news

రాష్ట్ర విభజన చట్టం హామీల అమలులో కేంద్రం ప్రదర్శిస్తున్న నిర్లక్ష్యంపై ఒత్తిడి పెంచుతూ వచ్చిన సీఎం చంద్రబాబు.. ఇప్పుడు సొంతగానే రాష్ర్టాన్ని అభివృద్ధి చేసేందుకు నడుం బిగించారు. ఈ క్రమంలో మరో కీలక ముందడుగు వేశారు. ప్రకాశం జిల్లాలో నిర్మించాలని భావిస్తున్న రామాయపట్నం ఓడరేవుకు కేంద్రం సహకరించకపోయినా.. స్వశక్తితోనే ఈ పోర్టును నిర్మించాలని నిర్ణయించి జనవరి 9న శంకుస్థాపన చేసేందుకు ముహూర్తం కూడా నిర్ణయించారు. ఇప్పటికే, పోలవరం సాగు నీటి ప్రాజెక్టు అంచనాలను ఆమోదించకుండా కేంద్ర జల వనరుల మంత్రిత్వ శాఖ కొర్రీలు వేస్తుంటే.. రాష్ట్రం సొంత నిధులతోనే లక్ష్యాన్ని అధిగమించేందుకు సన్నద్ధమైంది.

కడప స్టీల్‌ ప్లాంట్‌ విషయంలోనూ కేంద్రం ఇదే వైఖరి ప్రదర్శించింది. దీంతో ఇటీవల ఈ స్టీల్‌ ప్లాం ట్‌కు చంద్రబాబు శంకుస్థాపన చేసిన విషయం తెలిసిందే. రామాయపట్నం పోర్టు లాభనష్టాలపై మెసర్స్‌ రైట్స్‌ సంస్థ అధ్యయనం చేసి లాభదాయకమేనని నివేదిక ఇచ్చింది. దీనిని కేంద్రానికి పంపింది. నివేదిక ఆధారంగా నిర్ణయం తీసుకోవాలని కేంద్రానికి పలు దఫాలు రాష్ట్రం విజ్ఞప్తి చేసింది. రామాయపట్నం పోర్టు డీపీఆర్‌ తయారీని ప్రభుత్వం కాకినాడ పోర్టు డైరెక్టరేట్‌కు అప్పగించింది. అదేసమయంలో పోర్టుకు అవసరమైన వనరులు, నిధులు సమకూర్చే బాధ్యత ను ఏపీ మారిటైమ్‌ ఇన్‌ఫ్రాస్ట్రక్చర్‌ డెవల్‌పమెంట్‌ కార్పొరేషన్‌ లిమిటెడ్‌(ఏపీఎంఐడీసీఎల్‌)కు అప్పగించారు. ఏపీఎంఐడీసీఎల్‌ నిర్వహణ కోసం రూ.100 కోట్లను ప్రభుత్వం కేటాయించింది.

మరో రెండు నెలల్లో స్టీల్ ప్లాంట్ పనులు ప్రారంభం కానున్నాయి. ఇప్పుడు తాజాగా రామాయపట్నం ఓడరేవును పూర్తి చేసే బాధ్యతను కూడా చంద్రబాబు తానే తీసుకున్నారు. తద్వారా, మేము సహాయం చెయ్యకపోతే, మీరు ఎదగరు, మేము చెప్పినట్టు వినాలి, మా చెప్పు చేతల్లో ఉండాలి అనే, ఢిల్లీ అహంకారానికి ఎదురు నిలబడి, మీరు సహాయం చెయ్యకపోయినా, ఎదిగే సత్తా, దమ్ము మా ఆంధ్రులకు ఉంది, అనే విధంగా, మరోసారి ఢిల్లీ వాళ్లకి, ఆంధ్రుడు అంటే ఎంతో చెప్పటానికి చంద్రబాబు రెడీ అయ్యారు. సంపద సృష్టించేందుకు, తలసరి ఆదాయాన్ని పెంచేందుకు పరిశ్రమ, సేవా రంగాల విస్తృతికి తాను నాలుగున్నర ఏళ్లుగా రాత్రి పగలు అహర్నిశలు పాటుపడుతూ, రాష్ట్రాన్ని ఆంధ్రుల కష్టంతో ముందుకు తీసుకువెళ్తున్నారు.

సహజంగా చంద్రబాబు పై ప్రభుత్వ ఉద్యోగుల్లో కొంత వ్యతిరేకత ఉంటుంది. ఇక పోలీస్ శాఖలో అయితే అది మరీ ఎక్కువ ఉంటుంది. ఇదంతా చంద్రబాబు ఎక్కువ పని చెయ్యమంటారు, మా మీద ఒత్తిడి ఉంటుంది అని, అందుకే చంద్రబాబు అంటే వ్యతిరేకం అని బహిరంగంగానే చెప్తూ ఉంటారు. అయితే ఇందుకు భిన్నంగా నిన్న ఒక కానిస్టేబుల్, ఎంతో ఎమోషనల్ గా చేసిన ప్రసంగం చూసి అందరూ ఆశ్చర్యపోయారు. చంద్రబాబు చేసిన మంచికి, పోలీస్ శాఖ నుంచి వస్తున్న ప్రశంస ఇది. ఇటీవల పోలీస్‌ శాఖలో ఉద్యోగోన్నతి పొందిన సిబ్బంది సోమవారం విజయవాడ ఇందిరాగాంధీ మున్సిపల్‌ స్టేడియంలో ముఖ్యమంత్రి చంద్రబాబునాయుడిని సన్మానించారు. ఈ సందర్భంగా ఉద్యోగోన్నతి ఇచ్చిన ముఖ్యమంత్రిపై పోలీసు సిబ్బంది ప్రశంసలు జల్లు కురిపించారు. ఆయన రుణం తీర్చుకోలేనిదన్నారు. వృత్తిలో ఉద్యోగోన్నతి పొందలేమనే తమకు పదోన్నతులు ఇచ్చి జీవితంలో ఆనందాన్ని, ఆత్మవిశ్వాసాన్ని కలిగించారని ప్రశంసించారు.

ఉద్యోగోన్నతి పొందిన పలువురు సిబ్బంది తన మనసులోని మాటలను సభావేదికపై వివరించారు. అరుంధతీ నక్షత్రంలా ఏఎస్సైల భుజాలపై ఒక నక్షత్రం పెట్టారని, హెడ్‌కానిస్టేబుళ్ల భుజాలపై మూడు పట్టీలను చంద్రన్న కానుకగా ఇచ్చారన్నారు. మరో కానిస్టేబుల్‌ మాట్లాడుతూ పాతికేళ్లకిందట తాను పాఠశాలకు వెళ్లకుండా రోడ్డు మీదకు తిరుగుతుంటే మంత్రి హోదాలో ఉన్న చంద్రబాబునాయుడు తనను ఆపితే తమకు పాఠశాల లేదని ధైర్యంగా చెప్పానన్నారు. ఆ రోజు చంద్రబాబునాయుడు చొరవతో ఏర్పాటు చేసిన పాఠశాలలో చదువుకుని తాను కానిస్టేబుల్‌ ఉద్యోగం సాధించినట్లు వివరించారు. ఈ సందర్భంగా తమ అనుభవాలను వివరించిన పోలీసు సిబ్బందిని ముఖ్యమంత్రి ప్రశంసించారు.

ఈ సందర్భంగా చంద్రబాబు మాట్లాడారు. ‘పోలీసు వ్యవస్థలో కానిస్టేబుళ్లకు కొత్త శక్తినిస్తున్నాం. మొత్తం 3,151 మందికి పదోన్నతులు కల్పించాం. తిరుపతిలో వీరేష్‌ అనే బాలుడు కిడ్నాప్‌ అయితే 48 గంటల్లోనే టెక్నాలజీ సాయంతో ఛేదించి ఆ బాలుడిని తల్లిదండ్రులకు అప్పగించడం ఏపీ పోలీసుల సమర్థతకు నిదర్శనం. ఇప్పుడు పదోన్నతులు రావడంతో మీలో కనిపించిన ఆనందం శాశ్వతంగా ఉండాలి. సివిల్‌ పోలీసులతోపాటు ఏఆర్‌, మహిళా పోలీసులకు పదోన్నతులు కల్పించే బాధ్యతనూ తీసుకుంటున్నాం’ అని ముఖ్యమంత్రి పేర్కొన్నారు. హోంమంత్రి చినరాజప్ప మాట్లాడారు. ‘రాష్ట్రంలో 60వేల మంది పోలీసులు, వారి కుటుంబాల్లోని 3 లక్షల మంది, మా అందరి బంధువులు మరో ఆరేడు లక్షల మంది మొత్తం సుమారు 10 లక్షల మంది మీకు (ముఖ్యమంత్రి) రుణపడి ఉంటాం’ అని ఏపీ పోలీసు అధికారుల సంఘం రాష్ట్రాధ్యక్షుడు శ్రీనివాసరావు పేర్కొన్నారు.

ఆంధ్రప్రదేశ్‌లో మంగళవారం (2019 జనవరి 1) చారిత్రక ఘట్టం ఆవిష్కృతమైంది. విభజన జరిగిన నాలుగున్నరేళ్ల అనంతరం కీలకమైన హైకోర్టు కొలువు తీరుతోంది. తొలి తాత్కాలిక ప్రధాన న్యాయమూర్తిగా జస్టిస్‌ సి.ప్రవీణ్‌కుమార్‌ బాధ్యతలు స్వీకరించారురు. విజయవాడలో గవర్నర్‌ నరసింహన్‌ ఆయనతో ప్రమాణస్వీకారం చేయించారు. ఈ కార్యక్రమానికి ముఖ్యమంత్రి చంద్రబాబునాయుడు, సుప్రీంకోర్టు న్యాయమూర్తి జస్టిస్‌ ఎన్వీరమణ హాజరయ్యారు. ప్రధాన న్యాయమూర్తితోపాటు మిగిలిన న్యాయమూర్తులతో గవర్నర్‌ ప్రమాణస్వీకారం చేయించారు. దీంతో ఆంధ్రప్రదేశ్‌ రాష్ట్ర ఉన్నత న్యాయస్థానం పూర్తి స్థాయిలో కార్యకలాపాలకు శ్రీకారం చుట్టినట్లయింది. ఏపీ విభజన నేపథ్యంలో 62ఏళ్ల తర్వాత సోమవారం అమరావతికి హైకోర్టు తరలివెళ్లింది.

దీంతో రాష్ట్రంలో చారిత్రక ఘటం ఆవిష్కృతమైంది. 2018 డిసెంబరు 26న ఉమ్మడిహైకోర్టు విభజన నోటిఫికేషన్‌ వెలువడింది. దీంతో నేటి నుంచి అమరావతి కేంద్రంగా ఏపీ రాష్ట్ర హైకోర్టు విధులు ప్రారంభమయ్యాయి. ఉమ్మడిహైకోర్టులో 3.4లక్షల వ్యాజ్యాలు ఉండగా.. అందులో 70శాతం వరకు కేసులు ఏపీకి చెందినవే. ఏపీ హైకోర్టుకు మంజూరైన న్యాయమూర్తుల పోస్టులు 37 కాగా... ప్రస్తుతం ఉన్న వారు 14 మంది. క్యాంపు కార్యాలయంలో 9 కోర్టుహాళ్లు సిద్ధం చేశారు. మరో హాలును మహాత్మాగాంధీ రోడ్డులో ఉన్న ఆర్‌ అండ్‌ బీ కార్యాలయంలో ఏర్పాటు చేయబోతున్నారు. ప్రధాన న్యాయమూర్తి సహా న్యాయమూర్తులంతా ప్రమాణ స్వీకారం అనంతరం తాత్కాలిక హైకోర్టుకు చేరుకున్నారు. తమకు కేటాయించిన చాంబర్లలో ఆసీనులుకానున్నారు. 2వ తేదీ నుంచి నాలుగో తేదీ వరకు విధులు నిర్వర్తిస్తారు. 5వ తేదీన సంక్రాంతి సెలవులు మొదలవుతాయి. అప్పటి నుంచి 21వ తేదీ వరకు వెకేషన్‌ కోర్టును నిర్వహిస్తారు. ఇది వారంలో రెండు రోజులపాటు పనిచేస్తుంది. ఈ నెలాఖరుకు రాజధాని అమరావతి పరిధిలోని జ్యూడీషియల్‌ కాంప్లెక్స్‌కు హైకోర్టు తరలి వెళుతుంది.

ఉమ్మడి హైకోర్టులో చివరి పని రోజు భావోద్వేగాల మధ్య గడిచింది. కోర్టు విభజనపై ప్రధాన న్యాయమూర్తి జస్టిస్‌ టీబీఎన్‌ రాధాకృష్ణన్‌తో కూడిన ధర్మాసనం ఎదుట తన కేసు వాదనలను ముగిస్తూ సీనియర్‌ న్యాయవాది డి.వి.సీతారాంమూర్తి ఆవేదన వ్యక్తం చేశారు. విభజన తప్పనిసరైనప్పటికీ సమయం సరికాదన్నారు. కోర్టు విధులు కొంతసేపు మాత్రమే కొనసాగాయి. అనంతరం న్యాయవాదులు, న్యాయమూర్తుల మధ్య పరస్పర ఆలింగనాల నడుమ వీడ్కోలు పలుకులతో గడిచింది. తెలంగాణ హైకోర్టు ప్రధాన న్యాయమూర్తిగా బాధ్యతలు చేపట్టనున్న జస్టిస్‌ టీబీఎన్‌ రాధాకృష్ణన్‌, ఏపీ తాత్కాలిక ప్రధాన న్యాయమూర్తిగా బాధ్యతలు చేపట్టనున్న జస్టిస్‌ సి.ప్రవీణ్‌కుమార్‌లు ప్రత్యేకంగా పూజలు నిర్వహించారు. విడిపోయే న్యాయమూర్తులందరూ కలిసి కొబ్బరికాయ కొట్టి వెళ్లారు. తెలంగాణ హైకోర్టు బార్‌ అసోసియేషన్‌ వీడ్కోలు ఏర్పాటు చేసింది. హైకోర్టు ఆవరణలో న్యాయవాదులు, న్యాయమూర్తులు ఒకరికొకరు అభినందనలు, వీడ్కోలు పలికారు.