పరిష్కార వేదిక 1100 ఒక పదునైన ఆయుధమని ముఖ్యమంత్రి శ్రీ నారా చంద్రబాబు నాయుడు పేర్కొన్నారు. శుక్రవారం తన నివాసం నుంచి ఇసుక అక్రమ తవ్వకాలు, బెల్ట్ షాపుల నియంత్రణపై జిల్లాల కలెక్టర్లు, అధికారులతో టెలికాన్ఫరెన్స్ లో మాట్లాడారు.
ఇసుక అక్రమ తవ్వకాలు, అక్రమ రవాణా చేసేవారిని ఉపేక్షించేదిలేదని హెచ్చరించారు. అన్ని రీచ్ ల వద్ద పకడ్బందీగా నిఘా పెట్టామని, తనిఖీలు ముమ్మరం చేశామని తెలిపారు. అక్రమ రవాణాకు పాల్పడితే ఏ స్థాయివారినైనా కఠినంగా శిక్షిస్తామన్నారు. ఎప్పటికప్పుడు ప్రజలనుంచి అభిప్రాయాలు తీసుకుంటున్నట్లు చెప్పారు. రాష్ర్పవ్యాప్తంగా ఇళ్లు నిర్మించుకుంటున్నవారు, మున్సిపల్ ప్లాన్ అప్రూవల్ తీసుకున్నవారు, క్రెడాయ్ వంటి సంస్థలనుంచి కూడా సమాచారం సేకరిస్తున్నామన్నారు. ఇసుక కొనుగోళ్లపై సంతృప్తిగా ఉన్నారా లేదా అనేది కాల్ సెంటర్ ద్వారా ఎప్పటికప్పుడు తెలుసుకుంటున్న విషయం గుర్తుచేశారు. ఆ సమాచారాన్ని జిల్లాల కలెక్టర్లు, ఎస్పీలు, అధికారులకు పంపుతున్నామన్నారు. ‘‘ఇసుక,మద్యం సమస్యలు తక్షణమే పరిష్కారం కావాలి, పూర్తిగా ప్రక్షాళన జరగాలి. రాజీపడే ప్రసక్తేలేదు, ఎంతటివారైనా కఠిన చర్యలు తప్పవు’’ అని ముఖ్యమంత్రి చంద్రబాబు హెచ్చరించారు.
మీరు చేయలేకపోతే నేనే రంగంలోకి దిగుతా:
మీరు చేయలేకపోతే నేనే రంగంలోకి దిగుతా, రీచ్ ల వద్దకొచ్చి నేనే చర్యలు తీసుకుంటానని అధికారులకు ముఖ్యమంత్రి చంద్రబాబు కఠినంగా హెచ్చరించారు. ఏ రీచ్ వద్ద ఏ బండిలో ఎంత ఇసుక వెళ్తుందో బండి నెంబర్ తో సహా ట్యాబ్ లలో నమోదు చేయాలని ఆదేశించారు. కొనుగోలు దారులు ఎదుర్కొన్న ఇబ్బందులను కాల్ సెంటర్ ద్వారా అడిగి తెలుసుకోవాలి. ఆ సమాచారాన్ని సంబంధిత జిల్లాల కలెక్టర్లు,ఎస్పీలకు పంపాలి. కైజాలా యాప్ లో శాండ్ టాస్క్ ఫోర్స్ గ్రూప్ సద్వినియోగం చేసుకోవాలి. జిల్లా కలెక్టర్, ఎస్సీ ఈ గ్రూప్ లో ఖచ్చితంగా ఉండాలి. అభిప్రాయ సేకరణలో ఇసుక కొనుగోలు తేదిని కూడా అడగాలి.
రాష్ట్రంలో ఒక్క బెల్ట్ షాపు ఉన్నా సహించేదిలేదు:
‘‘రాష్ట్రవ్యాప్తంగా ఒక్క బెల్ట్ షాప్ కూడా ఉండటానికి వీల్లేదు. వీథి,వీథి గాలించాలి,అణువణువూ తనిఖీ చేయాలి. ద్విచక్ర వాహనాల ద్వారా రవాణా, అమ్మకాలు చేసేవారిపై కఠిన చర్యలు చేపట్టాలి. తమ బజారులో, తమ ఇంటివద్ద బెల్ట్ షాపు ఉందని ఏ మహిళా కాల్ సెంటర్ కు ఒక్క ఫిర్యాదు కూడా చేసే పరిస్థితి ఉండకూడదు. బెల్ట్ షాపులను పూర్తిగా తొలగించాలి,అక్రమ మద్యం అమ్మకాలపై కఠిన చర్యలు చేపట్టాలి’’ అని ముఖ్యమంత్రి చంద్రబాబు ఆదేశించారు. బెల్ట్ షాపులకు సంబంధించి ఇప్పటివరకు 3165 కేసులు పెట్టామని, 3422మందిని అరెస్ట్ చేశామని, 13,436లీటర్ల మద్యం, 98వాహనాలు సీజ్ చేశామని, 108 ఏ4 దుకాణాల లైసెన్స్ లను సస్పెండ్ చేశామని ఎక్సైజ్ అధికారులు వివరించారు.
ప్రజలు ‘‘మంచిని మంచి అంటారు,చెడును చెడు అంటారు’’:
మంచిని మంచి అంటారు,చెడును చెడు అంటారు అని అధికారులతో టెలికాన్ఫరెన్స్ లో ముఖ్యమంత్రి చంద్రబాబు పేర్కొన్నారు. ఏదైనా సరే ఉన్నదున్నట్లుగా ప్రజలు మాట్లాడతారని, వారికి ఎటువంటి భేషజాలు ఉండవని చెప్పారు. ప్రజాభిప్రాయానిదే ప్రజాస్వామ్యంలో అంతిమవాక్కుగా తెలిపారు. తప్పు చేసినవారిని శిక్షించడంలో ఉపేక్షించకండి అని ముఖ్యమంత్రి చంద్రబాబు జిల్లాల కలెక్టర్లు,ఎస్సీలతో అన్నారు.
ప్రజల్లో 80% సంతృప్తి రావాలి, అందరూ సమర్ధంగా పనిచేయాలి, ఎప్పటికప్పుడు ప్రజలను చైతన్యపరచాలి,వారిలో అవగాహన పెంచాలి.ప్రజల్లో మరింత సంతృప్తి,మరింత ఆనందం,అదే మనందరి లక్ష్యం అని ముఖ్యమంత్రి చంద్రబాబు మార్గదర్శకం చేశారు.
సుస్థిర ఆర్ధికాభివృద్ది, పారదర్శక పాలన ద్వారా రాజకీయ సుస్థిరత్వం:
సుస్థిర ఆర్ధికాభివృద్ది, పారదర్శక పాలన రాజకీయ సుస్థిరత్వానికి సోపానాలుగా ముఖ్యమంత్రి చంద్రబాబు పేర్కొన్నారు. ఇవి మూడు ఉంటే అందరి దృష్టి ఆంధ్రప్రదేశ్ వైపే ఉంటాయని తెలిపారు. రెండంకెల వృద్ది, పారిశ్రామిక పురోగతి,జలవనరుల అభివృద్ది,వ్యవసాయ అనుబంధ రంగాల ప్రగతి కేవలం మూడేళ్లలోనే సాధించామని గుర్తుచేశారు. అటు అభివృద్ది, ఇటు సంక్షేమానికి సమాన ప్రాధాన్యత ఇచ్చి ముందుకు పోతున్నామన్నారు. పారదర్శక పాలన, సుస్థిర ఆర్ధికాభివృద్ది,రాజకీయ స్థిరత్వం సాధిస్తే దేశంలోనే ఆంధ్రప్రదేశ్ నెంబర్ వన్ అవుతుందన్న విశ్వాసం వ్యక్తంచేశారు.
