news

తెలంగాణా అసెంబ్లీ సమావేశాలు ఈ రోజు వాయిదా పడిన సందర్భంలో, తెలుగుదేశం పార్టీ సీనియర్ నేత, జేసీ దివాకర్ రెడ్డి ఈ రోజు తెలంగాణా అసెంబ్లీకి రావటం జరిగింది. అదే సమయంలో సిఎల్పీ కార్యాలయానికి వచ్చిన కాంగ్రెస్ ఎమ్మెల్యే బట్టి విక్రమార్క, జీవన్ రెడ్డి చేరుకోవటంతో, అక్కడ జేసీని చూసి షాక్ అయ్యారు. తెలంగాణా కాంగ్రెస్ నేతలతో మాట్లాడాలని అనిపించిందని, చాలా రోజులు తరువాత వారిని కలవటానికి వచ్చానని అన్నారు. ఆ తరువాత, అనేక అంశాల పై జేసీ దివాకర్ రెడ్డి, తెలంగాణ కాంగ్రెస్ నేతలతో మాట్లాడటం జరిగింది. తెలంగాణా కాంగ్రెస్ నేతలకు, జేసీ దివాకర్ రెడ్డి చీవాట్లు పెట్టారు. పోరాడి తెచ్చుకున్న తెలంగాణాలో కాంగ్రెస్ పరిస్థితి ఘోరంగా ఉందని, భవిష్యత్తులో కూడా అధికారంలోకి రాలేరు, కేసీఆర్ ని ఎదుర్కునే ధైర్యం మీకు లేదు అంటూ, కాంగ్రెస్ నేతలకు క్లాస్ పీకారు. రాయల తెలంగాణా వచ్చి ఉంటే, కాంగ్రెస పరిస్థితి వేరేలా ఉండేది అని, కొంత మంది వ్యక్తిగత స్వార్ధం కోసం, రెండు రాష్ట్రాల్లో కాంగ్రెస్ ని నాశనం చేసారని వాపోయారు. జాతీయ పార్టీని, ఒక రీజినల్ పార్టీగా చేసారని వాపోయారు. ఈ సందర్భంగా అనేక అంశాల పై మాట్లాడిన జేసీ, షర్మిల అంశం పై కూడా మాట్లాడారు. జగన్ మోహన్ రెడ్డితో, ఆమెకు విబేధాలు ఉన్నాయని, అందుకే ఆమె తెలంగాణాలో పార్టీ పెట్టిందని, ఆమెకు ఇక్కడ 5 శాతం ఓట్లు కూడా వచ్చే అవకాసం లేదని అన్నారు.

రెండేళ్ళ తరువాత, ఆమె జెండాను ఏపిలో కూడా పెడుతుందని, జగన్ ను ఇబ్బంది పెడుతుందని అన్నారు. ఇక చంద్రబాబుకు సిఐడి నోటీసులు పై జేసీ తనదైన శైలిలో స్పందించారు. చంద్రబాబుకు ఒక చిన్న కాగితం, ఒక కానిస్టేబుల్ వచ్చి నోటీసులు ఇచ్చారని, కానీ జగన్ , విజయసాయి రెడ్డిలకు మాత్రం, నోటీసులు ఇవ్వాలి అంటే, లారీల్లో తీసుకుని నోటీసులు ఇచ్చే పరిస్థితి ఉందని, అంత పెద్ద ఆర్ధిక నేరాలు వీళ్ళు చేసారని, భవిష్యత్తులో వీరికి కూడా ఈ నోటీసులు తీసుకునే అవసరం రాబోతుందని అన్నారు. జగన్ అధికారంలోకి వచ్చిన ఇన్ని రోజులు దాకా చంద్రబాబుకు నోటీసులు ఇవ్వకుండా, అరెస్ట్ చేయకుండా ఉన్నారంటే ఆశ్చర్యం వేస్తుందని, ఎందుకు ఆలస్యం చేసారో అని సందేహం వ్యక్తం చేసారు. ఇక ఏపిలో బీజేపీ కలిసి పని చేయటానికి ఉత్సాహం చూపిస్తున్నా, స్థానిక బీజేపీ నేతలు మాత్రం, చంద్రబాబు మీద కోపంతో ఒప్పుకోవటం లేదని అన్నారు. ఇక తాడిపత్రి విషయంలో, పూర్తి మెజారిటీ ఉందని, చైర్మెన్ పదవి టిడిపినే కైవసం చేసుకుంటుందని, ఆయన గట్టిగా చెప్తున్నారు.

అమరావతి భూముల్లో ఇన్సైడర్ ట్రేడింగ్ అంటూ, చంద్రబాబుకు ఈ రోజు నోటీసులు ఇచ్చిన సంగతి తెలిసిందే. అయితే ఈ కేసు పెట్టింది, వైసీపీ ఎమ్మెల్యే ఆళ్ల రామకృష్ణా రెడ్డి అని తెలుస్తుంది. ఈ కేసు మార్చ్ 12న నమోదు అయినట్టు తెలుస్తుంది. ఇందులో ప్రధానమైన ఆరోపణ ఏమిటి అంటే, అమరావతి రాజధాని విషయం పై, తన అనుచరులకు చంద్రబాబు ముందే ఇచ్చారని, అక్కడ ఉన్న అసైన్డ్ భూములను చంద్రబాబు ముందే తమ అనుచరుల చేత కొనిపించారని, ప్రదమైన అభియోగం. ఈ అభియోగంలో ముఖ్యంగా అసైన్డ్ భూములు కొనుగోలు చేసిన తరువాత, తన అనుచురులకు కట్టబెట్టిన తరువాత, అమరావతిని రాజధానిగా ప్రకటించారని, దీని వల్ల తన అనుచరులకు లబ్ది చేకుర్చారని అభియోగం. నవులూరు గ్రామానికి చెందిన కొంత మంది రైతులు, అక్కడ ఎమ్మెల్యే ఆళ్ల రామకృష్ణా రెడ్డికి ఫిర్యాదు చేయగా, ఆయన ఫిర్యాదుని తీసుకుని సిఐడి నోటీసులు ఇచ్చింది. ఈ ఫిర్యాదు ఆధారంగానే, మాజీ ముఖ్యమంత్రి చంద్రబాబుకు, మాజీ మంత్రి నారాయణకు, ఈ కేసు నమోదు చేసారు. ఈ కేసు నాలుగు రోజులు క్రితం నమోదు అయ్యింది. ఈ కేసు విచారణకు రావాలని, చంద్రబాబుకు నోటీసులు జారీ చేసారు. చంద్రబాబుపై 120బి, 166, 167, 217 సెక్షన్ల కింద కేసులు నమోదు చేసారు.

అయితే దీంతో పాటుగా, ఎస్సీ, ఎస్టీ కేసు కూడా ఇందులో చేర్చటం అందరినీ ఆశ్చర్యానికి గురి చేసింది. ఒక మాజీ ముఖ్యమంత్రి పై ఎస్సీ, ఎస్టీ కేసు నమోదు చేయటం, ఈ దేశంలోనే మొదటి సారి అని తెలుగుదేశం వర్గాలు అంటున్నాయి. అసైన్డ్ భూములు, దళితుల నుంచి లాక్కున్నారు కాబట్టి, ఈ కేసు పెట్టాం అని చెప్తున్నారు. ఈ కేసులో మరో ప్రదమైన అంశం ఏమిటి అంటే, ఇప్పటికే ఇలాంటి కేసు, అంటే, అసైన్డ్ భూములు కొనుగోలు, ఇన్సైడర్ ట్రేడింగ్ కు సంబంధించి నమోదైన కేసు విషయంలో, హైకోర్టు స్పష్టమైన తీర్పు ఇచ్చింది. ఇన్సైడర్ ట్రేడింగ్ అనే పదం, భూములు కొనుగోళ్ళులో లేదని, ఈ పదానికి ఐపీసిలో అర్ధం లేదని కోర్టు ఈ కేసు కొట్టేసింది. దీంతో వ్యూహం మార్చిన ప్రభుత్వం, ఇన్సైడర్ ట్రేడింగ్ కాకుండా, అసైన్డ్ భూములు, దళితులూ అంటూ, మరో కేసుని వ్యూహాత్మికంగా ముందుకు తీసుకుని వచ్చారు. ఈ కేసులోనే చంద్రబాబు విచారణకు హాజరు కావాలని చంద్రబాబుని, నారాయణను కేసులో పెట్టి, చంద్రబాబుని 23వ తేదీన విచారణకు హాజరు కావాలని ఆదేశాలు ఇచ్చారు.

ఆంధ్రప్రదేశ్ రాష్ట్రంలో ఎంపీటీసీ, జెడ్పీటీసి ఎన్నికలకు సంబంధించి, ఈ రోజు హైకోర్టు ఇచ్చిన తీర్పుతో, ఈ రెండు ఎన్నికలకు లైన్ క్లియర్ అయ్యింది. కొద్ది సేపటి క్రితం రాష్ట్ర హైకోర్టు, గతంలో రాష్ట్ర ఎన్నికల కమిషన్ ఇచ్చిన ఉత్తర్వులను పక్కన పెట్టింది. దీంతో పాటుగా, ఎవరు అయితే గతంలో ఏకగ్రీవం అయ్యారో, వారి అందరికీ కూడా, వెంటనే డిక్లరేషన్ ఇవ్వాలని ఆదేశాలు జారీ చేసింది. ఎంపీటీసీ, జెడ్పీటీసి ఎన్నికల్లో, గతంలో సాధారణ స్థాయికి మించి ఏకాగ్రీవాలు అయ్యాయని, రాష్ట్ర ఎన్నికల కమిషన్, కేంద్ర హోం శాఖకు ఫిర్యాదు చేసింది. ఈ నేపధ్యంలోనే, ఈ ఎన్నికల్లో ఏవి అయితే అక్రమాలు జరిగాయో, దాని పై విచారణ జరగాలని, అదే విధంగా గతంలో ఇచ్చిన నోటిఫికేషన్ పైనే ఎన్నికలు జరగాలని కొంత మంది హైకోర్టున ఆశ్రయించగా, హైకోర్టు రీ నోటిఫికేషన్ కు సంబంధించి ఏవైతే ఆదేశాలు ఇచ్చిందో, ఆ ఆదేశాలకు సంబంధించి, రీ నోటిఫికేషన్ ఇచ్చే ముందు, రాష్ట్ర ఎన్నికల సంఘం కొన్ని ఆదేశాలు ఇచ్చింది. అందులో ముఖ్యంగా, గతంలో దౌర్జన్యాలు కారణంగా ఎవరైతే నామినేషన్ ను వేయలేక పోయారో, వారు అప్పట్లో ఎన్నికల కమిషన్ కు కానీ, రిటర్నింగ్ అధికారికి కాని, అక్కడ ఉండే పోలీస్ అధికారికి కానీ ఫిర్యాదు చేసినట్టు అయితే, ఆ ఫిర్యాదు కాపీని జత చేసి, తమకు లేఖ అందిస్తే, వాటిని విచారణ జరిపి, అందులో ప్రాధమిక సాక్ష్యాలు ఉంటే, వారి నామినేషన్ ను పరిశీలిస్తామని అని చెప్పి ఎన్నికల కమిషన్ చెప్పింది. ఈ నేపధ్యంలోనే, వీటిని సవాల్ చేస్తూ, గతంలో ఎవరైతే ఏకగ్రీవం అయ్యారో వారు అంతా, హైకోర్టుని ఆశ్రయించారు.

తాము ఒకసారి ఏకగ్రీవం అయినట్టు చెప్పి, ఆ తరువాత నామినేషన్లు అయిపోయిన తరువాత, ఇప్పుడు కొత్తగా ఫిర్యాదులు స్వీకరించటం ఏమిటి అని, హైకోర్టుని ఆశ్రయించారు. అయితే రాష్ట్ర ఎన్నికల కమిషన్ ఇచ్చిన ఉత్తర్వులు పై, హైకోర్టులో విచారణ జరిగింది. అటు ఎన్నికల కమిషన్, ఇటు ప్రభుత్వం, అదే విధంగా పిటీషనర్ తరుపు న్యాయవాదులతో పాటు పలు రాజకీయ పార్టీలు కూడా ఇందులో ఇంప్లీడ్ అయ్యాయి. ఈ పిటీషన్ లు అన్నీ కలిపి విచారణ చేసిన హైకోర్టు, ఈ విచారణ అనంతరం, ఈ రోజు కొద్ది సేపటి క్రితం తీర్పు చెప్పింది. ఒకసారి నామినేషన్ల ప్రికియ అయిన తరువాత, ఎవరు అయితే ఏకగ్రీవం అయ్యారో, అటువంటి దాంట్లో మళ్ళీ ఎన్నికల కమిషన్ జోక్యం చేసుకో కూడదు అని నిబంధనలు చెప్తున్నాయని కోర్టు పేర్కొంది. ఎవరు అయితే ప్రలోభాలు, దౌర్జన్యాలకు, గురి అయ్యారో, వాళ్లకి న్యాయం చేయటం అనేది మంచిదే అయినా కూడా, ఒకసారి ప్రక్రియ పూర్తయిన తరువాత, ఇలా చేయటం మంచిది కాదని చెప్తూ, ఎన్నికల కమిషన్ ఉత్తర్వులు పక్కన పెట్టటమే కాకుండా, ఏకగ్రీవం అయిన వారికి డిక్లరేషన్ ఇవ్వాలని ఆదేశించింది. ఈ ఆదేశాలు కారణంగా ఎంపీటీసీ, జెడ్పీటీసి ప్రక్రియ గతంలో ఎక్కడ అయితే ఆగిందో, మళ్ళీ అక్కడ నుంచి తిరిగి నిర్వహించే అవకాసం ఉంది.