news

ఆంధ్రప్రదేశ్ రాష్ట్రం మొత్తం ఎదురు చూస్తున్న సుప్రీం కోర్టు ఆదేశాలు వచ్చేసాయి. స్థానిక ఎన్నికలు జరపాలి అంటూ రాష్ట్ర ఎన్నికల కమిషన్ తీసుకున్న నిర్ణయం పై, హైకోర్టు స్పందిస్తూ, రాష్ట్ర ఎన్నికల కమిషన్ కు అనుకూలంగా తీర్పు ఇచ్చింది. అయితే దీని పై రాష్ట్ర ప్రభుత్వం సుప్రీం కోర్టుకు వెళ్ళిన సంగతి తెలిసిందే. ఈ పిటీషన్ ఈ రోజు సుప్రీం కోర్టు ముందుకు విచారణకు వచ్చింది. ప్రభుత్వం వేసిన పిటీషన్ తో పాటుగా, ఉద్యోగులు వేసిన పిటీషన్ ని కూడా సుప్రీం కోర్టు ఈ రోజు విచారణకు తీసుకుంది. జస్టిస్ సంజయ్ కిషన్ కౌల్ నేతృత్వంలోని ధర్మాసనం ఈ రోజు ఈ పిటీషన్ ను విచారణకు స్వీకరించింది. ఈ పిటీషన్ ను కొట్టేస్తూ, సుప్రీం కోర్టు నిర్ణయం తీసుకుంది. ఎన్నికల కమీషనర్ నిర్ణయంలో, తాము జోక్యం చేసుకోమని కోర్టు చెప్పింది. ఈ సందర్భంగా ఉద్యోగులు సంఘం నేతల పై ఆగ్రహం వ్యక్తం చేసింది. మీపైన ఎలక్షన్ కమిషన్ ఎందుకు చర్యలు తీసుకోకూడదు అని ఆగ్రహం వ్యక్తం చేసింది. ఈ పిటీషన్ ను చూస్తుంటే, ఎన్నికల కమిషన్ పై మీ వైఖరి ఏమిటో అర్ధం అవుతుందని అన్నారు. అలాగే ఉద్యోగ సంఘాలు పిటీషన్ పైన కూడా ఆగహ్రం వ్యక్తం చేసింది. మీ ఉద్దేశాలు అర్ధం అవుతున్నాయని, మీకు ఇందులో సంబంధం ఏమిటి, అంటూ తీవ్ర ఆగ్రహం వ్యక్తం చేసింది.

ఇక స్థానిక సంస్థల ఎన్నికల పై గత పది రోజులుగా హైడ్రామా నడుస్తుంది. ముందుగా హైకోర్టు ఇచ్చిన ఆదేశాలు ప్రకారం, ప్రభుత్వం నుంచి ముగ్గురు సీనియర్ అధికారులు, ఎన్నికల కమీషనర్ ని కలవటం, అదే రోజు ఆయన [ప్రొసీడింగ్స్ ఇవ్వటం చకచకా జరిగిపోయాయి. అయితే ప్రభుత్వం వెంటనే హౌస్ మోషన్ పిటీషన్ వేసింది. హైకోర్టుకు సంక్రాంతి సెలవులు కావటంతో, ఈ పిటీషన్ ని సింగల్ బెంచ్ విచారణ చేసి, ప్రభుత్వానికి అనుకూలంగా తీర్పు ఇచ్చింది. తరువాత రాష్ట్ర ఎన్నికల కమిషన్ డివిజన్ బెంచ్ ముందు ఈ పిటీషన్ ను విచారణ చేసింది. ఎన్నికలు జరుపుకోవచ్చు అంటూ 30 పేజీల తీర్పు ఇచ్చింది. దీని పై ప్రభుత్వం సుప్రీం కోర్టులో హౌస్ మోషన్ పిటీషన్ వేయగా, సుప్రీం కోర్టు రెగ్యులర్ పిటీషన్ గానే తీసుకుంది. ఈ మధ్యలోనే ఎలక్షన్ కమిషన్ నోటిఫికేషన్ కూడా ఇచ్చింది. అయితే ప్రభుత్వం, ఉద్యోగులు, హైకోర్టు ఇచ్చిన తీర్పు కానీ, ఎన్నికల కమీషనర్ నిర్ణయాన్ని కూడా లెక్క చేయటం లేదు. ఈ రోజు నుంచి నామినేషన్ లు తీసుకోవాల్సి ఉండగా, అది కూడా మొదలు కాలేదు. ఇక ఇప్పుడు సుప్రీం కోర్టు చెప్పటంతో, ఇప్పటికైనా ప్రభుత్వం, ఉద్యోగులు స్పందిస్తారో లేక రాజ్యాంగ సంక్షోభం వైపు రాష్ట్రం వెళ్తుందో చూడాలి.

ప్రభుత్వం మొండి వైఖరికి పోకుండా, ప్రజాస్వామ్మాన్ని గౌరవించాల్సిన బాధ్యత ప్రభుత్వానిదని మాజీ మంత్రి యనమల రామకృష్ణుడు పేర్కొన్నారు. సోమవారం జరిగిన విలేకరుల సమావేశంలో ఆయన మాట్లాడుతూ... ముఖ్యమంత్రి తన పంతం వీడి, ఎన్నికలకు సహకరించాల్సిన అవసరముందన్నారు. ప్రజలు తనకు నచ్చిన నాయకుడిని ఎన్నుకోవడంలో ప్రభుత్వ ఉద్యోగులు, అధికారులు సహకరించాలి. వారు అవలంబిస్తున్న విధానం సరికాదు. రాజ్యాంగాన్ని రూరల్ లాని గౌరవించాలి. స్థానిక సంస్థల ఎన్నికలను, ఎలక్షన్ కమిషన్ ఇచ్చిన నోటిఫికేషన్ ను తిరస్కరించడం భావ్యంకాదు. ఎన్నికల్లో బాధ్యతలు చేపట్టాల్సిన అవసరం లేదని సూచించడం జగన్ తన గొయ్యి తానే తీసుకున్నట్లుగా ఉంది. జగన్ రాజ్యాంగ, రాజకీయ సంక్షోభాన్ని సృష్టించుకుంటున్నారు. రాజ్యాంగ క్రైసిస్ లో చిక్కుకోవడమే కాకుండా గతంలో జగన్ ఇబ్బందులు ఎదుర్కొనక తప్పదు. ఎన్నికల నోటిఫికేషన్ ఇచ్చిన తరువాత మేము ఎన్నికలలో పాల్గొనము అని మంత్రులు, ముఖ్యమంత్రులు, ఉద్యోగులు చెప్పిన దాఖలాలు ఎక్కడా లేవు. దురదృష్టవశాత్తు మన రాష్ట్రంలోనే ఇలా జరుగుతోంది. జగన్ రాజ్యాంగ విలువల్ని కాపాడలేకపోయారు. రాజ్యాంగ విలువల్ని కాపాడలేని ప్రభుత్వం తగిన మూల్యం చెల్లించుకోక తప్పదు. జగన్ తగిన మూల్యం చెల్లిచుకునే సమయం ఆసన్నమైంది. ఇప్పటికైనా జగన్ మేల్కొని హైకోర్టు ఆర్డర్ ను తూచా తప్పక పాటించాలి. సుప్రీం కోర్టు ఆర్డర్ ను పాటిస్తామన్నట్లుగానే హైకోర్టు ఆర్డర్ ను పాటించాలి. ఎన్నికలకు సహకరించాల్సిన అవసరముంది.

రాజకీయ నాయకులు, రాజకీయ పార్టీలు ప్రభుత్వంలోకి వస్తుంటాయి, పోతుంటాయి. బ్యూరోక్రైయిట్స్, ఉద్యోగులు రాజ్యాంగానికి లోబడి పని చేయాల్సి ఉంటుంది. రాజ్యాంగాన్ని ధిక్కరించిన వారి పరిస్థితి ప్రభుత్వం పోయాక అధ్వాన్నంగా మారుతుందని గుర్తుంచుకోవాలి. రాజ్యాంగ విలువల్ని కాపాడాల్సిన బాధ్యత ప్రభుత్వ ఉద్యోగులపై ఉంటుంది. ప్రభుత్వాలు శాశ్వతం కాదు. ప్రభుత్వాలు వచ్చినప్పుడు, పోయినప్పుడు పరిస్థితులు ఎలా ఉంటాయో ఆలోచించుకోవాలి. ప్రభుత్వ ఉద్యోగులు, బ్యూరోక్రయిట్స్ వారు సొంత నిర్ణయాలు తీసుకోవాలిగానీ ప్రభుత్వం చెప్పినట్లుగా నడుచుకోకూడదు. ఎలక్షన్ కమిషన్ కు విలువివ్వాలి. ఎస్ సి, ఎస్టీ, బీసీలను కూడా పరిపాలనలో భాగస్వామ్యం అయ్యేలా చూడాలని మహాత్మాగాంధి, డాక్టర్ బాబాసాహెబ్ అంబేడ్కర్ లు తెలిపారు. వారు పంచాయతీరాజ్ నుంచి పార్లమెంట్ వరకు వెళ్లడానికి అవకాశాలుంటాయి. ఆ అవకాశాల్నికోల్పోయేలా చేయొద్దు. 74, 75 అమెట్మెంట్స్ పార్లమెంటులో చట్టం చేస్తే, పంచాయతీరాజ్ యాక్టు అసెంబ్లీ చేసింది. అసెంబ్లీ, పార్లమెంటు చేసిన చట్టాలను గౌరవించాలి గానీ అవమానించకూడదు. జగన్ ఆధీనంలో ప్రభుత్వ అధికారులు, ఉద్యోగులు పనిచేయడం బాధాకరం. ప్రభుత్వం ఎన్నికల నోటిఫికేషన్ ప్రక్రియను పరిశీలించాల్సిన అవసరముంది. నామినేషన్ల పర్వం ప్రారంభమవుతోంది కాబట్టి వెంటనే గవర్నర్ ప్రభుత్వానికి ఆదేశాలివ్వాలని యనమల రామకృష్ణుడు సూచించారు.

ఈ రోజు మరోసారి డీజీపీ గౌతం సవాంగ్ కు హైకోర్టులో ఎదురు దెబ్బ తగిలింది. ఇప్పటికీ ఆయన నాలుగు అయుదు సార్లు హైకోర్టు ముందు హాజరు కావాలని హైకోర్టు ఆదేశించగా, మూడు సార్లు హైకోర్టు ముందుకు వచ్చారు. ఈ రోజు మరోసారి డీజీపీని హైకోర్టు ముందుకు రావాల్సిందిగా కోర్టు ఆదేశాలు ఇచ్చింది. కోర్టు దిక్కరణ పిటీషన్ పైన విచారణ చేసిన ధర్మాసనం, ఈ నెల 27న డీజీపీ గౌతం సవాంగ్ తో పాటు, హోం సెక్రటరీ కూడా, తమ ముందు హాజరు కావాలని ఆదేశాలు జారీ చేసింది. ఈ కేసు పూర్వాపరాలు చూస్తే, రామారావు అనే పోలీసు అధికారి ప్రమోషన్ విషయంలో, గతంలో హైకోర్టు ఇచ్చిన ఆదేశాలు అధికారులు పాటించలేదని, దాని పై కోర్టు ధిక్కరణ పిటీషన్ దాఖలు చేసారు. ఆ పిటీషన్ పైన గతంలో విచారణ జరిగిన సమయంలో డీజీపీ హాజరు కావాలని, ఈ రోజు హాజారు కావాలని గతంలోనే ధర్మాసనం ఆదేశాలు జారీ చేసింది. అయితే ఈ రోజు డీజీపీ తరుపున అఫిడవిట్ దాఖలు చేసారు. అందులో, ఎన్నికల విధుల్లో హాజరుకాలేక పోతున్నాం అని, అఫిడవిట్ దాఖలు చేయగా, దాని పై ధర్మాసనం ప్రశ్నించింది. ఒక పక్క ప్రభుత్వం సుప్రీం కోర్టులో ఆదేశాలు వచ్చే వరకు, ఎన్నికలు వద్దు అంటుంటే, మీరు ఇలా అఫిడవిట్ ఎలా దాఖలు చేసారు అనే అభిప్రాయం వ్యక్తం చేసింది. దీంతో ఈ నెల 27న మాత్రం కచ్చితంగా హాజరు కావాలని ఆదేశాలు జారీ చేసింది.