news

డ్వాక్రా సభ్యులకు పసుపు-కుంకుమ చివరి విడత సాయాన్ని దసరా కానుకగా ఇచ్చేందుకు అధికారులు చర్యలు తీసుకుంటున్నారు. 2014 మార్చి 31 నాటికి డ్వాక్రా సంఘంలో ఉన్న ప్రతి సభ్యురాలికీ ప్రభుత్వం డ్వాక్రా రుణమాఫీకి బదులుగా పసుపు-కుంకుమ/పెట్టుబడి నిధి పేరుతో రూ.10వేలు ఆర్థిక సాయం చేస్తోంది. ఇందుకోసం అప్పటివరకు ఉన్న 86లక్షల మంది సభ్యులకు రూ.8,604 కోట్లు మంజూరు చేసింది. ఇప్పటికే ఒక్కో సభ్యురాలికి మూడు విడతల్లో రూ.8వేల చొప్పున రూ.6,883 కోట్లు అందించగా చివరి విడతగా రూ.2వేలు ఇవ్వాల్సి ఉంది. ఇందుకు రూ.1,931 కోట్లు అవసరమంటూ అధికారులు దస్త్రాన్ని ఆర్థిక శాఖకు నివేదించారు. మూడు, నాలుగు రోజుల్లో అక్కడి నుంచి ఆమోదం లభించే అవకాశాలు ఉన్నట్లు వారు చెబుతున్నారు.

డ్వాక్రా సభ్యుల్లో కొందరికి ఆర్థిక సాయం చేరలేదని ప్రభుత్వానికి ఫిర్యాదులు అందిన నేపథ్యంలో అధికారులు క్షేత్రస్థాయి సర్వే చేపట్టారు. గ్రామీణ పేదరిక నిర్మూలన సంస్థ(సెర్ప్‌) ఆధ్వర్యంలో వెలుగు సీసీ ప్రతి సంఘాన్ని సంప్రదిస్తూ సాయం అందిందో లేదో తెలుసుకుంటున్నారు. సెర్ప్‌ పరిధిలో 70లక్షల మంది డ్వాక్రా సభ్యులుండగా ఇప్పటికే 30లక్షల మంది చెంతకు వెళ్లి వివరాలు సేకరించారు. ఇప్పటివరకు 22,205 మందికి అందలేదని గుర్తించారు. వీరందరికీ ఏకమొత్తంలో రూ.10వేల వంతున అందించనున్నారు.

డ్వాక్రా సభ్యులకు వడ్డీ మొత్తాన్ని చెల్లించేందుకు ప్రభుత్వం రూ.316 కోట్లు మంజూరుచేసింది. దీన్ని కూడా దసరా నాటికి సభ్యుల రుణఖాతాల్లో జమచేసేలా అధికారులు చర్యలు తీసుకుంటున్నారు. డ్వాక్రా సభ్యులు బ్యాంకుల నుంచి రుణాలు పొంది వాటి వడ్డీ రేటు మేరకు ప్రతి నెలా కడుతున్నారు. సభ్యులు చెల్లించే వడ్డీ మొత్తాన్ని ప్రభుత్వం విడతల వారీగా సభ్యుల ఖాతాల్లో జమ(రీయింబర్స్‌) చేస్తోంది. ఇలా 2016 ఆగస్టు వరకు వడ్డీ మొత్తాన్ని చెల్లించింది. ప్రస్తుతం మంజూరు చేసిన రూ.316కోట్ల మొత్తంతో 2017 జనవరి వరకు అన్ని సంఘాలకు వడ్డీ చెల్లించనున్నారు.

రాఫెల్ ఒప్పందంపై కేంద్రాన్ని ఇరుకునపెడుతున్న కాంగ్రెస్ చీఫ్ రాహుల్ గాంధీ తాజాగా మరో అడుగు ముందుకేశారు. ఈ నెల 13న హిందూస్తాన్ ఏరోనాటికల్ లిమిటెడ్ (హెచ్ఏఎల్) ఉద్యోగులతో ఆయన సమావేశం కానున్నారు. రాఫెల్ ఒప్పందాన్ని హెచ్ఏఎల్ నుంచి లాక్కుని రిలయన్స్ డిఫెన్స్‌కు కట్టబెట్టారంటూ నరేంద్ర మోదీ ప్రభుత్వంపై రాహుల్ విరుచుకుపడుతున్న సంగతి తెలిసింది. వేలాది కోట్ల విలువైన రాఫెల్ యుద్ధ విమానాల కొనుగోలు ఒప్పందంపై ఇప్పటికే తీవ్ర విమర్శలు ఎదుర్కొంటున్న కేంద్ర ప్రభుత్వం రాహుల్ సమావేశంతో మరింత ఒత్తిడిలో పడేసే అవకాశాలున్నాయి.

ఫ్రాన్స్ సంస్థ దసాల్ట్ ఏవియేషన్‌కు ఆఫ్‌సెట్ భాగస్వామిగా ప్రభుత్వ సారథ్యంలోని హెచ్ఏఎల్‌ సంస్థను కాదని వ్యాపారవేత్త అనిల్ అంబానికి చెందిన రిలయన్స్‌ను ఎందుకు ఎన్నుకున్నారో ప్రధాని మోదీని రాహుల్ ప్రశ్నిస్తున్నారు. ఈ డీల్‌ను రిలయన్స్‌కు అప్పగించడం వల్ల అనేక ఉద్యోగ అవకాశాలు ఆవిరైపోయాయని రాహుల్ ఆరోపిస్తున్నారు. ‘‘దేశంలోని యువకులు, వైమానిక దళం నుంచి సొమ్ము దొంగిలించి అంబానీ జేబులు నింపుతున్నారు. గత 70 ఏళ్లుగా హెచ్ఏఎల్‌కు విమానాల తయారీలో అనుభవం ఉంది. మిగ్, సుఖోయ్, జాగ్వార్ వంటి యుద్ధ విమానాలను సైతం హెచ్ఏఎల్ తయారుచేసింది. కాబట్టి యువత అప్రమత్తంగా ఉండాలి.

అనిల్ అంబానీ తన జీవితంలో ఎప్పుడూ విమానం తయారుచేయలేదు. రాఫెల్ ఒప్పందానికి కేవలం 10 రోజుల ముందు ఆయన ఓ కంపెనీని సృష్టించి ఈ కాంట్రాక్టు చేజిక్కించుకున్నారు..’’ అని రాహుల్ గాంధీ ఆరోపించారు. యూపీఏ ప్రభుత్వం హయాంలో రాఫెల్ ఒప్పందం హెచ్ఏఎల్‌కు వెళ్లిందని రాహుల్ పేర్కొన్నారు. ‘‘హెచ్ఏఎల్‌కు కాంట్రాక్టు ఇవ్వడం ద్వారా.. ఇక్కడ యుద్ధ విమానాలు తయారైతే మరిన్ని ఉద్యోగాలు వస్తాయి. టెక్నాలజీ బదిలీ అవుతుంది. వైమానిక దళం మరింత బలోపేతం అవుతుంది. నరేంద్ర మోదీ ప్రధానమంత్రి అయిన తర్వాత రూ.526 కోట్ల విమానం ధర రూ.1600 కోట్లు అయ్యింది..’’ అని రాహుల్ వ్యాఖ్యానించారు.

బహ్రెయిన్‌లో బుధవారం ఉదయం ఘోర ప్రమాదం జరిగింది. గ్యాస్ సిలిండర్ పేలడంతో నలుగురు మృతి చెందారు. మరో 20 మంది తీవ్రంగా గాయపడ్డారు. గాయపడిన వారిని ఆస్పత్రికి తరలించారు. బహ్రెయిన్‌లోని ఓ భవనం రెండో అంతస్తులో ఈ ఘటన జరిగింది. పేలుడు ధాటికి భవనం పూర్తిగా నేలమట్టమైందని పోలీసులు తెలిపారు. భవన శిథిలాల కింద ఎవరైనా ఉన్నారేమోనని సహాయక బృందాలు గాలిస్తున్నాయి. బహ్రెయిన్ దేశంలో సంభవించిన అగ్నిప్రమాద ఘటనలో నలుగురు మృతి చెందగా, సుమారు ఇరవై మందికి పైగా గాయపడ్డారు.

ఓ బిల్డింగ్ లోని రెండో అంతస్తులో గ్యాస్ సిలిండ్ పేలి ఈ దుర్ఘటన జరిగింది. పేలుడు ధాటికి భవనం నేలమట్టమైంది. ఈ సమాచారం మేరకు సహాయక బృందాలు సంఘటనా స్థలానికి చేరుకున్నాయి. క్షతగాత్రులను సమీప ఆసుపత్రికి తరలించాయి. భవన శిథిలాల కింద ఎవరైనా చిక్కుకుపోయారేమోననే అనుమానంతో తక్షణ చర్యలు ప్రారంభించాయి.

ఇదిలా ఉండగా, ఈ ఘటనపై ఏపీ సీఎం చంద్రబాబునాయుడు ఆరా తీశారు. మృతుల్లో తెలుగువారు ఉన్నారంటూ వెలువడుతున్న మీడియా కథనాల నేపథ్యంలో ఏపీ భవన్ అధికారులతో చంద్రబాబు సమీక్షించారు. ఈ విషయమై బహ్రెయిన్ లోని భారత రాయబార కార్యాలయాన్ని సంప్రదించానని, మృతులందరూ బంగ్లాదేశ్ కు చెందిన వారేనని రెసిడెంట్ కమిషనర్ అర్జా శ్రీకాంత్ తెలిపారు. ఒకవేళ తెలుగువారు బాధితులుగా ఉంటే వెంటనే వారిని ఆదుకోవాలని చంద్రబాబు ఆదేశించారు.