్ధించుకోవడం కాదని, రాజ్యాంగం సమర్ధించేలా ఉండాలన్నారు. అమరావతిలో భారీ భవంతిలో ప్రారంభమైన హైకోర్టు భవనాన్ని న్యాయానికి ప్రతీకగా ఉండేలా చేయాలని పిలుపునిచ్చారు. ఆంధ్రప్రదేశ్‌ ప్రజలకు ఈ హైకోర్టును అంకిత చేస్తున్నానని అన్నారు.

రాజ్యాంగ ధర్మాన్ని చంద్రబాబు బాగా నిర్వర్తించారని పేర్కొన్నారు. న్యాయమూర్తులు, న్యాయవాదులు ఇద్దరూ కలిసి న్యాయవ్యవస్థ ప్రతిష్ఠ పెంచాలని బార్‌ న్యాయవాదులకు అప్పీల్‌ చేశారు. న్యాయ వ్యవస్థలో 5వేల ఖాళీలు జిల్లాల స్థాయి న్యాయవ్యవస్థలో ఉన్నాయని వీటిని భర్తీ చేస్తామన్నారు. దేశవ్యాప్తంగా హైకోర్టుల్లో 392 జడ్జిల పదవులు ఖాళీగా ఉండగా, హైకోర్టు కొలీజియంలు సిఫార్సు చేయక 270 పోస్టుల భర్తీ నిలిచిందని వివరించారు. హైకోర్టు భవనం ప్రారంభోత్సవంలో పాల్గొనడం సంతోషంగా ఉందని ఈ కార్యక్రమంలో పాల్గొన్న సుప్రీంకోర్టు న్యాయమూర్తి జస్టిస్‌ లావు నాగేశ్వరరావు అన్నారు.

‘వ్యక్తుల భావోద్వేగాలు వ్యవస్థల్ని ప్రభావితం చేయడానికి ప్రయత్నించడం విచారకరం. ఇటీవల కాలంలో ఆ సమస్యల్ని ధీటుగా ఎదుర్కొన్నాం’ అని సుప్రీంకోర్టు న్యాయమూర్తి జస్టిస్‌ ఎన్వీ రమణ పేర్కొన్నారు. భారత న్యాయవ్యవస్థ శక్తిమంతం కావడానికి న్యాయమూర్తులు, న్యాయవాదుల సమష్ఠి కృషే కారణమని అన్నారు. కోర్టులు అన్ని వేళలా ప్రజల పక్షానే నిలుస్తున్నాయని, ఇది న్యాయవ్యవస్థకూ, ప్రజలకూ మధ్యగల విశ్వాసానికి రుజువన్నారు. ఈ సందర్భంగా ఆయన తెలుగు వారి పై కవిత వినిపించారు. "తెలుగువాడు దేనికైనా సైసై.. తెలుగువారి ధీశక్తి.. తెలుగువారి క్రియాశక్తి.. నలుదెసలా రహించాలి..తెలుగుతనం జయించాలి.. కోట్లాది తెలుగుజాతి హర్షించాలి.. తెలుగువాడి తెలివితేటలకు జైజై.. తెలుగువాడు దేనికైనా సైసై.. తెలుగువారి నెదురాడు వాడు నైనై" అంటూ కవిత పాడి వినిపించారు.

రాష్ట్ర రాజధాని అమరావతి పరిధిలో ఏర్పాటు చేసిన వివిధ కార్యక్రమాల్లో పాల్గొంటూ సుప్రీంకోర్టు ప్రధాన న్యాయమూర్తి జస్టిస్ రంజన్ గొగోయ్ ఆదివారం బిజీబిజీగా గడిపారు. విజయవాడకు శనివారం చేరుకున్న ఆయన రాజధాని ప్రాంతంలోని నేలపాడు వద్ద నిర్మించనున్న ఏపీ హైకోర్టు శాశ్వత భవనాలకు శంకుస్థాపన చేశారు. ఈసందర్భంగా నిర్వహించిన ప్రత్యేక పూజలో పాల్గొన్నారు. అనంతరం జ్యుడీషియల్ కాంప్లెక్సును ప్రారంభించారు. తాత్కాలిక హైకోర్టు నిర్మాణ విశేషాలను ఆడియో, వీడియో ప్రజంటేషన్ ద్వారా అధికారులు ఆయనకు వివరించారు. అమరావతి నగర నిర్మాణ నమూనాలను ఆసక్తిగా తిలకించారు. హైకోర్టు, శాసనసభ, 9నగరాల గురించి ముఖ్యమంత్రి చంద్రబాబు నాయుడు వివరించారు.

రాజధానిలో వర్సిటీల ఏర్పాటు గురించి అధికారులను జస్టిస్ గొగోయ్ అడిగి తెలుసుకున్నారు. తాత్కాలిక హైకోర్టు ఆవరణ పరిధిలో 100 అడుగుల ఎత్తుల ఏర్పాటు చేసిన జాతీయ జెండాను జస్టిస్ గొగోయ్ ఆవిష్కరించారు. తాత్కాలిక హైకోర్టు భవనంలో ప్రవేశద్వారం సమీపంలో గోడపై ఏర్పాటు చేసిన మహాత్మా గాంధీ నిలువెత్తు విగ్రహాన్ని ఆయన ఆవిష్కరించారు. తాత్కాలిక హైకోర్టులోని వివిధ హాళ్లను సందర్శించారు. రెండో అంతస్తులోని కోర్టు హాల్‌ను కూడా పరిశీలించారు. 179రోజుల్లో భవన నిర్మాణం పూర్తిచేయడంపై ఆశ్చర్యం, హర్షం వ్యక్తం చేశారు. అంతకుముందు పోలీసుల గౌరవ వందనం స్వీకరించారు. బహిరంగ సభ ముగిసిన అనంతరం ఆయన హెలికాప్టర్‌లో అమరావతి రాజధాని నిర్మాణ ప్రాంతాలను వీక్షించారు. ఈ పర్యటనలో ఆయన వెంట దీపాంజలీ గొగోయ్ కూడా ఉన్నారు. కాగా తాత్కాలిక హైకోర్టుగా వ్యవహరించే జ్యుడీషియల్ కాంప్లెక్సును 4.6 ఎకరాల్లో నిర్మించారు. 2.65 లక్షల చదరపు అడుగుల విస్తీర్ణం వచ్చేలా నిర్మించారు. 22 కోర్టులు, జడ్జిల చాంబర్లను, గ్రంథాలయం, బార్ రూమ్, అడ్వకేట్ల చాంబర్ల వంటివి దీనిలో ఏర్పాటు చేశారు.

‘‘అమరావతిలో ఏర్పాటు చేసే నవనగరాల్లో ఒకటైన న్యాయనగరం (జస్టిస్‌ సిటీ)లో నల్సార్‌ విశ్వవిద్యాలయం ఏర్పాటుకు సుప్రీంకోర్టు ప్రధాన న్యాయమూర్తి, న్యాయమూర్తులు సహకరించాలి. అందుకు అవసరసమైన భూమి, కావాల్సిన నిధులు ఇస్తాం. సింగపూర్‌, హాంకాంగ్‌, లండన్‌ల తరహాలో మధ్యవర్తిత్వ, వివాద పరిష్కార కేంద్రాలు (ఆర్బిట్రేషన్‌, డిస్ప్యూట్‌ రిజల్యూషన్‌ సెంటర్‌)లను ఏర్పాటు చేయాలి. న్యాయ విద్యాలయాలను నెలకొల్పేందుకూ తోడ్పాటు అందించాలి. హైకోర్టు ఉద్యోగుల పదవీవిరమణ వయసును 58 ఏళ్ల నుంచి 60 ఏళ్లకు పెంచాం. వారికి ఉచిత వసతి, రవాణా సదుపాయాలూ కల్పిస్తాం. రాష్ట్ర హైకోర్టులో పెండింగ్‌లో ఉన్న 1.70 లక్షల పరిష్కారానికి సాంకేతికత వినియోగించుకోవొచ్చు’’ అని చంద్రబాబు సూచించారు. రాజధాని నిర్మాణానికి భూములిచ్చిన రైతులకు చంద్రబాబు ధన్యవాదాలు తెలిపారు. వారు భూములివ్వకపోతే ఈరోజు ఈ నిర్మాణాలేవీ సాధ్యమయ్యేవి కాదన్నారు. రాజధానిలో మౌలిక వసతులకు రూ.50వేల కోట్లు ఖర్చు చేస్తున్నామని తెలిపారు.