news

రాష్ట్రవ్యాప్తంగా పార్టీలో కోవర్టులను గుర్తించామని, రాబోయే ఆరునెలల్లో వారందరినీ ఏరివేసి కొత్తరక్తంతో పార్టీకి నూతన జవసత్వాలు తీసుకువస్తామని తెలుగుదేశం పార్టీ అధినేత నారా చంద్రబాబునాయుడు స్పష్టం చేశారు. మంగళగిరిలోని పార్టీ కేంద్ర కార్యాలయంలో కుప్పం మున్సిపల్ అభ్యర్థులు, పార్టీ నేతలతో బుధవారం చంద్రబాబునాయుడు సమావేశమయ్యారు. ఈ సందర్భంగా ఆయన మాట్లడుతూ పార్టీలో ప్రక్షాళన కార్యక్రమాన్ని కుప్పం నుంచే ప్రారంభిస్తామని తెలిపారు. ఎప్పటికప్పుడు నిరంతరం పర్యవేక్షిస్తూ పార్టీని సమర్థవంతంగా నడిపేంచేందుకు వీలుగా సమర్థులైన నేతలతో కోఆర్డినేషన్ కమిటీని నియమిస్తామని తెలిపారు. కుప్పం మున్సిపల్ ఎన్నికల్లో కేవలం 350 ఓట్ల తేడాతో ఏడువార్డుల్లో ఓడిపోయామని అన్నారు. కుప్పం మున్సిపాలిటీలోని 25వార్డుల్లో పోటీచేసిన అభ్యర్థులు ఎన్నికల్లో తాము ఎదుర్కొన్న అంతర్గత, బహిర్గత సమస్యలపై రహస్య నివేదికలు తయారుచేసి తమకు పంపినట్లయితే భవిష్యత్ కార్యాచరణ రూపొందిస్తానని అన్నారు. తన రాజకీయ జీవితంలో ఎన్నడూ లేనివిధంగా ప్రత్యర్థులు నీచ రాజకీయాలకు దిగారని, ఈ పరిస్థితుల్లో దీటుగా ఎదుర్కొనే సమర్థ నాయకత్వం అవసరమని భావిస్తున్నట్లు చెప్పారు. కొన్నిచోట్ల అభ్యర్థులను చివరినిమిషంలో ఎంపికచేయడం కూడా కొంత నష్టం కలిగించిందని అన్నారు. అయితే తాను ఇప్పటివరకు చేసిన సమీక్షల్లో నిత్యం ప్రజలవద్దకు వెళ్తూ క్షేత్రస్థాయిలో పనిచేస్తూ వచ్చినచోట్ల మంచి ఫలితాలు వచ్చాయని గుర్తించినట్లు చెప్పారు. ఒకచోట బేలుదారి మేస్త్రి, మరొక చోట లిఫ్ట్ ఆపరేటర్, ఇంకొక చోట పెయింటర్, బడ్డీకొట్టు చిరువ్యాపారి విజయం సాధించారని, ఇటువంటి వారి విజయాలు కేస్ స్టడీగా తీసుకొని ముందుకు సాగాలని నాయకులకు దిశానిర్దేశం చేశారు.

ఇకపై పార్టీని సమర్థవంతగా ముందుకు నడిపించే వారికి మాత్రమే పట్టం కడతామని, రకరకాల మొహమాటాలు, లాలూచీ వ్యవహారాలతో ప్రత్యర్థులతో కుమ్మక్కయ్యే వారికి స్థానం ఉండబోదని చెప్పారు. కొందరు క్షేత్రస్థాయిలో పనిచేయడం మాని...తమ వద్దకు ఏవేవో చెబుతూ తనను మెప్పించడానికి ప్రయత్నిస్తున్నారని, ఇకపై అటువంటి వారి పప్పులేమీ ఉడకబోవని చంద్రబాబునాయుడు పేర్కొన్నారు. మున్సిపల్ ఎన్నికల రోజు దొంగఓటర్లను అడ్డుకునేందుకు కుప్పంలో మహిళలు చూపిన చొరవ, పోరాట పటిమను చంద్రబాబునాయుడు కొనియాడారు. రాజకీయ ప్రత్యర్థులు ఇప్పటివరకు తమను ఒకవైపే చూశారని, అధికారంలోకి రాగానే రాజకీయ నేరగాళ్లకు వడ్డీతో సహా చెల్లిస్తామని తెలిపారు. బాంబులకు, క్లేమోర్ మైన్లకు భయపడని తాను...ముఠానాయకులకు భయపడేది లేదని అన్నారు. కుప్పంలో స్థానిక నాయకుల అతి విశ్వాసంతోపాటు ప్రత్యర్థుల తప్పుడు ప్రచారం, దొంగఓట్లు, పోలీసులతో బలప్రయోగం, ప్రలోభాలు ఓటమికి ప్రధాన కారణాలుగా విశ్లేషించారు. అధికార పార్టీ అరాచకాలపై ఐకమత్యంగా పోరాడతామని చంద్రబాబునాయుడు పార్టీ కేడర్ కు పిలుపునిచ్చారు. కుప్పంలో ఇల్లు నిర్మించుకొని కనీసం ప్రతి మూడునెలలకు ఒకసారి రావాల్సిందిగా ఎస్ ఆర్ బాలకుమార్ అనే స్థానిక నేత చేసిన విజ్జప్తిపై చంద్రబాబునాయుడు సానుకూలంగా స్పందిస్తూ...ఈ అంశాన్ని పరిశీలిస్తానని అన్నారు. ఈ సమావేశంలో పార్టీ జాతీయ ప్రధాన కార్యదర్శి వర్ల రామయ్య, శాసనసభా పక్ష ఉపనాయకుడు నిమ్మల రామానాయుడు, మాజీమంత్రి పరసా రత్నం, హెచ్ ఆర్ డి విభాగం చైర్మన్ బి.రామాంజనేయులు, కుప్పం అసెంబ్లీ నియోజకవర్గ ఇన్ చార్జి మునిరత్నం, పట్టణ పార్టీ అధ్యక్షుడు రాజ్ కుమార్, మున్సిపల్ చైర్మన్ అభ్యర్థిగా బరిలోకి దిగిన త్రిలోక్ తదితరులు పాల్గొన్నారు.

డాక్టర్ ఎన్టీఆర్ హెల్త్ యూనివర్సిటీ నిధులు రూ.400 కోట్లను ఎపిఎన్ఎస్ఎస్సిలకు మళ్లించడంపై రాజభవన్ స్పందించింది. మళ్లించిన నిధులను వెనక్కి ఇవ్వాలంటూ యూనివర్సిటీకి చాన్సలర్‌గా వ్యవహరిస్తున్న రాష్ట్ర గవర్నర్ విశ్వభూషణ్ హరిచందనకు ఉద్యోగ సంఘాల జెఎసి ఈ మెయిల్ లో ఫిర్యాదు చేసింది. అప్పటికే ఉద్యోగులు విధులను బహిష్కరించి ఆందోళన చేస్తున్నారు. ఈ నేపధ్యంలో ఉద్యోగుల ఆందోళనపై రాజ్ భవన్ అధికారులు ఆరా తీశారు. వర్సిటీ నిధుల మళ్లింపు వ్యవహారంపై వివరణ ఇవ్వాలని ప్రభుత్వాన్ని కోరినట్లు తెలిసింది. రాజభవన్ నుంచి వచ్చిన ఆదేశాల మేరకు హెల్త్ యూనివర్సిటీ వైస్ చాన్సలర్ డాక్టర్ శ్యామ ప్రసాదు సిఎంఓ నుంచి సోమవారం పిలుపు వచ్చింది. విసి శ్యామ ప్రసాద్ మధ్యాహ్నం ఒంటిగంట సమయంలో సిఎంఓకు వెళ్లి సుమారు రెండున్నర గంటలపాటు సిఎంఓలో అధికారులతో సమావేశమైనారు.

ఆంధ్రప్రదేశ్ రాష్ట్రానికి కేంద్రం మరో సారి మొండి చేయి చూపించింది. ఏపి విభజన చట్టంలో ఉన్న హామీలు అన్నీ, ఒక్కొక్కటీ, కేంద్ర ప్రభుత్వం క్రమక్రమంగా తుంగలోకి తొక్కుతూ వచ్చింది. తాజాగా రైల్వే జోన్ విషయంలో కూడా కేంద్రం షాక్ ఇచ్చింది. రైల్వే జోన్ కి కూడా కేంద్రం ఇక మంగళం పడినట్టే అని చెప్పుకోవాలి. ఎందుకు అంటే, గత ఎన్డీఏ వన్ హయాంలో ఎన్నికల ఏడాది వచ్చినప్పుడు, అప్పటి రైల్వే మంత్రి పియూష్ గోయల్, వైజాగ్ కేంద్రంగా కొత్త రైల్వే జోన్ ఏర్పాటు చేస్తున్నాం అంటూ, ఆయన ప్రకటన చేసారు. ఆ ప్రకటన మేరకు ఒక కమిటీని కూడా ఏర్పాటు చేసి, సాధ్యాసాద్యాలను ఒక నివేదిక రూపంలో కూడా ఇవ్వమన్నారు. ఆ నివేదిక ప్రకారం, రైల్వే జోన్ ఏర్పాటు ఉంటుందని అప్పట్లో చెప్పారు. ఆ తరువాత ఎన్నికలు రావటం, తరువాత చంద్రబాబు కాకుండా, జగన్ మోహన్ రెడ్డి అధికారంలోకి రావటంతో, ఈ అంశం మరుగున పడిపోయింది. అప్పట్లో చంద్రబాబు గట్టిగా పోరాడి సాధిస్తే, జగన్ మోహన్ రెడ్డి మాత్రం, ప్లీజ్ సార్ ప్లీజ్ అనటం తప్ప,మనం చేసేది ఏమి లేదని చెప్పారు. దీంతో కేంద్రం కూడా లైట్ తీసుకుంది. ఇటు రాష్ట్ర ప్రభుత్వం, అటు కేంద్రం కూడా పూర్తిగా రైల్వే జోన్ గురించి మర్చిపోయాయి. దీంతో ఈ అంశం పూర్తిగా మరుగున పడిపోయింది.

రాష్ట్ర ప్రభుత్వమే, ఈ అంశం గురించి పట్టించుకోక పోవటం, కేంద్ర ప్రభుత్వం కూడా మాకు ఎందుకులే అనుకున్నట్టు ఉంది. ఈ రోజు లోక సభలో, బీజేపీ ఎంపీ అజయ్‍నిషాద్ అడిగిన ప్రశ్నకు, కేంద్ర రైల్వే శాఖా మంత్రి అశ్వనీ వైష్ణవ్ ఇచ్చిన సమాచారం చూస్తే, దేశంలో ఎక్కడా కూడా కొత్త రైల్వే జోన్ ఏర్పాటు చేసే ప్రసక్తే లేదని తేల్చి చెప్పారు. ప్రస్తుతం 17 రైల్వే జోన్ లు ఉన్నాయని, ఆ 17 రైల్వే జోన్లు ప్రస్తవాన చెప్తూ, గతంలో కేంద్రం ప్రకటించిన విశాఖ రైల్వే జోన్ ని మాత్రం, ఏ మాత్రం పట్టించుకోలేదు. ఎక్కడా విశాఖ రైల్వే జోన్ ప్రస్తావన చేయలేదు. అలాగే పలు రాష్ట్ర ప్రభుత్వాలు డిమాండ్ చేస్తున్న కొత్త రైల్వే జోన్ ల విషయంలో, కొత్తవి ఏర్పాటు చేసే ఉద్దేశం ఏమి కేంద్రానికి లేదని, కేంద్ర మంత్రి స్పష్టం చేసారు. దీంతో ఇక వైజాగ్ రైల్వే జోన్ ని కేంద్రం పూర్తిగా మర్చిపోయిందనే చెప్పవచ్చు. కేంద్రం మెడలు వంచి విభజన హామీలు సాధిస్తా అని చెప్పిన జగన్ మోహన్ రెడ్డి, ఇప్పుడు ఏ మాత్రం, విభజన హామీల మీద స్పందించక పోవటం శోచనీయం.