news

ఆంధ్రప్రదేశ్ మాజీ ముఖ్యమంత్రి చంద్రబాబుకు సిఐడి నోటీసులు ఇచ్చిన ఘటన పై, ఒక పక్క రాష్ట్ర వ్యాప్తంగా చర్చ జరుగుతుంది. ఈ నోటీసులు ఇచ్చిన తీరు పై అందరూ ఆశ్చర్యం వ్యక్తం చేస్తున్నారు. రాజకీయ కక్ష సాధింపు తప్ప, ఈ కేసులో పసలేదని వాదిస్తున్నారు. ఎవరో తనకు ఫిర్యాదు చేసారని, ఆ ఎవరో పేర్లు చెప్పకుండా, ఎవరు మోసం చేసారో చెప్పకుండా, జరిగిన స్కాం ఏంటో చెప్పకుండా, ఎక్కడ ఏ ఊరిలో, ఏ భూమిలో జరిగిందో చెప్పకుండా, వైసీపీ ఎమ్మెల్యే ఇచ్చిన ఫిర్యాదుతో, ఏకంగా చంద్రబాబు స్థాయి వ్యక్తికి నోటీసులు ఇవ్వటం పై, అందరూ ఆశ్చర్యం వ్యక్తం చేస్తున్నారు. అయితే దీని పై చంద్రబాబు కోర్టుకు వెళ్లనున్నారు. ఇది ఇలా ఉంటే ఒక పక్క చంద్రబాబు పై ఇలా కక్ష సాధింపు చర్యలు చేస్తూనే, ఇప్పుడు ఆయన కుటుంబం పై కూడా ఒత్తిడి తెచ్చే పనులు చేస్తున్నారని, తెలుగుదేశం నేతలు వాపోతున్నారు. తాజాగా చంద్రబాబు సోదరి, హైమావతి ఇంట్లో, చంద్రగిరి పోలీసులు వెళ్లి హల్ చల్ చేయటం, ఇప్పుడు చర్చనీయంసంగా మారింది. చిత్తూరు జిల్లాలోని చంద్రగిరి మండలం కందులవారిపల్లెలో, చంద్రబాబు సోదరి హైమావతి ఉంటున్నారు. అయితే నిన్న ఆమె ఇంటికి, మేము పోలీసులం అని చెప్పి, కొంత మంది ఇంట్లోకి చొరబడటంతో, ఒక్కసారిగా కలకలం రేగింది.

ఎలాంటి అనుమతి లేకుండా, వాచ్ మెన్ రవి వారిని ఆపుతున్నా కూడా, మేము పోలీసులం అని చెప్పి ఇంట్లోకి వెళ్లి హడావిడి చేసారని, ఇంటి లోపల సిసిటీవీ కెమెరాలు ఉండటం, అవి చూసి, వెంటనే బయటకు వచ్చేసారని చెప్పారు. బయటకు వచ్చిన తరువాత, ఇంటి చుట్టూ ఉన్న పరిసరాలు మొత్తం ఫోటోలు తీసుకున్నారని వాచ్ మెన్ తెలిపారు. అయితే ఈ విషయం పై వాచ్ మెన్ రవి చంద్రగిరి పోలీసులకు ఫిర్యాదు చేసారు. నిన్న కొంత మంది పోలీసులు అని చెప్పి ఇంటి లోపలకి వచ్చారని, దానికి ఆధారంగా సిసిటీవీ ఫూటేజ్ కూడా పోలీసులకు సమర్పించి, అసలు వచ్చిన వారు ఎవరు, ఎందుకు వచ్చారో విచారణ చేయాలని చంద్రగిరి పోలీసులకు ఫిర్యాదు చేసారు. అయితే దీని పై స్పందించిన పోలీసులు, నారావారిపల్లె నుంచి, సుచరిత అనే ఆమె ఇంట్లోకి వచ్చిన కొంత మంది గొడవ చేస్తున్నారని ఫిర్యాదు వచ్చిందని, అయితే కందులవారిపల్లెలో ఉన్న చంద్రబాబు సోదరి హైమావతి కుమార్తె పేరు కూడా, సుచరిత కావటంతో, పోలీసులు కన్ఫ్యూజ్ అయ్యారని, అంతే తప్ప ఇందులో ఏమి లేదని తెలిపారు. అయితే దీని పై టిడిపి శ్రేణులు మాత్రం భగ్గుమంటున్నాయి. ఇందులో ఏదో కుట్ర దాగి ఉందని అంటున్నారు.

కొద్ది సేపటి క్రితం ప్రివేలేజ్ కమిటీ సమావేశం ముగిసింది. ప్రివేలేజ్ కమిటీ చైర్మెన్ కాకాని గోవర్ధన్ రెడ్డి, సభ్యులు మల్లాది విష్ణు, శిల్పా చక్రపాణి రెడ్డి, తదితర సభ్యులు జూమ్ లో సమవేశం అయ్యారు. అయితే ఈ సమావేశంలో ప్రధానంగా మంత్రి పెద్దిరెడ్డి రామచంద్రా రెడ్డి ఇచ్చిన ప్రివేలేజ్ నోటీస్ పైన ఈ సమావేశంలో చర్చించారు. చర్చించిన తరువాత, ఈ నోటీస్ పై విచారణ చేపట్టాల్సిందే అనే అభిప్రాయానికి వచ్చారు. దీని పై ఫర్ధర్ ప్రొసీడింగ్స్ ఏమి ఉంటాయో, అవి ఫాలో అవ్వాలని నిర్ణయం తీసుకున్నారు. అవసరం అయితే రాష్ట్ర ఎన్నికల కమీషనర్ నిమ్మగడ్డ రమేష్ కుమార్ ని విచారణకు పిలవాలి అనే దాని పై కూడా చర్చ జరిగింది. అయితే ఈ ప్రొసీడింగ్స్ పై ఏ విధంగా ముందుకు వెళ్ళాలి అనే దాని పైన, సాంకేతిక అంశాలు అన్నీ పరిశీలించి, దానికి అనుగుణంగా ముందుకు వెళ్ళాలని నిర్ణయం తీసుకున్నారు. రాష్ట్ర ఎన్నికల కమీషనర్ నిమ్మగడ్డ, తన ప్రతిష్టకు భంగం కలిగించారని, రెండో సారి కూడా పెద్దిరెడ్డి ఫిర్యాదు చేసారు. మొదట మంత్రులు బొత్సా, పెద్దిరెడ్డి గవర్నర్ కు రాసిన లేఖను బయటకు విడుదల చేసి, తమ ప్రతిష్టకు భంగం కలిగించారని, ఫిర్యాదు చేసారు. అయితే తరువాత, మళ్ళీ పెద్దిరెడ్డి ఇంకో ఫిర్యాదు చేసారు. ఈ ఫిర్యాదుని కూడా విచారించి, పరిగణలోకి తీసుకుంది ప్రివేలేజ్ కమిటీ.

దీని పైన వెంటనే అవసరమైన చర్యలు తీసుకోవాలని, నిర్ణయం తేసుకున్నారు. అవసరం అయితే, నిమ్మగడ్డకు నోటీసులు ఇవ్వాలని చర్చ జరిగింది. అయితే అందుతున్న సమాచారం ప్రకారం, విచారణకు అందుబాటులో ఉండాలి అంటూ, నిమ్మగడ్డకు లేఖ రాయాలని, అసెంబ్లీ సెక్రటరీని ఆదేశించినట్టు తెలుస్తుంది. రేపు ఉదయమే, నిమ్మగడ్డకు ఈ లేఖ పంపే అవకాశాలు ఉన్నాయని చెప్తున్నారు. అయితే ఈ సమావేశాన్ని అత్యవసరంగా నిర్వహించటం, అదే విధంగా వెంటనే చేపట్టాలని , జూమ్ లో ఈ సమావేశం నిర్వహించటం ఆసక్తి రేపుతుంది. గతంలో ఇదే ఫిర్యాదు పై, ఒకసారి సమావేశం అయిన కమిటీ, ఏ నిర్ణయం తీసుకోకుండానే అప్పట్లో వాయిదా వేసింది. అయితే ఈ రోజు ఆరు గంటలకు సమావేశం ఏర్పాటు చేస్తున్నట్టు సమాచారం ఇవ్వటంతో, అందరూ ఈ సమావేశానికి హాజరు అయ్యారు. పెద్దిరెడ్డి , రాష్ట్ర ఎన్నికల కమిషన్ ను దుషిస్తూ మీడియా సమావేశం పెట్టటం, దీని పై నిమ్మగడ్డ, ఈ విషయం పై గవర్నర్ కు లేఖ రాస్తూ, ఆ లేఖ మీడియాకు విడుదల చేయటంతో, తమ హక్కులకు భంగం కలిగింది అంటూ, పెద్దిరెడ్డి, బొత్సా ఫిర్యాదు చేసిన సంగతి తెలిసిందే.

రాజధాని అమరావతిలోని అసైన్డ్ భూములు విషయంలో అవకతవకలు జరిగాయి అంటూ, మాజీ ముఖ్యమంత్రి చంద్రబాబు నాయుడుకి, మాజీ మంత్రి నారాయణకు, సిఐడి నోటీసులు ఇచ్చిన సంగతి తెలిసిందే. అయితే ఈ నోటీసులుకు సంబంధించి, మంగళగిరి వైసీపీ ఎమ్మెల్యే ఆళ్ళ రామకృష్ణా రెడ్డి ఫిర్యాదు మేరకు, ఈ కేసు నమోదు అయినట్టు, దాని పై ఎఫ్ఐఆర్ నమోదు చేసి, దానికి వివరణ ఇవ్వాలంటూ, చంద్రబాబుకు నోటీసులు ఇచ్చారు. అయితే ఈ ఫిర్యాదులు అనేక లోటు పాట్లు ఉన్నాయి అంటూ, నిన్నటి నుంచి మీడియాలో కధనాలు వస్తున్నాయి. అలాగే న్యాయ నిపుణులు కూడా ఇదేమి కేసు, ఇవేమీ సెక్షన్లు, కోర్టులో చీవాట్లు తప్పవు అంటూ విశ్లేషించారు. తెలుగుదేశం పార్టీ కూడా ఈ లోటు పాట్లు విషయం పై కోర్టుకు వెళ్ళటానికి సిద్ధం అయ్యింది. ముఖ్యంగా ఆ ఎఫ్ఐఆర్ లో, ఎమ్మెల్యే ఆర్కే కు, కొంత మంది రైతులు, కొంత మంది మధ్యవర్తలు లబ్ది పొందారని, కొంత భూమి పై ఫిర్యాదు చేసినట్టు, దీంతో ఎమ్మెల్యే సిఐడికి ఫిర్యాదు చేసినట్టు, దాని పై సిఐడి ప్రాధమిక దర్యాప్తు చేసి, కేసు నమోదు చేసినట్టు ఉంది. అయితే అసలు ఎవరా కొంత మంది రైతులు, వారి పేర్లు ఏమిటి, వారు ఊరు ఏమిటి ? నష్టపోయిన రైతులు పేర్లు ఏమిటి ? ఏ గ్రామంలో భూమి ? మధ్యవర్తలు ఎవరు ? ఇలా ఏమి చెప్పకుండా, ఒక మాజీ ముఖ్యమంత్రి పై కేసు పెట్టటం పై ఆశ్చర్యం వ్యక్తం చేస్తున్నారు.

అసలు సిఐడి చేసిన ప్రాధమిక విచారణ ఏమిటి ? ఏ ప్రాతిపదికిన చేసారు అనే దాని పై కూడా చర్చ జరుగుతుంది. రేపు చంద్రబాబు కోర్టుకు వెళ్తే, ఈ ప్రశ్నలు అన్నిటికీ సమాధానం చెప్పాల్సి ఉంటుంది. అందుకే, సిఐడి దిద్దుబాటు చర్యలు ప్రారంభించింది. ఎమ్మెల్యే ఆర్కే కు సిఐడి నోటీసులు ఇచ్చింది. రేపు 11 గంటలకు విజయవాడలో ఉన్న సిఐడి కార్యాలయానికి రావాలని, మీ దగ్గర ఉన్న ఆధారాలు, అన్ని వివరాలు తమకు ఇవ్వాలని నోటీసులు ఇచ్చారు. 160 సిఆర్పీసి కింద నోటీసులు ఇచ్చారు. చంద్రబాబు, నారాయణ, ఇతరులు పై చేసిన ఆరోపణల విషయంలో ఆధారాలు ఇవ్వాలని కోరారు. అయితే ఇక్కడే తెలుగుదేశం ఆశ్చర్యం వ్యక్తం చేస్తుంది. ఇప్పటి వరకు, ఎలాంటి ఆధారలు ఆళ్ళ నుంచి తీసుకోకుండా, కేవలం ఫిర్యాదు ఇవ్వగానే, మాజీ ముఖ్యమంత్రి చంద్రబాబు పై ఎలా కేసు పెట్టి, ఎలా నోటీసులు ఇస్తారని ప్రశ్నిస్తున్నారు. అసలు ఎలాంటి విచారణ సిఐడి చేసిందని ? ఆళ్ళ నుంచి ఆధారాలు తీసుకోకుండా కేసు పెట్టి, నోటీసులు ఇచ్చి, ఇప్పుడు ఆళ్ళని ఆధారాలు ఇవ్వమని అడగటం ఏమిటి అంటూ, తెలుగుదేశం ఆశ్చర్యం వ్యక్తం చేస్తుంది. దీని పై కోర్టులోనే తేల్చుకుంటాం అని చెప్తున్నారు.