news

నిన్న పవన్ కళ్యాణ్ విశాఖలో ఉక్కు పరిశ్రమ ప్రైవేటీకరణ కాకుండా చేస్తున్న పోరాటానికి సంఘీభావం తెలిపారు. ఆయన తరువాత ప్రసంగిస్తూ, వైసీపీ ప్రభుత్వం పై విమర్శలు గుప్పించారు. ఉపరాష్ట్రపతి మీద, చీఫ్ జస్టిస్ అఫ్ ఇండియా మీద పోరాటం చేయటానికి వైసిపీ ప్రభుత్వానికి ధైర్యం ఉంటుంది కానీ, స్టీల్ ప్లాంట్ పైన మాత్రం కేంద్రాన్ని నిలదీయటానికి ధైర్యం లేదని అన్నారు. ఎందుకని రాష్ట్ర ప్రభుత్వం కేంద్రాన్ని నిలదీయటం లేదో చెప్పాలని అన్నారు. వైసీపీకి 22 మంది ఎంపీలు, ఆరుగురు రాజ్యసభ సభ్యులు ఉన్నారని, బిల్లులకు మద్దతు ఇచ్చే సమయంలో, విశాఖ ఉక్కు పై కేంద్రం వద్ద క్లారిటీ తీసుకునే, వారికి మద్దతు తెలపవచ్చు కదా అని, పవన్ నిలదీశారు. ఎంత సేపు డబ్బు, కాంట్రాక్టులు, పదవులు తప్ప, వైసీపీ ప్రభుత్వానికి వేరే ధ్యాస లేదని అన్నారు. ఈ సందర్భంగా వైసీపీ ప్రభుత్వానికి పవన్ కళ్యాణ్ వారం రోజుల డెడ్ లైన్ విధించారు. వారం రోజుల్లో అఖిలపక్షం నిర్వహించి, అందరినీ ఢిల్లీ తీసుకుని వెళ్లాలని అన్నారు. మేమందరం మీతో పాటు వస్తాం అని అన్నారు. అధికారం మీ చేతిలో ఉంది కాబట్టి, మీరే బాధ్యత తీసుకోవాలని, అధికారం ఉన్న వారి మాటే కేంద్రం వింటుందని, వారం రోజుల్లో అఖిల పక్షం నిర్వహించి, అందరూ కలిసి విశాఖ స్టీల్ ప్లాంట్ పై బలమైన పోరాటం చేయాలని అన్నారు.

పవన కళ్యాణ్ డిమాండ్ పై ప్రధాన ప్రతిపక్షం తెలుగుదేశం కూడా స్పందించింది. ఈ రోజు విశాఖలో టీడీపీ రాష్ట్ర అధ్యక్షులు అచ్చెన్నాయుడు ఈ విషయం పై స్పందించారు. ఢిల్లీకి అఖిలపక్షాన్ని తీసుకుని వెళ్ళాలి అనే డిమాండ్ ని తాము స్వాగతిస్తున్నామని అన్నారు. తాము ఇప్పటికే ఈ డిమాండ్ ప్రభుత్వం ముందు ఉంచాం అని, ఇప్పుడు పవన్ కూడా ఇదే డిమాండ్ చేస్తున్నారు కాబట్టి, తాము స్వాగతీస్తున్నామని అన్నారు. తమ అధినేత చంద్రబాబు ఆరు నెలల క్రిందటే ఉక్కు దీక్షకు మద్దతు ఇచ్చారని, అప్పుడే అఖిల పక్షాన్ని ఢిల్లీ తీసుకుని వెళ్ళాలని డిమాండ్ చేసిన విషయాన్ని గుర్తు చేసారు. ప్రభుత్వం పై తమకు నమ్మకం లేదని, ఇప్పటికే అసెంబ్లీలో తీర్మనం చేసి ఢిల్లీకి పంపించాం అని ప్రభుత్వం చెప్తుందని, అలా పంపించి ఉంటే, ఢిల్లీ నుంచి రిప్లై రావాలి కదా అని, అచ్చెన్నాయుడు ప్రశ్నించారు. తమ పార్టీకి చెందిన ముగ్గురు ఎంపీలు, పార్లమెంట్ లో బల్ల గుద్ది మరీ, పోరాటాలు చేస్తున్నారని గుర్తు చేసారు.

ఈ రోజు ఆంధ్రప్రదేశ్ రాష్ట్ర అవతరణ దినోత్సవం అని ప్రభుత్వం ప్రకటించింది. నిజానికి జగన్ మోహన్ రెడ్డి ప్రభుత్వం వచ్చిన తరువాతే ఈ విడిపోయిన ఆంధ్రప్రదేశ్ రాష్ట్రానికి, ఈ రోజు, అంటే నవంబర్ ఒకటో తేదీ రాష్ట్ర అవతరణ దినోత్సవం అని తేల్చారు. సరే ప్రభుత్వాలు తేల్చాయి కాబట్టి, మనం కూడా బాధ్యత గల పౌరులుగా దానికి కట్టుబడి ఉండాల్సిందే. ఇష్టం ఉన్నవారు ఈ రోజుని సెలెబ్రేట్ చేసుకుంటారు, లేని వాళ్ళు లేదు. కానీ అసలు ఈ రోజుని మనం రాష్ట్ర అవతరణ దినోత్సవంగా చేసుకోవటం సమంజసమేనా అనే చర్చ అయితే చేయాల్సిందే. దీని పై సోషల్ మీడియాలో కూడా పెద్ద ఎత్తున చర్చ జరుగుతుంది. మద్రాస్ రాష్ట్రం నుంచి ఆంధ్రప్రదేశ్ రాష్ట్రం విడిపోయి, అక్టోబర్ 1 న, 1953 లో కర్నూల్ రాజధానిగా ఆంధ్రప్రదేశ్ రాష్ట్రం ఏర్పడింది. 1956లో విశాలాంధ్ర ఏర్పడే దాకా మన రాష్ట్ర అవతరణ దినోత్సవం, అక్టోబర్ 1 గానే జరుపుకున్నాం. భౌగోళిక స్వరూపంలో 1953 లో ఏర్పడిన రాష్ట్రానికి, ఇప్పటి నవ్యాంధ్రకు పోలిక ఉంది. కాకపోతే అప్పట్లో భద్రాచలం ఉండేది, ఇప్పుడు లేదు. అది ఒక్కటే తేడా. తరువాత విశాలాంధ్ర ఏర్పడింది. తరువాత 1956 నవంబర్ 1న, విశాలాంధ్ర ఏర్పడింది. అంటే ఇప్పటి ఆంధ్రా, తెలంగాణా కలిపి ఓకే రాష్ట్రంగా ఏర్పడటం జరిగింది. పొట్టిశ్రీరాములు గారి త్యాగ ఫలితం ఉమ్మడి రాష్ట్రం.

తరువాత ప్రత్యేక తెలంగాణా కోసం కొట్లాటలు మొదలు అయ్యాయి. కేసిఆర్ టీఆర్ఎస్ పెట్టిన తరువాత, ఆంధ్ర ప్రాంతం వారిని తిట్టటం అనే సంస్కృతీ కూడా మొదలైంది. దీనికి ఉద్యమంలో ఇట్టాం అనే సమర్ధింపులు కూడా ఉన్నాయి. 2014 జూన్ 2న తెలంగాణా ఉద్యమం ఫలించి, ప్రత్యెక రాష్ట్రం ఏర్పడింది. మళ్ళీ ఆంధ్రప్రదేశ్ 1953 అక్టోబర్ 1 న ఎక్కడ ఉన్నామో అక్కడికే వచ్చేసాం. భౌగోళిక స్వరూపంలో అప్పటి లాగే వచ్చేసాం. ఇందాక చెప్పినట్టు భద్రాచలం లేదు అంతే. అంటే ఒక ఉదాహరణ చెప్పాలి అంటే, 1953 అక్టోబర్ 1 మన పుట్టిన రోజు, 1956 నవంబర్ 1 మన పెళ్లి రోజు, 2014 జూన్ 2 పెళ్లి పెటాకులు అయిన రోజు. పెళ్లి పెటాకులు అయిన తరువాత, పెళ్లి రోజుని, పుట్టిన రోజుగా , ఉత్సవంలాగా, ఈ రోజు రాష్ట్ర అవతరణ అని మనం జరుపుకుంటున్నాం. దీని పై భిన్నాభిప్రాయలు ఉన్నా, ప్రభుత్వం ఇలాగే ముందుకు వెళ్ళటంతో, ప్రధాని దగ్గర నుంచి అందరూ ఈ రోజే మన రాష్ట్ర అవతరణం అంటున్నారు. గతంలో చంద్రబాబు ప్రభుత్వంలో, జూన్ 2న నవ నిర్మాణ దీక్ష చేసే వారు కానీ, ఏ నాడు రాష్ట్ర అవతరణ దినోత్సవం జరుపుకోలేదు. మరి ఈ రోజు రాష్ట్ర అవతరణ దినోత్సవం జరుపుకోవటం కరెక్టో కాదో అనేది ప్రజలే నిర్ణయించుకోవాలి.

అమరావతి రైతుల మహా పాదయత్ర ఈ రోజు ప్రారంభం అయ్యింది. న్యాయస్థానం నుంచ దేవస్థానం అంటూ, అమరావతిలోని హైకోర్టు దగ్గర నుంచి తిరుపతి వెంకన్న ఆలయం వరకు, అమరావతి రైతులు పాదయాత్రగా వెళ్లనున్నారు. అమరావతి రైతులకు సంఘీభావంగా కాంగ్రెస్ పార్టీ సీనియర్ నాయకురాలు, మాజీ రాజ్యసభ సభ్యురాలు రేణుకా చౌదరి, ఈ రోజు అమరావతి వచ్చారు. అయితే ఆమె ఇబ్రహింపట్నం నుంచి అమరావతి వరకు ర్యాలీగా వెళ్లాలని నిర్ణయం తీసుకున్నారు. రేణుకా చౌదరికి స్వాగతం పలికేందుకు కాంగ్రెస్ మహిళా కార్యకర్తలతో పాటుగా, ప్రజలు కూడా వచ్చారు. రోడ్డు పైన ఆమెకు కోసం హారతి ఇవ్వటానికి, స్వాగతం పలకటానికి సిద్ధం అయ్యారు. అయితే రోడ్డు పైన ఉన్న మహిళా కార్యకర్తలకు పోలీసులు ఆంక్షలు పెట్టారు. రోడ్డు పైన ఉండటానికి వీలు లేదని అన్నారు. అక్కడ నుంచి కార్యకర్తలను చెదరగొట్టారు. రోడ్డు పైకే వస్తే అరెస్ట్ చేస్తామని పోలీసులు హెచ్చరించారు. అయితే విజయవాడ చేరకున్న రేణుకా చౌదరికి, జరిగిన ఘటన పై, మహిళలు ఫిర్యాదు చేయగా, ఆమె ఆగ్రహం వ్యక్తం చేసారు. తనకు బొట్టు పెట్టటానికి వచ్చినా వాళ్ళని తరిమేసరని, వారికి వచ్చిన ఇబ్బంది ఏమిటో అర్ధం కావటం లేదని అన్నారు. హారతి ఇస్తాం అని, బొట్టు పెడతాం అని చెప్పినా, తరిమేసారు అని అన్నారు.

అమరావతిలో మహిళలను ఇలాగే చేసారని, ఇప్పుడు తనకు స్వాగతం పలకటానికి వస్తే కూడా అడ్డుకంటున్నారని, బెదిరిస్తున్నారని, భయపెడుతున్నారని, ఇది ఏపి పోలీసులకు సర్వ సాధారణం అయిపోయిందని అని అన్నారు. మీరు భయ పెడితే, మేము భయపడం అని అన్నారు. బొట్టు పెడతాం అంటే, సంస్కృతీ, సాంప్రదాయాలు కూడా పక్కన పడేసారని అన్నారు. ఒకటి గుర్తుంచుకోవాలని, అమరావతిలో ఉద్యమం చేస్తున్నది ఆడవాళ్ళే అని, నా తోటి మహిళలకు శభాష్ అంటూ, మమ్మల్ని మీరు అవమానపరుస్తారా ? భయపెట్టి మమ్మల్ని పంపించినంత మాత్రాన, మీరు మొనగాళ్ళు కాదని అన్నారు. చేతికి వేసుకుని మేము గాజలు కాదని, ఇవి విష్ణు చక్రాలు అని, రేపు ఓటు మిషన్ పై నొక్కేది ఇవే చేతులు అని అన్నారు. తనకు దేశంలో ఎక్కడైనా పర్యటించే అవకాసం ఉందని, కొంత మంది తాను ఎందుకు వచ్చానని అంటున్నారని వీళ్ళు అంతా నా సోదర సోదరీమణులు అని, ఎక్కడైనా తాను వెళ్ళే హక్కు ఉందని, తనను ప్రశ్నించే హక్కు ఎవరికీ లేదని అన్నారు.