news

తిరుమల తిరుపతి దేవస్థానంలో 24 మందిని సభ్యులుగా నియమిస్తూ, రాష్ట్ర ప్రభుత్వం జారీ చేసిన జీవో నెంబర్ 245 ను హైకోర్టులో సవాల్ చేసారు. ఈ రోజు హైకోర్టులో ఈ పిటీషన్ పై విచారణ జరిగింది. ఈ పిటీషన్ విచారణకు వచ్చిన సందర్భంగా న్యాయవాది అశ్విని కుమార్ వాదనలు వినిపించారు. బోర్డులో నియమించిన 24 మందిలో, 14 మందికి నేర చరిత్ర ఉందని, మరో నలుగురికి రాజకీయ నియామకాలు జరిగాయని ఆయన వాదించారు. ఈ 14 మందికి సంబంధించిన కేసులను, ఇతర వివరాలను హైకోర్ట్ ధర్మాసనానికి అందించారు. దీనిపైన హైకోర్టు ధర్మాసనం ఈ 18 మందికి కుడా ఈ వ్యాజ్యంలో ప్రతివాదులుగా చేరుస్తూ, వారికి వెంటనే నోటీసులు జారీ చేయాలని ఆదేశాలు జారీ చేసింది. అయితే దీని పై టిటిడి స్టాండింగ్ కౌన్సిల్ తీవ్ర అభ్యంతరం తెలిపింది. జీవో నెంబర్ 245 ను సవాల్ చేయటం అసమంజసం అని, అదే విధంగా వారిని ప్రతివాదులుగా చేరుస్తూ, వాళ్ళకి నోటీసులు జారీ చేయటం ఏమిటి అని ప్రశ్నించింది. అయితే దీని పై హైకోర్టు ధర్మాసనం మీకు ఉన్న అభ్యంతరం ఇందులో ఏమి ఉంటుంది, అంటూ ఎదురు ప్రశ్నించింది. దీంతో టిటిడి స్టాండింగ్ కమిటీ దగ్గర సమాధానం లేకుండా పోయింది. వాళ్ళకు లేని అభ్యంతరం, వీరికి ఎందుకు అర్ధం కాలేదు.

ఏదైతే ఈ 18 మందికి ఏవైతే నోటీసులు జారీ చేసామో, వాళ్ళు ఏదైనా అభ్యంతరం ఉంటే, వాళ్ళు అభ్యంతరం తెలుపుతారు కానీ, స్టాండింగ్ కౌన్సిల్ కు ఏమి సంబంధం అంటూ, మీకు ఈ విషయంలో ఏ సంబంధం లేదు కదా అని హైకోర్టు స్పష్టం చేసింది. పైగా దసరా సెలవులు అనంతరం, ఈ కేసుని ప్రాధాన్యత కేసుగా తీసుకుంటాం అని చెప్పిన హైకోర్టు, ఈ కేసు పై సెలవులు అనతంరం వెంటనే వాదనలు వింటాం అని, ఇది అత్యంత ప్రాధాన్యతతో కూడిన అంశం అని చెప్పి, హైకోర్టు స్పష్టం చేసింది. దసరా సెలవులు అనంతరం ఈ కేసు వాయిదా వేసింది. ఎవరు అయితే నేర చరిత్ర ఉందని ఆరోపిస్తున్నారో వారికి, అలాగే రాజకీయ నియామకాలు అని ఆరోపిస్తున్నారో వారికి, మొత్తం 18 మందికి హైకోర్టు నోటీసులు జారీ చేసి, వారిని కౌంటర్ దాఖలు చేయాలని ఆదేశించింది. ఇప్పటికే రాష్ట్ర ప్రభుత్వం నియమించిన టిటిడి జంబో బోర్డు సభ్యులకు షాక్ ఇస్తూ, ఆ జీవోని హైకోర్టు సస్పెండ్ చేసిన సంగతి తెలిసిందే. మరి ఈ కేసు పై ఏమి తేలుతుందో చూడాలి.

గత ప్రభుత్వ హాయంలో చేసిన ఉపాధి హామీ పనులకు నిధులు ఇవ్వకుండా, జగన్ మోహన్ రెడ్డి ప్రభుత్వం పెడుతున్న ఇబ్బందులు పై కాంట్రాక్టర్ లు కోర్టు మెట్లు ఎక్కి చేస్తున్న పోరాటం, ఎట్టకేలకు ఫలించింది. కాంట్రాక్టర్లు అంటే, వీళ్ళు ఏదో పెద్ద పెద్ద వాళ్ళు కాదు. చిన్న చిన్న వాళ్ళు. ప్రభుత్వం వర్కులు అని చెప్పి, అప్పులు తీసుకుని వచ్చి మరీ కాంట్రాక్టులు చేసిన వాళ్ళు. ఇలాంటి కాంట్రాక్టర్లును, జగన్ ప్రభుత్వం ఇబ్బందులు పెట్టింది. ఎన్ని సార్లు జగన్ మోహన్ రెడ్డి ప్రభుత్వాన్ని ఉపాధి హామీ బిల్లులు గురించి అడిగినా, వారు చెల్లించలేదు. మరో పక్క కేంద్రం తన వాటాగా ఇవ్వాల్సిన డబ్బులు ఇచ్చేసింది. అయితే ఆ డబ్బులు దారి మళ్ళించి, వేరే అవసరాలకు వాడుకుని, వీరికి బిల్లులు చెల్లించకుండా, వీరిని ఇబ్బంది పెడుతూ వచ్చారు. అయితే దీని పై దాదాపుగా వెయ్యికు పైగా కాంట్రాక్టర్లు కోర్టు మెట్లు ఎక్కారు. గత కొన్ని నెలలుగా, ఈ విషయం పై విచారణ జరిగింది. అయితే ఈ ప్రక్రియలో అనేక సార్లు కోర్టు ఆగ్రహం వ్యక్తం చేస్తూ, ప్రభుత్వానికి అవకాశాలు ఇచ్చినా, ప్రభుత్వం మాత్రం చెల్లింపులు చేయలేదు. చివరకు కోర్ట్ ధిక్కరణ కేసులు, అధికారులు కోర్టు ముందుకు రావటం ఇవన్నీ జరిగినా, ప్రభుత్వం మారలేదు. అయితే, ఈ రోజు హైకోర్టు తుది తీర్పు ఇస్తూ, మొత్తం బకయాలు వెంటనే చెల్లించాలని ఆదేశాలు ఇచ్చింది.

అంతే కాదు, మొత్తం చెల్లింపులకు, ఎప్పటి నుంచి పెండింగ్ ఉందో, అప్పటి నుంచి కూడా 12 శాతం వడ్డీ కలిపి చెల్లించాలి అంటూ సంచలన తీర్పు ఇచ్చింది. ఈ మొత్తం దాదాపుగా 2800 కోట్లుగా తేలింది. అయితే వీటిని ఇప్పుడు ప్రభుత్వం వెంటనే చెల్లించాలి, వడ్డీకి మాత్రం నాలుగు వారాల టైం ఇచ్చింది హైకోర్టు. అయితే ఇది ఇలా ఉంటే, అసలు ఎలా చెల్లించాలి, ఏమి చేయాలి అనే విషయం పై, ఇప్పుడు ప్రభుత్వానికి పాలు పోవటం లేదు. హైకోర్టు ఇచ్చిన డెడ్లైన్ ప్రకారం, వెంటనే చెల్లించాలి. ప్రభుత్వం దగ్గర డబ్బులు లేవు. జీతాలకు కూడా అప్పు తెచ్చుకోవాల్సిన పరిస్థితి. ఈ రోజు కూడా రెండు వేల కోట్లు అప్పు తెచ్చారు. ఇలా అనేక విధాలుగా, అప్పులు మీద నెట్టుకుని వస్తున్న రాష్ట్ర ప్రభుత్వానికి, హైకోర్టు ఇచ్చిన డెడ్లైన్ తో షాక్ తగిలింది. అయితే ఈ ప్రక్రియను ఎలాగైనా వాయిదా వేయాలి అంటే, పై కోర్టులో అపీల్ చేసి, కేసు తేలే వరకు ఎలాగైనా సగదీయటం తప్ప, రాష్ట్ర ప్రభుత్వానికి వేరే మార్గం లేదనే చెప్పాలి. ఎందుకంటే ప్రస్తుతం అప్పు ఇచ్చే వాళ్ళు కూడా లేరు.

ఆంధ్రప్రదేశ్ హైకోర్టు దేబ్బాకు, జగన్ మోహన్ రెడ్డి ప్రభుత్వం దిగొచ్చింది. రాష్ట్ర వ్యాప్తంగా చెత్త నుంచి సంపద తయారు చేసే కేంద్రాలకు, వైసిపీ పార్టీ రంగులు వేయటం పై, రాష్ట్ర హైకోర్టులో జైభీమ జస్టిస్ కృష్ణా జిల్లా అధ్యక్షుడు సురేష్ కుమార్ వేసిన ప్రజా ప్రయోజన వ్యాజ్యం పై, గత వారం హైకోర్టు ధర్మాసనం ఆదేశాలు జారీ చేసింది. వెంటనే ఈ రంగులను తొలగించాలని, చెత్త నుంచి సంపద తయారు చేసే కేంద్రాలతో పాటుగా, ప్రభుత్వ భవనాలకు కూడా వైసిపి రంగులు వేయటం పట్ల తీవ్ర ఆగ్రహం వ్యక్తం చేసింది. వెంటనే వీటిని తొలగించాలని ఆదేశాలు జారీ చేయటమే కాకుండా, అన్ని శాఖలకు కూడా తగిన ఆదేశాలు లిఖిత పూర్వకంగా ఇవ్వాలి అని చెప్పి, పది రోజులు క్రితం హైకోర్టు ఆదేశించింది. ఈ సందర్భంగా కోర్టు ముందు హాజరు అయిన పంచాయతీరాజ్ ప్రిన్సిపల్ సెక్రటరీ గోపాల కృష్ణ ద్వివేదిని కోర్టు ఆదేశించింది. ఈ రోజు మళ్ళీ ఇదే కేసు విచారణకు వచ్చింది. అయితే ఈ రోజు విచారణ సందర్భంగా, రాష్ట్ర ప్రభుత్వం దిగి వచ్చి, అఫిడవిట్ దాఖలు చేసింది. భవిష్యత్తులో ఏ ప్రభుత్వ భవనానికి కూడా రంగులు వేసేది లేదని, హైకోర్టులో పంచాయతీరాజ్ ప్రిన్సిపల్ సెక్రటరీ గోపాల కృష్ణ ద్వివేది ఈ రోజు ప్రమాణ పత్రం దాఖలు చేసారు. ఒక విధంగా కోర్టు దెబ్బకు ప్రభుత్వం దిగి వచ్చిందనే చెప్పాలి.

అదే విధంగా అఫిడవిట్ రూపంలో ప్రమాణ పత్రం దాఖలు చేయాలని, గత నెలలో రాష్ట్ర హైకోర్టు ఆదేశించిన నేపధ్యంలోనే, ప్రభుత్వం దిగి వచ్చింది. అఫిడవిట్ రూపంలో, ఇక మీదట రాష్ట్రంలో ఎక్కడా కూడా, ఏ విధమైన ప్రభుత్వ భవనాలకు కూడా పార్టీ రంగులు వేయం అని, కోర్టుకు చెప్పారు. హైకోర్టు మాజీ న్యాయవాది జడ శ్రావణ్ కుమార్, పిటీషనర్ తరుపున వాదనలు వినిపించారు. ఈ రోజు ప్రమాణ పత్రం దాఖలు చేయటంతో అత్యున్నత న్యాయ స్థానం ఆదేశాలను అనుసరించారు అని చెప్పి, శ్రవణ్ కుమార్ సంతృప్తి వ్యక్తం చేసారు. అయితే భవిష్యత్తులో మాత్రం, ఏ ప్రభుత్వ భవనానికి కానీ, చెత్త నుంచి సంపద తయారు చేసే కేంద్రాలకు, ఏ ఇతర ప్రభుత్వ భవనాలకు కానీ, వైసీపీ రంగులు వేస్తే మాత్రం, భవిష్యత్తులో మళ్ళీ కోర్టుకు వస్తామని, ప్రభుత్వం తన అఫిడవిట్ కు కట్టుబడి ఉంటుందని ఆశిస్తున్నామని అన్నారు. అయితే గత ఏడాది హైకోర్టు, సుప్రీం కోర్టులో ఎదురు దెబ్బ తగిలిన తరువాత కూడా, ప్రభుత్వం మళ్ళీ రంగులు వేసి, ఇప్పుడు రెండో సారి దెబ్బ తింది. మరి ఈ సారి అయినా చెప్పిన మాట అనుసరిస్తారో లేదో చూడాలి.